Madcos 10 - El Nuevo Testamento en matsés

Dada aton chidobëd cuëshëdte Esusën chiaid

¹ Esus abëd icquidobëd shubu dadpen icquid Capednaun yacnouësh puduanec nidec nidaid cuëshë Udea yacno matambidanec nidquin acte Odan caid potepanëdash. Ambo uëshë choacmi choash tabadsho isash padpidec matses dadpen chochopanëdash. Adec chochoacsho issun ambi chuidedniacpadembi Nuquin Papan Chiaid padpiden chuibanuapanëdash Esusën.

² Aden chuibannubi padiseobon chieshënquin: Nuquin Papan Chiaid icsambuen chuimenu, queshun Esus naden chuituidpanëdash: Aton bënën dada uaid menequin aton chido cuenmete tantiaquin ¿Mitsi paden mimbi chuipe? Tantianu. Ubi chui, capanëdash.

³ Adoaquien: ¿Atotsi mibitedi tantiamenuen Moisesën dada uaquin chuipampic? capanëdash Esusën.

⁴ Adoaquien: Aton chido bedash iuecash bunenquio yanshun: Cun chido icsambocquid nec, quequin ambi tantiacpaden aton bënën dada uashun menequin cuenmiacsho isash: Padi. Aden nainda, quenquiocpampic Moises, quepanëdash padiseobo.

⁵ Adoaquien Esusën: Min tsusedpabobëd mibitedi Nuquin Papan Chiaid tantiashun adombuen nate bunenquio icquid icsho issun: Padi. Aden nainda, cainquio Moisesën icpampic.

⁶ Tauaquin Nuquin Papan dadabëta chido uapampic.

⁷ Adoampid icnuc dadan aton papabëta aton tita nianquin aton chido bedash aidbëd bëdambuec tabadec.

⁸ Aden aton chido bedash iquequi matses abentsëc icbuedi aidbëd daëdash abentsëc yacbimbuec iquec.

⁹ Aden Nuquin Papan dada aton chido bedmequin daëd uaid yec ma cuëshëdec niannanenquio icpanuna, quepanëdash Esus.

¹⁰ Aden chianec shubun puduedacsho: Padpiden mimbi chuibued tantianu. Ubi chui, capanëdash abëd icquidon Esus chuiquin.

¹¹ Adoaquien: Chido utsi bedquin ambi bëyuc bedbued nianquin Nuquin Papan Chiaid niaquec icsaindac.

¹² Adembidi chidon dada utsi bedmequin aton bënë nianquin Nuquin Papan Chiaid niaquec icsaindac, quepanëdash Esus.

Esus yacno bacuëbo bëbëaid

¹³ Adnubien: Ma Esusën mamishnu, queshun bacuëbo bëbëpanëdash. Aden bëbësho issun abëd icquidon: Padi. Nëmbo bëbëenda, capanëdash.

¹⁴ Aden chuisho tantiash nëishtanquin Esusën: Padi. Ma bacuëbo ubi yacno bënu. Cuenmenda. Nëid bacuëbo amën chuisho tantiash badedi: Abimbo caic, quiacbimbuen ubi tantiaquid Nuquin Papan namiacno puduedtequido nendac. Bacuëbo bëdambo iqueque. Bec cho, cac bëbëpanëdash.

¹⁵ Abimbo chiembique. Tantia. Nëid bacuën amë badedquio tantiacpadombuen Nuquin Papan Chiaid tantiesa yec Nuquin Papan namiacno puduedtiapimbo iquendac, quepanëdash Esus.

¹⁶ Aden chuitanquin Esusën bacuëbo dayumbanquin mamishquin: Nëid bacuë bëdambo icmeta, Papa, quequin Nuquin Papa chuipanëdash.

Dada atona dadpen icquid chiaid

¹⁷ Aden chianec auëshquio puduanec podquiedën nidnubien dada abentsëc titinquianec choquin bëquedtanec dannëshën sebudash tsadquin: Chuibanquid yec bëdambocquidquio mibi neque. En ubi chui. Nuquin Papa yacno ënëdenquio yec tabadnuen ¿atotsimbi nape? capanëdash chobuedën Esus chuiquin.

¹⁸ Adoaquien Esusën: ¿Atotsi quequin mimbi ubi: Bëdambocquid nec, cape? Nuquin Papa abentsëcquiobien bëdambocquid nec.

¹⁹ Nuquin Papan: Naden nata, quequin Moises chuiquin naden dada uamepampid mimbi tantiec: Cuessunnenda. Min chidopenquio chudenda. Ampenda. Cuidmenuen utsi mua uainda. Adecbidi utsina bednuec muainda. Titabëta papa chieshënenquio icquin bëdambuen tantiata, quequin chiampictedi mimbi tantiec, capanëdash Esusën.

²⁰ Adoaquien: Aden chiaidtedi niaquenquio icquin bacuëctsëc icquimbi bedanquin tauaondambi, quepanëdash chobued.

²¹ Aden chuisho tantiashun bëisquin: Aid tantiembi, quequin ambibi tantiec Esus nadpanëdash: Utsi mimbi padabi iqueque. Tantia. Chuinu. Mimbi dayun uaidtedi uesquin menequin piucquid bedta. Aden bedshumbic piucquid nibëdquido mitsana uesquin menebanta. Adosho issun abuc abëd tabadmenun Nuquin Papan mibi bëdamboshëcquid menetsiash. Adota. Adotanec ubëd iquec cho, capanëdash Esusën.

²² Adsho tantiash: Cuna dadpenquio icquid uesquin menetiapimbo iquebi, quiash uënësquimbo yec atona dadpen icquid nidpanëdash.

²³ Adec nidsho istanec bidiadshun bëisbanquin Esusën abëd icquido naden chuipanëdash: Atona dadpen dayun uaquid atonauidtsëqui tantiaquin Nuquin Papa tantiabentiapimbo iquec. Adquid yec Nuquin Papan namiacno puduedtiapimbo iquendac, quepanëdash.

²⁴ Aden chuisho tantiash tantiadempambo yec tabadsho issun Esusën: Cun utsibo, atona dadpen icquid atonauidtsëqui tantiaquid yec Nuquin Papan namiacno puduedtiapimbo iquendac.

²⁵ ¿Ada nëish tapa camecho caid pinchuc chicte shëcuë nasiadpatsiash? Padenquio. Adecbidi atona dadpenquio dayun uaquid atonauidtsëqui tantiec Nuquin Papan namiacno puduedtiapimbo iquendac, quepanëdash Esus.

²⁶ Aden Esusën chuisho tantiash abëd icquido: ¿Abimbobida capec? Ambi tantiacpadequi puduedte bunec puduedtiapimbocquid icnuc ¿tsudain Nuquin Papa yacno puduedash tabadtequid icpec? quec chuinampanëdash.

²⁷ Adoaquien aido bëisec Esus nadpanëdash: Matsesën natiapimbo ictequid icnuc Nuquin Papain namianquidquio nec. Ambi natiapimbo ictequid nibëdec, quepanëdash.

²⁸ Aden chuishobien Petedon nadopanëdash: Chuinu. Tantia, Icbo. Mimbi: Nuquibi icnu. Cho, cac ubitedishumbi cuna abitedi nianec mibëd icnuec chopondabi, quequin Esus chuipanëdash.

²⁹ Adoaquien Esusën: Tantia. Mibitedi chuinu. Esusbëd icnu, queshun: Nuquin Papan namiacno tabadte iquec, quequin chuibannu, quequidën aton shubu nianquinc aton utsibo nianquinc aton chibi chedo nianquinc aton papabëta aton tita nianquinc aton bacuëbo nianquinc aton tied nianquinc cashobi

³⁰ Nuquin Papan aidën nianaidtedi daëd uaquin 100 ted udictsëc dadpenquioshë menendac. Aton shubu yec aton utsibo yec aton chibi chedo yec aton tita yec aton bacuëbo yec aton tied yec quenuc dadpen menendac. Adquid icnubi mibi chieshënquidbidi icuaindac. Iuecash ënëdenquio yec Nuquin Papa yacno mibi tabadendac, quepanëdash.

³¹ Aden chiashic: Nidaidënuësh chuiquid tapa icbuedi Nuquin Papa yacnouësh utsi utsiec chuiquidpenquio iquendac. Adecbidi utsi utsiec nidaidënuësh chuiquidpenquio icbuedi Nuquin Papa yacnouësh chuiquid tapa iquendac, quepanëdash Esus.

Ubi uënës uamendac, quequin Esusën padpidembuen chuiuaid

³² Aden chianec Edusaden yacno nidec Esus bëyuc nidpanëdash. Adec nidsho isash abëd icquido: Edusaden yacno padpidec niduacsho ubi bedshun uënës uamendac, quequin Esusën chuibued tantiash tantiadempambo yec dacuëdec tsiuec nidannepanëdash. Abi tsibanquid utsibotsen dacuëdecbidi nidannepanëdash. Adnubien: Ubëd icquido 12tedtsëqui chuiuanu, quiash nidtuidshun chochomeshun naden abi mëyante chuipanëdash:

³³ Tantia. Chuinu. Nëbi Edusaden yacno nidacsho Matsesën Tishaid icsho ubi chieshënquido bedmendac. Adoac nëish iua cuessunneshun pichicaquidon chuiquidobëtan Moisesën chiampid tantiamequidon ubi bedshun: Ma uënës uamenu, queshun matses utsi isadaidpembon chuiquid tapa ubi menendac.

³⁴ Adoac bedshun aidon oncain mamënshumbededquimbi bëpishtucabannetsëcquien cuesquin mëyantanquin buanshun ubi uënës uamendac. Aden uënës uaqui daëdec ushash uincuenendabi, quepanëdash Esus.

Abi chuisho Esusën Santiacobëta Uan chiaid

³⁵ Aden chiaquien Sebedeon mado Santiacobëtan Uanën Esusën dayuntsëqui choshon naden chuipanëdash: Mibi chuinu. Tantia. Ubi daëdshun chiacpadombuen ¿ada ubi nashuntsia, Icbo? capanëdash.

³⁶ Adoaquien: ¿Atotsimbi mibi nashune? capanëdash Esusën.

³⁷ Adoaquien: Abuc niduash chuiquid tapambo icquin mimbi nadatiambocquin namiacnoshon mibëtan chuiquid ubi daëdi icmeta. Aden chuiquid tapa icmeshun min dayunquio tsadmeta. Copioc utsi tsadunquin abiuc utsi tsadunta, capanëdash Esus chuiquin.

³⁸ Aden chiaquien: Tantienquio icquin mimbi ubi chiec. ¿Ada ubi mëyadacpadquiecbidi chieshtoenquio yec mëyadtsia? ¿Ada ubi uënësacpadec uënëstsia? capanëdash Esusën.

³⁹ Adoaquien: Ai, adtsiabi, quepanëdash. Adsho tantiashumbien: Ai, adecbidi mibitsen mëyadtequid iquendac, capanëdash Esusën.

⁴⁰ Aden chuishumbic: Abuc nidash chuiquidquio yec cun dayunquio ëquë tsadbudcuenec nëmbo tsadec cho, quetiapimbo iquendabi. Nuquin Papambien ambi tantiaidquio aden tsadunendac. Umbi padenquio iquembi, quepanëdash Esus Uambëta Santiaco chiec.

⁴¹ Aden chuisho tantiashun Uambëta Santiaco nëishëmbededpanëdash abëd icquid utsibo 10tedshun.

⁴² Adec tabadshobien: Nëmbo chocho, capanëdash Esusën. Adoac chochoacsho: ¿Mitsipad matses utsi isadaidpembon chuiquid tapa icpec? Aton chuiquid tapan badedbadedquien ancabudac dacuëdquin aton iuabon badedi naic. Aden chuiquidën: Baded nata, quequin namebanec, quequin mibitedishun tantiec.

⁴³ Ubi tantiaquido icquin mimbi adoenquio ictsiac. Utsibo namete bunquin aido tantiaquin nashunta.

⁴⁴ Adembidi: Chuiquid icte bunquin iuan aton icbo nashunacbimbuen mimbi utsibo nashuntsiac.

⁴⁵ Adecbidi Matsesën Tishaid icsho ma ubi matsesën nashunnu, quecpenquio chondabi. Adenquio icquin matses tantiaquin Nuquin Papa icsambuen naquidobi cuidmenquio icnuec ubided cuidadec uënësendabi, quepanëdash Esus.

Badtimeo cuëmëdquid bëshuaid Esusën bëdanmiaid

⁴⁶ Aden chiashic shubu dadpen icquid Edico caid yacno Esus abëd icquidobëd chochopanëdash. Adashic auëshquio nidannesho issun matses dadpenshunquio tsibanampanëdash. Adnubien Timeon mado Badtimeo cuëmëdquid bëshuaid onquec: Ubi piucquid mene, quiannequid podquied cuëman tsadpanëdash.

⁴⁷ Ambo tsadquimbi: Esus Nasaded yacnocquid choec, quequin utsin chuisho tantiashun: Esus, Dabidën mado caid icquin ubi tantiaquin nashunta, quequin cuëmpanëdash bëshuaidën.

⁴⁸ Aden cuënsho tantiashun matses dadpenshun chushcapanëdash. Padi. Aden cuënenda. Cuënsho tantiac chieshanquiec mibi iqueque, caquien abi niacbidanec buëdanquien cumapenen cuënec: Tsusedpa Dabidën mado caid icquin ubi tantiaquin nashunta, Icbo, queuapanëdash.

⁴⁹ Aden abi cuënsho tantiash nidtuidshun Esusën: Ubi cuënquid nëmbo bec cho, capanëdash. Adoaquien: Nëmbo bec cho, queque. Nidtoash nid, capanëdash utsibon.

⁵⁰ Adoaquien bëshuaid aton dashcute bëntsecquid chicquin netanec badedquio nidtoanec Esus yacno chopanëdash.

⁵¹ Adec chosho issun: ¿Atotsimbi mibi nashune? capanëdash Esusën. Adoaquien bëshuaidën: Iste bunebique, Cun ëshë bëdanme, Icbo, capanëdash.

⁵² Adoaquien Esusën: Aidën ubi bëdanmetsiash, quequin mimbi tantiacpadquiequi mibi bëdanoque. Nidec nid, Esus quenubi badedquio bëdanquin bëshuacbuedëmbi isbenuapanëdash. Adec bëdanshun Esus nidsho issun tsibanampanëdash.