Hechos 19 - El Nuevo Testamento en matsés

Epeso yacno Pabado tabadaid

¹ Codinto yacno Apodo icnubi Pabado nidaid Pidiquia caid yacnouësh puduanec podquedën choec macuësh tapa naquiadcuëtsenec shubu dadpen icquid Epeso yacno chopanëdash. Ambo choshon Esus tantiaquido istuidshun

² naden chuipanëdash: ¿Ada Esus tantiabensho Nuquin Papan aton Mayan Bëda mibitedi meniondash? capanëdash Pabadon. Adoaquien: Tsaun. Nuquin Papan Mayan Bëda iquec, quequin chuisho tantiambo iccombi, quecuededpanëdash.

³ Adshobien Pabadon: ¿Atotsi tantiasho mibi acten mentobampanëdash? capanëdash. Adoaquien aido: Uan acten mentoanquidën chiaid tantiaquid icsho acten mentondashi, quecuededpanëdash.

⁴ Adsho tantiashumbien Pabadon: Mimbi icsambuen naid ënta, quequin chiacpaden naquin abimbo tantiaquidtedi Uanën acten mentobampanëdash. Adotanquimbic: Cun tsiuec choquid Esus tantiaquid icta, quequin Uanën chuipanëdash.

⁵ Aden chiac: Esus Cun Icbo nec, quequin tantiaquid nebi, quequin Epeso yacnocquid Esus tantiaquidon chuisho tantiashun padpiden acten mentobampanëdash.

^6-7 Aden acten mentoaidotedi dada 12ted icsho Pabadon mëdanten mamishbanshobi Nuquin Papan aton Mayan Bëda menepanëdash. Adoac abi onquiacmaidënquio onquequin: Nuquin Papan: Naden naindambi, quequin oncamiaid chuibampanëdash.

⁸ Adashic Nuquin Papan Chiaid isadaidbon chuibante shubun puduedshun Pabadon: Nuquin Papan namiacno tabadte iquec, quequin Chiaid Bëda Esus nanëdaid chuibampanëdash. Cuembo tantiamenu, quequin uëshë choaid 3ted nidmequin chonoadtemaid uëshën uëshënquien dacuëdenquio icquin Nuquin Papan Chiaid isadaidbo Pabadon chuibampanëdash.

⁹ Aden chuibansho tantiash isadaidbo utsi utsiec pamumëdacbimbuec tabadquin: Tantiatiapibi, quequin Nuquin Papa yacno tabadmianquid chieshënquin icsambuen chuishumpanëdash. Adoac Esus tantiaquidobëd Pabado: Nidnunid, quianec Nuquin Papan Chiaid chuibante shubu yacnouësh puduenanec nidec Tidano cuëmëdquidën chuibanquin tantiamete shubu yacno nidshun adombuembidi tantiamenuen badiadquidën badiadquidënquien Nuquin Papan Chiaid chuibampanëdash.

¹⁰ Adec seta daëd matanmequin Pabadon Nuquin Papan Chiaid chuibampanëdash. Aden nidaid Asia caidën icquidtedishun isadaidbobëtan isadaidpembon Nuquin Icbo Esusën Chiaid chuibansho tantiapanëdash.

¹¹ Nuquin Papan namiac Pabadon nadatiambocquin dadpen nabampanëdash.

¹² Pabadon dada cuëscaid dashcute cuëshë utsin buanshun nënquidobëta daicsaido mishbanac bëdampanëdash. Adembidi podobitsi icsa dapuduedaid cuëscaquin mishac dapuduempanëdash.

Esseban madobon naid

¹³ Adnubien podobitsi icsa dapuduenmenuen Pabadon Esus chuiquin nabocpaden tanquin isadaidbo utsibon: Esus Pabadon chuibuedënquio namiac dapuduen, capanëdash.

¹⁴ Pabado tannuequido nëish iua cuessunneshun pichicaquidon chuiquid isadaidbo yec Esseba cuëmëdquidën mado 7ted icpanëdash.

¹⁵ Aidon aden padpiden chiaquien podobitsi icsan: Esus umbi isaid nec. Pabado umbi isaidbidi nec. ¿Adquid icnuc tsutsi mibitedi ne?

¹⁶ quetanquin bëcunnequin dashcute ched chedcapambuen podobitsi icsa dapuduedaidën cuesactanniaqui shubu nuntanuësh puduenanec dashcute nibëdpambuec cheshcaid intac intacpambo yec Esseban mado cuempanëdash.

¹⁷ Adec cuensho isquidon chiac Epeso yacnocquid isadaidbobëd isadaidpembo dacuëdcuededpanëdash. Adec dacuëdquimbi: Esus nadatiambocquin nabanquid nec, quequin tantiabededpanëdash.

¹⁸ Esus tantiesa icbuedëmbi aid tantiaquid yanshun Esus tantiaquido iccuededacno nidshun utsibo tantiamequin ambi icsambuen nabanaidtedi chuibampanëdash.

¹⁹ Adembidi nënëchoquid icbuedombi dadpenshun: Nëbi adquid ictiapimbo iquebi, quetanquin cute dëtsiadotanquin ambi podobitsi icsan namete chuiquin dada uaidtedi caic: Nëid bedshun isash utsitsen icsamboshë icnushe, queshun abitedishun isnubi aid dada uaidtedi pichicapanëdash. Aden pichicabi icsho aidtedi menequin piucquid shocosh ushu nacnenaid dadpen 50 midted bedtsempanëdash.

²⁰ Adec Esus tantiaquid yansho issun Esus tantiaquid utsibon shubu dadpen icquid utsi utsiec yacno nidshun dacuëdenquio icquin Esusën naid chuibenniac utsi dadpen Esus tantiaquid yampanëdash.

²¹ Adashien Pabado: Edusaden yacno nidnu, quequin nidaid Masedonia caid yacnocquido isbidanquin nidaid Acaya caid yacnocquidotsen isbidanec nidec Edusaden yacno nidash tabadashic shubu dadpen icquid Doma caid yacnotsen nidtiadquio iquebi, quequin Pabadon tantiapanëdash.

²² Aden tantiec: Nidaid Asia caid yacno iuepactsëc tabadnu, quequin nidaid Masedonia caid yacno abia abi nashunquido Timoteobëta Edasto nidmepanëdash.

Epeso yacnouësh Esus tantiaquido chieshënec cumapenec cuëdcuededaid

²³ Epeso yacnoshon: Nuquin Papa yacno tabadmianquid iquec, quequin Pabadon chuibanaquien Esus tantiesabo nëishquiash chushquecuededpanëdash.

²⁴ Adquid Demetedio cuëmëdquid ambi tantiaid chidobimbuecnuc nacnenaid Adtemisa caidën shububimbuecnuc shubumpi nacnenmequid icpanëdash. Aden ambi nacnenmiaid menequin piucquid dadpen bedbampanëdash. Adshumbic abëtan nacnenaido dadpen menebampanëdash.

²⁵ Aidëmbi: Esus tantianu, quesa icquin ambi namiaidobëta abipadquid Adtemisa caidën shububimbuecnuc nacnenmequid utsibo iccuededmequin Demetedion nadopanëdash: Nuqui tantiaid Adtemisan shububimbuecnuc shubumpi nacnenshun menequin piucquid dadpen nuqui bedbanec, quequin mibitedishun tantiec.

²⁶ Aden nanubi nidaid utsi yacnouësh Pabado cuëmëdquid nëmbo choshon cumapenen naden chuibanec: Adtemisabimbuecnuc nacnenaid tiboquesa iquec. Adquid matsesën tantiaid abimbo ictiapimbo iqueque. Aid tantienda, quequin chuibanac Epeso yacnocquidobëtan nidaid cuëshë Asia yacnocquid matses dadpenshun Adtemisa tantienquio yanac.

²⁷ Aden chiac matses utsi dadpenshun Pabadon chiaid tantiaquin nuqui Adtemisa aton shububëta aid daëdbimbuecnuc nacnenaid icsambo iquec, catsiash. Adshun nidaid Asia yacnocquido dadpenshun Adtemisa tantiabuedombi aidbimbuecnuc nacnenaid tantienquio yannubi adembidi matses abitedishunquio tantienquio yanuaindac. Aden tantienquio yanshun aidbimbuecnuc nuqui nacnenaid piucquid menequin bedenquio iquendac, quepanëdash Demetedio.

²⁸ Aden chiac ambi chomebuedtedi nëishcuededash: Epeso yacnocquidon tantiaid Adtemisa bëdambo iquec, quec cumapenec cuëdcuededpanëdash.

²⁹ Adec cumapenec cuëdcuededsho tantiash Epeso yacnocquid utsibo aidobëd cuëdcuededpanëdash. Adec cuëdcuededash nëishshun nidaid Masedonia caid yacnouësh Pabadobëd chobued Cayobëta Adistadco bedshun nimbanquin iccuededte shubu yacno buampanëdash.

³⁰ Aden aid daëd bedshun buansho isquidën chiac Pabado: Iccuededte shubu yacno nidash matsesbëd onquete bunebi, quesho tantiashun: Padi. Ambo nidenda, capanëdash Esus tantiaquidon.

³¹ Adembidi: Pabado bëdambo iquec, quequin ambocquidon chuiquid utsin utsinquien: Ambo nidenda, quequin chuitan, cac Pabado chuiuampanëdash.

³² Adnubien cuëdcuededquidon Cayobëta Adistadco bedshun buansho isash aidobëd iccuededte shubu yacno choash matses dadpen cuëdcuededsho tantiash utsi utsiec: ¿Atotsi queshun aid daëdi nëmbo bëpac? quenubi utsi utsiec dadpenquio: ¿Atotsi quiash nëmbo nuqui tabadec nepe? quequin tantienquio yec tabadpanëdash.

³³ Adnubien: Ubitedishun naid bëdambuen tantiamenuen chuitan, quequin isadaidbon Adejando cuëmëdquid tsicunniac nënantanquio nidtoshon mëdante uic uiccaic: Otacquio tabadquin tantiata. Chuibannu, quetanquin

³⁴ daëdpactsëc chiec onquesho tantiash cuëdcuededbuedi ënëdash tabadnubi: Isadaidbo aidi nec, quesho tantiash: Epeso yacnocquidon tantiaid Adtemisa bëdambo iquec, quec iuecquio cuëdcuededuapanëdash.

³⁵ Adec cuëdcuededshobien Epeso yacnocquidon chuiquidën chiaid dada uaquidën matses dadpen cuëdsho ënëdmeshun nadopanëdash: Epeso yacnocquidon tantiata. Chuinu. Adtemisa caidbimbuecquid abucuësh paëdaidbimbuecnuc nacnenaid nuqui tantiaidbëta abi tabadte shubu isquido nuqui nec. Adquid Epeso yacnocquido nec, quequin nidaidën tabadquidtedishun tantiec.

³⁶ Aden utsibon tantiec, quequin tantiaquin cuëdcuededbuedi ënëdshun bëdambuen tantiashun nata.

³⁷ Nëid dada daëd mimbi nëmbo bëbuedën Adtemisa caidën shubu puduedshun icsa uambo iccosh. Adembidi ampiambo iccosh. Adembidi Adtemisa cain icsambuen chuishunec icsambuec onquiambo iccosh.

³⁸ Adambo icnuc Demetediobëd icquido aidbëd chushquiaid chuimenuen Epeso yacnocquidon: Naden nata, quequin chiaid tantiaquid cuidte chuiquido yacno nëid daëd buanshun: Nëid icsambocquido nec, quequin chuitiadquidi mibi nec. Adoac chuiquidon mimbi buambuedtsen chuimequin tantiatsiash. Aido ismequin buantiadquidi mibi nec.

³⁹ Cun matses cuidte chuiquidon ma utsitsen tantianu, quequin aido iccuededacno nidshun chuiquid nuquin matses nendac.

⁴⁰ Cumapenec cuëdcuededac caosh, quesho nuqui iuaquid Doma yacnocquidon chuiquid tapanquio tantianushe. Aden tantiashun abëd icquid chomiac: ¿Atotsi queshun nao? cac ¿midapaden chuitiapimbo nuqui ictsiaque?

⁴¹ Nidannec nid, chuiquidën chiaid dada uaquidën cac Demetediobëd iccuededquido nidannepanëdash.