Hechos 14 - El Nuevo Testamento en matsés

Shubu dadpen icquid Iconio yacno choaid

¹ Adashic Pabadobëd Bednabe shubu dadpen icquid Iconio yacno choash tabadpanëdash. Ambo tabadec Nuquin Papan Chiaid chuibante shubu yacno nidash puduedshun Esusën naid chuibanac isadaidbobëd isadaidbopembo dadpen Esus tantiaquid yampanëdash.

² Aido Esus tantiaquid yannubi isadaidbo utsibon Pabadon chuibanaid tantiatiapimbo icquin Esus tantiaquido muaquin chuiquin isadaidbopembotsen nëishmepanëdash.

³ Aido nëishmiambi Iconio yacno iuec tabadquin Pabadobëtan Bednaben: Nuquin Icbon nuqui bëdambuen nametsiash, quiash dacuëdenquio icquin Esus bëdambuen tantiamequin: Nuquin Papan matses tantiaquiec, quequin chuibampanëdash. Aden chuibansho issun Nuquin Papan nadatiambocquin nabanquido Pabadobëta Bednabe icmepanëdash.

⁴ Adoac aid daëdshun nadatiambocquin nabansho isash isadaidbon chuiquidon chuibocpadec: Bednabebëd Pabado icsambocquid nec, utsi utsiec quenubien utsibo: Ambi chiaid abimbo iquec, quepanëdash.

⁵ Aden chuisho tantiash: Bednabebëta Pabado bedtanquin mëyanshun cuënoten sesequin cuessunnenuna, quec nëidted onquepanëdash. Nëidic Esus tantiesabo isadaidbon chuiquido. Utsibic isadaidbopembo. Nëidic ambocquidon chuiquido. Aidtedi adec onquecuededpanëdash.

^6-7 Adec onquesho tantiashun utsin: Aden chuibededosh, quequin chiac cuenec nidequi nidaid cuëshë Dicaonia caidën icquid shubu dadpen icquid Disteda caid yacno nidash tabadquin Pabadobëtan Bednaben Esusën naid Chiaid Bëda chuibampanëdash. Adtanec auëshquio puduanec nidec shubu dadpen icquid Dedbe caid yacnotsen nidash tabadquin adombuembidi Esus chuibampanëdash. Adtanec auëshquio puduanec nidshun nidaid Dicaonia caid yacno shubu utsi utsiec yacno nidquin ambocquidotsen Chiaid Bëda Esusën naid chuibanuapanëdash.

Disteda yacnoshon Pabado mëyanaid

⁸ Disteda yacno nidash tabadnubien ambocquid taicsacchobi anin tishaid yec caputiapimbo icquid tsadpanëdash.

⁹ Aidi Pabadon Esus chuibansho tantiec: Esusën ubi bëdanmetsiash, quequin otacquio tantiec tsadpanëdash. Aden caputiapimbocquidën tantiacpadombuen Nuquin Papan Pabadotsen tantiamiac

¹⁰ caputiapimbocquid chiec cumapenec cuëdquin: Bëdambo yanec nidto, cac badedi nidtoec taicsaid icbuedi bëdantanec puduanec capucuempanëdash.

¹¹ Aden taicsaid Pabadon bëdanmiac capucuensho isash ambocquido aton onqueten cuëdcuededquin: Disteda yacnocquidon papa cain tantiaid matsesbimbuec yanash abucuësh budoshe. Nëid daëd isec cho, quepanëdash.

¹² Adtanequi Bednabe otacquio tsadquid icsho issun ambi papa cain tantiaid Seus cain Bednabe cuënquimbi Pabado chuibanec onquequid icsho issun ambi tantiaid utsi Edmes cain Pabado cuëmpanëdash Disteda yacnocquidon.

¹³ Ambocquidon papa caid Seus ismequin nëish iua pichicaquid icpanëdash. Aid shubu dadpen icquid puduedte shëcuë cuëman Seus tabadte shubu icpanëdash. Aden cuënsho tantiashun baca bënë daëdbëta bëdambo isadnuc nacnenaid payumetequid bëec: Mibi daëdi Disteda yacnocquidobëtan umbi papa cain tantiaid neque. Ismenu, quequin ambi papa canun tantiaid nacnenaid Seus caid dayun uaquido: Aido ismequin baca cuessunnemenu, quepanëdash.

¹⁴ Aden ambi papa canun nacnenaid ismequin pichicanuen baca cuessunnemenuen bësho issun Pabado: Icsambo iquec, quequin ismenuen abi dasiuidaid aton dashcute bëntsecquid shoyonquin cancheuidtanec iccuededquidon nënantanquio nidash Bednabebëd Pabado cumapenec cuëdquin chiec nadpanëdash:

¹⁵ ¿Atotsi quequin aden nai? Ubi daëdi mibi padquid matsesquio nebi. Mimbi tantiacmaid nebique. Baca cuessunnenda. Chiaid Bëda Esusën naid mibitedi naden chuinuec chobi. Nuquin Papa uënëstiapimbocquid abentsëcquiobi iquec. Aidëmbi abu uaquinc nidaid uaquinc acte uaquinc cashun aidën icquidtedi uaquidquio neque. Aiduidtsëqui tantiaquin matsesën papa canun nacnenaid tantiesa icta.

¹⁶ Ëndenquimbo Nuquin Papan: Aden nainda, cainquiocnoc matsesën ambibi tantiacpaden nabampampic.

¹⁷ Aden nainda, cainquio icquimbi: Abitedishun Icbo icquin bëdambocquid nebi, quequin ismequin ue secamedednequinc, cute bacuëmequinc, nuqui penun tiedën nitsindenniaid canimequinc cain Nuquin Papan bëdambuen naid nuquitedi pebededec. Aden nabanquin Nuquin Papan bëdambo icmiaido nuquitedi nec, quepanëdash Pabadobëd Bednabe.

¹⁸ Aden chuibudaqui abi baca cuessunnemete bunsho issun: Padi, cauapanëdash Pabadobëtan Bednaben.

¹⁹ Adnubien isadaidbon chuiquido Antioquia yacnocquidobëd Iconio yacnocquido Disteda yacno chochoshon: Pabado icsambocquid nec, quequin chiac Disteda yacnocquido nëishcuededpanëdash. Adec nëishcuededshun Pabado cuënoten sesetanquin: Uënësosh, queshun nimbanquin buanshun shubu nibëdacno Pabado netampanëdash.

²⁰ Ambo netanan Esus tantiaquido nidanneshun istuidash dacuenadec databëdtuidnubi Pabado nidtopanëdash. Adash padpidec aidobëd Disteda yacnobidi choec shubun pudueduapanëdash. Adashic badiadash puduanec shubu dadpen icquid Dedbe yacno Pabadobëd Bednabe nidpanëdash.

Nidaid Sidia caidën icquid Antioquia yacnobidi chouaid

²¹ Adec Dedbe yacno nidash tabadquimbi Pabadobëtan Bednaben Chiaid Bëda Esusën naid chuibanac Esus tantiaquid dadpen yampanëdash. Auëshquio padpidec puduanec chouaic shubu dadpen icquid Disteda yacnoba chopanëdash. Adashic Iconio yacnotsen chouashic Antioquia yacno chouapanëdash.

²² Aidtedi yacno chouaquin Esus tantiaquido naden chuibampanëdash: Natiamiantequid iquendac. Adquid icnuc Nuquin Papan namiacno tabadtequid nebi, quequin Esus tantiec chieshtoenquio yec tabadta, capanëdash Pabadon.

²³ Adembidi Esus tantiaquido yacno yacnombuen Pabadobëtan Bednaben: Bëdambuec tabadquin ismequin Esus tantiaquido chuibanquid icta, capanëdash. Adotanec ambi chuibuedobëd Nuquin Papauidtsëqui tantiaquin buna mëmunec tabadpanëdash. Adtanquimbic mamishbanquin: Nëido mibi tantiaquido neque. Bëdambuen dayun uata, Papa, quequin Pabadobëtan Bednaben chuipanëdash.

Nidaid Sidia caidën icquid shubu dadpen icquid Antioquia yacno chouaid

²⁴ Adanec auëshquiobi puduanec nidec nidaid cuëshë Pisidia caid matambëtsenec nidaid cuëshë Pampidia caid yacno chopanëdash.

²⁵ Adtanec shubu dadpen icquid Pedque yacno choash tabadquin Esusën naid chuibanash shubu dadpen icquid Atadia yacnotsen choshon chuibampanëdash.

²⁶ Auëshquio cano dapa antabëdtoanec nidash pudundoanec shubu dadpen icquid Antioquia yacno chopanëdash. Ashunquio Nuquin Papan Mayan Bëdan tantiamiac: Nuquin Papan mibi bëdambuen isquin dayunuaique. Dacuëdenquio icquin chuibennetan, quequin abi chiondacnombo chouapanëdash.

²⁷ Ambo choash tabadquin ambo icquid Esus tantiaquidobëd iccuededquin Nuquin Papan tantiamiacpaden abi capucuenniacnoshon ambi nabanaidtedi Pabadobëtan Bednaben chuibampanëdash. Isadaidpembo dadpen Esus tantiaquid yamposh, quequin chuibampanëdash.

²⁸ Adashic ambobi iuec Esus tantiaquidobëd Pabadobëd Bednabe tabadpanëdash.