Hechos 23 - El Nuevo Testamento en matsés

¹ Adoaquien isadaidbon chuiquid tapabo iccuededsho isquin naden Pabadon chuipanëdash: Cun utsibo, umbi naid chuibannu. Tantiata. Nuquin Papan isquin tantianubi ambi: Naden nata, quequin chiaid nabanquidquio nebi, quepanëdash.

² Aden chuisho tantiashun Nuquin Papa ismequin nëish iua cuessunneshun pichicaquidon chuiquid tapanquio Ananiasën: Muaquin chieque. Ëccues, capanëdash Pabadon dayun tabadquido chuiquin.

³ Adoaquien Pabadon: Bëdambocquid danmianquid icsho Nuquin Papan mibi ëccuesmendac. Nuquin Papan: Naden nata, quequin chiaid tantiembi, quequimbi ubi ëccuesmequin Nuquin Papan Chiaid ma mimbi niacpayoc, quepanëdash Pabado isadaidbon chuiquid tapambo caic.

⁴ Aden Pabadon chuisho tantiash abi datsidadquido: ¿Aden Nuquin Papa ismequin nëish iua cuessunneshun pichicaquidon chuiquid tapambo icsambuen chuishunquinda nai? quepanëdash.

⁵ Adoaquien Pabadon: Nëish iua pichicaquidon chuiquid tapambo nec, quequin tantienquio iccombi. Aidi adquid icsho umbi chuibocpaden chienquio ictsenombi. Mimbi abimbo chioc. Min chuiquid tapa icmiaid icsambuen chuishunenda, quequin Nuquin Papan chuiquin dada uamiampid iquec, quepanëdash Pabado.

⁶ Aden chuishumbic: Iccuededquid utsi utsiec saduseobobëd icquido icnubi utsi utsiec padiseobobëd icquido iquec, quequin tantiec: Tantia. Chuinu, cun matses. Padiseobon tishmiaid yec padiseobo nebi. Adquid icquin: Uënësash uincuentequid iquec, quequin tantiaquid icsho: Icsambocquid nec, quequin mimbi ubi chiec, quec cumapenec onquequin Pabadon iccuededquido chuipanëdash.

⁷ Aden Pabadon chuisho tantiashien saduseobo: Uënësash uincuente nibëdendac, quequin umbi tantiacpaden Pabadon tantienquio iquec, quec cumapenec cuëdcuedednubi padiseobo: Uënësash uincuente iquendac, quequin umbi tantiacpaden Pabadon tantiec, quec cumapenec cuëdcuededpanëdash.

⁸ Saduseobombidi: Nuquin Papabëd icquid nibëdec. Podobitsi nibëdec. Uënësash uincuentequid nibëdec, quequin tantianubi padiseobon: Uënësash uincuentequid iquec. Nuquin Papabëd icquid iquec. Podobitsi iquec, quequin tantiec.

⁹ Aden ambi tantiacpaden chuibanec cumapenec saduseobobëd padiseobo natiambo cuëdcuededpanëdash. Adec onquec cuëdcuedednubi Nuquin Papan Chiampid tantiamequid padiseobo: Nëid dadan icsambuen naid nibëdec. ¿Mitsipadquidëmbien chuichitash? Mayanëmbien chuichitash. Aidën padenquiocnoc Nuquin Papabëd icquidëmbien chuichitash. Ma Pabadon chuibued abimbo iqueyoc, quequin padiseobon saduseobo chuipanëdash.

¹⁰ Adec cumapenec cuëdcuededec chushcanansho tantiashun dacuëdquin comandanten: Podon shoyonquin Pabado canite dëchicnushe, queshun: Bedshun sondado ushte shubu nuntan padpiden buanta, cac sondadon Pabado buampanëdash.

¹¹ Aden buanshun shubu nuntan sondadon iuedaquien Pabado ushash badiadash padpidec inchëshquidën Pabado yacno choec isadcuenshun Nuquin Icbon: Chieshtoenda, Pabado. Mimbi Edusaden yacnoshon ubi chuibambocpadembidi shubu dadpen icquid Doma yacnoshontsen mibi chuibanmembique. Dacuëdenquio yec dayacquio yec nidta, quequin chuipanëdash.

Pabado cuessunnenu, quequin ompodshon cainte chiaid

^12-13 Adec Pabadobëd Nuquin Icbo onquebombien badiadash isadaidbo 40ted onquecuededec: Pabado cuessunniambo icquin pete penquiocquin buna mëmunembi. Aden naquin Pabado cuessunniambocsho issun Nuquin Papan ma ubitedi cuidpanu, quequin abimbo chiembi, quecuededpanëdash.

¹⁴ Aden nanuna, quecuededash isadaidbo tsësiobobëd nëish iua cuessunneshun pichicaquidon chuiquido yacno nidash: Pabado cuessunniambo icquin penquio icquin buna mëmunembi, quequin muenquio icquin chuibanombi. Adec muasho mabi Nuquin Papan cuidpanu, caombi, quequin chuipanëdash.

¹⁵ Aden chuishumbic: Ubitedishun ompodshon Pabado cuessunnenu, quequin cainnu. Nëish iua pichicaquidon chuiquidobëd isadaidbon chuiquid tapabo icquin mimbimbo naden comandante chuitanta: Pabadon naid bëdambuen tantianu. ¿Ada badiadshun padpiden isadaidbo chuiquido iccuededte shubuno bëmeuatsia? quequin chuita. Adoac Ai, queshun Pabado sondadon podquiedën bësho cuessunnetsiambi, quepanëdash Pabado cuessunnete bunquido.

¹⁶ Aden aidon chiaid tantiashun aton piaquën sondadon ushte shubuno nidshun Pabado chuipanëdash.

¹⁷ Adoaquien Pabadon sondadon chuiquid capitan caid naden chuipanëdash: Cun piac comandantebëd onquete buneque. Aid yacno buantan, capanëdash.

¹⁸ Adoac Pabadon piac comandante yacno buanash sondadon chuiquid capitan: Mimbi quënën nauedmebued Pabado cuëmëdquidën chioshi. Cun piac comandante chuite buneque. Aid yacno buantan, cac bëombi, quequin chuipanëdash.

¹⁹ Aden chiaquien aid mëdinanquin udictsëc buanshun comandanten: ¿Atotsi ubi chuinuec cho? capanëdash.

²⁰ Adoaquien Pabadon piaquën: Nëbi isadaidbon ambi namiaid mibi yacno chomec. Aden chomiac nëmbo choshon naden chiendac: ¿Ada badiadshun isadaidbon chuiquido iccuededte shubuno Pabado mimbi buanmepatsia? Aidën naid chuibansho bëdambuen tantianuna, quiosh, cata, quequin chomioshi, quequin mibi chiendac isadaidbon chuiquidon chomiaidën.

²¹ Aden muaquin chiac: Abimbo caic, quequin tantienda. Comandanten Pabado bëmetsiash, quequin tantiaquin cun cu cuessunenuen nëbimbobi caineque. Buanmenda. Aden cuessunnenuequid: Pabado cuessunniambo icquin petebëta acte aquenquio icquin buna mëmunembi. Cuessunniabi icsho ma ubi Nuquin Papan cuidnu, quiosh. Adshun nëbimbobi podquied cuëmanshun ompodshon dada 40ted udictsëc icquidon cuessunnenuen mimbi: Buantan, caiduidtsëqui cainec tabadec, quequin comandante chuipanëdash.

²² Adoaquien comandanten: Isadaidbon chiaid mimbi ubi chuibued utsi chienquio yec nidec nid, capanëdash comandanten Pabadon piac chuiquin.

Chuiquid Uedis yacno Pabado buanmiaid

²³ Aden Pabadon piac nidmeshun sondadon chuiquid capitan daëd chomiash comandante nadpanëdash: Inchëshën 9 yannuc shubu dadpen icquid Sesadea yacno ma mibëdi mimbi namiaid sondado 200ted nidnu. Mitsana buannuen nacnenta, cata. Adombuembidi cabachu catsadquid 60ted icquido chuiquin: Nidnun nacnenta, quequin chuiuata. Adombuembidi shocosh sianten senu, quequin sananquid 200ted icquido chuiquin: Nidnun nacnenta, quequin chuiuata.

²⁴ Adembidi Pabado cobednadod Uedis yacno bëdambuen buannun cabachu catsadmenuen nacnenta, capanëdash comandanten sondadon chuiquid capitan daëd chuiquin.

²⁵ Aden chuishumbic comandanten Uedis cobednadod caid chuiquin naden dada uapanëdash:

²⁶ Cadaudio Disias nebi. Chuiquid tapa cobednadod caid Uedis bëdambocquid mibi icsho chuinu. Nëid dada Pabado umbi bedmebued mibi yacno buanmembi, quequin chuiquin dada uaimbique. Isec onqueta.

²⁷ Nadquio iccoshe. Tantia. Chuinu. Pabado isadaidbon bedshun cuessunnetsensho issun: Doma yacnoquido nec, quequin utsin chuisho tantiashun cun sondadobëd choquin mënchiccombi.

²⁸ Aden mënchicshumbic: ¿Atotsi quiash Pabado cuessunnete bumpec? quequin tantianuen isadaidbon chuiquido iccuededacno Pabado buanmiombi.

²⁹ Ambo buanmeshun isadaidbon naden chuisho tantiapombi: Nuquin tsusedpabon: Naden nata, quequin chiaid niacquid Pabado nec, quequin isadaidbon chuiquidon chuiposh. Adembidi ambi nabanaid Pabadon chuisho tantiashun: Cuidquin cuessunnetiadquio iquec, quetiapimbo iccobi. Quënën tsadunmenquioctiadquidi nec, quequin tantiaboshombi quënën tsadunmepombi.

³⁰ Aden Pabado quënën tsadunmeboshombic: Pabado cuessunnenu, quequin isadaidbon podquied cuëmanshun cainec, quesho tantiashun badedquio mibi yacno buanmembi. Adembidi: Pabado icsambocquid nec, quequin aid cuessunnenu, quequido mibi yacno nidmembi. Adoac ma ambibi Pabadon icsambuen naid mibi chuinu, queshun.

³¹ Aden comandanten dada uashun meniac aidën chiacpaden Pabado buanec sondado aid inchëshëmbi shubu dadpen icquid Antipatidis yacno nidpanëdash.

³² Ambo nidash badiadash sondado cabachu catsadquidonuidquio Pabado buanec nidnubi sondado capuquidotedi aucbidi chopanëdash.

³³ Adec Pabado buanec nidequi Sesadea yacno choshon cabachu catsadquidën chuiquid comandante Cadaudio Disiasën dada uaidbëta Pabado Uedis menepanëdash.

³⁴ Aden meniac dada uaid isbanash: ¿Mitsicquid nidaidën icquid ne? capanëdash cobednadod caid Uedisën Pabado chuiquin. Adoaquien Pabadon: Nidaid Sidisia caid yacnoshon tishaid nebi, capanëdash.

³⁵ Aden chiaquien: Mibi icsambocquid nec, caquido chochoacsho issun mimbi nabanaid mibi chuimequin tantiembi, quepanëdash Uedis. Aden chiec onqueshumbic ënden chuiquid tapambo Edodes cuëmëdquidën shubu uaid yacno buanshun nauedmeshun Uedisën: Pabado puduenanec cuennushe. Ista, capanëdash sondado chuiquin.