Hechos 18 - El Nuevo Testamento en matsés

Codinto yacno Pabado tabadaid

¹ Adec Atenas yacno tabadash auëshquio puduanec nidec shubu dadpen icquid Codinto yacno Pabado nidpanëdash.

² Ambo isadaidbo Aquida cuëmëdquid nidaid cuëshë Ponto caid yacnoshon tishaid Pabadon istuidpanëdash. Aid ambo choabicnubi: Isadaidbotedi nidaid Itadia yacnouësh nidta, Doma yacnocquidon chuiquid tapa Cadaudion cac aton chido Pisida cuëmëdquidbëd Codinto yacno Aquida chopanëdash.

³ Nëish iua bitsi shubumpi nacnenquid abipadquid Aquida aton chidobëd icsho issun aidobëd tabadquin Pabadon shubumpi nacnempanëdash.

⁴ Ambo tabadec chonoadtemaid uëshën uëshënquiec Nuquin Papan Chiaid isadaidbon chuibante shubuno nidshun: Esus Nuquin Papan Madombo nec, quequin isadaidbobëta isadaidpembo tantiamenuen Pabadon chuibampanëdash.

⁵ Adnubien Sidasbëd Timoteo nidaid Masedonia caid yacnouësh choshon isaquien Pabadon shubumpi nacnenenquio icquin: Esus Nuquin Papan Chomiaid Quidistu cashumbic Mesias niondash, quequin isadaidbo tantiamenuen Nuquin Papan Chiaid Bëda chuibampanëdash.

⁶ Aden chiac: Aid tantiatiapi, quequin isadaidbon icsambuen chuishunac abi dasiuidaid dashcute bëntsecquid chicshun sequecaquin nidaid putu idmequin Pabadon: Mibitedi Esus chuibanombi. Aid tantiesa yec uënësash Nuquin Papa yacno puduedenquio mibitedi iquendac. Adquid Nuquin Papan cuidquin nësecatequid nendac. Nëbi padpiden mibi chienquio icquin isadaidpembo chuibanec nidebi, quequin chuipanëdash.

⁷ Aden chiashic Nuquin Papan Chiaid chuibante shubu yacnouësh puduenanec aid dayuntsëqui shubu icquidën Pabado puduedpanëdash. Aid shubu icbo Tisio Usto cuëmëdquid Nuquin Papa tantiaquidquio icpanëdash.

⁸ Adnubien Quidispo cuëmëdquid Nuquin Papan Chiaid chuibante shubun iccuededquidon chuiquid tapa nepanëdash. Aidëmbi Pabadon chuibanac aton shubun icquidobëd Esus tantiaquido yampanëdash. Adecbidi Codinto yacnocquid utsi dadpen Esus tantiaquid yampanëdash. Adsho aidotedi acten mentobampanëdash.

⁹ Adnubien inchësh utsin Pabado ushquin isacbimbuecnuc ismequin Nuquin Icbon: Dacuëdenquio icquin ënenquio icquin Ubided cuidadec uënësash uincuenaid chuibanta.

¹⁰ Mibi dayunuaic mibëd iquebi. Aden umbi dayun uasho ubi tantiesabon mibi mëyantiapimbo iquec. Nëmbocquido ubi tantiaquid dadpen icsho issun mibi mëyantiapimbo iquendac, quepanëdash Pabado caic.

¹¹ Aden chiac Codinto yacno seta abentsëc matanmiash uëshë 6ted nidmec tabadquin Nuquin Papan Chiaid Pabadon chuibampanëdash.

¹² Adnubien aid nidaid cuëshë Acaya caid yacno Cadion cuëmëdquid chuiquid cobednadod icnubi Acaya yacnocquido isadaidbo dadpenshun: Pabado icsambo iquec, queshun bedshun cuidte chuiquid yacno Pabado buampanëdash.

¹³ Ambo bëquin puduedmiash: Nuquin Papa tantiata, quequin ubitedishun cun tsusedpabon: Naden nata, quequin chiampid chienquio icquin utsi uain icsambuen nëid dadan chuibanosh, quepanëdash Pabado chieshënquido.

¹⁴ Adnubien Pabado onquetsennubi Cadionëmba naden isadaidbo chuipanëdash: Tantia. Chuinu. Nëidën icsambuenshë nabanec, quequin mibitedishun ubi chuisho tantiashun: Icsambo iquec, quequin tantiatsiambi.

¹⁵ Aden icsambuen naid chienquio yec: Cun matsesën tantiaidbëta cun matsesën Papa cain cuënaid icsambuen chuiquid nec, mibi quepec. Adecbidi: Ubitedishun natemaid icsambuen chuiquidquio nëid dada nec, mibi queuapec. Aden mimbi min matsesën naid chuisho tantiashun: Ubi chienquiocquin mibitedishumbi nacnenta, quequin Cadionën chuipanëdash.

¹⁶ Aden chuishumbic Cadionën ambi namiaido: Aidtedi umanuc puduenmeta, cac Pabado bëbuedo isadaidbo puduenmepanëdash.

¹⁷ Adoac puduenshun Nuquin Papan Chiaid chuibante shubun iccuededquidon chuiquid Sostenes cuëmëdquid bedshun isadaidbon cumapenen cuesbededpanëdash. Adosho isec mimbi: Icsambuen naic, quenquio yec Cadion otacquio tsadpanëdash.

Sidia yacnocquid Antioquia yacno Pabado chouaid

¹⁸ Adashien Pabado nidaid cuëshë Codinto yacno iuec tabadash Esus tantiaquido nianec nidaid cuëshë Sidia caid yacno nidec Pabado puduampanëdash. Aidbëdi Aquidabëd aton chido Pisida Codinto yacnouësh nidec Codinto nidaid cuëshën icquid shubu dadpen icquid Senquedeas yacno chopanëdash. Ambo tabadquin: Nuquin Papa tantiaquioquin aidtedec ushquin nainombi, queshun utsibo ismenu, quequin Pabadon aton manëdaid nibëdquiecnuc matasmepanëdash. Adashic auëshquio cano dapa antabëdtoanec nidpanëdash.

¹⁹ Adec nidequi Epeso yacno chopanëdash. Ambo choshon Aquida aton chidobëta: Nëmbobi tabadta, capanëdash. Adshun aid daëdi nianec Nuquin Papan Chiaid chuibante shubu yacno nidshun isadaidbo Esus tantiamenuen Nuquin Papan Chiaid chuibampanëdash Pabadon.

²⁰ Aden chuibansho tantiashun: Adombuembidi chuibannuec ¿ada ubëd iuec tabadtsia? iccuededquidon caquien: Ai, quenquio yec:

²¹ Nuquin Papan tantiacpadec mibi isec padpidec chouatsiabi, quianec Epeso yacnouëshquio puduanec nidec cano dapa antabëdtoanec Pabado nidpanëdash.

²² Canon nidequi shubu dadpen icquid Sesadea yacnoba choash pudundoanec Edusaden yacno nidash Esus tantiaquido iccuededacno nidshun isanec nidequi shubu dadpen icquid Antioquia yacno Pabado niduapanëdash.

5. Padpidec Pabado Esus chuibennec niduaid ( 18.23—20.38 ) Pabadon nidaid cuëshë Cadasia yacno bëta nidaid Pidiquia cuëshë yacno Esus chuibenniaid

²³ Antioquia yacno choash iuec tabadashic padpidec puduanec Esus tantiec iccuededquido yacno yacnombuen isbennequin tantiametannu, quianec nidaid cuëshë Cadasia caid yacno nidash tabadquin: Chieshtoenquiocquin Esus tantiec bëdambuec tabadta, quequin chuibampanëdash. Auëshquio nidequi nidaid Pidiquia caid yacno nidshun adombuembidi Pabadon chuibanuapanëdash.

Apodon Epeso yacnoshon chuibanaid

²⁴ Adnubien isadaidbo Apodo cuëmëdquid shubu dadpen icquid Adejandedia caid yacnocquid Epeso yacno chopanëdash. Aidi bëdambuen chuibanquid yec Nuquin Papan Chiampid tantiaquidquio nepanëdash.

²⁵ Adquid yec Nuquin Icbo tantiaquid icquin Uan acten mentoanquidën Esus chote chiec onquiaid tantiaquin matses bëdambuen chuibanquidquio Apodo icpanëdash.

²⁶ Aidëmbi Nuquin Papan Chiaid chuibante shubu yacno nidshun dacuëdenquio icquin chuibampanëdash. Aden chuibansho tantiashun Aquidan aton chido Pisidabëtambi aton shubuno buanshun: Esus nadquidquio nec, quequin naden abimbo chuipanëdash: Matsesmiaid icquin Esusën nadatiambocquin nanëdaidbëta abided cuidadec uënësash uincuenaid bëdambuen tantiamequin Apodo chuibampanëdash.

²⁷ Adoac iuec tabadquin Epeso yacno chuibanashic: Nidaid Acaya caid yacno nidnu, quesho tantiashun Epeso yacnocquid Esus tantiaquidon naden dada uashun Apodo menepanëdash: Nëid dada uaid buanquid Apodo cuëmëdquid Esus tantiaquid nec. Umbi bëdambuen isaid neque. Iuedta, quequin dada uashun menepanëdash. Aden meniac puduanec nidec nidaid Acaya caid yacno nidash puduedshun Esus tantiaquido bëdambuen tantiamenuen chuibampanëdash.

²⁸ Aden chuibanquimbic isadaidbo Esus tantiesabo icsho issun abëd onquequin: Esus Nuquin Papan Chomiaidquio Quidistu Mesias caid nepanëdash, quequin Nuquin Papan Chiaid isbanquin Apodon abimbo chuibampanëdash.