Madcos 1 - El Nuevo Testamento en matsés

I. BEDANQUIN CHIAID ( 1.1-15 ) Uan acten mentoanquidën nate chiaid

¹ Nuquin Papan ambi tantiampicpaden aton Madombo Esuquidistu Mesias caid chomete tauaquin chiampid Chiaid Bëda chuinu. Tantia.

² Ëndenquimboshë Nuquin Papan ambi oncamiaid Isayas dada uamiampid nad iquec: Mibi chote chuiquidba chomendambi, Mado. Aidëmbi: Bëdambo icquid choeque. Icsambuen nabanenquio icquin ënta, quequin chuibanendac, Mado.

³ Aidëmbi shubu nibëdacnoshon cumapenen cuënac matses chochosho: Chuiquid tapambo choec, queshun podquied nacnenacbimbuen: Nuquin Icbombo choeque. Mimbi icsambuen naid ënash bëdambuec tabadta, quequin Uan acten mentoanquidën nate Isayasën chuipampic.

⁴ Aden chiampicpadquiequi: Nuquin Papan Chomiaid choec, quequin chuibanquidba Uan bëyuc chopanëdash. Aidëmbi shubu nibëdacno tabadquin cumapenec onquequin naden chuibampanëdash: Mimbi icsambuen naid ënshun Nuquin Papa tantiabenquin acten mentometa. Adosho isash mimbi icsambuen naid tantienquio yec Nuquin Papa bëshunendac, quequin chuibampanëdash.

⁵ Aden Uanën chuibannubien matses dadpen: Tantiatannu, quec nidaid cuëshë Udea yacnocquidobëd shubu dadpen icquid Edusaden yacnouësh chochopanëdash. Chochoash tabadquin tantiashien: Aden Icsambuen naombique. Umbi icsambuen naid ënnu, quequin abimbo chuisho Uanën acte Odan caidën mentobampanëdash.

⁶ Nadquid Uan icpanëdash. Aton dashcute nëish iua dapa camechon bu daëdcaid dasiuidpanëdash. Tsipantebic nëish iua bitsi nacnenaid tsiupanëdash. Aton pete bacumbëd capishtobiecquid icpanëdash.

⁷ Aidëmbi naden chuibampanëdash: Umbia chuibambon cun tsiuec choshon ubi udictsëc nadatiambocquin nabanquin chuibanendac. Aidi bëdamboshëcquid icnuc ubi icsaquid yec abi tapucudaid chicnuec dacuëdec shuebudtiapimbo iquebi.

⁸ Mibitedi acten mentoquiduidtsëqui nebi. Aidien abipadquidquio aton Mayan Bëda menianquidquio nendac.

Esus acten mentoaid

⁹ Adnubien Uanën chuibuedquio Esus nidaid Cadidea caidën icquid shubu daëdpactsëcquid Nasaded yacnouësh chopanëdash. Adec choacshobien Uanën acte Odan caidën Esus mentopanëdash.

¹⁰ Aden acten mentoac pudundonobi abu canchedec shëcuë yansho Esusën ispanëdash. Adnubi oshpodcobimbuec isadec aton Mayan Esusbëd icnuec budpanëdash.

¹¹ Adnubien abucuësh nadec onquepanëdash: Mibiuidtsëqui cun Madombo icsho umbi bëdambuen isquin umbi tantiaidquio mibi nec, quepanëdash.

Nuquin Papan Chiaid Esus niacmenu, quequin Mayan Icsa Satanasën tanaid

¹² Aden mentobocshobien Nuquin Papan Mayanën shubu nibëdec masiuidpambo yacno Esus buampanëdash.

¹³ Ambobi 39tedec ushpanëdash. Ambo icshobi Nuquin Papa chieshënquid Mayan Icsa Satanasën: Nuquin Papan Chiaid niacmequin tannu, quianec choshon tanuidpanëdash. Ambobi bëdibiecquid nëish aben icquid chedobëd icpanëdash. Ambo Esus icshobi Nuquin Papabëd icquido chochoshon nashumbededpanëdash.

Nidaid Cadidea yacnoshon Esusën tauambuen chuibanquin matses nashunaid

¹⁴ Adnubien isadaidpembon chuiquid tapan acten mentoquid Uan bedmeshun quënën tsadunmepanëdash. Aden Uan quënën tsadunmiambien Esus nidaid Cadidea caid yacno nidpanëdash. Adshumbic tauaquin Nuquin Papan Chiaid Bëda chiec: Nuquin Papan namiacno tabadte nëbi iquec, quequin Esusën chuibampanëdash.

¹⁵ Nuquin Papan chiampicpadquid ambi namiacno iuedanquid nëmbobi iqueque. Mimbi icsambuen naid ënshun Chiaid Bëda tantiash bëdambuec tabadta, quequin Esusën chuibampanëdash.

II. ADQUID NEBI, QUEQUIN ESUSËN CHIAID ( 1.16—8.30 ) 1. Tantiaquidënquio chiacpadombuen chiaid 1.16—3.12 Nuëcquid bedquido 4ted Esusën: Ubëd iquec cho, caid

¹⁶ Aden chuibanashic chian dapa Cadidea caid cuëman nidquin Simombëtan aton utsi Andedesën nëshaid acte nënesho istuidpanëdash. Aid daëdi nuëcquid bedquidombo nepanëdash.

¹⁷ Aden istuidshumbien: Nuquibi icnu. Cho. Nuëcquid bedquid icbuedi nuëcquid mimbi bedbocpadombuembidi nëbi umbi namiaid icquin matses chuibanquid mibi icmenu, capanëdash Esusën.

¹⁸ Adoaquien nëshaid nianec Esusbëd nidannepanëdash.

¹⁹ Adanec udictsëc nidquimbi Sebedeon mado daëdshun Santiacobëtan Uanën cano antabëdquin aton nëshaid nacnensho Esusën istuidpanëdash.

²⁰ Aden nacnensho istuidtanquimbien Esusën ambi utsi chuibocpadombuembidi chiaquien aid daëdshuntsen aton papabëta abi nashunquido cano antabëdsho nianec Esusbëd nidannepanëdash.

Podobitsi icsa dapuduedaid Esusën dapuduenmiaid

²¹ Adashic shubu dadpen icquid Capednaun caid yacno abëd icquidobëd nidpanëdash. Nidash chonoadtemaid uëshën Nuquin Papan Chiaid chuibante shubun puduedshun iccuededquido tantiamequin Nuquin Papan Chiaid Esusën chuibampanëdash.

²² Aden chuisho tantiash tantiadempambo yec tabadec: ¿Mitsipadombuen tantiabenshun adombuen chuibanquin napeba? Tantiaquidënquio chuibanacpadombuen Esusën chuibampayoc. Ma Moisesën chiampid tantiamequidon adombuen chuibanenquio icpaboc, quecuededpanëdash.

²³ Aden Esusën isadaidbon Nuquin Papan Chiaid chuibante shubun chuibansho tantiec tabadnubien dada podobitsi icsa dapuduedaid abi tsadacnouëshquiobi cumapenec nadec cuëdec:

²⁴ Nasaded yacnocquid Esus caid ¿atotsi quec nëmbo cho? ¿Ubipadquidtedi nibëdquio icmenuecta cho? Umbi isaidquio mibi nec. Nuquin Papan bëdambuen isaidquio yec Icsaisambo mibi nec, quepanëdash.

²⁵ Adoaquien Esusën: Adec cuëdenda. Adec cuëdenquio yec aidën dadan iquenquio iquec dapuduenta, capanëdash.

²⁶ Adoac abi dapuduedaid uëdëquec uebudnubi cumapenec sidquianec podobitsi icsa dapuduempanëdash.

²⁷ Adosho isash tantiadempambo yec tabadcuededec: ¿Abimbobida capec? ¿Mitsi padquid nepeba? Ambi chuibanaid chiaid chuca utsibien nechitec. Ma chuiquidën nacpadombuen: Dapuduen, ambi cac aidën chiacpadombuen podobitsi icsan napayoc, quec onquecuededpanëdash.

²⁸ Aden isanec nidanneshun Esusën nabanaid ambi isbued chuibampanëdash. Aden chuibansho aid nidaid cuëshën icquid Cadidea yacno tabadquidon tantiabededpanëdash.

Simonën nachi bëdanmiaid

²⁹ Adashic Nuquin Papan Chiaid chuibante shubu yacnouësh puduenanec Simonën shubu yacno nidec Santiaco yec Uan yec quec aidobëd Esus nidpanëdash. Aidën shubun icquidbidi aton utsi Andedes icpanëdash.

³⁰ Aidën shubun icquidbidi Simonën nachi nëncuenash chumbo yec ueten uepanëdash. Adnubi Esus chosho issun utsin: Simonën nachi nëncuenash chumbo iquec, quequin chuipanëdash.

³¹ Aden chiac aid uiacno puduedshun Esusën mëdinquin nidtomiac chumbo icbuedi badedquio dauebudec bëdampanëdash. Aden bëdanmiac codocashun abëd icquidobëta Esus pemepanëdash.

Esusën daicsaidobëta nënquido dadpen bëdanmiaid

³² Adnubien inchëshbudtsëqui Capednaun yacnocquidon daicsaidobëta nënquido bëbëpanëdash. Adembidi podobitsi icsa dapuduedaidtedi Esus yacno bëbëpanëdash.

³³ Aden bëbëash Simonën shubu shëcuë cuëman puduedabi matses dedpen tabadcuededpanëdash.

³⁴ Adsho issun shubunuësh puduenshun nënquidobëta daicsaidotedi Esusën bëdanmebampanëdash. Adembidi podobitsi icsa dapuduedaid oncamenquio icquin dapuduenmebampanëdash. Umbi tantiaid Nuquin Papan Madombo nec, quequin chuinushe, queshun oncamenquio icpanëdash.

Esusën Nuquin Papan Chiaid Bëda chuibanaid

³⁵ Adashic badiadte anoentsëqui isucunanec shubu nibëdacno abentsëqui Esus nidpanëdash. Adec nidshun Nuquin Papa chuipanëdash.

³⁶ Adec nidan isucunshun abëd icquidobëtan Simonën Esus nibëmpanëdash.

³⁷ Aden nibënquin istuidshumbien: Mibi isnuec chochoquidtedishun mibi nibëmbededec, capanëdash.

³⁸ Adsho tantiashumbien Esusën: Capucuennequin utsibotsen Chiaid Bëda chuibannuec chondabique. Shubu dadpen icquid anoentsëc icquidtedi chuibanec nidnunid, quepanëdash.

³⁹ Aden chuibanec nidaid cuëshë Cadidea caidën icquidtedi yacno capucuennequin Esusën Nuquin Papan Chiaid chuibante shubun shubunquiec puduedcuennequin Nuquin Papan Chiaid Bëda chuibampanëdash. Adembidi podobitsi icsa dapuduedaido dapuduenmebampanëdash.

Dada aton dada daush daushpambo yec daicsaid bëdamiaid

⁴⁰ Aden Esusën chuibannubien dada aton dada daush daushpambo yec daicsaidquio chopanëdash. Esus yacno choequi dannëshën sebudec tinquebudshun chiec: Ubi bëdanmete bunquin mimbi ubi bëdanmetsiaque. Ubi bëdanme, Icbo, quequin Esus chuipanëdash.

⁴¹ Adsho tantiash aid isec uënësquio ictanquin mishec Esus: Mibi bëdanmete bunebique. Bëdanta,

⁴² quenubi daicsaid nibëdquio yec badedquio bëdampanëdash.

⁴³ Aden bëdanmetanquin: Tantia. Chuinu.

⁴⁴ Nidquin: Aidën bëdanmioshi, quequin utsibo chuibanenda. Naden nata. Edusaden yacno nidash Nuquin Papa tabadte shubu dapa yacno nidec daquënë uaidën puduedta. Ambo puduedshun Moisesën chiampicpadombuen Nuquin Papa ismequin nëish iua cuessunneshun pichicaquido isme. Adoshombic oshpodcobimbuecquid daëd bedshun meneta. Adoac: Bëdanac, mibi caindac, capanëdash Esusën.

⁴⁵ Adsho tantiaboshombi niacbidanquin: Esusën bëdanmioshi, quequin abitedi chuibennepanëdash. Aden chiac Esus yacno matses dadpen chochopanëdash. Adec chochosho isash: Shubu dadpen icquid yacno tabadtiapimbo iquebi, quianec shubu nibëdacno Esus abëd icquidobëd nidpanëdash. Adnubien Esus nibënec nidaid utsi utsiec yacnouësh matses dadpen chochopanëdash.