Madcos 13 - El Nuevo Testamento en matsés

Nuquin Papa tabadte shubu dapa uesquin chicchicte chiaid

¹ Aden chianec Esus Nuquin Papa tabadte shubu dapa daquënëuaidënuësh puduenshobien: Nuquin Papa tabadte shubu dapa cuënote nacnenaid bëdaidquio iqueque. Is, Icbo, capanëdash abëd icquid abentsëcshun.

² Adoaquien Esusën: ¿Nëid shubu dapa cuënote nacnenquin shubu uaid isecta ne? Mimbi isaidquio cuënote bëdambuen nacnenaid matsesën nibëdquiecnuc chicchiquendac, capanëdash.

Abitedi nibëdanmete uëshë yannuc ismiante chiaid

³ Aden chiashic auëshquio puduanec nidannec macuësh Odibos caid yacno nidshun Nuquin Papa tabadte shubu dapa isec tabadtuidpanëdash. Ambobi abëd icquid Petedo yec Santiaco yec Uan yec Andedes yec quequin aidtedshun utsibon tantienquiocnoc naden chuipanëdash:

⁴ Icbo, Mimbi cuënote nacnenaid chicchicte chuibued ¿tedectsicshun aid chic chictequid icpec? Adembidi aid tauanun ismete ¿atotsi icuapec? Tantianu. Ubi chui, capanëdash.

⁵ Adoaquien Esusën: Tantia. Mibi chuinu. Muaquidoba choshon chuisho tantiash: Abimbuen cachitec, quec mua uade, tantiaquiec tabadta.

⁶ Adquido chochoshon: Nuquin Papan Chomiaidquio Quidistu caid nebi, quequin chuiquin matses dadpenquio mua uaindac. Adoac dadpenshun: Ai, abimbuen mimbi caic, capendac.

⁷ Ubi choabi icnuc: Matses dadpenquio cuesnan cuesnannubi nidaid utsi utsiec yacnouësh cuesnantiadpambo tabadac caosh, quesho mimbi tantiendac. Adsho tantiash dacuëdenda. Nuquin Papan matses abitedi cuidte uëshë choabi icnuc ambi tantiacpadec matses adonanendac.

⁸ Adec matses utsi dadpen icquidobëd nidaid utsi utsiec yacnocquid matses utsibo cuesnanendac. Nidaid utsi utsiec yacno pete nibëdnuc bunquiote iquendac. Nidaid utsi utsiec yacno nidaid cumapenec ishcudtednendac. Adsho issun chido bacuë nëncuenacbimbuec nëbi matses abitedi natiametequid yanec, quequin tantiata, quepanëdash Esus.

⁹ Adquid yannuc ista, cacbimbuen bëdambuen tantiec tabadta. Mibi bedshun: Icsambocquid neque. Cuidta, quequin chuiquido menenun mibi buanendac. Adembidi bedshun Nuquin Papan Chiaid chuibante shubuno buanacsho chuiquido cuesmequin mëyanmendac. Adembidi bedshun isadaidpembon chuiquid cobednadodbëd aidon chuiquid tapambo yacno buanac umbi nabanaid mimbi aido chuibanendac.

¹⁰ Nuquin Papa matses bëdambuen ismequid iquec, quequin Chiaid Bëda Esusën naid nidaid utsi utsiec yacno nidshun matses abitedi chuibennendac. Aden chuibanambo icnuc abitedi cuidte uëshë yantiapimbo iquendac.

¹¹ Adembidi: Icsambuen naquid nec, quequin bedshun chuiquido yacno buanac ¿atotsimbi chuipeba? quequin tantiec natiec tsadenda. Adec tsadshobi Nuquin Papan Mayan Bëdan tantiamiacpadombuen mimbi chuibanendac.

¹² Ad icnuc ubi chieshënquidon ubi tantiaquidotsen cumapenen chieshënendac. Esus tantiaquid nec, queshun aton buchimbi aton utsi cuessunnemendac. Amëmbi ambi tishmiaido cuessunnemendac. Aton bacuëbombi chieshtoshon anibëta amë cuessunnendac.

¹³ Esus tantiaquid nec, queshun matses dadpenshunquio mibitedi chieshënendac. Adoaqui chieshtoenquio icquin ubi tantiaquid icsho Nuquin Papa yacno tabadmendambi.

¹⁴ Adnubien Nuquin Papa chieshënte uëshë choendac. Aid chonoc Nuquin Papan oncamiaid Daniedën aden icsambuen nate chuiquin Nuquin Papan Chiaid dada uapampic. Aidën dada uampid isbanquidën mimbi tantiendac. Ubi tabadte shubu yacnoshon adotemaidquio nec, caidi pichicate dayunshun icsambuenshë nabanquid icsho isash: Cuessunnenushe, quiash nidaid Udea yacnocquido macuësh tapa yacno ompodec cuenac bëdambo ictsiash.

¹⁵ Adecbidi shubu macano padapadapambo icquidën tabadquido yec umanuc dectatoten budanec: Cuna bednu, quenquio yec cuenta.

¹⁶ Adecbidi tied nantan nidash chonoadquid min dashcute bëntsecquid chicshun dectanaid bednuec chouainquio yec badedquio cuenta.

¹⁷ Adec cuennuequi chidobo bacuë usunquidbëd bacuë chishmequid badedquio cuentiapimbo yec mëyadec natiaquiendac.

¹⁸ Adquid uëshë tantiec: Ue taëec iquenuanquid icnumbo adquid icmenda, quequin Nuquin Papa chianneta.

¹⁹ Aden Nuquin Papa tantiaquido cumapenen natiamequin iuen mëyadmequiendac. Ëndenquimbo Nuquin Papan nidaid uan matses adec mëyadtequid nibëdpampic. Aden padpiden mëyadmian adquid utsi nibëdendac.

²⁰ Adquid icnuc Nuquin Papan ënmenquio icnuc matsestedi nibëdantsiandac. Adnushe, queshun Nuquin Papan: Cun matses nec, caido tantiaquin Nuquin Papan ënmendac.

²¹ Adecbidi Nuquin Papa chieshënte uëshë icnuc: Quidistu Nuquin Papan Chomiaid nëmbo choaccoshe. Isec cho, quequin utsin utsinquien chuisho tantienda. Adnubi utsi: Quidistu Nuquin Papan Chomiaid ambo choaccoshe. Isec cho, quesho tantienda.

²² Adquid uëshë icnuc: Nuquin Papan Chomiaid Quidistu nebi, quec muaquid utsi utsiec yanendac. Adecbidi: Nuquin Papan oncamiaid nebi, quec muaquid utsi utsiec iquendac. Aidon: Ubi tantiaquid icmenu, quequin Nuquin Papan tantiamiaido chieshënquimbi nadatiambocquin nabanquin ismendac. Adosho issun Nuquin Papan tantiamiaidonquiobi utsin utsinquien ubi tantienquio ictsenendac.

²³ Adquid iquendac, quequin mibitedi chiombique. Adquid yanshun chuibansho: Abimbo caic, quequin tantienda, quepanëdash Esus abëd icquido chiec.

Matsesën Tishaid yec padpidec chote chiaid

²⁴ Aden matses icsamboshë icquidon ubi tantiaquido natiamequin mëyadmequin nainnubi badiadën uëshë chënquebuedi inchëshquio yanendac. Inchëshën uëshëtsen chënquenquio yanendac.

²⁵ Uispa chedo paëdbudnendac. Abuc tabadquid abitedimbo uëdëquendac.

²⁶ Adnubini Matsesën Tishaid yec ubi dasiuidaid bëchamauanquiec uëshë chënquiacbimbuec nadatiambocquin nabanquidquio yec abu ushu yacno chosho matses abitedishunquio ubi isbededendac.

²⁷ Adnubimbi Nuquin Papabëd icquidombo chuiquin: Ubi tantiaquido bedtan, cac nidaid abitedi yacno nidshun ubi tantiaquido abitedimbo bedtanendac, quequin Esusën chuipanëdash.

²⁸ Aden chuishumbic ambi chuibued uëshë yante tantiamenuen Esusën naden chuipanëdash: ¿Mitsipaden: Seta taëec, quequin matsesën tantiapec? Suc seccuduquiaid issun: Nëbi seta taëec, quequin matsesën tantiec.

²⁹ Adombuembidi umbi chuibuedquio yansho issun puduedte shëcuë yacno choacsho isash: Nëbimbobi Matsesën Tishaid yec cun Icbo choec, quequin tantiata.

³⁰ Abimbo chiembique. Tantia. Umbi chuibambuedtedi yanabicnuc nëbi matses icquido utsi utsiec uënësec naimëdenquio iquendac.

³¹ Abubëd nidaid nibëdanendac. Padnuen Umbi Chiaid nibëdantiapimbo icquid icnuc umbi chuibocpadquio iquendac, quepanëdash Esus.

³² Ad icnuc ubi caic: Aid uëshënquio choec, quetiapimbo matses iquec. Nuquin Papabëd icquido adtiapimbo icuaic. Aton Madombo iquequi adtiapimbo iquebi. Cun Pa abentsëcshunquiobien ubi chote tantiec.

³³ Ubi chote uëshë tantiadenquio icnuc: Nuquin Papan Chiaid niacmane, queshun Aidën Chiaid istednequin tantiaquiota.

³⁴ Nad iqueque. Tantia. Chuinu. Nidaid utsi yacno nidnun aton icbon aton iuabo chochomeshun utsi utsien naden chuiposh: Bëdambuen shubu isquid icta, quequin chuishumbic puduedte shëcuë isquidtsen: Bëdambuen Ista, quequin chianec nidposh. Adec icbo nidan icbo chote uëshë tantienquio icquin ambi chiacpadombuen naquid icposh.

³⁵ Aden umbi chuibued tantiashun: ¿Nëbida Cun Icbo chopeba? quequin iuabon ënenquio icquin tantiacbimbuen tantiata. Ubi chote uëshë mimbi tantienquio iqueque. Inchëshbudtsëqui chotsiash, quequin tantiata. Adembidi: Inchësh poctsembo chotsiash, queshun tantiaquiota. Adembidi: Cachina cuëdannubi chotsiash, queshun tantiaquiota. Adembidi badiadnubi chotsiash, queshun adembidi tantiaquiota.

³⁶ Ushquin umbi tantienquiocnoc cun icbo chopanundac, queshun tantiadonequiota.

³⁷ Adecbidi: ¿Nëbida Esus chopeba? quec bëdambuec tabadquin Nuquin Papan Chiaid istedneta, quequin umbi mibitedi chuiquimbi matses abitedi chiec nebi, quepanëdash Esus.