Madcos 11 - El Nuevo Testamento en matsés

Chuiquid tapabimbuec Edusaden yacno Esus chouaid

¹ Adec nidequi Edusaden anoentsëqui shubu daëdpactsëcquid Bedpaque caid yacno Esus chopanëdash. Edusaden anoentsëcbidi shubu daëdpactsëcquid Betania caid icuapanëdash. Aid daëdi macuësh Odibos caidën icquid anoentsëqui icpanëdash. Ambo choshon: Ubëd icquid daëd shubuno nidmenu, quequin tantiec Esus nadpanëdash:

² Nëid podquiedën nidquimbi shubu daëdpactsëcquid yacno nidshun mimbi cabachubitsecquidën bacuë caniactsëc catsadabicquid nëshac tsadsho mimbi istuidendac. Aid istuidshun bucun nëshaid chicshun nëmbo bëta.

³ Aden mimbi chicsho isash: ¿Atotsi canun aid chique? quendac. Adsho tantiashun: Cun Icbon: Bedtan, cac naimbique. Badedquio bëuaindambi, quequin chuita, quepanëdash Esus abëd icquid daëd chiec.

⁴ Aden Esusën chiaquien abidaëdi nidpanëdash. Adec nidquimbi cabachubiecquidën bacuë caniactsëc shubu puduedte shëcuë dayun cuesten nëshac tsadsho istuidshun bucun nëshaid chicpanëdash.

⁵ Aden bucun nëshaid chicsho istanquin: ¿Atotsi canun aid chicquin nai? capanëdash ambocquidon.

⁶ Adoaquien: Bucun nëshaid chicshun bëta, cun icbon cabocpadembi naimbi, caquien: Buanec nid, capanëdash.

⁷ Adoac Esus yacno bëpanëdash. Aden bëquimbi aton dashcute bëntsecquid chicshun cabachubiecquidën bacuë caniactsëc capucpanëdash. Adoaidën Esus catsadtopanëdash.

⁸ Adanec nidsho: Chuiquid Esus nec, quequin ismequin utsibo dadpenshun aton dashcute bëntsecquid chicbededshun podquied ansambededpanëdash. Adembidi tantiaquin utsibontsen budëd podobiecquid tebededshun podquied ansambededuapanëdash.

⁹ Aden ansambededash matses dadpen bëyuc nidannenubi Esus nënantanquio nidnubi aidtedbidi tsiuec chochoec nadec cuëdëncuededpanëdash: Adeduya. Mibi chomequid Nuquin Papatsen abitedishun Icbombo yec bëdamboshë iquec.

¹⁰ Nëid nuquin Chuiquid Tapa icnuec choec nuquin tsusedpa Dabid chuiquid tapa icacpadec. Abi chomequid Nuquin Papa bëdamboshë iquec. Adeduya, quec cuëdëncuededpanëdash Esusbëd nidquido.

¹¹ Adec cuëdëncuededequi Edusaden yacno chochopanëdash. Choashic Nuquin Papa tabadte shubu dapa yacno nidash daquënë uaidën Esus puduedpanëdash. Adec puduedshun abitedi isbanash uëshë budsho istanec Esus abëd icquid 12ted icquidobëd Betania yacno nidpanëdash.

2. Edusaden yacnoshon nabanaid ( 11.12—13.37 ) Cute icueda bacuëesa icsho uënësmiaid

¹² Abadiadtsashi Betania yacnouësh puduanec nidequi Esus bundopanëdash.

¹³ Adec bundoshon isac cute icueda caid podo bëdapambo yec ancuenquio nidsho istuidec Esus: Icueda podo bëdapambo podoash nideque. Bacuëash icnushe. Isbono, quianec nidpanëdash. Adanec nidquimbi icueda podouidquio icsho istuidpanëdash. Uëshë utsimbi bacuëtequid yec bacuëabi podopac.

¹⁴ Adquid icsho issun Esusën: Adequi bacuëesa icsho ma matsesën chenquio icpanuna, quequin chuisho abëd icquidon tantiapondambi.

Nuquin Papa tabadte shubu dapa yacnoshon Esusën cuenmiaid

¹⁵ Aden chuibëtsenec Edusaden yacno chopanëdash. Ambo choashic Nuquin Papa tabadte shubu dapa tsicatiaidën Esus puduedpanëdash. Adec puduedquin isaquien atona menequin piucquid bednun sandoaid tabëcaid dadpen icnubi aid bedquido dadpen icuapanëdash. Adsho istanquin tabëcte bidiacbanquimbi nidaid utsi yacnouësh choquidën piucquid bedshunquin meneuaquidobëta oshpodcobiecquid menequin piucquid bedquidon tsadtetsen bëcunneshumbanquin icbotedi umanuc cuenmequin niacumpanëdash.

¹⁶ Aden niacunshun Nuquin Papa tabadte shubu dapa yacnoshon nasiadquin atona bedbededshun buansho issun: Nuquin Papan shubu neque. Nëmbo mitsana bëbëash capucuededenda, capanëdash Esusën cumapenen chushcaquin.

¹⁷ Adembidi tantiamenuen chuibanquin: Nuquin Papan chuiquin dada uamiampid nad iquec: Ubi tabadte shubu dapa nidaid utsi utsiec yacnoquido ubi chiannec tabadte shubu iquendac, quequin chiampid iquec. Aden chiampid icnubi mitsanauidi bedte bunquin ampec tabadte shubu mibitedishun icmiaye. Niecun, quequin Esusën chushcapanëdash.

¹⁸ Aden chuisho tantiash matses dadpen: Chuiquid tapan chiacpadombuen Esusën chiec, quepanëdash. Aden chuisho tantiash dacuëdequi: Icsambocquid Esus neque. ¿Mitsipadombuen bedmeshun uënës uametiad? Aid tantiaquin matsesën nuqui chiacpadombuen nainquio ictsiashe, quequin Nuquin Papa ismequin nëish iua cuessunneshun pichicaquidon chuiquidobëtan Moisesën chiampid tantiamequidon tantiapanëdash.

¹⁹ Adnubien inchëshsho istanec abëd icquidobëd Edusaden yacnouësh puduanec Esus niduapanëdash.

Cute icueda bacuëesa uënësaid chuibanaid

²⁰ Abadiadtsashi Edusaden yacno niduaquimbi cute icueda caid datanquin bidiquec uënësacsho istuidpanëdash.

²¹ Aden Esusën icueda bacuëambocsho chuibued tantiactanquin Petedon: Mimbi bacuëabicsho: Uënësta, cabued bidiquec uënësaque. Is, Icbo, capanëdash.

²² Adoaquien Esusën: Nuquin Papa nadatiambocquin nabanquid nec, quequin tantiaquiota.

²³ Aden tantiaquin: ¿Umbi chiacpadombuenda napatsiashba? quenquiocquin abi chuisho mimbi chiacpadombuen natsiash. Adoac mimbi nëid macuësh cain: Mananuc icbuedi adquiecbidi acte nantan icuata, mimbi cac nëid macuësh acte nantan icuaindac.

²⁴ Umbi chiacpadombuen Nuquin Papan naindac, quequin abimbo tantiaquin mibitedishun abi chuisho tantiashun Nuquin Papan adombuen nashunendac.

²⁵ Aden Nuquin Papa chuinuec utsin mibi icsambuen nashunaid tantienquio yec bëshunta. Adsho abucshun isash Nuquin Papa mimbi icsambuen naid tantienquio yec bëshunendac.

²⁶ Adenquio mibi icsho issun Nuquin Papan mimbi icsambuen naid tantiec bëshunenquio iquendac, quepanëdash Esus abëd icquido chiec.

¿Tsuntsin: Chuibanta, caid mibi ne? caid

²⁷ Adashic padpidec Edusaden yacno Esus abëd icquidobëd chochouapanëdash. Adec chouash Nuquin Papa tabadte shubu dapa tsicatiaidën puduedash capusho istuidshun nëidtedshun Esus chuimetuidpanëdash. Nëidic nëish iua cuessunneshun pichicaquidon chuiquidon. Nëidic Moisesën chiampid tantiamequidon. Nëidic chuiquid tapa utsi tsësiobon. Aidtedshun Esus naden chuimepanëdash:

²⁸ ¿Tsuntsin: Chuibanquin nabanta, cac chuibanquin nai? capanëdash.

²⁹ Adoaquien Esusën: Adembidi umbitsen mibi chuimenu. Umbi chiac mimbi chuisho tantiashun umbitsen mibi chiembi,

³⁰ Tantia. Chuinu. ¿Tsuntsin namiac Uanën matses acten mentopadennec? ¿Matsesënda namepadennec? ¿Nuquin Papan namiacta napadennec? En chui. Tantianu, capanëdash Esusën aido chuiquin.

³¹ Aden Esusën chuisho tantiash badedquio chienquio yec uannotantsëc tabadec nadec onquecuededpanëdash: ¿Mitsipaden chuitiad? Nuquin Papan namiaidquio Uan nepadennec, nuqui cac: ¿Atotsi queshun aidën chiacpadombuen nainquio icconda? quetsiash Esus.

³² Matsesën: Nata, caid Uan nepadennec, nuqui quesho tantiashun: ¿Atotsi nuqui capatsiash Uanën chuisho tantiondaidon? Aidon: Nuquin Papan oncamiaid Uan niondash, quequin tantiabededquin nuqui cuënoten seshun secatsiash, quec dacuëdcuededpanëdash.

³³ Aden chiec onquecuededashic: Tsaudi. ¿Tantienquio iquembi. Tsundan namiaquien nachitondash? queshobien: Adembidi umbitsen ubi namequid chienquio iquembi, capanëdash Esusën.