Hechos 10 - El Nuevo Testamento en matsés

IV.ESUS TANTIESABO ESUS CHUIBANAID ( 10.1—28.31 ) 1. Tauaquin dadpenshun Esus tantiabenaid 10.1—12.25 Codnedion Petedo chomiaid

¹ Adnubien shubu dadpen icquid Sesadea caid yacno Codnedio cuëmëdquid isadaidpembo nidaid Itadia caid yacnouësh choash ambo tabadpanëdash. Aidi Doma yacnocquid sondado dadpen 400tedshun chuiquid sentudion caid nepanëdash.

² Aidi aton shubun icquidobëd Nuquin Papa tantiaquid icquin isadaidbo atona nibëdquid icsho issun meniannequid nepanëdash. Adecbidi Nuquin Papa chiec onquiannequidquio nepanëdash.

³ Adquid yec uëshë utsin uëshë budtsambi 3 yannuc ushquin isacbimbuen Nuquin Papabëd icquidquio abi yacno puduedsho Codnedion ispanëdash. Adec choshon: Codnedio, capanëdash.

⁴ Adsho tantiash cumapenec dacuëdquin Nuquin Papabëd icquid bëisec: ¿Atotsi ubi chuinuec ne, Icbo? capanëdash Codnedion. Adoaquien: Abi chiec mibi onquedednesho Nuquin Papan tantiosh. Adembidi atona nibëdquido tantiaquin menedednequid icsho Nuquin Papan bëdambuen isaid mibi neque. Tantia. Chuinu.

⁵ Nëbi Simon cashumbic Petedo cuënaid: Ma bedtannu, quequin mimbi namiaid shubu dadpen icquid Ope yacno nidmeta.

⁶ Aidi Simon cuëmëdquid utsi nëish iua bitsi uashun chodcashun nacnenquidën shubun tabadec. Aidën shubu acte dapa mad caid cuëman iquec, quepanëdash Nuquin Papabëd icquid Codnedio chiec.

⁷ Aden chianec Nuquin Papabëd icquid nidambic Codnedion aton iua daëdbëta ambi tantiaidquio Nuquin Papa tantiaquidbidi icsho sondado utsi abentsëc chomeshun

⁸ Nuquin Papabëd icquidën chuibuedtedi chuitanquin: Ma Petedo bedtannu, queshun aido Ope yacno Codnedion nidmepanëdash.

Petedon ushquin isacbimbuen isaid

⁹ Aid badiadash uëshë cuembocnoc Ope anoentsëqui Codnedion chomiaido chonobi Petedo Nuquin Papa chiec onquenuec shubu macano padapadapambocquid yacno dectatopanëdash.

¹⁰ Adec dectatoash shubu icbon iuabon codocanubi Petedo bundoash petiadquio yec tsadquin ushquin isacbimbuen isquin

¹¹ abu shëcuë yannubi abi tsadacno dabidiete dapabimbuecquid bucun dënëshbudcuenaid budsho Petedon ispanëdash.

¹² Aidëmbi ambi petemaiduidquio nëish utsi utsiec icnubi tacbidën capuquidbëd podon shucquequid utsi utsiec antabëdpanëdash.

¹³ Adnubien: Aid bedshun cuessunneshun pe, Petedo, quec abucuësh onquesho tantiapanëdash.

¹⁴ Adoaquien: Padi, Icbo. Umbi petemaid yec pichicaquin mibi ismetemaidquiobi nec. Adquid piambo iquembi, Icbo, quepanëdash Petedo.

¹⁵ Adoaquien padpidec abucuësh onquec: Nuquin Papan bëdambo icmiaidi icsambocquid nec, cainda, quepanëdash.

¹⁶ Adotanquimbic antabëdquid abuc indouashun adenuidi 3teden budmequin Petedo chuishun abu shëcuë uaid yacno badedquio buanquin puduedmeuapanëdash.

¹⁷ Aden isash Petedo ambi isbued tantiec: ¿Atotsi ubi tantiametembi ispoba? quec tsadnubi Codnedion chomiaido Simonën shubu yacno choash shëcuë cuëman tabadtuidpanëdash.

¹⁸ Adec tabadtuidshun: ¿Nëmboda Simon cashumbic Petedo cuënaid iquec? quequin chuipanëdash.

¹⁹ Aden chuinubi ambi isbued tantiec Petedo tsadsho Nuquin Papan Mayan Bëdan: Dada 3ted choshon mibi nibënec.

²⁰ Aido umbi chomiaido neque. Budash cacuidenquio yec aidobëd nidtan, capanëdash.

²¹ Aden chiac budshun Codnedion chomiaido isash: Mimbi nibënaid nebi. ¿Atotsi quec cho? capanëdash Petedon.

²² Adoaquien: Codnedio cuëmëdquidën chomiaid nebi. Aidi sondado dadpenshun chuiquid yec bëdambocquidquio nec. Adquid icquin Nuquin Papan chiacpaden nabansho issun isadaidbon bëdambuen isaidquio nec. Aidi Nuquin Papabëd icquidën naden chuipaccosh: Simon Petedo bedtan, cata. Bedtanac choshon chuibansho tantiata, quequin Nuquin Papabëd icquidën chuiposhi, quequin Codnedion ubitedi chuiuaposhi, quepanëdash Codnedion chomiaido Petedo chiec.

²³ Adoaquien: Puduedash nëmbo ushec cho, quepanëdash Petedo. Adashic badiadanec Codnedion chomiaidobëd Petedo nidsho issun Esus tantiaquid Ope yacnocquidon utsin utsinquien tsibanampanëdash.

²⁴ Adec nidec ushcuidanec Sesadea yacno chopanëdash. Adnubien: Nëid uëshëmbien chochitec, quequin tantiashun Codnedion aton shubun icquidobëtan ambi tantiaidouidquio chochomeshun Petedon chuibansho tantianuen aton shubu nuntan iccuededquin caimpanëdash.

²⁵ Aden cainec tabadnubi utsibobëd choec Petedo puduedsho isash: Mibi bëdambocquid icnubi adesa nebi, quequin Petedo ismec dannëshën sebudec nidaidën bëccuësquepanëdash Codnedio.

²⁶ Adec dannëshën sebudec shuebudsho istanquin Petedon: Mibi padquid matses nebique. Nidto, Codnedio, capanëdash.

²⁷ Adtanec Codnediobëd onquetanec shubun puduedshun isadaidpembo dadpen tabadsho Petedon istuidpanëdash.

²⁸ Aden aido isec: Umbi naden tantiaid mibitedishun tantiec: Isadaidbo nebi. Adquid yec isadaidpembobëd capuesa nebi. Adecbidi min shubun puduedesa nebi. Puduedesa icbuedi Nuquin Papan: Umbi bëdambuen isaidi: Icsambo iquec, cainda, quequin ismequin tantiameboc ubi tantiec tsadnubi

²⁹ mimbi: Bedtan, caido nidshun chiac: Mibëd capuesa nebi, quenquio yec chobi. Adecbidi nëmbo choash isadaidpembon shubu nec. Nëmbo puduedtiapimbo iquebi, quenquio yec puduedobi. Nëbi: Tantianu. Chui. ¿Atotsi canuen ubi chomio? quepanëdash Petedo Codnedio chiec.

³⁰ Adoaquien Codnedio: Ënden 3tedec ushash cun matses mibi yacno nidmiabi yec cun shubu nuntan Nuquin Papa chiec onquec tsadobi. Adnubien uëshë budec 3 yannuc dada dashcute bëchamauanquiecquid dasiuidquid ubi yacno choec isadcuenash onquec:

³¹ Codnedio, abi chiec onquiannesho Nuquin Papan mibi tantiashunosh. Adembidi atona nibëdquido mimbi meniannesho aidëmbi bëshunenquio icquin tantiec.

³² Simon cashumbic Petedo cuënaid Ope yacnocquidbëd tabadquid ma bedtannu, queshun mimbi namiaido nidmeta. Aidi Simon cuëmëdquid utsi nëish iua bitsi uashun chodcashun nacnenquidën shubun tabadec. Aidën shubu acte dapa mad cuëman iquec, quequin Nuquin Papabëd icquidën chuiposhi.

³³ Aden chiac: Petedo bedtan, quequin umbi namiaido nidmiombi. Adoac bëdambocquid yec cacuidanenquio yec badedquio mibi choac. Adec mibi choacsho isash bëdambo iquebi. Nuquin Papan isnubi nëbi ambi tantiamiacpaden mimbi chuibansho tantiec ubitedi tabadnu, quepanëdash Codnedio Petedo chiec.

Codnedion shubu nuntanshun Petedon chuibanaid

³⁴ Aden Codnedion: Chuiban, cac Petedon naden chuibampanëdash: Matses utsi nec, quenquio icquin Nuquin Papan iuedtequid matses utsi utsiec iquec, quequin nëbi abimbo tantiembi.

³⁵ Nuquin Papan Chiaid tantiashun nidaid utsin utsinquiec tabadquidon chieshenquio icquin bëdambuen nabansho issun: Aidtedi Nuquin Papan bëdambuen isendac, quequin tantiembi.

³⁶ Isadaidbon tsiuecquidoba tantiamenuen Nuquin Papan Esus chomepanëdash. Esuquidistunuidtsëqui Abitedishun Icbombo icquin Nuquin Papa matses bëdambuen ismec, quequin tantiembi.

³⁷ Nidaid cuëshë Cadidea yacnoshon Uan acten mentoquidën mentoac Esusën nabanquin tauapanëdash. Nidaid cuëshë Udea yacnoshon adembidi aidën nabanaid chuisho mibitedishun tantiapanëdac.

³⁸ Ma abëd tabadnu, queshun Nuquin Papan aton Mayan Bëda meniac nadatiambocquin Esusën nabampondash. Shubu daëdpactsëcquid Nasaded yacnouësh caniquid yec capuquin bëdambuen nabanquin Mayan Icsa Satanasën mëyanaido icsho Esusën bëdanmebampondash. Aden Nuquin Papabëd icquin aidën nabanaid chuisho mimbi tantiapanëdac.

³⁹ Cun matses isadaidbon nidaid Udea yacnobëta shubu dadpen icquid Edusaden yacnoshon Esusën nabansho ispondambi. Aidi cueste napotiaidën dectanquin isadaidbon uënës uamesho ispondambi.

⁴⁰ Aden uënës uaqui daëdec ushash uincuenshun: Uincuenobi, quequin Esusën ismepondashi.

⁴¹ Aidëmbi uincuenshun matses abitedi ismenquio icquin Nuquin Papan: Nëidon umbi naid chuibennendac, caido icquin aidbëtan peshun accondambi.

⁴² Abëd icshobi: Ubi chuibanquin naden chuiban: Matses cuidte chuibanquid Nuquin Papan icmioshi. Uënësaidobëta uënësabicquido abitedi aden chiendambi. Bëdambocquid ubëd tabadmequimbi icsambuen naquido cuidmendambi, quequin Umbi Chiaid chuibanta, Esusën caondaid nebi.

⁴³ Adembidi Nuquin Papan oncamiaidon Esus tantiaquin: Nuquin Papan Chomiaid Quidistu Mesias iquendac, quequin chuiquin dada uapampic. Aden chiampid icnuc aid tantiashouidtsëqui ambi icsambuen naid tantienquio yec Nuquin Papa bëshunendac, quequin chiampid iquec, quepanëdash Petedo Codnedion shubun iccuededquido tantiamequin chiec.

Isadaidpembo Nuquin Papan aton Mayan meniaid

⁴⁴ Aden Petedon chuibansho tantiaquidotedi icsho issun Nuquin Papan: Ma aidobëd tabadnu, queshun aton Mayan Bëda menepanëdash.

^45-46 Aden meniacsho issun isadaidpembo abi onquiacmaidënquio matses utsin onqueten onquequi Nuquin Papa tantiec cuëdëmpanëdash. Adsho tantiash Petedobëd chochobuedo isadaidbo tantiadempambo yec aton tsusedpabon nacpaden shui dëbid dëtemequido: ¡Padtec! Dacuëdampambo icchitec. Isadaidpembotsen Nuquin Papan aton Mayan Bëda meniac, quepanëdash isadaidbo Petedobëd chochobuedo.

⁴⁷ Aden menesho issun Petedon: Nuquin Papan aton Mayan Bëda meniaido yec Esus tantiaquido neque. Acten mentono, cashoda ¿utsibon: Padi, capatsiash?

⁴⁸ Aden chuitanquin: Esuquidistu tantiaquid nebi, queshun acten mentometa, capanëdash Petedon. Adoac acten mentomeshun: Nuquibi tabadnuna, cac Petedobëd chochobuedo acten mentoaidobëd daëdpactsëc ushec tabadpanëdash.