Madcos 14 - El Nuevo Testamento en matsés

3. Esus uënës uacsho chococac uincuenaid chiaid ( 14.1—16.20 ) Esus bedshun uënës uate bunec chuinanaid

¹ Daëdec ushshun cun tsusedpabon: Ma cun mado uënësmenquio icnu, queshun obeca caniactsëc cuessunneshun piampidbëta pan bidiscabicquid buanampid tantiaquin obeca caniactsëc pec tabadte yampanëdash. Adnubien Nuquin Papa ismequin nëish iua cuessunneshun pichicaquidon chuiquidobëd Moisesën chiampid tantiamequido: ¿Mitsipaden utsibo ismenquio icquin Esus bedmeshun uënës uametiad? quequin tantiec tabadcuededpanëdash.

² Aden tantiaquimbi: Nuquin matses obeca pec tabadnuc bedmenquien ictiad. Esus bëdambocquidi bedec, queshun obeca pec chochoaidon nuqui cuesnushe, quepanëdash isadaidbon chuiquido.

Chidon bëdambo nuadquidën Esus machiuinaid

³ Adnubien Esus shubu daëdpactsëcquid Betania caid yacno choash Simonën shubun puduedshun pec tabadpanëdash. Simon aton dada daush daushpambo yec daicsaidquio icsho bëdanmiaid nepanëdash. Aden pec tabadshobien chido choquin ambi piucquid dadpenquio menequin bedaid sedunte postichoquidën icquid danoshquete bëdambo nuadquid dëdquëntanquin Esus machiuimpanëdash.

⁴ Aden machiuinsho isash utsibo nëishshun chido naden chushcapanëdash: ¿Atotsi quequin machiuinquin danoshquete mëyanquin nai?

⁵ Aid danoshquete menequin piucquid dadpenquio 300tedec ushec chonoadacsho piucquid meniaidtedquiobi mimbi bedtsenoc. Adoshon piucquid nibëdquido aid piucquid menebantiadquidi mimbi naic, quequin chido chushcabededpanëdash.

⁶ Aden chushcasho tantiashumbien Esusën: Ubi tantiaquin bëdambuen naique. Aden chushcainda.

⁷ Piucquid nibëdquido dadpen mibëd tabadec nibëdenquio iquendac. Aidi menenu, queshun mimbi menepec. Ubien mibëd icbuedi nëbi nibëdquio yanendac.

⁸ Nëid chidon ubi uënësacsho chococate tantiaquin machiuinoshibique. Chushcainda.

⁹ Abimbo chiembique. Tantia. Nidaid utsi utsiec yacno Nuquin Papan Chiaid Bëda chuibenniacnoshombi nëid chidon ubi machiuinquin nabued tantiaquin chuibanendac. Adoac aidën naid tantiendac, quepanëdash Esus abëd icquido chiec.

Esus bedmembi, quequin Udasën chiaid

¹⁰ Adnubien Udas Iscadiote abëd icquid abentsëc: Esus bedmenu, quequin tantianec nëish iua cuessunneshun pichicaquidon chuiquido yacno isec nidpanëdash.

¹¹ Adec nidshun: Esus mibi bedmembi, quequin chuituidac aido cuishonquecuededpanëdash. Adshumbic Udas chuiquin: Ubi Esus bedmesho issun mibi piucquid menembi, cabededpanëdash. Adsho tantianec nidquimbi: ¿Mitsishunquiembi utsibo ismenquio icquin Esus bedmepeba? quequin tantiapanëdash Udasën.

Nëish iua obeca cuessunniaid abëd icquidobëtan piaid

¹² Adnubien abëd icquidon: Equipito yacnouësh puduanec nidnun nëish iua obeca caniactsëc cuessunniampid peshun pan bidiscabicquid buanampid 6tedec ushquin tantiaquin tauaid uëshë nëbi nec, queshun: Nëish iua obeca caniactsëc penun ¿mitsishunquiembi mibi shuishumpe? quequin Esus chuipanëdash.

¹³ Adsho tantiash abëd icquid daëd chiec Esus nadpanëdash: Edusaden yacno nidshun dadan tëchun cushtoaid acte buansho mimbi istuidendac. Aden istuidshun aid tsibananta.

¹⁴ Adash shubun puduedshun shubu icbo naden chuita: Ubëd icquidobëtan obeca caniactsëc pepampid tantiaquin obeca pec tabadte ¿mitsicquid quënë icpec? quiosh Nuquin Icbo, cata, capanëdash.

¹⁵ Adoac aidën abuc dectatomeshun quënë dapa bëdambuen nacnenaid mibi ismendac. Adoac ashunquio penun nacnenta, quepanëdash Esus abëd icquid daëd chiec.

¹⁶ Aden chiac Edusaden yacno nidquimbi Esusën chuibocpadombuen acte buansho isash aid tsibananec shubun puduedshun nëish iua obeca caniactsëc shuishun penun nacnempanëdash.

¹⁷ Adnubien inchëshbudtsëqui Esus abëd icquido utsibobëd chochopanëdash.

¹⁸ Adec chochoash pec tabadequien: Abimbo chiembique. Tantia. Ubëtan pequid abentsëcshun ubi chieshënquin ubi chieshënquido ubi bedmendac, quepanëdash Esus.

¹⁹ Adsho tantiash uënësquio yanquimbi abentsëcshun abentsëcshunquien abëd icquidon naden Esus chuipanëdash: ¿Ubida cai Icbo? cabededpanëdash.

²⁰ Adoaquien Esus: Ubëd icquid abentsëcshun nëbimbobi ubëtambi pan cuëshën ënë punshun pequidën ubi chieshënquin isadaidbon chuiquido ubi bedmendac.

²¹ Nuquin Papan ubi bedmete chuiquin dada uamiampicpadombuen Matsesën Tishaid icsho ubi bedmendac. Aden ubi chieshënquin bedmequid cumapenen cuidtequidquio nendac. Aidi aton titan tishenquio icpatecnëdan, quepanëdash Esus.

²² Aden pequimbi Esusën pan sananquin: Mimbi uaid nëid pete bëdambo iquec, Papa, quequin Nuquin Papa chuitanquin cuëshcuëshshun menequin abëd icquido naden chuipanëdash: Ubi uënës uate tantiaquin nëid cun dadabimbuecquid neque. Pe, cac pebededpanëdash.

²³ Adshumbic Esusën uba chinaid cushtoaid dëshote sananquin: Mimbi uaid nëid actequid bëdambo iquec, Papa, quequin Nuquin Papa chuitanquin: Nëid mibitedishun acbeded, quequin meniac aniactse aniactsen acbededpanëdash.

²⁴ Aid actequid acshobien: Nëid cun intacbimbuecquid nec. Aid acquin: Ubi cuidmenquio icnuen Nuquin Papan abided cuidmiac aton intac siquebudpambuec uënëspanëdash. Adec uënësaid tantiaquid icsho Nuquin Papan ubi cuidenquio iquec, quequin nëid acquin ubi tantiata.

²⁵ Abimbo chiembique. Tantia. Uba chinaid nidaidënshun padpiden aquenquio icquin Nuquin Papan namiacnoshon actequid chuca aquendambi, quepanëdash Esus.

Esus umbi isacmaid nec, quequin Petedon chuite chiaid

²⁶ Adashic Nuquin Papan naid chiec cuëdënte cuëdënanec macuësh Odibos caid yacno Esus abëd icquidobëd nidannepanëdash.

²⁷ Ambo nidanniash tabadquin Esusën naden chuipanëdash: Nëid inchëshëmbi Nuquin Papan chiampicpadec ubi tantienquio icquin nianec mibitedi niquendac. Nuquin Papan Chiampid nad iquec: Icbo uënës uasho istanec ambi iuaid obeca niquendac, quequin chuipampic, quequin chuipanëdash.

²⁸ Uënësash uincuenash nidaid cuëshë Cadidea yacno ubia nidendabi. Mibitsen ambo nidanneta, capanëdash Esusën abëd icquido chuiquin.

²⁹ Adoaquien Petedo: Mibi cuesnuec chochosho isash utsibo dacuëdec niquenubi umbien mibi nianenquio iquendac, quepanëdash.

³⁰ Adshobien Esusën. Tantia. Mibi chuinu. Nëid inchëshëmbi cachina daëdec cuëdabicnuc: Umbi isacmaidquio aidi nec, quequin mimbi 3teden chiendac, capanëdash.

³¹ Adsho tantiash: Pada. Adtiapimbueni iquec. Chieshëmënquidon: Esusbëd icquid mibi neque. Cuessunnenu, caqui: Umbi isacmaid neque. Padi, quenquio iquendabi. Mibëdquiobi uënëstsiandabi, quepanëdash Petedo. Adecbidi Esusbëd icquido utsibo onqueuapanëdash.

Quetsemani caid yacnoshon Esusën Nuquin Papa chiaid

³² Adanec abëd icquidobëd nidequi cute dadpen nitsinaid Quetsemani caid yacno nidpanëdash. Auëshquio Esus: Nëmbobi tabadta. Udictsëc nidshun Nuquin Papa chuitannu, quepanëdash.

³³ Aden chianec nidquin Petedo, Santiaco, Uan quequin buanec bëyucanec nidequi Esus natiaquiec uënësquioshë yampanëdash.

³⁴ Adshumbic: Ubi uënësquio icaidëmbi uënëstiadquio iquec. Udictsëc nidebique. Nëmbo tabadec ushenquio icta, quepanëdash Esus ambi 3ted buanaid chiec.

³⁵ Aden chianec udictsëc nidash Nuquin Papa chiec dannëshën sebudec nidaidën bëccuësquebudash onquec: ¿Ada ubi natiamequin mëyanmenquio ictsia? Papa, quepanëdash Esus.

³⁶ Aden chiashic: Papa, Papa, mimbi natiapimbo ictequid nibëdec. Adquid icquin ubi bunacpaden ubi mëyante nibëdmiac bëdambo ictsiash. Ubi bunacpadombuen nainquiocquin mimbi tantiacpadombuen nameta, Papa, quepanëdash Esus.

³⁷ Aden chuitanec choquimbi abëd nidbued 3ted icquid ushsho istuidpanëdash. Adsho issun Petedo chuiquin: Simon ¿ushecta ne? ¿Iuec iuecpactsec ushenquio icquin istiapimboda ique?

³⁸ Ushenquio icquin Nuquin Papa chuita. Nuquin Papan Chiaid niacmequid Mayan Icsa Satanasën icsambuen namequin tannu, cac: Chieshtoenquio iquebi, quebuedi min dada uidëmpentsëcquio icsho badedquio mibi chieshtomendac, quepanëdash Esus.

³⁹ Aden chianec ambi Nuquin Papa chuibocno padpidec niduashun ambi chuibocpadembidi Nuquin Papa Esusën chuiuapanëdash.

⁴⁰ Adtanec padpidec chouaquin isaquien Petedo chedo ushuaic ushcas mëmuntiapimbo yec. Adsho tinac: Ushcasquin chuitiapimbo yec otacquio tabadpanëdash.

⁴¹ Adnubien padpidec niduashun Nuquin Papa chuiuatanec chouaic: ¿Ushcas mëmuntiapimbo yecta ushec mibitedi samëdec ne? Baded isucun. Nëbimbobi Matsesën Tishaid icshobi icsambuen naquido ubi bedmeque.

⁴² Baded nidnu. Isucun. Ubi chieshënquin bedmequid choeque. Is, quepanëdash Esus.

Abi chieshënquidon Esus bedaid

⁴³ Aden chuinubien Esusbëd 12ted icbued Udasbëd matses dadpen chochopanëdash. Aido utsi utsiec chështe sanambededtsëquiec chonobi utsibo cueste sanambededtsëcquiec chochopanëdash. Nëish iua pichicaquidon chuiquido yec Moisesën chiampid tantiamequido yec cun matsesën chuiquido tsësiobo yec quequidon: Bedtan, cac chochopanëdash.

⁴⁴ Esus bednuequido tantiamequin chuiquin Udasën: Umbi tanchoccaid mimbi bedtequid nendac. Aidquiobi bedshun buanta. Cuennushe, queshun bëdambuen mëtaneshun buanta, quequin chuipanëdash.

⁴⁵ Aden chiash aidobëd choquimbi: Icbo, quetanquin Udasën Esus tanchoccatuidpanëdash.

⁴⁶ Aden Udasën tanchoccasho istanquin chochoquidon Esus bedpanëdash.

⁴⁷ Adnubien abëd icquid abentsëcshun abi tsiusudaid chështe chictanquin nëish iua cuessunneshun pichicaquidon chuiquid tapan iuan pabiate auc abentsëc pateshunnepanëdash.

⁴⁸ Adec chochoacshobien: ¿Cuesanquid Esus nec, queshunda cuestebëta chështe sanambededtsëquiec mibitedi ubi bedec chocho?

⁴⁹ Mambi mibiteditabadnubi badiadquidën badiadquidënquien Nuquin Papa tabadte shubu dapa daquënë uaidën tabadquin matses tantiamenuen chuibampaboc. Aden chuibanshobi ¿atotsi queshun mimbi ubi bedenquio icpo? Nëbi ubi bedshun mëyante Nuquin Papan chuiquin dada uamiampicpadombuen nëbimbobi mimbi ubi bedec, quepanëdash Esus abi bedquido chiec.

⁵⁰ Aden chuibannubien Esus abentsëqui nianec abëd icquidotedi niquepanëdash.

⁵¹ Adec niquenubi cania abentsëc Esus tsibananec nidpanëdash. Aidi dashcute tuscabicquid dapucudanec nidquin Esus tsibanshobi Esus chieshënquidon bedtuidpanëdash.

⁵² Aden bedtuidaqui aton dashcute nianec dashcute nibëdquio yec cuempanëdash.

Isadaidbon chuiquido iccuededacno Esus buante chiaid

⁵³ Aden bedshun Nuquin Papa ismequin nëish iua cuessunneshun pichicaquidon chuiquid tapan shubu yacno Esus buampanëdash. Aden buansho isanec nëidted chochopanëdash. Nëidic Nuquin Papa ismequin nëish iua cuessunneshun pichicaquidon chuiquid utsibo. Nëidic chuiquido tsësiobo. Nëidic Moisesën chiampid tantiamequido. Aidted chochoash puduedash tabadpanëdash.

⁵⁴ Aden Esus buannubi Petedo uannoshon isbëec tsiuec chopanëdash. Nëish iua pichicaquidon chuiquid tapan shubu yacnombo tsicatiaid shëcuën puduedpanëdash. Adec puduedash Nuquin Papa tabadte shubu dapa isquid sondado tabadacno cute cuëec Petedo tsadtuidpanëdash.

⁵⁵ Adnubien abëtan chuiquidobëtan nëish iua cuessunneshun pichicaquidon chuiquid tapan Esus uënës uamete bunquin: Esusën icsambuen naid chuiquid ¿ada icpec? quequin nibënquin chuiquidon istuidambo icpanëdash.

⁵⁶ Abimbo chiacbimbuen muaquimbi dadpenshun chuibededpanëdash. Aden chuiquin abentsëcshun: Naden naosh, canubi utsibon: Padenquio. Aden nainquio iccosh, quequin tantiadenquiocnoc chuibededpanëdash.

⁵⁷ Adnubien: Chuinu. Tantia, queshun nidtoshon abimbo chiacbimbuen muaquimbi utsibon naden chuipanëdash:

⁵⁸ Naden Esusën chuisho ubitedishun tantiondambi: Nëid matsesën nacnenaid Nuquin Papa tabadte shubu dapa chicchiquendambi. Aden chicchicshumbic daëdec ushquin matsesën naidpenquio isadnuc umbibi nacnenendambi, quequin ma Esusën chuipondac, quepanëdash.

⁵⁹ Aden abentsëcshun chuinubi utsibo: Abimbo caic, quequin chienquio icpanëdash.

⁶⁰ Aden chuisho tantiash nëish iua cuessunneshun pichicaquidon chuiquid tapa nënantanquio nidtoshon Esus chuiquin: ¿Mimbi chiaid chiecquiobida nec? ¿Abimbo chuiquimbida nëidtedishun chieque? Chui. Tantianu, capanëdash Esus chuiquin.

⁶¹ Adoac ëcbedenquio yec otacquio icsho issun: Ambi chomiaidquio Quidistu caid Nuquin Papan Madombo nebi, ¿quecta ique? capanëdash nëish iua cuessunneshun pichicaquidon chuiquid tapanquio Esus cain.

⁶² Adoaquien Esus: Ai, aidi nebi. Matsesën Tishaid yec abuc niduashic Nadatiambocquidën dayun abiucquio tsadsho mibitedishun isendac. Adashic abucuësh abu ushun ubi chouasho mibitedishun isendac, quepanëdash Esus.

⁶³ Adsho tantiash nëish iua cuessunneshun pichicaquidon chuiquid tapa: Icsambuen chiec, quec nëishtanec abi dasiuidaid dashcute bëntsecquid dached dachedquetanec: Utsin chuisho tantienquio icnuna. Ambibi icsambuen chioshe.

⁶⁴ Ambibi Esusën Nuquin Papa icsambuen chuishunsho mimbi tantioc. ¿Mitsipaden mimbi tantie? Tantianu. Chui, capanëdash chuiquid tapan utsibo chuiquin. Adoaquien: Icsambuen chieque. Uënës uamequimbien ictiad, quecuededpanëdash.

⁶⁵ Adshumbic utsibon Esus bëpishtucaquin tauapanëdash. Adotanquin dashcuten bëpucshun cuestanquimbi: ¿Tsuntsin mibi cuesoshe? Cumapenen tantiaquidquio icquin en ubi chui. Tantianu, capanëdash Esus chuiquin. Adoshobi Nuquin Papan shubu dapa isquid sondadon mëdanten bëcuespanëdash.

Esus umbi isacmaidquio nec, quequin Petedon chiaid

⁶⁶ Adnubien Petedo aid shubu daquënë uaid nuntan tsadnubi Nuquin Papa ismequin nëish iua cuessunneshun pichicaquidon chuiquid tapan iuaid chido chopanëdash.

⁶⁷ Choshon cute cuëec Petedo tsadsho istuidshun: Nasaded yacnocquid Esusbëd icquidien mibi nec, capanëdash.

⁶⁸ Adoaquien Petedo: Umbi isacmaidquio chuiquin mimbi tantiadenquiocnoc chiec, quepanëdash. Adtanec puduenash puduedte shëcuë anoentsëqui tsadnubien cachina cuëdpanëdash.

⁶⁹ Adec Petedo ambo tsadshobi aid champimbidi padpiden istuiduatanquin: Esusbëd icquidquio nëid nec, quequin ambo tabadquido chuiuapanëdash.

⁷⁰ Adoaquien Petedo muaquimbi chiec: ¿Esusbëd icquidtabi nedi? queuapanëdash. Adnubien iuecpactsëctanec: Nidaid Cadidea yacnocquid yec aidbëd icquidien mibi nec, quepanëdash ambobi tabadquido Petedo caic.

⁷¹ Adoaquien: Umbi isacmaidquio nec, quequin mambi abimbo chuipaboc. Umbi abimbo chienquio icsho ma ubi chian annëdënquequid Nuquin Papan nënepanuna, quepanëdash muaic Petedo cumapenec cuëdec.

⁷² Adnubien cachina padpidec cuëdpanëdash. Adsho tantiashun: Cachina daëdec cuëdabicnuc: Umbi isacmaidquio Esus nec, quequin mimbi 3teden chiendac, quequin Esusën chioshi, quequin tantiactanec uënësquio yanec shubianquiopanëdash Petedo.