Hechos 24 - El Nuevo Testamento en matsés

Uedisën tantianubi Pabadon ambi naid chiaid

¹ Adashic 4tedec ushash Nuquin Papa ismequin nëish iua cuessunneshun pichicaquidon chuiquid tapambo Ananiasbëd isadaidbon chuiquido tsësiobo utsi utsiec Pabadon icsambuen naid Uedis chuinuec Sesadea yacno chochopanëdash. Icsambocquid nec, quequin chuibanquid Tedtudo cuëmëdquidtsen bëpanëdash.

² Aido chochoacsho issun Uedisën Pabado chomiacsho issun isadaidbon chuiquidon tantiacpaden chuinu, quequidën Tedtudon naden Uedis chuipanëdash: Tantia. Mibi chuinu. Chuiquid bëdambocquid icquin mimbi bëdambuen namebanac isadaidbo bëdambuec tabadec. Adembidi aido nashunnuen dadpen mimbi nacnenmec.

³ Chuiquid tapa Uedis, mimbi aden namebanacsho issun: Bëdambocquid mibi nec, quequin mibi chiec nebi.

⁴ Aden iuen chuibanquin mibi chieshtomete bunenquiocquin isadaidbon chushcabued badedquio chuinu. Tantiata.

⁵ Nëid dada mimbi bëmebued icsambocquid nec. Adquid iquec Nasaded yacno iccondaid tantiaquidon chuiquid nec. Aidëmbi nidaid utsi utsiec yacno nidshun ambi tantiaid chuibanquin isadaidbo cumapenen chushcananmequin cuëdcuededmiac cuëshëdcuededpac caosh.

⁶ Aidëmbi Nuquin Papa tabadte shubu dapan puduedtemaidën matses utsi puduedmesho issun bedpombi. Bedash tsusedpabon: Naden nata, quequin chiampicpadembi cuidte bumpobi.

⁷ Adec: Cuidnu, quenubien comandante Disias cuëmëdquid choshon cumapenec cuëdquin Pabado mënchictanquin buamposh.

⁸ Pabadon ambi naid chuisho mimbimbo tantiashun: Isadaidbo chuiquidon abimbo chiosh. Icsambocquid nec, quequin mimbi chuiuapatsiac, quepanëdash Tedtudo: Pabado icsambocquid nec, Uedis camenuec.

⁹ Aden chuisho tantiash isadaidbotedi: Ai Tedtudon chiacpadec iccosh, quequin chuibededpanëdash.

¹⁰ Adsho tantiashun: Onque, quequin mëdante uiccaquin Uedisën ismiac Pabado nadec onquepanëdash: Chuiquid tapan tantiata. Umbitsen chuinu. Dadpen seta matanmequin cun matses isadaidbo abi chushcananaid tantiashun mimbi bëdambuen tantiaquin nacnenshundennioc. Adquid mibi nec, quequin tantiaquin: Umbi naid mibi chuibanec bëdambo iquebi.

¹¹ Edusaden yacno nidash ambobi 11tedec ushpobi. Ubi amboshon isbuedon: Abimbo caic, quequin nëmbo choshon mibi chuitsiash. Edusaden yacnouësh Nuquin Papa tabadte shubu dapa tsicatequin daquënë uaidën Nuquin Papa tantiec puduedtennepobi.

¹² Ambo puduedash utsibëd chushcananenquio iccobi. Adembidi chuibanquin utsibo nëishmequin chushcamenquio iccombi. Nuquin Papan Chiaid chuibante shubun puduedshun adoenquio iccombi. Edusaden yacnocquido utsibotsen aden chushcamenquio iccombi.

¹³ Pabadon icsambuen naosh, quequin Tedtudon umbi naid chuibambued: Abimbo caic, quetiapimbo utsibo iquec.

¹⁴ Nëiduidtsëqui abimbo iqueque. Tantia. Chuinu. Cun tsusedpabon Papa campicpaden Nuquin Papan Chomiaid tantiesa isadaidbon chuiquido icnubi aid tantiaquid nebi. Adembidi Nuquin Papan: Naden nata, quequin chiaidbëta Nuquin Papan oncamiaidon dada uaquin chiampid: Abimbo iquec, quequin tantiembi.

¹⁵ Adembidi matses uënësacsho Nuquin Papan bëdambocquidobëta icsambuen naquido uincuenmendac, quequin Nuquin Papan oncamiaidon chiampicpadembidi tantiembi.

¹⁶ Aden tantiaquin Nuquin Papan: Bëdambuen mimbi naic, ma ubi canu, queshun bëdambuen nabanec tabadebi. Adembidi matsestedishun: Bëdambuen mimbi naic, ma ubi canu, queshun adombuembidi bëdambuen nabanec tabadebi.

¹⁷ Adequi seta dadpen matanmec nidaid utsi utsiec yacno capucuennec tabadcuennequin: Edusaden yacnocquid isadaidbo bunec tabadec, quesho tantiash piucquid menenuec chopobi. Adembidi: Nuquin Papan bëdambuen dayun uabennioshi, quequin Nuquin Papa ismequin piucquid nibëdquido meneuanuec chopobi.

¹⁸ Aden menenuec Nuquin Papa tabadte shubu dapa tsicatequin daquënë uaidën puduedobi. Adembidi Nuquin Papan: Naden nata, quequin chiacpadombuen nainquin nabanombi, quec ubi icsaid ucacbimbuen acte bëdambocquidën dapanmenuec puduedash ubentsëqui icsambuen nainquio yec capusho ubi chushcabuedon istuidposhi.

¹⁹ Ubi capusho istuidquido isadaidbo nidaid Asia caid yacnouësh choquido niosh. Pabado icsambuec tabadsho isombi, quepac caosh. Aidombo choshon ambi chiaid abimbo icnuc nëshuntsen adombuembidi chuitiadquidi nec.

²⁰ Adembidi isadaidbon chuiquidon: Pabadon icsambuen nac caosh, quequin aton matsesën chuiquido iccuededacnoshon ubi chuibocpadembidi nëshuntsen adombuembidi chuitiadquidi nec.

²¹ Auëshquio nëiduidtsëqui naden chiec cumapenec cuëdobi: Uënësash uincuentequid iquec, quequin umbi chuisho tantiashun: Icsambocquid nec, quequin iccuededacnoshon chuiboshon isadaidbon mibi chuiquin naic, quepondash Pabado Uedis chiec.

²² Aden Pabadon chuisho tantiash: Nuquin Papa yacno tabadmianquid iquec, quequin utsibon chuisho tantiabued yec: Nëbi mibitedishun chuibansho tantiombi. Comandante Disias nëmbo choshon chiac tantiashun mibi padpiden chuimembi, quepanëdash Uedis Pabadobëta isadaidbon chuiquido chiec.

²³ Aden chuishumbic naden Uedisën sondadon chuiquid capitan chuipanëdash: Shubuno Pabado buanuashun quënën tsadunshun. Puduennushe Ista. Aid: Umanuc capuec nidnu, quesho tantiash aidbëd nidta. Adembidi abi nashunquin isquido chosho issun iuedta, quequin chuita, quepanëdash Uedis capitan chiec.

²⁴ Adashic daëdpactsëc ushash padpidec Uedis aton chido Dusidabëd chopanëdash. Aton chido isadaidbo nepanëdash. Adec choshon Uedisën abi yacno chomiac Pabadon ambi tantiaid Esus chuibansho tantiapanëdash.

²⁵ Aden chuibanquin nadembidi chuiuapanëdash: Icsambuen nainquio yec utsibobëd bëdambuec tabadta. Adembidi: Icsamane, quequin Nuquin Papan chiacpadenuidi nabanquin mibi bunaid nainquiocquin ënta. Adembidi Esus tantienquio icsho chian annëdënquequid Nuquin Papan nësecanushe, quequin Esus tantiata, quequin Pabadon chuibampanëdash. Aden chuibanac dacuëdtanec: Umbi nabante nibëdnuc padpiden mibi chuimenuen chomeuaimbique. Nidec nid, capanëdash Uedisën.

²⁶ Adshumbic abi yacno Pabado Uedisën chomeded chomededpanëdash. Puduente bunquin Pabadon ubi piucquid menetsiash, quequin tantiaquin Pabado chomiash aidbëd Uedis onquedennepanëdash.

²⁷ Adashic seta daëd matanmiash Podsio Uesto cuëmëdquid cobednadod yampanëdash. Aid cobednadod yannuc nidnu, quequin: Nidta, cainquiocquin Uedisën abi Pabado quënën tsadnubi naden tantiaquin niampanëdash: Pabado quënën tsadunaid ma adequi icnu, quequin umbi nianacsho isash: Bëdambocquid nec, quequin isadaidbon ubi chuibededtsiash, quequin tantiaquin Uedisën Pabado niampanëdash.