Hechos 8 - El Nuevo Testamento en matsés

Saudon Esus tantiaquido mëyanmiaid

¹ Esteban cuënoten sesequin cuessunnenu, cac: Ai, adota, quiash ambobi isec Saudo tsadpanëdash. Esteban sesiaid uëshëmbi Edusaden yacnoshon Saudon Esus tantiaquid utsi utsien cumapenen mëyanmequin tauadopanëdash. Adosho isash Esus chuibennequido ambobi tabadpanëdash. Adnubien Esus tantiaquid utsibo uanno uannoec nidannec nidaid Udea yacno utsi utsiec nidanniash tabadnubi Samadia caid yacno nidanniash utsibo tabaduapanëdash.

² Adec nidanniambic Nuquin Icbo tantiaquidombo Esteban chococash iuec cumapenec sedenquec shubicuededpanëdash.

³ Adnubien Esus tantiaquidtedi chieshënquin Saudon shubun shubunquiec puduedcuennequin dadabëtabi chido bedmeshun quënën tsadunmebampanëdash.

III. NIDAID SAMADIA YACNOCQUIDOBËTA UDEYA YACNOCQUIDO ESUS CHUIBENNIAID ( 8.4—9.43 ) Samadia yacnoshon Chiaid Bëda Esusën naid chuibanaid

⁴ Aden Saudon Esus tantiaquido mëyambanosh, quesho tantiash Edusaden yacnouësh cuenec shubu dadpen icquid utsi utsiec yacno nidanneshun Esus tantiaquidon: Esus tantiash Nuquin Papabëd tabadte iquec, quequin Chiaid Bëda Esusën naid chuibennepanëdash.

Uedipen naid

⁵ Adembidi Esus tantiaquid utsibon: Niante nashunquin menequid icta, cabued Uedipe cuëmëdquidën shubu dadpen icquid Samadia caid yacno nidshun Esuquidistun naid chuibanuapanëdash.

⁶ Aidën nadatiambocquin nabanquimbi Esus chuibansho iccuededquin ambocquidon bëdambuen tantiapanëdash.

⁷ Aidëmbi nadatiambocquin nabanac podobitsi icsa dapuduedaid icsho dapuduenmiac sidquianec cuempanëdash. Adembidi dada daicsash shëquëquenquiocquidbëta tidinquequido Uedipen dadpen bëdanmebampanëdash.

⁸ Adosho isash Samadia yacnocquid dadpenquio cuishonquecuededpanëdash.

⁹ Adnubien Samadia yacno ënden bedanquin nënëchoquid icquin nadatiambocquin naquin ismiac anocquido tantiadempambo icpanëdash. Adembidi: Matsesën chuiquid nebi, quequin muaquin chuipanëdash, Aid dada Simon cuëmëdquid nepanëdash.

¹⁰ Aden nabansho isash tantiadempambo yec tabadec: Abimboshenda caposh. Nëid dada Nuquin Papa caidën nadatiambocquin nabanquin tantiamiaid nec, quequin ambocquidobëtan aton chuiquidon aidën chuisho tantiapanëdash.

¹¹ Aden iuen podobitsi icsan namiac Simonën nadatiambo icquin muaquin ismiac isnuequid dadpen aid yacno chochoash iccuededquin tantiadennepanëdash.

¹² Adnubien Uedipen: Nuquin Papan namiacno puduedmianquid Esus nec, quequin Chiaid Bëda chuibansho tantiash Esus tantiaquid dadpen dadabëdi chidobo yampanëdash. Adsho issun aidotedi acten mentobampanëdash.

¹³ Simontsen: Esus tantiaquid nebi, quesho Uedipen acten mentopanëdash. Adoac Uedipe tsibananshun aidbëd capuquin Uedipen nadatiambocquin nabansho isash tantiadempambo yec: Adopenshenda nabampec, quequin ispanëdash Simonën.

Petedobëta Uan Samadia yacno nidmiaid

¹⁴ Adnubien Edusaden yacnoshon: Samadia yacnocquidon Esus tantiabenac caosh, quesho tantiashun Esus chuibennequidon Petedobëta Uan Samadia yacno nidmepanëdash.

^15-16 Adoac aid daëdi nidanneshun: Esus tantiaquid acten mentoaido nëidtedi nec, quequin ambocquidën chuisho tantiashun Nuquin Papa chuiquin: Nëidtedi actenuidtsëqui mentoaido yec min Mayan Bëda meniacmaido neque. Min Mayan Bëda mene, Papa, quequin

¹⁷ Petedobëtan Uanën mëdanten Esus tantiaquido mamishbampanëdash. Aden mamishbannubi aidtedi Nuquin Papan aton Mayan menepanëdash.

¹⁸ Aden Petedobëtan Uanën aido mamishquin chuinubi Nuquin Papan aton Mayan Bëda menesho isash Simon: Ubi mëquiac. Mibi piucquid menenu.

¹⁹ Mimbi matses mamishacpadembidi umbi mamishaidtedi ma Nuquin Papan aton Mayan Bëda meniaid icpanu, quepanëdash.

²⁰ Adoaquien Petedon: ¿Piucquid menecta mibi Nuquin Papan namiaid icpe? Aden mimbi tantianuc chian annëdënquiacno ma mibëdi min piucquid cuidadtequid icpanu.

²¹ Nuquin Papa tantiesa icquin icsambuen tantiaquin umbi nacpadombuen natiapimbo mimbi iquendac.

²² Mimbi icsambuen tantiaid ënta. Aden ënshun: Umbi icsambuen naid tantienquio yec bëshunta, Papa, quequin Nuquin Papa chuita. Ma mimbi icsambuen naid tantienquio yec bëshumpanu.

²³ Mayan icsa Satanasën namiaid icquin umbi naid natiapimbo yec cumapenec chieshec nëishshun mimbi icsambuen chuisho tantiembi, capanëdash Petedon.

²⁴ Adoaquien: Mimbi chuibocpaden chian annëdënquequid nënenushe, queshun ubi tantiaquin: Aidën icsambuen naid tantienquio yec bëshunta, Papa, quequin Uambëtan Nuquin Papa chianneta, Petedo, quepanëdash Simon.

²⁵ Adec nidaid cuëshë Samadia yacno tabadquin Petedobëtan Uanën: Umbi isondaidën Nuquin Icbo Esusën Chiaid chuinu, quequin Nuquin Papan Chiaid chuibanash Edusaden yacno chouapanëdash. Adec podquiedën choquimbi nidaid cuëshë Samadia caidën icquid shubu daëdpactsëcquid utsi utsiec yacnoshontsen Chiaid Bëda chuibanuapanëdash.

Uedipen nidaid Etiopia caid yacnocquidon chuiquid chiaid

²⁶ Adoshombic Samadia yacno Uedipe icsho abëd icquid Nuquin Papan budmiaidën nadopanëdash: Nëuëshquio puduanec nidec Edusaden datambidanec acte dapa mad yacno shubu dadpen icquid Casa caid yacmi shubu nibëdacno podquied nidquidën nidtan.

²⁷ Aden Nuquin Papabëd icquidën chuibocmi nidquin Etiopia caid yacnouësh choquid Uedipen chinuntuidpanëdash. Aton chuiquid tapabi chido Candase cuëmëdquidën piucquid dayun uaquid aid dada nepanëdash. Aidi Edusaden yacno nidash tabadquin Nuquin Papa tantiec cuëdënec tabadanec

²⁸ padpidec Etiopia yacno nidequi aton nidaid cano cabachun buannubi antsadquin Nuquin Papan oncamiampid Isayasën dada uampid isquin chuibanec tsadpanëdash.

²⁹ Adnubien Nuquin Papan Mayan Bëdan: Nidaid cano anoentsëc nidta, cac

³⁰ Uedipe titiquianec aid anoentsëc nidshun Etiopia yacnouësh choquid Isayasën dada uampid isquin chiec onquesho tantiashun: ¿Ada mimbi isbanaid tantie? capanëdash Uedipen.

³¹ Adoaquien: Ubi chuiquin tantiamequid nibëdnuc ¿mitsipadembimbi tantiape? quetanquimbi: Baded antsadtoec cho, cac aidën dayunquio Uedipe antsadtopanëdash.

³² Nuquin Papan dada uamiampid chiec Etiopia yacnouësh choquid onquesho Uedipen tantiabued naden chiaid nepanëdash: Nëish iua obeca cuessunnemenuen buanac cuëdenquio yacbimbuec onquenquio iquendac. Adecbidi obeca bënë bu datasac cuëdenquio yacbimbuen mëyanaqui onquenquio iquendac.

³³ Aidi icsaisa icshobi mëyansho isec: ¿Icsambo icshoda naique? Isnu, quenquio aton matses iquendac. Aidi chido inesa yec ambi tishmiaid nibëdnuc ¿tsuntsin aid naid chuipec? Adquid icsho uënës uaid iquendac, quequin chiampid nepanëdash.

³⁴ Aden chiampid abi isec onquebued Uedipe ismeshun Etiopia yacnouësh choquidën: Umbi isquin chuibued ¿tsutsi chuiquin Nuquin Papan oncamiampidën dada uampid isequibi onquepo? ¿Nëid dada uaquin abibi chiadaid isectabi onquepo? ¿Utsi chuibanaidta neque? Ubi chui. Tantianu, capanëdash Uedipe chuiquin.

³⁵ Adoaquien Uedipen: Matses abitedi icsaid bedshunash abided cuidadec uënësaid Esus Nuquin Papa yacno puduedmianquid nec, quequin chuiquin Isayasën dada uampid nec, quequin Etiopia yacnouësh choquid tantiamequin chuipanëdash.

³⁶ Aden chuibanec podquiedën nidquimbi Etiopia yacnouësh choquid Esus tantiaquid yanshun acte istuidshun: Acte cueneque. Is. ¿Ada ubi acten mentotsia? capanëdash.

³⁷ Adoaquien Uedipe: Esus tantiaquidquio nebi, quesho mibi acten mentoembi, capanëdash. Adoac: Ai, nëbi Nuquin Papan Madombo Esuquidistu nec, quequin tantiembi, queshun Etiopia yacnouësh choquidën:

³⁸ Nidtuidme, cac nidaid cano nidmequidën cabachu nidtuidmian acte nantan budshun Etiopia yacnouësh choquid Uedipen acten mentopanëdash.

³⁹ Adashic acte nantanuësh abidaëdi pudundosho Nuquin Icbon Mayanën Uedipe buampanëdash. Adoacsho padpiden aid isenquio iquequi: Esus tantiec bëdambo iquebi, quec cuishonquec aton nidaid Etiopia yacno nidpanëdash.

⁴⁰ Adnubien Nuquin Papan Mayan Bëdan buanac Uedipe nidaid utsi Asoto caid yacnouësh isadcuempanëdash. Ambo capucuennequin shubu dadpen icquid yacno yacnombuen Chiaid Bëda Esus abided uënësaid chuibanequi shubu dadpen icquid Sesadea yacno chopanëdash.