Hechos 2 - El Nuevo Testamento en matsés

II. EDUSADEN YACNOSHON CHIAID BËDA CHUIBENNIAID ( 2.1—8.3 ) Esus tantiaquidbëd icnuec Mayan Bëda choaid

¹ Adashic isadaidbon aton tiedën caniquid tidico caid bedbante tantiate uëshë chotsëcnubi Esus tantiaquidotedi shubu nuntan iccuededpanëdash.

² Ambo iccuedednubien abucuësh choec cumapenec cuëdec cunquequid tapabimbuec nuntan chosho tantiapanëdash.

³ Aden aid tantianubi cute nëdënquiacbimbuecquid budec icbo icboec matsadtocuededpanëdash abi isquidtedi.

⁴ Aden Nuquin Papan: Ma nëidobëd tabadnu, queshun Aton Mayan menebanac abi onquiacmaid matses utsin onqueten onquetenquiec ambi matsadtomiaidotedi onquecuededpanëdash.

⁵ Aden Nuquin Papan aton Mayan menenubien isadaidbo utsibo Edusaden yacno chochoash dadpen tabadpanëdash. Aido Esus tantiesabo iquequi aton tsusedpabon chiampicpaden nanuec nidaid utsi utsiec yacnouësh Edusaden yacno chochoaido icpanëdash.

⁶ Cunquequidbimbuecquid cuëdsho tantiash chochoash tabadnubi Nuquin Papan aton Mayan meniaidotedi chochoquidon onquete anquiadabi onqueten onquetenquiec onquesho tantiash nëbi chochobuedo utsi utsiec nadec onquepanëdash:

⁷ ¡Padtec! Dacuëdampambo iquec. Ubipadquiequien onquepec. ¿Onquequidotedi nidaid cuëshë Cadidea yacnocquidopenquioda nedic?

⁸ ¿Mitsipadec cun onquete anquiadash onquecuededec nepec?

⁹ Ubitedi nëidtedi yacnouësh chochoquido nebi. Nidaid Padtia caid yacnouësh choquido. Utsibic Media yacnouësh choquido. Utsibic Edan yacnouësh choquido. Utsibic Mesopotamia yacnouësh choquido. Utsibic nidaid cuëshë Udea yacnouësh choquido. Utsibic nidaid cuëshë Capadosia yacnouësh choquido. Utsibic nidaid cuëshë Ponto yacnouësh choquido. Utsibic nidaid cuëshë Asia yacnouësh choquido.

¹⁰ Utsibic nidaid cuëshë Pidiquia yacnouësh choquido. Utsibic nidaid cuëshë Pampidia yacnouësh choquido. Utsibic Equipito yacnouësh choquido. Utsibic shubu dadpen icquid Sidene anoentsëcquid nidaid Dibia caid yacnouësh choquido. Utsibic shubu dadpen icquid Doma caid yacnouësh choquido.

¹¹ Utsibic acte nënantan nidaid nacnëdquid Quedeta caid yacnouësh choquido. Utsibic Adabia caid yacnouësh choquido. Adec chochoquido dadpen isadaidbombo icnubi utsibo isadaidbopadquio icnuequido Edusaden caid yacno isadaidbon tsusedpabon chiampicpaden nanuec chochobuedo ubitedi nebi. Adec chochoshon cun onquetenquio Nuquin Papan natiambocquin naid chuibansho tantiembi.

¹² Adash tantiadempambo yec tabadec ¿Mitsi paden tantiequien adec onquepec? quepanëdash Edusaden yacno chochoaido.

¹³ Adnubien utsi utsien icsambuen chuishunec: ¿Bëdambuen tantiec onquepequida nepec? Acte paë uaid acash tantienquio yec nepanui, quecuededpanëdash.

Iccuededquido Petedon chuibanaid

¹⁴ Adec chochoquido onquesho tantiashun Esusën: Ubi chuibenneta, caidobëd nidtoshon Petedon naden chochobuedo cumapenec onquequin chuipanëdash: Isadaidbobëta Edusaden yacnocquido, mimbi tantienquio yaid chuinu. Bëdambuen tantiata.

¹⁵ Uëshë abuctoec 9 icnuc nuquin matsesën acte paë uaid aquenquio icquid. Mibitedishun tantiacpaden tantiadennuen aid acambo iccombi.

¹⁶ Utsin utsinquiec onquete utsin utsinquiec onquesho mimbi tantiaid Nuquin Papan ëndenquimboshë chiampicpadec onquec nebi. Tsusedpa Nuquin Papan oncamiaid Oedën naden chuiquin dada uapampic:

¹⁷ Iuecshun umbi tantiacpadënquiobi Cun Mayan matses utsi utsien menendambi, quec Nuquin Papa. Adoac aidon madobobëtan aidon champibontsen umbi iuecshun nate chuibanendac. Adembidi caniabontsen ushquin isacbimbuen umbi ismiac isendac. Adembidi ismiac tsësiobon ushquin isendac.

¹⁸ Adembidi Cun Mayan meniac umbi chuiquin namiaidon dadabëtan chidon umbi iuecquio icshun nanun chiaidquiobidi chuibanuaindac.

¹⁹ Adnubi abucuësh uinsadpambo ictequid icnubi nidaidënshun istequid intac yec nëdënquequid yec nidaidën abembi pushudquid yec quenuc adquidtedi mibi ismendambi.

²⁰ Adquid icnubi badiadën uëshë chënquebuedi inchëshquio yanendac. Inchëshën uëshë piupiupambo yec intacbimbuecsho mimbi isbededendac. Umbi ismiaidtedi icambic Nuquin Papan uëshë bëdamboshëcquid chomendac.

²¹ Adnubimbi: Cun Icbombo Esus nec, ubi caquidquio ëbëd tabadmendambi, quequin Nuquin Papan chuimiacpaden Oedën dada uapampic.

²² Adembidi Nuquin Papan Chomiaid chuinu. Tantiata, isadaidbo. Nasaded caid yacnouësh caniquid Esus Nuquin Papan Chomiaid icquin nadatiambocquin nabanquin dadpen ismebansho mimbi isondac.

²³ Aidi Nuquin Papan ëndenquimboshë tantiampicpaden bedmeshun mëyanmequin: Uënës uata, cac Nuquin Papa tantiesabo matses icsambocquidën cueste napotiaidën dectanquin uënës uapondash.

²⁴ Aden mimbi aton dada paëmbo icmequin uënës uacshobien Nuquin Papan: Matsesën nibëdquiecnuc uënësmetiapimbo iquec, queshun Esus uincuenmepaccondash.

²⁵ Adembidi ëndenquimboshë chuiquid tapa Dabidën Esus chuiquin naden dada uapampic: Ënëdenquio yec mibi ubëd iquec, Icbo. Aden ubi dayun uaquid icquin cudasënac utsibon ubi chieshtometiapimbo iquec.

²⁶ Ubi adoquid nec, quiash bëdambo yec cuishonquec cuëdënebi. Ubi dayun uaquin ubi bëdambuen namec, quequin tantiec natiec tabadenquio iquebi.

²⁷ Ënenquio icquin umbi chiacpadombuen naquidquio nec, queshun mimbi ubi uënës uacsho cun dada chodcamenquio icquin ubi uincuenmendac.

²⁸ Nadec bëdambuec tabadtsiash, quequin mimbi ubi bëdambuen tantiamec. Mibëd iquec bëdambo yec cuishonquec tabadebi, quequin Dabidën dada uapampic.

²⁹ Tantia, cun utsibo, mibi cuembo chuinu. Tsusedpa Dabid uënësacsho chococampid abi nëbi shëcuë nacnenaidquio iquec.

³⁰ Dabidën Nuquin Papan oncamiaidquio icquin dada uaquin: Naden Nuquin Papan chiondashi. Mibi uënësan min tsiuecquid chuiquid tapabidi iquendac, quequin Nuquin Papan Chiaid abimbo iquec, quequin tantiaquiopampic Dabidën.

³¹ Aden Nuquin Papan nanun chiaid tantiaquin Esus uincuente isacbimbuen dada uaquin: Nuquin Papan Chomiaid Quidistu uënësacsho chococaqui aton nami chodquenquio yec uincuenendac, quequin Dabidën chuipampic.

³² Aden Dabidën chiampicpadembi Nuquin Papan Esus uincuenmepanëdash. Aid uincuenmiacsho isondaido icquin ubitedishun mibitedi chuibanec nebi.

³³ Aidi uincuenash nidacsho Nuquin Papan aton dayun abiucquio tsadtomepanëdash. Ambo nidacsho Nuquin Papan Aton Mayan Bëda menepanëdash. Adoac ambi chiannebocpadombuen Esusën aton Mayan Bëda ubitedi menebanac onquete utsin utsinquiec onquesho nëbi mibitedishun tantiec.

³⁴ Dabid abuc nidambo icpampic. Nidambobi Nuquin Papan tantiamiac naden chuipampic: Icbo Dapan Cun Icbo naden chiendac: Cun abiuc abitedishun Icbombo icnuec nëmbo tsadec cho.

³⁵ Mibi chieshënquidobi dëniacmeshun Cun Icbo mibi camenu, quequin Nuquin Papan Cun Icbo chiendac, quequin Dabidën chuipampic.

³⁶ Tantia. Cun matses isadaidbo. Dabidën chiampid Esus mibitedishun cueste napotiaidën dectanquin uënës uaid Nuquin Papan Chomiaid Mesias caid yec Nuquin Papan icmiacpadec abitedishun Icbombo nec, quequin abimbo chiec nebique. Esus tantiata, quepanëdash Petedo.

³⁷ Aden Petedon chuisho tantiash iccuededquido ambi icsambuen naid tantiec uënësquio yec: Esus tantianu, quequin ¿atotsimbi nape? quepanëdash Petedobëta Esusën: Ubi chuibenneta, caido utsibo chiec.

³⁸ Adoaquien Petedon: Mimbi icsambuen naid ënshun: Esus cun Icbombo nec, quequin abimbo tantiaquin acten mentometa: Ma umbi icsambuen naid tantienquio yec Nuquin Papa bëshunnu, queshun. Adoacsho aton Mayan Bëda mibi menendac.

³⁹ Adembidi abi tantiasho issun mibitedibëta min bacuëbo menendac. Adembidi nidaidtedi yacnocquid Nuquin Icbo Nuquin Papa bunacpaden Esus tantiasho issun aton Mayan Bëdambocquid meneuaindac ambi chiampicpaden, quepanëdash Petedo.

⁴⁰ Aden iuen bëdambuen chuibanequi: Nuquin matses isadaidbo Esus tantiesabo icnubi mimbi icsambuen naid ënash Esus tantiaquidquio icta, quequin chuibudquin Petedon ëmpanëdash.

⁴¹ Aden chuisho tantiash: Abimbo caic, quequin tantiaquido utsi utsiec yampanëdash. Aid uëshëmbi dadpenquioshë 3midted Esus tantiaquido yampanëdash. Adquid yansho issun acten mentobampanëdash. Adoac Esus tantiaquido utsibobëd iccuededpanëdash.

Esus tantiaquido iccuededaid

⁴² Aden Esus tantiabenshun Esusën: Ubi chuibenneta, caidon Esus chuibansho tantiec abëd icquido menenanec tabadquimbi Esus uënësaid tantiaquin actequid acshun pan cuëshë pebededtednepanëdash. Adembidi Nuquin Papa chiannepanëdash.

⁴³ Adec tabadcuededquimbi Esusën: Ubi chuibenneta, caidon nadatiambocquin nabampanëdash. Adosho isash abitedi tantiadempambo yec tabadpanëdash.

⁴⁴ Adnubien Nuquin Papan Esus tantiamiaidotedi atona cudasenquio yec menenanec bëdambuec tabadcuededpanëdash.

⁴⁵ Shububëta atona utsi menequin piucquid bedshun utsina nibëdsho issun menepanëdash.

⁴⁶ Adecbidi badiadquidën badiadquidënquiec Nuquin Papa tabadte shubu dapa yacno nidash iccuededpanëdash. Adecbidi shubu utsi utsiec yacno nidash iccuededquin Esus uënës uaid tantiaquin pan cuëshcuëshshun pebededpanëdash. Adecbidi bundoshon pete pec cuishonquecuededuapanëdash.

⁴⁷ Adec tabadquin Nuquin Papan naid chiec cuëdëncuededpanëdash. Adec tabadsho isash: Bëdambocquido nec, quec Nuquin Papan tantiacpadec badiadquidën badiadquidënquiec utsibotsen Esus tantiash abëd tabadtequid yanash aid tantiaquid utsibobëd dadpen iccuededpanëdash.