Hechos 11 - El Nuevo Testamento en matsés

Petedon ambi nabanaid chuibanaid

¹ Adnubien Udea yacnoshon Esus chuibennequidobëtan Esus tantiaquid utsibon naden chuisho tantiapanëdash: Isadaidpembobi Esus tantiaquido yanac caosh, quequin chuisho tantiapanëdash.

² Aden chuisho tantiash tsusedpabon chiampicpadombuen shui dëbid dëtemequido tabadquin cainnubi: Petedo Edusaden yacno choacsho issun ambi nabanaid chuimenu, quequin chushcapanëdash.

³ Aden chushcaic: Isadaidpembo shui dëbid dëtemesabo icnuc aton shubun puduedtemaidquio nec, quequin tsusedpabon chiaid niaquec aidon shubun puduedshun mimbi pepac caoc. ¿Mitsi paden tantiec puduedshun mimbi aidobëtan piaye? Tantianu. Chui, quepanëdash Edusaden yacno tabadquido.

⁴ Adoaquien Petedon nadopanëdash: Aidobëd ubi tabadbuedtedi chuibannu. Tantiata.

⁵ Shubu dadpen icquid Ope caid yacnouësh Nuquin Papa chiec tsadquin ushquin isacbimbuen naden ispombi. Abu shëcuë yannubi ubi tsadacno dabidiete dapabimbuecquid bucun dënëshbudcuenaid budsho ispombi.

⁶ Aidëmbi nëish yec utsi utsiec yec tacbidën capuquid utsi utsiec yec podon shucquequid utsi utsiec yec bëdi utsi utsiec quec antabëdsho ispombi.

⁷ Adquidtedi icsho isnubi: Nidtoshon cuessunneshun pe, Petedo, quec onquesho tantiapombi.

⁸ Adsho tantiashun: Aidtedi umbi petemaid icsho pichicaquin mibi ismetemaidbidi nec. Adquid pesambo nebi, Icbo, capombi.

⁹ Adoaquien abucuësh padpidec onquequin: Nuquin Papan bëdambo icmiaid petemaid nec, cainda, caposhi.

¹⁰ Aden 3teden antabëdquid imbudted imbudtedquin chuitanquin abuc indouasho ispombi.

¹¹ Adnubien dada 3ted shubu dadpen icquid Sesadea yacnoshon chomiaido ubi nibënec choash ubi icaid shubu shëcuë cuëman tabadtuidpaccosh.

¹² Adec tabadnubi Nuquin Papan Mayan Bëdan chuiposhi: Aid cacuidenquio yec nidtan, quesho tantiash aidobëdi nidpobi. Adecbidi Ope yacnocquido dada 6ted Esus tantiaquidobëd nidec Codnedion shubun puduedpobi.

¹³ Puduedacsho isash Codnedio: Nuquin Papabëd icquid budshun naden chuiposhi: Simon cashumbic Petedo cuënaid Ope yacno tabadeque. Ma aid bedtannu. Mimbi namiaido nidmeta.

¹⁴ Aidëmbi mibëta min shubun icquidtedi: Nuquin Papa yacno tabadmetequid iquec, quequin chuibanendac, quequin Nuquin Papabëd icquidën chuiposhi, quequin Codnedion chuiposhi.

¹⁵ Adoac umbi bedanquin chuibannubi aton Mayan Bëda ubitedi Nuquin Papan meniondacpadombuembidi aidotsen menebanuaposh.

¹⁶ Aden menesho issun Nuquin Icbo Esusën naden chiondaid tantiapombi: Uan acten mentoanquiduidtsëqui niondash. Padnuen: Ubi tantiaquid icsho Cun Pan Aton Mayan Bëda mibitedi menendac, quequin chuipondash, quequin tantiombi.

¹⁷ Aden isadaidpembotsen Nuquin Icbombo Esuquidistu tantiaquid yansho nuquitedi meniondacpadembidi Nuquin Papan aton Mayan Bëda aidotsen menesho issun: Padi. Menenda, ¿caquindambi icpe? quepanëdash Petedo shui dëbid dëtemequido chiec.

¹⁸ Aden Petedon nainquin chuibanac bëdambuen tantiash chushquec ënëdash isadaidbo shui dëbid dëtemequido: Isadaidpembon Esus tantiaquin ambi icsambuen naid ënsho issun Nuquin Papan aidotsen ënëdenquio yec abi yacno tabadtequid icmiac, quepanëdash Nuquin Papan naid chiec.

Antioquia yacno Esus tantiaquido iccuededaid

¹⁹ Esteban cuënoten seshunniash: Esus tantiaquido cuessun secanu, quesho tantiash: Ubitsen cuessunnenushe, quianec Edusaden yacnouësh Esus tantiaquido utsi utsiec nëidtedi yacno niquepanëdash. Nëidic nidaid Penisia caid yacno. Utsibic acte nënantanquio nidaid nacnëdquid Chipide yacno. Utsibic shubu dadpen icquid Antioquia caid yacno. Adec nidanniash tabadquin aton matses isadaidbouidi Chiaid Bëda chuibanquimbi Esusën naid chuibampanëdash.

²⁰ Adnubien Esus tantiaquid utsibo Chipide yacnocquidobëd Sidene yacnocquido shubu dadpen icquid Antioquia yacno chochopanëdash. Aidon isadaidpembotsen Nuquin Papan Chiaid Bëda chuibanquin Nuquin Icbo Esus tantiamenuen chuibampanëdash.

²¹ Aden chuibanshobi Nuquin Papan nadatiambocquin tantiamiac aidon chuibanaid tantiashun isadaidpembon: Cun matsesën icsambuen tantiaidbëta umbi icsambuen naid ënnu, quequin ënash Esus tantiaquid dadpen yampanëdash.

²² Adec isadaidpembo Esus tantiaquid dadpen yanosh, quesho tantiashun Esus tantiaquid Edusaden yacnocquidon Antioquia yacno Bednabe nidmepanëdash.

²³ Adoac Antioquia yacno choshon ambocquido Esus tantiaquido Nuquin Papan bëdambo icmiaid icsho isash: Bëdambo iquebi, quec cuishonquequin: Adembi chieshtoenquio icquin Nuquin Icbo Esus tantiata, capanëdash Bednaben.

²⁴ Bednabe bëdambocquid icsho Nuquin Papan aton Mayan Bëda meniac Esus tantiaquidquio icquin chuibanac Esus tantiaquid utsi utsiec dadpen yampanëdash.

²⁵ Adashic Antioquia yacnouësh puduanec Saudo bednuec Bednabe nidec shubu dadpen icquid Tadso yacno nidshun

²⁶ Saudo istuidash Antioquia yacno aidbëdi Bednabe chopanëdash. Ambo choash seta abentsëc matanmec ambocquid Esus tantiaquidobëd iccuededquin Esusën naid chuibanquin aid daëdshun tantiamepanëdash. Aden chuiban chuibanac Esus tantiaquid dadpen yansho issun: Quidistubo nec, quequin tauaquin Antioquia yacnoshon cuëmbempanëdash.

²⁷ Bednabebëd Saudo Antioquia yacno tabadnubien Edusaden yacnouësh Antioquia yacno Nuquin Papan oncamiaido chochopanëdash.

²⁸ Chochoshon abentsëc Acabo cuëmëdquidën Nuquin Papan Mayan Bëdan oncamiac: Iuecash Doma yacnocquidon namiaido aton nidaidtedi yacnocquidon pete nibëdnuc buntequid yanendac, quepanëdash. Aden chiambic shubu dadpenquioshë icquid Doma yacnocquidon chuiquid tapa Cadaudio cuëmëdquid icnubi adec pete nibëdquiec yampanëdash.

²⁹ Adnuc: Udea yacnocquidon pete nibëdec, quesho tantiashun Antioquia yacnocquid Esus tantiaquidon: Aido nashunnuna, queshun aton piucquid menemenuen ambi tantiactedi Edusaden yacno buanmenu, quequin sambededpanëdash.

³⁰ Edusaden yacnocquid Esus tantiaquidon chuiquido nëid piucquid menetan. Ma pete nibëdquido nidaid Udea yacnocquido menenu, quequin Bednabebëta Saudo menequin Edusaden yacno buanmepanëdash.