Hechos 16 - El Nuevo Testamento en matsés

Sidasbëd icquin Pabadon Timoteotsen buanaid

¹ Adec shubu dadpen icquid Dedbe caid yacno choash tabadquin adombuembidi chuibanuash nidec shubu dadpen icquid Disteda caid yacno Pabadobëd Sidas niduapanëdash. Ambo Esus tantiaquid Timoteo cuëmëdquid icpanëdash. Aidën tita isadaidbo yec Esus tantiaquid icnubi aidën papa isadaidpembo quidieco matses nepanëdash.

² Timoteo bëdambocquid nec, quequin Disteda yacnocquid Esus tantiaquidobëtan Iconio yacnocquid Esus tantiaquidon Pabado chuipanëdash.

³ Aden dadpenshun chuisho tantiash Timoteo buante bumpanëdash Pabado. Adec buante bunquin: Ubi capucuenniacno isadaidbo dadpen iquec. Aido Timoteo isash: Aton papa quidieco matses icnubi aton madotsen isadaidpembo nec, quenushe, queshun Pabadon Timoteo shui dëbid dëtemepanëdash.

⁴ Adotanec shubu dadpen icquid utsi utsiec yacno nidshun Esus tantiaquid utsibo yacno puduedcuennequin Esus chuibennequidobëtan Esus tantiaquidon chuiquid tapabo Edusaden yacnocquidon dada uaquin chiaid Pabadon chuibampanëdash.

⁵ Aden chuibanac ambia tantiabenquidon Esus udictsëc tantiabenquionobi utsibo Esus tantiaquid dadpen yanuapanëdash.

Ushquin isacbimbuen Pabadon isaid

⁶ Adnubien Pabado: Nidaid Asia caid yacno nidnu, quesho Nuquin Papan Mayan Bëdan: Ambo Esus chuibennec nidenda, cac Pabado abëd nidquidobëd nidaid Pidiquia caidbëta nidaid cuëshë Cadasia caidtsen matambidanec

⁷ nidaid cuëshë Misia caid yacno nidpanëdash. Ambo nidash: Nidaid cuëshë Bitinia yacno nidnu, quesho: Ambo nidenda, quequin Esusën Mayanën tantiamepanëdash.

⁸ Adoac nidaid Misia matambidanec shubu dadpen icquid Todoade yacno chopanëdash.

⁹ Ambo choash tabadquin inchëshën ushquin isacbimbuen nidaid Masedonia caid yacnocquid dada abentsëc nadec onquesho Pabadon ispanëdash: Ubitedi tantiaquin nashunec cho, quec onquesho tantiapanëdash.

¹⁰ Aden tantiash: Nuquin Papan: Nidaid Masedonia caid yacnoshontsen Esus chuibanta, caoshibique. Ambo nidnun nacnennuna, Pabadon cac badedquio buannun nacnembededpondambi.

Pidipos yacnoshon chuibanaid

¹¹ Adanec Todoade yacnouësh puduanec cano dapa antabëdtoanec cuebi nidec acte nënantanquio nidaid nacnëdquid Samotadasia caid yacno choash Pabadobëd icquidobëd tabadtuidpondabi. Badiadash auëshquio puduanec cano dapa antabëdtoanec nidquimbi acte cuëman shubu dadpen icquid Niapodis yacno chopondabi.

¹² Auëshquio puduanec nidequi nidaid cuëshë Masedonia caidën icquid shubu dadpen icquid Pidipos yacno Doma yacnocquido dadpenquio tabadacno choash daëdpactsëc ushec tabadpondabi.

¹³ Pidipos yacno tabadashic isadaidbo chonoadtemaid uëshën Nuquin Papa chiec isadaidbo onquededniacno istuidnuec puduanec shubu nibëdacno nidequi acte yacno chopondabi. Ambo choshon iccuededquido chidobo istuidshun Nuquin Papan Chiaid Bëda Esusën naid Pabadon chuibampondash.

¹⁴ Pabadon chuibanacno chido Didia cuëmëdquid shubu dadpen icquid Tiatida yacnouësh choquid icpondash. Aidi dashcute umu umumbo bëdaidquio cuëshaid menequin piucquid bedquid nepondash. Aidi Nuquin Papa tantiaquid icquin Pabadon chuibansho tantiec tsadsho Nuquin Icbon tantiamiac Esus tantiaquid Didia yampondash.

¹⁵ Aidbëd aton shubun icquido Esus tantiaquido yansho issun acten mentobampondash. Aden abi mentoboc Didian: Esus tantiaquid nec, quequin ubi tantiaquid icsho umbi: Cun shubuno ushec cho, cac ubitedi nidash Didian shubun puduedash Pabadobëd tabadpondabi.

Pabadobëta Sidas quënën tsadunaid

¹⁶ Adashic padpidec Nuquin Papa chiec onquedenniacno Pabado abëd icquidobëd niduaquimbi chido iuaid bëquedtuidpondash. Aidëmbi podobitsi icsan tantiamiacpaden: Nad iquendac, quequin chuisho matsesën piucquid dadpen meniac ambi bedaidtedi abi iuaquid meniannequid aid chido nepondash.

¹⁷ Aden bëquedtuidac Pabadobëta ubitedi tsibambëec choec chido nua cuëdec: Nëid dadatedi Nuquin Papa abitedishun Icbon namiaidombo nec. Aido: Nuquin Papa yacno puduedmianquid iquec, quequin chuibanquido nec, quec

¹⁸ badiadquidën badiadquidënquiec cumapenec cuëdtednepondash. Adec cuëdsho tantiate bunenquio icquin amibidi bidiadquin podobitsi icsa dapuduedaid chido chuiquin cumapenec cuëdquin Pabadon: Esuquidistu Cun Icbombo icquin dapuduenmeta, cac aid chidon dadan iquenquio yec badedquio podobitsi icsa dapuduempondash.

¹⁹ Aden dapuduenmiac chido bëdanacsho issun abi iuaquidon: Nëbi nadquio iquendac, quequin chuitiapimbo nuquin iua iquec. Aden chuiquin piucquid bedshun nuqui meneuatiapimbo iquec, quequin tantiec nëishshun Pabadobëta Sidas bedshun nimbanquin aton matses iccuededacno nidshun aton chuiquido yacno: Ma cuidnu, quequin chido iuaquidon buampondash.

^20-21 Aden cuidte chuiquido tabadacno bëash: Nëid dada daëd isadaidbo nec. Nëmbo chochoshon aton chuiquidon: Naden nata, quequin chiaid icsambuen chuibanec. Ubitedi Doma yacnoquido icquin ambi chiaid ubitedishun natemaid icnuc cun matsestedi chushquecuededmiosh, quepondash chido iuaquido cuidte chuiquido chiec.

²² Aden chuisho tantiashumbic chuiquid yacno tabadquidontsen adembidi aido icsambuen chuishunuapanëdash. Adoac cuidte chuiquidon: Mimbi bëbuedo dashcute dachicshun cuesten cacuesmeta, cac sondadon cacuespanëdash.

²³ Aden iuen cuescanten cumapenen cacuesmetanquin buanshun quënën tsadunmeshun: Cuennushe. Isquiota, quequin quënën tsadunaido isquid chuipanëdash chuiquidon.

²⁴ Adsho tantiashun ambi: Ista, caidën Sidasbëta Pabado quënë ëquëducquio icquidën tsadunshun cueste shëcuë uaidën tausunash puduentanquin quënë bëdambuen bëtashpanëdash.

²⁵ Adoaquien inchësh poctsenquio Pabadobëd Sidas Nuquin Papa chiec onquepanëdash. Adecbidi Nuquin Papan naid chiec cuëdëmpanëdash. Adec cuëdënsho quënën tsadunaid utsibon tantianubi

²⁶ cumapenec nidaid ishcudnubi quënën tsadunacnotsen ishcudnuc shëcuë bëtashaidtedi shëcniadpanëdash. Adecbidi quënën tsadunquin shocosh bucun mëtaniaidtedi mënchiquidnubi adecbidi tataniaid tachiquidpanëdash.

²⁷ Adnubien: Ista, cabued isec tsadbuedi ushtanec isucunquin isac shëcuë bëtashaidtedi shëcniadac. Adsho isash: Ista, caid: Quënën tsadunaido puduen puduempash icnui, quetanec: Chuiquid tapabon ubi cuessunnemetsiash, queshun: Siadnu, quequin abi tsiusudaid chështe chicpanëdash.

²⁸ Adsho istanec Pabado: Quënën tsadunaidtedi nëmbo iquebique. Seshunniadenda, quec cumapenen cuëmpanëdash.

²⁹ Adoaquien seshunniadtsembuedën: Tabote bec cho, cac ambi namiaidën tabote bëacsho bedshun sananec badedi quënën puduedash dacuëdec uëdëquec Pabadobëd Sidas tabadacno choash danëshën sebudpanëdash.

³⁰ Adsho issun Pabadon nidtomiaquien seshunniadtsembuedën umanuc buanshun: ¿Atotsi nashobini mimbi Papa caidën bëdambuen ispatsiash? capanëdash.

³¹ Adoaquien Pabadon: Esuquidistu min Icbombo neque. Min shubun icquidobëtambi aidquio tantiata. Adash aidobëdi Nuquin Papa yacno mibi tabadendac, capanëdash.

³² Aden chuishumbic aton shubun icquidobëtabi seshunniadtsembued tantiamequin Nuquin Icbo Esusën chiaid Pabadon chuibampanëdash.

³³ Adoaquien aid inchëshëmbi Pabadobëta Sidas cuesaid chiuë acten bëpanshumpanëdash seshunniadtsembuedën. Adash aton shubun icquidobëd Esus tantiaquido yansho issun aidtedi Pabadobëtan Sidasën acten mentobampanëdash.

³⁴ Aden mentoac aton shubuno buanshun pemepanëdash. Adashic Nuquin Papan Chiaid abimbo tantiaquid yec: Ambi bëdambo icmiaido nebi, quiash seshunniadtsembued aton shubun icquidobëd cuishonquecuededpanëdash.

³⁵ Adshumbic badiadshun cuidte chuiquidon quënën tsadunaid isquid sondado chuiquin: Quënën tsadunte shubu yacno nidshun quënën tsadumbued Pabadobëta Sidas puduenme, quequin chuitanta, cac quënë yacno nidshun Ista, cabued adombuembidi chuiuapanëdash.

³⁶ Aden chiac: Ista, cabuedën: Nëbi quënën tsadunmebued aid dada daëd puduenme, quequin cuidte chuiquidon chiosh, quequin aidon chomiaidën chioshibique. Dacuëdenquio yec puduenanec nidec nid, capanëdash Pabadobëta Sidas chuiquin.

³⁷ Adoaquien Pabado: Umbi naid chuimenquio icquin ubi daëdi Doma yacnoquido icshobi utsibon isnubi cacuesmeposhi. Adshumbic quënën tsadunoshi. Nëbi puduenmenuen ¿utsibon isenquiocnobida ubi daëdi puduenme? Padi. Ubi daëdi puduenmenuec ma chuiquidobi chopanuna, quequin quënën tabadquido ista cabued chuipanëdash.

³⁸ Aden chiac puduenanec cuidte chuiquido yacno nidshun: Mimbi quënën nauedmebued daëd: Doma yacnoquido nebi, quiosh, quequin chuisho tantiash cuidte chuiquido cumapenec dacuëdtancuededpanëdash.

³⁹ Adec dacuëdcuededec nidequi quënën tsadunte shubu yacno choash: Doma yacnoquido nec, quequin tantienquio icquin mibi quënën tsadunmiombi, queshun puduenmequin: Nëmbo iquenquio yec nidta, capanëdash Pabadobëta Sidas chuiquin.

⁴⁰ Adoac puduenanec nidequi Didian shubu yacno choash puduedshun Esus tantiaquido iccuededsho issun: Esus tantiec chieshtoenquio yec bëdambuec tabadta, quequin Pabadon chuibampanëdash. Aido chuibidanec Pabadobëd Sidas nidpanëdash.