Hechos 21 - El Nuevo Testamento en matsés

6. Pabado quënën tsadunshun Doma yacno buanaid ( 21.1—28.31 ) Edusaden yacno Pabado chouaid

¹ Epeso yacnocquid Esus tantiaquidon chuiquido acte dapa mad caid cuëman tabadnubi cano dapa antabëdtoanec ubitedi Pabadobëd nidquimbi cuebi potec acte nënantan nidaid nacnëdquid Cos yacno chopondabi. Adashic badiadash puduanec nidec acte nënantan nidaid nacnëdquid utsi Dodas caid yacnotsen choashic auëshquio puduanec nidequi shubu dadpen icquid Patada yacno chopondabi.

² Ambo choashic: Nidaid Penisia caid yacno nidnu, quequid cano dapa istuidash aid antabëdtoanec Pabadobëd ubitedi nidpondac.

³ Adec nidquimbi acte nënantan nidaid nacnëdquid Chipide caid copiocquid datambidanec nidaid utsi Sidia caid yacnotsen choash shubu dadpen icquid Tido yacno chopondash. Ambo choshon ambi ansandoshon bëaid icbo yacno sambudmepondash.

⁴ Ambo pudundoshon Esus tantiaquido istuidash aido yacno puduedash 6tedec ushec Pabadobëd ubitedi tabadpondac. Ambo tabadnubi: Edusaden yacno Pabado cuessunnenuequid iquec, quequin Nuquin Papan Mayan Bëdan tantiamiac aidon: Edusaden yacno nidenda, quequin Pabado chuipondash.

⁵ Aden chuiboc 6ted ushtanec: Nidnunid, quepondash Pabado. Adec: Nidnu, quesho tantiash Esus tantiaquido dada yec chido yec bacuëbo yec quec Pabadobëd ubitedi acte cuëman chochoash dannëshën tinquebudcuededshun Nuquin Papa chiec onquecuededpondabi.

⁶ Aden Nuquin Papa chuitanec: Nidec nid, quequin chiac ubitedi Pabadobëd cano dapa antabëdtoanec nidnubi Tido yacnouësh acte cuëman chochobuedo aton shubuno nidanneuapondash.

⁷ Adec Tido yacnouësh nidequi shubu dadpen icquid Todemaida yacno Pabadobëd choquin ambobi acte dapa mad caidën nidquin cuëscapondambi. Ambo choquin Esus tantiaquido istuidash aidobëd abentsec ushec tabadpondabi.

⁸ Adashic badiadash puduanec podquiedën nidec shubu dadpen icquid Sesadea yacno choash Uedipe Esus tantiaquido nashunquidën shubun puduedpondabi. Esusën: Ubi chuibenneta, caidon: Niante nashunquin menequid icta, cabued utsi 6tedbëd icbued Uedipe nepondash.

⁹ Aidën champi 4ted bënë nibëdquido icpondash. Aidon Nuquin Papan oncamiaid icquin Nuquin Papan: Naden naindambi, quequin chiaid chuibanquido nepondash.

¹⁰ Adec Uedipebëd iuec ushec tabadnubi Nuquin Papan oncamiaid dada Acabo cuëmëdquid nidaid Udea yacnouësh chopondash.

¹¹ Adec choshon Pabadon tsipante bedshun Pabado tatanetanquin mëtanetanec Acabo nadpondash: Nuquin Papan Mayan Bëdan naden chioshibique. Tantia. Chuinu. Umbi chuibocpadombuen isadaidbon Edusaden yacno tabadquidon nëid tsipante icbo bedshun tatanetanquin mëtaneshun buanshun isadaidpembo menendac, quepondash Acabo Pabado chiec.

¹² Aden chuisho tantiashun Sesadea yacnocquid Esus tantiaquidobëtan ubitedishun: Edusaden yacno nidenda, quequin Pabado chuipondac.

¹³ Adoaquien Pabado: ¿Atotsi quiash shubiquin ubi uënësquio icme? Edusaden yacno nidshun Nuquin Icbo Esusën naid chuibansho bedquin taneshun ubi cuessunnetsiash, quequin tantiaquimbi abi Esus chuibanembi, quepondash.

¹⁴ Aden: Nidenda, caqui niacbidanec: Edusaden yacno nidebi, queuapondash Pabado. Adec: Nidebi, quesho tantiashun: Ma Nuquin Icbon tantiacpadec nidshun chuibannu, capondambi ubitedishun.

¹⁵ Aden chiashic nacnenanec Sesadea yacnouësh puduanec Edusaden yacno Pabadobëd nidannepondabi.

¹⁶ Adec nidsho isash Sesadea yacnocquid Esus tantiaquido utsi utsiec Pabadobëd nidquin Emenason cuëmëdquidën shubu yacno buanac puduedash ushpondabi. Aid shubu icbo Chipide yacnouësh choash Edusaden yacno tabadquid ënden Esus tantiabennëdaid nepondash.

Pabado Santiacobëd onquiaid

¹⁷ Adec Edusaden yacno choacsho Esus tantiaquidon: Bëdambo iquec, quiash cuishonquequin Pabadobëta ubitedi iuedpondash.

¹⁸ Adashic badiadash Pabadobëd Santiaco isec nidannepondabi. Ambobi Santiacobëd Esus tantiaquidon chuiquidotedi icpondash.

¹⁹ Adec aidtedi icsho issun: Mibi isec chobi, quetanquin: Umbi Esuquidistu chuibannubi Nuquin Papan tantiamiac isadaidpembo dadpen Esus tantiaquido yanosh, quequin Pabadon dadpen chuibampondash.

²⁰ Aden chuisho tantiash: Nuquin Papan namiaid bëdambo iquec, quetanquin naden Pabado chuipondash: Nëmbo Esus tantiaquid isadaidbo dadpenquio iquec. Aido Nuquin Papan Moises dada uamiampid: Naden nata, quequin chiaid naban, quequin chuiquido nec.

²¹ Adquidombo icquin: Min bacuëbon shui dëbid dëtemenda, quequin isadaidbobi nidaid utsin icquido Pabadon chiec, quesho tantiash nebi. Adecbidi: Nuquin Papan: Naden nata, quequin Moises chuiquin dada uamiampid niacmequid Pabado nec, quequin chiaid tantiombi, quec aido tabadec.

²² Aden tantiec tabadquido mibi nëmbo choaid tantiash chochotsiash. Adsho aido bëdambo icmenuen ¿atotsi nuqui napatsia?

²³ Naden nac bëdambo ictsiashe. Tantia. Chuinu, Pabado. Nëmbo ubëd icquido: Nuquin Papan tantianubi umbi chuibocpadombuen nëidtedec ushquin matses nashunnu, quequid dada 4ted iquec.

²⁴ Nëbimbobi Edusaden yacno padpidec mibi choac. Nëid dadatedi buanec Nuquin Papa tabadte shubu dapa yacno nidash acte bëdambocquidën dapanshun mimbi ënden chiondacted piucquid meneshumbic aidonatsen meneshunta. Ma mimbi naondacpadombuen mibëd nidquidontsen ma matasmenu. Mimbi adosho issun: Pabado icsambo icquid nec, quequin chuibuedombi: Nuquin Papan: Naden nata, quequin chiacpaden naquidquio Pabado nec, quequin tantiatsiash.

²⁵ Isadaidpembo Esus tantiaquid yanacsho ubëtan chuiquidon tantiaid dada uaquin naden chiondambi: Nuquin Papan: Naden nata, quequin Moises chuiquin dada uamiampid nëidtedtsëqui mimbi natequid nendac. Ambi papa canun nacnenaid ismequin pete sanaid penda. Adembidi min chidouidtsëqui chudquid icta. Adembidi min bënëuidtsëqui chudmequid icta. Adembidi nëish tëtaniaid penda. Adembidi tëshë codocaid intac icquid penda, quequin isadaidpembo chiondambi, quepanëdash Santiaco Pabado chiec.

Nuquin Papa tabadte shubu dapan icsho Pabado bedaid

²⁶ Aden chiaquien badiadash Nuquin Papa tabadte shubu dapa yacno dada 4ted buanec nidacsho Pabadobëta aido acte bëdambocquidën dapampanëdash. Adoac Nuquin Papa tabadte shubu dapan puduedshun chiec: Nëidon ambi Nuquin Papa chiactedec ushquin nainshun ¿tedectsishun piucquid menepec? quequin Nuquin Papa tabadte shubu dapa yacnocquid Pabadon chuipanëdash. Aden chianec niduapanëdash.

²⁷ Adashic 6tedec ushquin naimbudnubi Pabado Nuquin Papa tabadte shubu dapa yacno nidash tsicatiaidën puduedash capusho nidaid Asia caid yacnouësh chochoquido isadaidbon ispanëdash. Aden isash Pabado bedmete bunec: Isadaidbo utsibo nëishmenu, quequin cumapenec cuëdquin:

²⁸ Isadaidbotedishun tantiata. Nëid dada: Isadaidbon icsambuen naic, quequin: Nuquin Papan: Naden nata, quequin Moises chuiquin dada uamiampid icsambo icquid nec, caosh. Adembidi Nuquin Papa tabadte shubu dapa icsambo iquec, quequin chuiquid icquin Nuquin Papa tabadte shubu dapan puduedtemaid isadaidpembo iuedquin nëid shubu bëdamboshëcquid icsa uamebued neque. Bednu. Uidën uata, quec abimbo chiacbimbuec cuëdcuededpanëdash.

²⁹ Epeso yacnouësh choquid isadaidpembo Todopimobëd Pabado Edusaden yacnouësh capusho isboshon Nuquin Papa tabadte shubu dapan aidbëd pudueda danquin tantiec abimbo chiacbimbuec onquecuededpanëdash.

³⁰ Aden chiac nëishash cuëdcuededec: Bednu, quianec titinquianec chochoshon Pabado bedshun nimbanquin umanuc buansho istanquin Nuquin Papa tabadte shubu dapa isquidon badedquio shëcuë bëtashpanëdash.

³¹ Aden Pabado buanec: Cuessunnenu, quec cuëdcuededsho tantiashun sondadon chuiquid tapa chuituidac:

³² Nëmbo icquido cuesnannushe, queshun aton chuiquidbëtabi aton sondado dadpen chochomiash aidobëd titinquianec chochosho issun Pabado cuesbededquin isadaidbon ëmpanëdash.

³³ Adec choshon sondadon chuiquid comandante caidën: Bed, cac Pabado bedtanquin shocosh bucu daëdshun mëtanemepanëdash. Adotanquin ambo tabadquido chuiquin: ¿Tsutsi nëid nec? ¿Atotsi icsambuen naosh? capanëdash sondadon chuiquidën.

³⁴ Adoaquien iccuededquid utsi utsien chiec onquecuedednubi utsi uaquin chiec utsibo cuëdcuededpanëdash. Adec dadpen cuëdcuededsho tantiash: Tantiadenquio yec cuëdcuededeque. Sondado ushacno nauedmenu. Buanec nid, quepanëdash sondadon chuiquid sondado chiec.

³⁵ Aden Pabado buanec nidec sondado ushaid shubu dapa yacno choec dectatonobi cuëdcuededquido tsucus tsucustsëcquio yec Pabado bednuec chosho issun Pabado abuc cadoanquin sondadon buampanëdash.

³⁶ Aden cadoanquin buansho isash tsiuec chochoec cuëdcuededec abitedi: Aidien cuessunnemetiad, quepanëdash.

Ambi nabanaid iccuededquido Pabadon chuibanaid

³⁷ Aden buanquin sondado tabadte shubu dapan nauedtsenshobien Pabadon: ¿Adabi mibëd onquepatsia? capanëdash Quidieco matsesën onqueten sondadon chuiquid chuiquin. Adoaquien: ¿Quidieco matsesën onqueten onquequidmenda ne?

³⁸ Chuiquid tapa icnu, quequin umbiquien namenu, quequin Equipito yacnocquid dada cuesanquid 4midtedi cute nibëdacno buanac caondaidien nechitec, queshun mibi bedombi, capanëdash.

³⁹ Adoaquien Pabadon: Isadaidbon tishaid nebi. Nidaid Sidisia caidën icquid shubu dadpen icquid Tadso caid bëdambocquid yacnoshon tishaid yec cun matses chuibante bunebique. ¿Adambi cun matses chuipatsia? capanëdash.

⁴⁰ Adoaquien: Ai chuita, capanëdash sondadon chuiquidën. Adoac abuc dectatoten dectatoshon nidtomiac chiec: Otacquio tabad, quequin ismequin Pabadon aton mëdante uic uiccapanëdash. Aden nasho isash isadaidbo otacquio tabadsho isash: Cun matsesën onqueten ebedeon mibi chuinu. Tantia, quec nadec Pabado onquedopanëdash: