Hechos 9 - El Nuevo Testamento en matsés

Saudo Esus tantiaquid yanaid

¹ Adnubien Edusaden yacnouësh Esus tantiaquid utsi utsiec niquenubi Saudo Edusaden yacno tabadpanëdash. Ambo tabadec chushquec Esus tantiaquidtedi cuessunnemete bunec nëish iua cuessunneshun pichicaquidon chuiquid tapambo yacno nidash:

² Shubu dadpen icquid Damasco yacno nidshun chiaid chuca tantiamiaido Esus tantiaquido dadabobëtabi chidobo bedmequin tanemeshun Edusaden yacno bëmete bunebique. Aden dada uashun ¿ada dada uaid ubi menetsia? Ai adota, quequin mimbi dada uaid meniac shubu dadpen icquid Damasco yacno nidshun Nuquin Papan Chiaid chuibante shubu utsi utsiec yacno nidshun ambo chuibanquid mimbi dada uaid ismiac: Adota, queuatsiash, quequin chuipanëdash Saudon.

³ Aden chiac dada uashun meniac bedash Edusaden yacnouësh puduanec ënapen nidec shubu dadpen icquid Damasco anoentsëqui yanshobi abucuësh uëshëmboshë yec bedquec chënquequidën Saudo dachëncaquin dëcatepanëdash.

⁴ Aden nabanquid icsho ënden dëcatiac uebudash uesho isash abucuësh onquec: Saudo, Saudo ¿atotsieshun ubi chieshënquin mëyane? quesho tantiapondash.

⁵ Adoaquien Saudon: ¿Tsutsi ne? caquien: Mimbi chieshënquin mëyanaid Esus nebi.

⁶ Nidtoanec shubu dadpen icquid Damasco yacno nidec nid. Amboshon umbi: Nata, cacpadombuen ambocquid mibi chuimembique. Nidec nid, capanëdash.

⁷ Adec abucuësh onquesho tantiec Saudobëd chochoquido nidtuidshun tantiaquimbi onquequid isenquio yec dacuëdquiec tabadpanëdash.

⁸ Adec onquec ënëdan nidtoshon isnuequi Saudo istiapimbo yec bëshupanëdash. Adsho issun mëdinanquin Damasco yacno buampanëdash.

⁹ Ashunquio daëdec ushquin isenquio yec petebëta acte mëmunquiec Saudo tsadpanëdash.

¹⁰ Adnubien shubu dadpen icquid Damasco yacno tabadquid Esus tantiaquid Ananias cuëmëdquid icpanëdash. Aidi ushquin isacbimbuen ismequin Esusën: Ananias, caquien: ¿Atoda? Në iquebi, Icbo, capanëdash.

¹¹ Adshobien: Nidtoash podquied Cuembocquid caid yacno nidtan. Ambo nidshun Udasën shubun puduedquin: Shubu dadpen icquid Tadso caid yacnoshon tishaid Saudo cuëmëdquid ¿ada iquec? quequin chuita. Aidi Nuquin Papa chiec tsadec.

¹² Aidëmbi ushquin isacbimbuen isquin mimbi choshon mëdanten mamishac isbenquin isoshe. Aidi istan, capanëdash Esusën Ananias chuiquin.

¹³ Adoaquien: Cun matses dadpenshun Saudon icsambuen nabanaid chuibansho tantiombi, Icbo. Aidëmbi Edusaden yacnoshon mibi tantiaquido mëyanmiac caosh.

¹⁴ Aidëmbidi Edusaden yacnocquidon chuiquid tapanquio dada uaid sananquin nëmbotsen mibi tantiaquido bedmeshun buannuec aidi chopac caosh, quepanëdash Ananias Esus chiec.

¹⁵ Adoaquien aton Icbon: Aidi ubi chuibennequid icmequin umbi bëdambuen isaid neque. Aid dacuëdënenquio yec nidshun istan. Aidëmbi isadaidbobëta isadaidpembo aton chuiquidobëtabi ubi chuibennec capuendac.

¹⁶ Aden ubi chuibennesho: Mibi natiambo icnuc mëyantequid iquendac, quequin Saudo tantiamendambi, quepanëdash Esus.

¹⁷ Adsho tantianec nidec Ananias Udasën shubun puduedquin Saudo istuidshun mamishec: Cun utsi, mibi podquiedën chosho chuibuedën Nuquin Icbo Esusënquio mibi cain: Ma padpiden ismebennu, quequin chomiaid nebi. Adembidi aton Mayan Bëda mibi menemenuen chomiaidbidi nebi, quepanëdash Ananias Saudo chiec.

¹⁸ Aden Ananiasën chuinubi nuëcquid bitsibimbuecquid ëshënuësh paëdnubi bëshuacbuedëmbi Saudon bëdambuen isbenuapanëdash. Aden isbenash capusho acten mentopanëdash.

¹⁹ Adecbidi penquio yec padishacbuedi piash padpidec uidënquio yanuapanëdash. Adash shubu dadpen icquid Damasco yacno Esus tantiaquidobëd iuecpactsëc tabadpanëdash.

Shubu dadpen icquid Damasco yacnoshon Saudon Esus chuibanaid

²⁰ Adec Damasco yacno tabadquin Nuquin Papan Chiaid chuibante shubun shubunquiec puduedcuennequin isadaidbo chiec: Esus Nuquin Papan Madombo nec, quequin chuibennequin Saudon tauapanëdash.

²¹ Aden chuibansho tantiash tantiadempambo yec tabadec: ¿Edusaden yacnoshon Esus tantiaquido mëyanmebuedpenquioda nedic? ¿Adecbidi nëmbo choshon nuquitsen tanemeshun isadaidbo Edusaden yacnocquidon chuiquid tapabo yacno buanmenuec choashpenquioda nedic? quepanëdash Damasco yacnocquido.

²² Aden ambocquidon tantianubi Nuquin Papan Mayan Bëdan oncamiac Saudon: Nuquin Papan Chomiaidquio Mesias Quidistu caidbidi Esus nec, quequin isadaidbo tantiamenuen chuided chuidedpanëdash. Adoac: Tantiadenquiocnuen chuibampec, quepanëdash ambocquido.

Isadaidbon: Cuessunnenu, cac Saudo cuenaid

²³ Adembidi iuec ushquin Saudon chuibansho tantiash: Cuessunnenuna, quiash isadaidbo aid cuessunnete bunsho

²⁴ tantiaquidën chiac Saudon tantiapanëdash. Aden Saudon tantianubi abi cuessunnenuen shubu dadpen icquid abichobi tsicatequin daquënë uaidën shëcuën shëcuënquien cuëmanshun: Saudo puduensho cuessunnenu, quequin abi chieshënquidon caimpanëdash.

²⁵ Aden cainsho issun: Saudo cuessunnenushe, queshun aid inchëshëmbi tsitsan dapan antsaduntanquin tsicatiaid quënë uaid cachoc Saudo imbudpanëdash.

Edusaden yacno Saudo tabadaid

²⁶ Aden imbudac budanec nidec Edusaden yacno choash Saudo: Esus tantiaquido iccuededsho istannu, quesho tantiash: Saudon: Esus tantiaquid nebi, quec muaquin ubi bednushe, quiash aido dacuëdcuededpanëdash.

²⁷ Adnubien Bednaben Esus chuibennequido iccuededacno buanquin Saudo iuedpanëdash. Aden iuedshun: Saudon Damasco yacno nidquin Nuquin Icbo ispaccosh. Aden ismec Nuquin Icbo Saudobëd onquepaccosh. Adanec shubu dadpen icquid Damasco yacno choshon dacuëdenquio icquin Esus chuibampaccosh, quequin Saudon naid Bednaben chuibampanëdash.

²⁸ Aden Bednaben chuibanac Esus tantiaquidon Saudo dacuëdënenquio yannubi aidobëdi capuquin Saudon Edusaden yacnoshontsen dacuëdenquio icquin Esus chuibanuapanëdash.

²⁹ Ambo capuquin isadaidbo quidiecon onqueten onquequido istuidshun Saudon adembidi Esus chuibansho tantiash aidotsen Saudo cuessunnete bumpanëdash.

³⁰ Adec Saudo cuessunnete bunsho tantiashun Sesadea caid yacnoba Esus tantiaquidon Saudo buanshun abi tishnëdacno Tadso caid yacno Saudouidtsëqui nidmepanëdash.

Saudo nidan Esus tantiaquidon naid

³¹ Aden Saudo nidmian Esus tantiaquido nidaid Udea yacnocquido yec nidaid Cadidea caid yacnocquido yec nidaid Samadia caid yacnocquido yec quec dacuëdenquio yec tabadpanëdash. Adec tabadec: Nuquin Papan Chiaid tantiabennu, quesho Nuquin Papan Mayan Bëdan tantiamiac bëdambuec tabadpanëdash. Adec tabadquin Esus chuibansho tantiash tantiesa icbuedi Esus tantiaquid dadpenquio yampanëdash.

Petedon Eneas bëdanmiaid

³² Adnubien Petedo Esus tantiaquido utsi utsien isbidanec nidequi shubu dadpen icquid Dida yacnotsen Esus tantiaquid utsibo isec niduapanëdash.

³³ Ambo seta 8 ted matanmec dada Eneas cuëmëdquid shëquëquenquiocquid ueten uesho Petedon istuidshun:

³⁴ Esuquidistun mibi bëdanmeque. Nidtoshon min uete buannun nacnenta, Eneas, Petedon cac badedquio bëdanec nidtopanëdash.

³⁵ Adec Eneas capucuensho isash shubu dadpen icquid Dida yacnocquidobëdi nidaid Sadon caid yacnocquido dadpen Esus tantiaquid yampanëdash.

Dodcas uincuenmiaid

³⁶ Adnubien Dida caid udictsëc shubu dadpen icquid Ope caid yacnocquid Esus tantiaquid chido Tabita cuënshumbic quidiecon onqueten Dodcas cain cuënaid icpanëdash. Aidëmbi atona nibëdquido nashundednequimbi pete nibëdquido menedednepanëdash.

³⁷ Aidi nëncuenash uënësso issun abëd icquidon aton dada dapanshun shubu abuc quënë icquidën nampanëdash.

³⁸ Aden nanshun: Ope anoentsëc icquid Dida caid yacno Petedo tabadec, quesho tantiashun Esus tantiaquidon: Aid chomenu, quequin dada daëd nidmiac nidshun Dodcas uënësbued Petedo chuituidquin: Ma badedquio chono, quiosh, cac

³⁹ aidobëd badedquio Ope yacno Petedo nidpanëdash. Adec nidec Ope yacno chosho issun abuc quënë icquidën Tabita cashumbic Dodcas uënësaid uiacno puduedmepanëdash. Ambo puduedsho issun shubiquimbi niantebon Dodcasën uënësabicquin tuscabued dashcute dadpen Petedo ismepanëdash.

⁴⁰ Adosho issun abitedi puduen puduenmiash dannëshën sebudash Nuquin Papa chiec onquetanec nidtoshon uënësbued isquin: Nidto, Tabita, Petedon cac uincuenquin Petedo isequi badedi uëtsëdtopanëdash.

⁴¹ Uëtsëdtosho issun mëdinquin nidtomeshun niantebobëta Esus tantiaquido utsibo cuënquin chochomeshun ambi uincuenmebued ismepanëdash.

⁴² Adoac issun Dodcas uincuenmiaid chuibanac Ope yacnocquido dadpen Esus tantiaquid yampanëdash.

⁴³ Adnubien Petedo Ope yacnocquid nëish iua bitsi chodcashun nacnenquid Simon cuëmëdquidën shubun iuec tabadpanëdash.