Hechos 20 - El Nuevo Testamento en matsés

Masedonia yacnocquido isbidanec nidequi Quedesia yacnocquidotsen isbidanec nidaid

¹ Natia cuëdcuededbuedo nidannian Esus tantiaquido chochomiash Pabado: Nidaid Masedonia caid yacno niduaibique. Esus tantiec bëdambuec tabadta, quequin chianec Epeso yacnouësh puduanec nidpanëdash.

² Auëshquio puduanec nidquimbi nidaid Masedonia caid yacnocquid Esus tantiaquido iccuededacno iccuededacnombuen chiec: Chieshtoenquio icquin Esus tantiata, quequin aden bëdambo icmequin chuibidanec nidaid Quedesia caid yacno nidpanëdash Pabado.

³ Ambo nidash uëshë 3ted nidmec tabadash: Nidaid Sidia caid yacnotsen cano dapa antabëdtoanec nidebi, quepanëdash. Adsho tantiashun: Cano dapan nidsho Pabado cuessunnenu, quequin isadaidbon mibi cainec, cac nidaid Masedonia caid yacno aucbidi nidec Pabado podquiedën niduapanëdash.

⁴ Nëidtedi dada abëd nidquido icpondash. Nëidic Bedea yacnouësh choquid Pidonën mado Sopatedo. Utsibic Tesadonica yacnouësh choquid Adistadcobëd Secundo. Utsibic Dedbe yacnouësh choquid Cayo. Utsibic nidaid cuëshë Asia yacnouësh choquid Timoteo yec Tiquico yec Todopimo yec quec icpondash.

⁵ Aidtedi abia bëyucanec Asia yacno nidec shubu dadpen icquid Todoade yacno chochoash tabadquin ubëta Pabado caimpaccondash.

⁶ Aidtedi nidannian pan bidiscamiabicquid piampid uëshë tantiec 6ted ushec tabadanec Pidipos yacnouësh Pabadobëd cano dapa antabëdtoanec nidec 4tedec ushshun bëyuc chochobued shubu dadpen icquid Todoade yacno istuidpondambi. Ambo 6tedec ushec Pabadobëd tabadpondabi.

Eutico abucuësh paëdec uënësacsho uincuenmiaid

⁷ Ambo tabadequi dominco inchëshën Esus tantiaquidobëd iccuededquin abëd icquidobëtan Pabadon Esus uënës uaid tantiaquin pan cuëshcuëshshun pebededpondash. Aden piashic Pabado: Badiadash nidebi, quiash inchësh poctsembo yantsëcquiec iuec onquepondash.

⁸ Aid onquiaid shubu abentsëquëmbi tëshquën uain sanaid icpondash. Ambobi dectatoash quënën tabadacno tabote dadpen taboaid chënquepondash.

⁹ Adec Pabado iuec onquenubi cania Eutico cuëmëdquid abucquid iste shëcuë yacno tsadec ushcastoash ushtotanec abucuëshquio paëdpaccondash. Adec paëdsho isash budbudshun uënësacsho isbededpondash.

¹⁰ Adnubien Pabadotsen budquin dayumbudec: Uënësbuedi abi tiboquianeque. Natiec shubicuededenda, quepondash.

¹¹ Aden chiash abuc quënë yacno padpidec dectatouashun pan cuëshcuëshshun abitedishumbi pebededpondash. Aden piash tabadec Pabado ambi badiadtsëcquiec onquepondash. Adec badiadnubi abëd icquidobëd Pabado shubu nuntanuësh puduennubien

¹² paëdbued uincuenacsho aton shubuno utsibon buansho isash bëdambo yec cuishonquec nidannepondash.

Todoade yacnouësh puduanec Mideto yacno nidaid

¹³ Adashic Pabado: Podquedën nidebique. Shubu dadpen icquid Aso yacno nidshun ubi cainta, quianec nidpondash. Adec nidnubi cano dapa antabëdtoanec puduanec nidequi Aso yacno nidannepondabi.

¹⁴ Adec Aso yacno choshon istuidac Pabado ubitedibëd cano dapa antabëdtoanec nidec shubu dadpen icquid Mitidene yacno nidpondash.

¹⁵ Auëshquio puduanec nidec badiadash acte nënantan nidaid nacnëdquid Quio caid datambëtsenec choec abadiadash acte nënantan nidaid nacnëdquid utsi Samos caidtsen datambëtsenec shubu dadpen icquid Mideto caid yacno chopondash.

¹⁶ Ambo choash: Edusaden yacno badedquio nidebi. Adec ambo nidnu, quequin nidaid Asia caid yacno tabadenquio icquin shubu dadpen icquid Epeso datanembi. Isadaidbon aton tiedën caniquid tidico caid bedaid tantiate uëshë chonoc Edusaden yacno badedquio nidash tabadtiadquio iquebi, quequin tantiec Epeso datanembi, quepondash Pabado.

Epeso yacnocquido Esus tantiaquidon chuiquido chomeshun Pabadon chuibanaid

¹⁷ Adashic Mideto caid yacno tabadtuidshun Epeso yacnocquid Esus tantiaquidon chuiquido Pabadon chochomepondash.

¹⁸ Aden chochomeshun naden aido chuipondash: Ënden tauambuec nëid nidaid Asia caid yacno choash mibëd iuec tabadsho umbi nabanondaid mibitedishun tantiec.

¹⁹ Adshumbic isadaidbo utsibon Esus tantiesa icquin cuessunnete bunquin mëyampondashi. Adoaqui: Nuquin Icbon: Ubi chuibenneta, cacpaden ubi bunaid tantienquio icquin Ambi Chiaid mibitedi chuibanondambi. Tantiesa icsho isash shubiquiondabi.

²⁰ Chuibanenquio iquembi, quenquio icquin mibitedi Esus bëdambuen tantiamenuen matses dadpen iccuededacnoshon chuibanondambi. Adembidi shubun shubunquiec puduedcuennequin chuibenniondambi.

²¹ Nuquin Papa tantiabenquin mimbi icsambuen nabanaid ënshun Nuquin Icbo Esuquidistu tantiaquid icta, quequin isadaidbobëta isadaidpembo chuibanondambi.

²² Aden chuibanshobi Nuquin Papan Mayan Bëdan: Nëbi Edusaden yacno nidta, quequin chuiposhi. Adec aidën chuibocpadequi nidebi. ¿Atotsi ubi Edusaden yacnoshon napatsiashba? quec nidebi.

²³ Shubu dadpen icquid ubi nidacnoshon nidacnoshonquien Nuquin Papan Mayan Bëdan naden chuided chuidedoshi: Mibi mëyantequid iquendac. Adembidi mibi quënën tsaduntequid iquendac, quequin chioshi.

²⁴ Aden Nuquin Papan Mayan Bëdan chuisho tantiashi: Cuessunnenushe, quenquio yec niduaibi. Esuquidistun: Ubi chuibenneta, cacpaden naimbudquin utsi utsiec yacno nidshun: Esus tantiasho Ambi tantiaid yec Nuquin Papabëd tabadte iquec, quequin Chiaid Bëda chuibanembi.

²⁵ Nëshunquio: Nuquin Papan namiacno tabadte iquec, quequin chiaid umbi chuibansho tantiabenondaidon ubi nëuëshquio nidacsho mibitedishun padpiden ubi isuainquio iquendac, quequin tantiembi.

²⁶ Tantia. Chuinu. Umbi nëshunquio mibitedi Esus chuibanondaqui mimbi tantienquio icsho issun: Icsambuen chuichitombi, quetiapimbo iquebi.

²⁷ Aden mibi Nuquin Papan: Naden ubi yacno matses tabadmenu, quequin chiaid ompoenquio icquin abitedi chuibanombi.

²⁸ Nëbi nidebique. Ubi nidan chieshtoenquio icquin Esus tantiec bëdambuec tabadta. Adembidi mimbi chuibanaido Esus tantiaquido chuiquin: Chieshtoenda. Esus tantiec bëdambuec tabadta, cadednequin bëdambuen chuibanta. Nuquin Papan Mayan Bëdan aido chuibanquid mibitedi icmioshe. Adota. Aido Nuquin Papa yacno tabadmenuec Esuquidistu abided cuidadec intac mëyanec uënëspanëdash.

²⁹ Ubi nidan bëdi nëish iuaid ueste bunacbimbuen abimbo chiacbimbuen chuibanquin Esus tantiaquido icsambuen tantiamenuec utsibo choendac.

³⁰ Adembidi mibëd iccuededquidëmbi utsin utsinquien Nuquin Papan Chiaid abimbo chiacbimbuen muaquin chuibanendac. Esus tantiaquidon chuiquidquio icnu, quequin adoendac.

³¹ Adquid Esus tantiec iccuededquido cuëshëdmequid neque. Adquid tantienda. Adquid yanendac, quequin seta 3ted matanmec mibëd tabadquin ënenquio icquin shubiquimbi mibitedi chuibanondambi.

³² Bëdambuen chuibanombi, quequin tantiaquin mibi nianembi. Esus tantiaquid nec, quequin Ambi Chiaid Nuquin Papan mibi bëdambuen tantiamendac. Aden tantiamequin mibi tantiaquioquin ambi chiampicpadombuen mibitedi bëdambo icmendac.

³³ Mibëd tabadec: Piucquid bec cho, quenquio iccondabi. Adecbidi: Dashcute bec cho, quenquio iccondabi.

³⁴ Adenquio icquin umbibi shubumpi nacnenshun menequin piucquid bedshun cuna bedondambi. Adshumbic umbi bedbuedi ubëd capuquido musuc menebanondambi. Adec ubi chonoadondaid mibitedishun tantiec.

³⁵ Adecbidi chonoadshun mitsana bedshun mosucshun atona nibëdquido meneta, quequin mibitedi ismebanondambi. Nuquin Icbo Esus nidaidën tabadec nadpanëdash: Atona nibëdquido menequid Nuquin Papan bëdambo icmendac, quequin Esusën chuinëdaid chuiquin Epeso yacnocquid Esus tantiaquidon chuiquido Pabadon chuibampondash.

³⁶ Aden chuibanashic Pabado Nuquin Papa chiec aidobëd danëshën sebudcuededash onquecuededpondash.

³⁷ Aden Nuquin Papa chiec onqueshumbic abitedishun: Uënësquiocnoc chiosh, quequin tantiec shubiquimbi Pabado dayumbededquin tanchoccapondash.

³⁸ Ubi mimbi padpiden isuainquio iquendac, Pabado quebued tantiash uënësquio iccuededpondash. Adec uënësquio yec Epeso yacnocquid Esus tantiaquidon chuiquido: Pabado nidsho isnu, quianec Pabadobëd cano dapa yacno chochopondash.