Hechos 15 - El Nuevo Testamento en matsés

3. Edusaden yacnouësh Esus tantiaquidon chuiquido onquec tabadaid ( 15.1-35 ) Esus chuibennequidobëd tsësiobo iccuededec: Bëdambuen tantianuna, quianaid

¹ Adnubien nidaid Udea caid yacnouësh choquido Esus tantiaquid utsibo Antioquia yacno chochoash tabadquin: Nuquin Papan: Naden nata, quequin Moises chuiquin dada uamiampicpaden shui dëbid dëtemesa Nuquin Papa yacno puduedtemaid nendac, quequin chuibampanëdash.

² Adnubien Pabadobëd Bednabe ambo tabadquin aidon chuisho tantiash: Nuquin Papan aden chiambo iqueque. Aden chienda, quec aidobëd cumapenec cuëdcuededpanëdash. Adsho tantiashun Esus tantiaquido chuibanquidon: Edusaden yacno nidshun cumapenec cuëdcuededbued Esusën: Ubi chuibenneta, caidobëta Esus tantiaquidon chuiquid tapabo chuitanta, quequin Bednabebëta Pabado chuishumbic Esus tantiaquid utsibo chuiuaquin: Aidobëd nidta, quequin chuipanëdash.

³ Adoac Antioquia yacnouësh puduanec nidec nidaid cuëshë Penisia caid yacno choash tabadquin: Ambi icsambuen tantiaquin naid ënash Isadaidpembotsen Esus tantiaquid yamposh, quequin chuipanëdash. Adsho tantiash cuishonquepanëdash Esus tantiaquido. Adtanec auëshquio nidequi nidaid Samadia caid yacno nidash tabadquin adombuembidi chiac adquiecbidi cuishonqueuapanëdash Esus tantiaquido.

⁴ Auëshquio puduanec nidec Edusaden yacno choash tabadquin ashunquiotsen Nuquin Papan namiacpaden ambi capuquin nabanaidtedi Pabadobëtan Bednaben Esus tantiaquido yec Esus chuibennequido yec Esus tantiaquidon chuiquid tapabo yec quec tabadsho tantiamequin chuibanuapanëdash.

⁵ Aden chiac utsi utsiec Esus tantiaquid padiseobo: Nuquin Papan: Naden nata, quequin chiampid tantiaquin isadaidpembotsen shui dëbid dëtemetiadquidi nec. Adashic: Nuquin Papan: Naden nata, quequin Moises dada uamiampidtedi nabanmetiadquidi neuaic, quequin chuipanëdash.

⁶ Adoaquien abia Esusën: Ubi chuibenneta, caido Esus tantiaquidon chuiquid tapabobëd: Bëdambuen tantianuna, quiash onquecuededpanëdash.

⁷ Adec iuec onquec tabadash Petedo nidtoec nadpanëdash: Cun utsibo, tantia. Chuinu. Ënden Nuquin Papan naden chuipondashi. Isadaidpembo Esuquidistu tantiaquid icmete bunebique. Aidotsen Esusën naid Chiaid Bëda chuibenneta, quequin chuipondashi. Adoac umbi naondaid chuibansho mibitedishun tantiondac.

⁸ Umbi Esus chuibanac aid tantiaquid isadaidpembo yampondash. Adsho issun matsesën tantiaid tantiaquid icquin Nuquin Papan: Esus tantiaquid nec, quequin aton Mayan Bëda nuqui meniondacpadombuembidi isadaidpembo menepondash.

⁹ Matses utsibo nec, quenquio icquin aidotsen Esus tantiamequin bëdambuen tantiamequiopondash.

¹⁰ Aden Nuquin Papan nasho issumbi: ¿Atotsi queshun: Nuquin tsusedpabon natiapimbo icpampidi nuquitsen natiapimbo ictequid caic isadaidpembo chuiquin: Moisesën chiampicpaden nabanta, cate mibitedi bumpe?

¹¹ Aden chienquio icnuna. Matses abitedi icsaquid icsho cuidnushe, quiash Esusded cuidadpanëdash, quequin tantiaquiec uënësash abëdi tabadendac, quequin nuqui tantiacpadembidi Esus tantiaquido yanshun isadaidpembon tantiec, quepanëdash Petedo.

¹² Aden Petedon chuibansho tantiec otacquio tabadnubien Bednabebëtan Pabadon Nuquin Papan namiacpaden ambi nadatiambocquin naquin isadaidpembo ismebanaid chuibampanëdash.

¹³ Aid daëdshun chuibanquin nainan Esusën utsi Santiaco Esus tantiaquidon chuiquid tapambo yec nadpanëdash: Umbitsen chuinu. Tantia, cun utsibo.

¹⁴ Isadaidpembo tantiaquin aido Esus chuibanta, quequin Nuquin Papan chiacpaden Simon Petedon chuibanac isadaidpembo Esus tantiaquid yanosh, quequin chuisho nuqui tantioc. Nuquin Papan aidobëta nuqui aton matses icmiac.

¹⁵ Adombuembidi Nuquin Papan oncamiaidon dada uampid Nuquin Papan Chiaidquio nad iqueque. Tantia. Chuinu:

¹⁶ Isadaidbobëd iuec tabadenquiocbuedi padpidec choash aidobëd icuaindabi. Umbi tantiacpadën Dabidën tsiuecquid chuiquidpenquio icbuedi chuiquid icmeuaindambi. Shubu chimeshadacsho chuca uaquin nacnenacbimbuen adquid icmendambi, quequin Nuquin Papan chuipanëdash.

¹⁷ Adoac nidaid utsi utsiec yacnocquido matses utsibon ubi tantiabededendac. Adsho aidotsen bëdambuen isquin: Cun matses nec, caindambi.

¹⁸ Nuquin Icbon ambi ëndenquimboshë tantiampicpadombuen chiaid nec, quepampic Nuquin Papan oncamiaid, quequin Santiacon chuipanëdash.

¹⁹ Aden chuishumbic: Esus tantiaquid isadaidpembo icsho Nuquin tsusedpabon: Naden nata, quequin chiacpaden nabanta, cainquio icnuna. Esus tantiabenshun aton matsesën icsambuen tantiaquin nabanaid ma tantienquio icquin ëmpanu.

²⁰ Nadenuidtsëqui dada uaquin isadaidpembo chuinuna. Ambi papa canun nacnenaid ismequin pete sanaid penda. Adembidi min chidouidtsëqui chudquid icta. Adembidi min bënëuidtsëqui chudmequid icta. Adembidi nëish tëtaniaid penda. Adembidi tëshë codocaid intac icquid penda, quequinuidtsëqui isadaidpembo chuibannuna.

²¹ Naden tantiaquin aden chiombi: Ënden shubu dadpen icquid yacnoshon yacnoshonquien Nuquin Papan Chiaid chuibante shubunshun Moisesën dada uampid chuibansho isadaidbon tantiadednepampic. Nëbi adombuembidi chonoadtemaid uëshën uëshënquien Moisesën dada uampid chuibansho tantiauapec, quepanëdash Santiaco iccuededquido chiec.

Isadaidpembon iste dada uaid

²² Adashic Esus chuibennequido yec Esus tantiaquidon chuiquid tapabo yec Esus tantiaquido utsibo yec quec iccuededec onquec ënëdshun: Umbi aden chuibued dada uaid Antioquia yacno ma buannu, quequin Pabadobëta Bednabe nidmenuna. Aidobëd nëid daëd chuiquid icsho nidmenuna, quequin chiac abentsëc Udas cashumbic Badsabas caidbëta Sidas cuëmëdquid nidmenuna, quequin chuipanëdash.

²³ Isadaidpembo chuiquin Edusaden yacnoshon Esus tantiaquidon naden dada uapanëdash: Esus chuibennequido yec Esus tantiaquidon chuiquid tapabo yec min utsibo Esus tantiaquido yec quec Edusaden yacnocquido nebi. Mibi cun utsibo nec. Isadaidpembo Esus tantiaquido Antioquia yacno tabadquido yec nidaid Sidia yacno tabadquido yec nidaid utsi Sidisia yacno tabadquido yec quesho mibitedi tantiembi, quequin chuiquin dada uaombique. Isec onqueta.

²⁴ Umbi: Nidtan, cacmaidobi nëuëshquio nidash mibi yacno puduedshun: Isadaidbon: Naden nata, quequin chiaidtedi natiadquidi mibi nec, quequin mibi icsambuen chiac caosh. Adoac mimbi Esusquio tantienquio ictsenash, quequin tantiombi.

²⁵ Aden chiosh, quequin chuituidsho tantiash nëmbocquidobëd iccuededec onquequin: Naden chuiquin dada uanuna, queshun nëid dada uaombi. Aidi nëmbocquidobëtan nuqui tantiaidquio nuquin utsi Bednabebëta Pabado buantan, quequin chiombi.

²⁶ Aid daëdi Nuquin Icbo Esuquidistu chuibansho utsibon cuessunnetsenaqui: Uënësmane, quenquio yec capucuennequin chuibennequidquio nec.

²⁷ Adembidi Udasbëta Sidas mibi yacno nidmembi. Adoac aidon umbi dada uacpaden mibitedi bëdambuen chuibanendac.

²⁸ Nuquin Papan Mayan Bëdan ubitedi tantiamiacpaden isadaidbon: Naden nata, quequin chiaidtedi nabanta, mibitedi cainquio iquembi. Nëidtedtsëqui ubitedishun: Nainda, caid nec.

²⁹ Ambi papa canun nacnenaid ismequin pete sanaid penda. Adembidi min chidouidtsëqui chudquid icta. Adembidi min bënëuidtsëqui chudmequid icta. Adembidi nëish tëtaniaid penda. Adembidi tëshë codocaid intac icquid penda, quequin chiac umbi chiacpaden nabanec mibi bëdambo iquendac. Mibitedi tantiaquin aidtedtsëqui chiombi.

³⁰ Aden dada uaquin nainshun ambi: Nidtan, cabuedo meniac Antioquia yacno nidannepanëdash. Ambo nidash Esus tantiaquido iccuededmiash puduedshun dada uaid menepanëdash.

³¹ Aden meniac isquin chuibansho tantiash: Bëdambuen chiaid isash bëdambo iquebi, quec cuishonquecuededpanëdash.

³² Adnubien Udasbëtan Sidasën Nuquin Papan oncamiaido icquin Nuquin Papan Chiaid chuibanquin Antioquia yacnocquid Esus tantiaquido: Chieshtoenquio ictsiabi, camenuen bëdambo icmequin tantiamepanëdash.

³³ Aden dadpen ushquin chuibanshun Edusaden yacnouësh choquido: Padpidec niduaibi, caquien: Uënësquio icquimbi mibi chomequido yacno bëdambuec nidta, quequin chuipanëdash Antioquia yacnocquid Esus tantiaquidon.

^34-35 Adec Udas Edusaden yacno nidnubien Sidas yec Bednabe yec Pabado yec quec Antioquia yacno tabadquin Esus tantiaquido Nuquin Papan Chiaid Bëda Esusën naid bëdambuen tantiamenuen chuibampanëdash.

4. Pabado padpidec Esus chuibennec niduaid ( 15.36—18.22 ) Pabadobëd Bednabe cuëshëdaid

³⁶ Adashic iuecash Pabado Bednabe caic: Capucuennequin Nuquin Papan Chiaid nuqui chuibenniac Esus tantiaquid yanondaido ¿mitsipadec tabadeque? Isbennenu nid, capanëdash.

³⁷ Adoaquien: Uan cashumbic Madcos cuënaid ma nuquibëd nidnu. Chuinuna, capanëdash Bednaben.

³⁸ Adoaquien: Aidi nidaid Pampidia caid yacnouësh chieshec tëshëdondashe. Padi, capanëdash Pabadon.

³⁹ Adoaquien Bednaben aden tantienquio icquin: Aidi buannuna, quequin iuen chuibudaqui Pabadon adembidi: Padi, cauac Pabadobëd cuëshëdnanec Bednabe Madcosbëd cano dapa antabëdtoanec nidec acte nënantanquio nidaid nacnëdquid Chipide yacno nidpanëdash.

⁴⁰ Adnubien Pabadon Sidas chuiquin: Nuquibi nidnunid, capanëdash. Adec aid daëd: Nidnu, quesho tantiashun ambocquid Esus tantiaquidon: Ma mibi tantiaquid Nuquin Papan mibi daëd bëdambuen nidmequin bëdambo icmepanuna, quequin chiac Pabadobëd Sidas nidpanëdash.

⁴¹ Adec nidec nidaid Sidia caid yacno nidash capucuennequin Esus tantiaquido bëdambuen tantiamenuen chuibampanëdash. Aden chuibenneshumbic nidaid Sidisia yacnotsen nidshun Esus tantiaquido chuiquin: Adembidi Esus tantianuna, quequin Pabadon chuibanuapanëdash.