Hechos 3 - El Nuevo Testamento en matsés

Petedon caputiapimbo icquid bëdanmiaid

¹ Adnubien uëshë budec 3 yannuc aton matses isadaidbon nadedniacpadec Petedobëd Uan Nuquin Papa tabadte shubu dapa yacno Nuquin Papa chiec nidpanëdash.

² Ambo nidnubien dada caputiapimbo yec uishcaid puduedte Shëcuë Bëdaidquio quequin cuënaid yacno utsibon buanshun dectanaid icpanëdash. Aidi anin tishacchobi yec caputiapimbocquid nepanëdash. Adquid icsho badiadquidën badiadquidënquien buandednequin aid shëcuë cuëmano nanded nandedac uequimbi utsi utsiec chochosho issun: ¡Piucquid ubi mene! cabampanëdash.

³ Adnubien Petedobëd Uan chosho issun: ¡Piucquid ubi mene! capanëdash caputiapimbocquidën.

⁴ Adoaquien Uambëd nidtuidshun Petedon caputiapimbocquid bëisquin: Ubi daëdi is, capanëdash.

⁵ Adoac: Ubi piucquid menec, quequin tantiaquin aid daëd issobien

⁶ Petedon: Piucquid cuna nibëdec. Umbi tantiaid Esuquidistu Nasaded yacno iccondaidën bëdanmiacpadec bëdanec nidtoash nidec nid, capanëdash.

⁷ Aden chuitanquin caputiapimbocquidën mëdante abiucquio bedtanquin Petedon nidtomiac badedquio taëshbëd taë uidënquio yanec nidtopanëdash caputiapimbocbuedi.

⁸ Bëdambo yanec puduanec capuampanëdash. Adec bëdanash Petedobëd Uan chedobëd capuashic Nuquin Papa tabadte shubu dapa daquënë uaidën puduedash: Nuquin Papa bëdamboshë iquec, quequin aid tantiec pudundotan pudundotanec cuishonquequiopanëdash.

⁹ Adec pudundotannec cuishonquec capushobien isquidon nadobededpanëdash:

¹⁰ Nuquin Papa tabadte shubu dapa daquënë uaidën puduedte shëcuë Bëdaidquio quequin cuënaid yacno tsadunac tsadec: Piucquid ubi mene, quebuedi capueque. Is, quec tantiadempambo yec dacuëdec tabadquin isbededpanëdash.

Nuquin Papa tabadte shubu dapa cuishubu uaidënshun Petedon chuibanaid

¹¹ Aden caputiapimbocquid bëdanmiac Petedobëta Uan nianmenquio yec aidobëd chuiquid tapa Sadomonën Nuquin Papa tabadte shubu dapa cuishubu uampidën puduednubien iccuededquid titinquianec choquin tsibananash auëshquiotsen tantiadempambo yec tabaduapanëdash.

¹² Adec tabadsho issun Petedon naden chuibampanëdash: Cun matses isadaidbo ¿Atotsi quiash: Padtec, quequin ubi daëdi mibitedishun bëise? ¿Ubi daëdshun nacta nëid capupadic? ¿Ubi bëdambocquid icquindambi nadatiambocquin nadio?

¹³ Aidi Abadauan yec Isac yec Acobo yec nuquin tsusedpabo yec quequidon Papa campidën naid nec. Aidëmbi ambi nidaidën chomiaid icsho Esus nëbi abitedishun Icbombo icmiac Nuquin Papan dayun tabaduaic. Aidi Aton Papa yacno nidabicsho bedmeshun Pidato meniaquien: Nëid dada icsambuen naisa neque. Nidmenu, quequin tantiaquin Pidaton chiaqui: Icsambocquid neque. Uënës uamequimbien ictiad, quequin mibitedishun chuipondac.

¹⁴ Esus icsaisa yec bëdamboshëcquid nec, quequin utsin tantianubi aid bunenquio icquin: Chieshëmënec cuessunnianquid quënën tsadunaid chicquin Esusded cuidta, quequin mibitedishun chuipondac.

¹⁵ Aden mibitedishun Esus uënës uamepondac. Aiduidtsëqui Nuquin Papabëd matses tabadmequid icsho uënës uamiacshobien Nuquin Papan uincuenmepaccondash. Aden uincuenmiacsho ubitedishun ispondambi.

¹⁶ Esusën nëid bëdanmec, quequin umbi abimbo tantianubi nëid dada uishcash uesho mimbi isbededbuedi bëdanash bëdambuec capusho mibitedishun isec.

¹⁷ Cun matses isadaidbo mibitedi neque. Tantia. Chuinu. Nuquin Papan Chomiaidquio nec, quequin tantienquio icquin min chuiquidobëtan mibitedishun Esus uënës uamiondac.

¹⁸ Adote chuiquin Nuquin Papan: Umbi Chomiaid Quidistu Mesias caid matsesën uënës uaendac, quequin ambi oncamiaidtedi Nuquin Papan dada uamiampicpadembi napondash.

¹⁹ Nëbi mimbi icsambuen naid ënshun Nuquin Papa tantiata. Ma mimbi icsambuen naidtedi tantienquio yec bëshumpanu.

²⁰ Ëndenquimbo Ambi tantiampicpaden Chomiaid Mesias caid Esusën ma mibitedi bëdambo icmepanuna.

²¹ Nuquin Papan abitedi bëdambo icmete uëshë choabicnuc ambi chiampicpadequi nëbi Esus abuc aton Papabëd tabadec. Adec tabadte chuiquin Nuquin Papan oncamiaidon utsin utsinquien dada uapampic.

²² Adembidi nuquin tsusedpabo Moisesën naden chuipampic: Ambi oncamiaid ubipadquid utsi iuecshun Nuquin Papan chomendac. Aidi isadaidbo nendac. Aid choshon chuibansho tantiashun aidën chiactedi bëdambuen nabanta.

²³ Aidën chiacpadombuen naisa Nuquin Papan: Cun matses nec, catiapimbo iquendac, quequin Moisesën dada uapampic.

²⁴ Adombuembidi Samuedën chuibampampic. Adombuembidi aid tsibanquido Nuquin Papan oncamiaid utsibon matsesën nëbi natequid chuibanuapampic.

²⁵ Nuquin Papan oncamiaidon tsiuecquido yec aidën madobimbuecquido mibitedi nec. Tsusedpa Abadauanën tsiuecquidobidi mibitedi neuaic. Aidon tsiuecquido nidaid abitedi yacnocquido icsho Nuquin Papan Abadauan chiampicpaden bëdambuen isaido mibitedi nec. Naden Abadauan Nuquin Papan chuipampic: Mibi ënden uënësampid icnuc iuecquimbocshon aton matsesbëta matses utsi utsien min tsiuecquidën bëdambuen isquin bëdambo icmendac, quepampic,

²⁶ Aden Abadauan ambi chiampicpadquid aidën tsiuecquid Nuquin Papan Mado choacsho mimbi uënës uamepondac. Aden uënës uacsho Nuquin Papan uincuenmeshun nuquin matsesëmba ambi icsambuen naid ënsho ma ambi bëdambuen isaid icpanuna, quequin Petedon chuipanëdash.