Hechos 17 - El Nuevo Testamento en matsés

Tesadonica yacnouësh isadaidbo chushquecuededaid

¹ Pidipos yacnouësh puduanec nidequi Pabadobëd Sidas shubu dadpen icquid Ampipodis datambidanec nidec shubu dadpen icquid Apodonia caidtsen datambidanec shubu dadpen icquid Tesadonica yacno nidpanëdash. Ambobi isadaidbon Nuquin Papan Chiaid chuibante shubu iquec, quesho tantiash ambo tabadpanëdash.

^2-3 Ambo tabadequi abi nidtedniacpadec chonoadtemaid uëshën Nuquin Papan Chiaid chuibante shubu yacno nidshun Pabadon Esus tantiamenuen Nuquin Papan naden chiampid chuibampanëdash: Nuquin Papan Chomiaid Quidistu Mesias caid abided cuidadec uënësash padpidec uincuenendac, quequin chiampid icnuc Nuquin Papan Chomiaidquio Quidistu Mesias caid Esus nec, quequin mibitedi chuibanec nebi, quequin Pabadon chuipanëdash. Aden chonoadtemaid uëshë 3tedec icquin chuibampanëdash.

⁴ Aden chuibanac Esus tantiaquid nëidtedi yampanëdash. Nëidic isadaidbo utsi utsiec. Utsibic Nuquin Papa tantiaquido quidieco matses dadpen. Utsibic ambocquidon chuiquid tapabon chido utsi utsiec. Aidtedi Esus tantiaquid yampanëdash.

⁵ Aden Pabadon chuibanac Esus tantiaquid dadpen yansho isashien isadaidbo utsibo nëishshun abembi capuquido tantiesabo icsambocquid dadpen iccuededmequin aidotsen chuiquin nëishmiac natia chushquecuededpanëdash. Adec chushquecuededsho tantiashun Pabadobëta Sidas bednuec Pabado ushacno Ason cuëmëdquidën shubun puduedpanëdash.

⁶ Adec puduedshun isac Pabadobëd Sidas nibëdsho issun chieshëmënquidon Asombëta Esus tantiaquid utsibo bedshun aton chuiquid tapabo yacno buampanëdash. Aden buanash cumapenec cuëdcuededec: Nidaid utsi utsiec yacno capucuennequin icsambuen tantiamequin chuitemaid chuibanquido nëmbo choaccosh.

⁷ Aido Asonën aton shubun iuedac caosh. Aidombi nuquin chuiquid tapa Sesadën chiaid niacquin: Chuiquid utsi Esus cuëmëdquid iquec, quequin chuibanac caosh, quepanëdash Pabado chieshënquido aton chuiquido chiec.

⁸ Aden chuisho tantiash iccuededquidobëd chuiquid tapabo chushquec cumapenec cuëdcuededpanëdash.

⁹ Adtanec Asombëta abëd icquido chiec: Mibi: Puduenmete bunebique. Ubi piucquid mene. Aden meniac mibi nidmembi, cac meniac Asombëta abëd icquido puduenmepanëdash.

Bedea yacno Pabadobëd Sidas tabadaid

¹⁰ Adshumbic: Mibi bednushe, queshun aid inchëshëmbi Tesadonica yacnocquid Esus tantiaquidon Pabadobëta Sidas shubu dadpen icquid Bedea yacno nidmepanëdash. Aden nidmiac ambo tabadec Nuquin Papan Chiaid chuibante shubu yacno Pabadobëd Sidas puduedpanëdash.

¹¹ Ashunquiotsen: Nuquin Papan Chomiaid Quidistu caid Esus niondash, quequin tantiamenuen Nuquin Papan Chiampid Pabadon chuibansho ambocquido isadaidbo Tesadonica yacnocquidon tantiacpadempenquio bëdambocquid icquin: ¿Abimbobida chuibanoshe? Tantiabono, queshun Nuquin Papan chuiquin dada uamiampid isban isbampanëdash Bedea yacnocquidon.

¹² Aden isbanash: Abimbo caic, quiash isadaidbo dadpen Esus tantiaquido yampanëdash. Adecbidi isadaidpembon chuiquido quidieco matses utsi utsiec aton chidobëdi Esus tantiaquid dadpen yampanëdash.

¹³ Adnubien: Bedea yacnoshontsen Pabadon Nuquin Papa caidën chiaid chuibanec, quesho tantiash Tesadonica yacnocquid isadaidbo Bedea yacno nidshun ambocquidotsen nëishmiac chushquec cumapenec cuëdcuededpanëdash.

¹⁴ Adsho tantiashumbien Bedea yacnocquid Esus tantiaquidon acte dapa mad caid cuëman badedquio Pabado nidmepanëdash. Adnubi Sidasbëd Timoteo nidenquio yec Bedea yacnobi tëshëdpanëdash.

¹⁵ Bedea yacnoshon utsibon bëyucanquin Pabado buanec nidequi shubu dadpen icquid Atenas yacno chopanëdash. Ambo choash abia bëyucanquin Pabado bëbuedo: Ubi icbocnobidi Bedea yacno niduaibi, quesho tantiashun Pabadon: Mibi yacno niduashun: Badedquio Atenas yacno chota, quiosh Pabado, quequin Sidasbëta Timoteo chuita, capanëdash. Aden chiac nidannepanëdash.

Atenas yacno Pabado tabadaid

¹⁶ Adashic Atenas yacno Pabado tabadquin Sidasbëta Timoteo cainec capuquimbi Atenas yacnocquidon papa canun nacnenaid dadpenquio tabëcaid tabadsho isbampanëdash. Adsho isash Pabado uënësquio yampanëdash.

¹⁷ Adec uënësquio yanec Nuquin Papan Chiaid chuibante shubu yacno nidshun Esus tantiamenuen Nuquin Papan Chiampid Pabadon isadaidbobëta Nuquin Papa tantiaquido utsibo chuibampanëdash. Adembidi ambocquidon piucquid bednuen menebanacno nidshun adombuembidi Pabadon chuibanuapanëdash.

¹⁸ Aden chuibansho tantiash utsi utsiec epicudeobo: ¿Atotsibi cuishoncamepec? quequin chuinëdacpaden tantiaquido Pabadobëd onquepanëdash. Adembidi tantiash estoicobo: Ubi bunactedi dadpen mëmunquin nainquio iquembi, quequido Pabadobëd onqueuapanëdash. Aido Pabadon chuisho tantiate bunenquio yec: Abembi onquecuennequidien nechitec, quenubi utsi utsiec: Matses utsibon papa cain cuënaido chuibanec nepanui, quepanëdash. Pabadon Chiaid Bëda chuibanquin Esus uënësash uincuenaid chuibansho tantiash adpanëdash.

^19-20 Adec onqueshumbic: Utsin tantiaid tantianu, queshun macuësh Adeopaco caid yacno iccuededquidon buanshun Pabadon aden chuipanëdash: Mimbi chiaid umbi tantiacmaid nec. ¿Midapadquidquio chuibanec mibi neque? Tantianu. Chuiban, quepanëdash Pabado chiec.

²¹ Abi buanquido Adeopaco caid yacno nidtedniash Atenas yacnocquidobëd nidaid utsi utsiec yacnouësh chochoquido badiadquidën badiadquidënquiec utsin utsinquien ambi tantiacpaden chuibansho tantianuec iccuededtednepanëdash.

²² Aden: Mimbi tantiacpaden chuibanta, caquien aid shubu Adeopaco caid nënantanquio nidtoshon naden Pabadon chuipanëdash: Tantiata, Atenas yacnocquido. Mibitedi chuibannu. Mimbi papa cain cuënaid mimbi tantiaidquio dadpenquio iquec, quequin tantiembi.

²³ Capucuennequin mimbi tantianuen nacnenaid aid ismenuen mananquin tabëcaid dadpen isombi. Mimbi papa cain cuënaid dadpen tabëcaid icnubi mimbi cuënacmaid abentsëc iccosh. Aid mimbi cuënacmaid icnuc abibimbuecnuc nacnenaid nibëdosh. Aid ismenuen mananteuidtsëqui iccosh. Anoshon: Nuqui tantiacmaid icnushe, queshun aid manante iquec, quequin mimbi dada uaid dectanaid iccosh. Aden mimbi cuënacmaid mimbi tantiacmaid mibi chuibannuec nebique. Tantiata.

²⁴ Umbi tantiaid Nuquin Papa nidaidbëta abu uashun aidën icquidtedi uaquidquio nec. Abitedi uaquidquio yec abitedishun Icbombo aidi nec. Aidi matsesën shubu uaidën tabadesa nec.

²⁵ Aidi: Ubi nashunta, quenquio icsho matsesën aid nashuntiapimbo iquec. Aidën tantiacpadec nuquitedi tabadec. Aidën tantiacpadec nuquitedi tiboquec. Aidën tantiacpaden nuqui pete bedshun pequin acte aquec.

²⁶ Aidëmbi matses abentsëc uashumbic aidën tsiuecquido dadpen caidmepampic. Adec caidash matses utsi utsiec dadpen yanash nidaid utsi utsiec yacno tabadquido nec. Aden matses uabi icquin Nuquin Papan: Aid uëshënquio yanendac. Aido ambo tabadendac, quequin ambi tantiacpadembi napampic.

²⁷ Aidëmbi naden tantiec: Matses tantiaquin abitedi uaquin nashunondambi. Ma aidon: ¿Tsuntsin nabanaid nepec? queshun ma ubi tantiaquin Icbo canu, quequin Nuquin Papan nuqui nashunaid nec. Aidi uannopenquio yec nuquibëd iquec.

²⁸ Aidën nac tiboquec abi nuqui iquec. Aidën nac capuec shëquëquequid nuqui nec. Adembidi min matsesën dada uaquin chiampid nad iqueque. Tantia. Chuinu: Nuquin Papa caidën bacuëbo nuqui nec. Abia matses uampidën tsiuecquido nuquitedi nec, quequin chuipanëdash.

²⁹ Nuquin Papan uaido yec ambi matses uampidën tsiuecquido yec tiboquequid icquin shocosh bëshpiu bëshpiucquid odo yec shocosh ushu yec cuënote yec quequin ambibi tantiaquin matsesën nacnenaid tiboquesa icsho papa cuënenquio ictiadquidi matses nec.

³⁰ Ënden matsesën ambibi nacnenshun: Papa, quequin cuënsho tantiash Nuquin Papa: Padi. Aden nainda, quenquio iccondaidi nëbi: Mimbi icsambuen tantiaid ënshun ubi tantiaquin umbi chiacpadombuen nabanta, quequin matses abitedimbo chiec.

³¹ Matses abitedishun naid chuibanquin cuidte uëshë chonoc matsesën icsambuen naidbëta bëdambuen naid chuibanquin Nuquin Papan Chomiaidën cuidbanendac. Aden matsesën naid chuibanquid nec, queshun ismenu, quequin ambi chiampicpaden naquin Nuquin Papan isadaidbon uënës uacsho Aid uincuenmepanëdash, quepanëdash Pabado.

³² Adec aidi uënës uacsho Nuquin Papan uincuenmepanëdash, quequin Pabadon chuibansho tantiashun utsin utsinquien mamënshunnubi utsi utsiec: Mimbi chuisho padpiden tantiate bunebi, quepanëdash.

³³ Adoaquien Pabado Adeopaco caid yacnouësh iccuededquido nianec nidpanëdash.

³⁴ Adec nidsho istanquin: Padpiden aid tantiate bunebi, quebuedo utsin utsinquien tsibanash Esus tantiaquido yampanëdash. Nëidic Dionisio cuëmëdquid Adeopaco caid yacno iccuededquidon chuiquid nepanëdash. Utsibic chido Damadis cuëmëdquid adecbidi Esus tantiaquid yampanëdash. Aidobëd utsi utsiec Esus tantiaquid yampanëdash.