Epeso 6 - El Nuevo Testamento en matsés

Aton pabëta aton bacuëbo tantiamequin chuibanaid

¹ Aton bacuëbo icquin Nuquin Icbo Esuquidistu cuishoncamequin papabëtan titan chiacpadombuen chieshenquio icquin nabanta. Aden naquin mimbi bëdambuen naindac.

² Aden nasho bëdambuen nashunendambi, quequin Nuquin Papan chiaid ambi Moises dada uamiampid nad iquec: Papabëta tita bëdambuen tantiata.

³ Nëid nidaidën cuishonquec iuec tabadnuen adobanta, quequin chuipampic.

⁴ Tantia. Aton papabëd aton tita icsho mibitedi chuinu. Cun bacuëbo chieshec nëishnushe, queshun Nuquin Icbo Esuquidistu bunacpaden Ambi Chiaid ma nanu, quequin bëdambuen chuiquin tantiamebanta.

Iuabobëta abi iuaquid tantiamequin chuibanaid

⁵ Tantia, iuabo. Mibitedi chuinu. Nidaidënshun mibi iuaquid yec min icbo neque. Aidën chiacpadombuen nabanta. Chieshënenquio icquin bëdambuen isquin nashunta. Esuquidistu nidaidën icsho nashunacbimbuen mibi iuaquidën chiacpadombuen nabanta.

⁶ Min icbon isnuc aidën chiacpadombuen mimbi bëdambuen nabanacpadombuembidi min icbon isenquiocnoc adembidi nabanuata. Esuquidistu: Cun Icbo nec, quequin chieshenquio icquin Nuquin Papa bunacpadombuen naimbi, quequin nidaidënshun min icbon chiacpadombuen nabanta.

⁷ Aidën chiacpadombuen chieshenquio yec chonoadquimbi: Matsesuidtsëqui nashunembi, quenquio icquin Nuquin Icbo Esuquidistu mimbi nashunendac.

⁸ Iuabobëtambi iuacmaidon bëdambuen nabanquido icsho Nuquin Icbon ambi tantiacpadombuen abitedi menendac, quequin tantiaquin bëdambuen nabanta.

⁹ Mibitedi iuaquido icquin min iuabo chushcainquiocquin bëdambuen isquin namebanta. Min iuabobëtan mimbi: Cun Icbo caid: Abuc iqueque. Aid tantiata. Aidi matses abitedi tantiaquidquio neque.

Mayan Icsa Satanas cuenmete dasiuidte chiaid

¹⁰ Cun utsibo, nëbi: Nuquin Icbo nadatiambocquin nabanquid nec, quiash aidënquio uidënquio icmequin bëdambuen tantiamiaid icta.

¹¹ Sondado tsasimbocquid dasiuidacbimbuen Nuquin Papan bëdambuen tantiamiaido chieshtoenquio yec uidënquio icsho mibitedi Mayan Icsa Satanasën mua uaquin icsametiapimbo iquendac.

¹² Matses isadacpadquidpenquiobëd cuesnanacbimbuecquido nuquitedi nec. Mayan Icsa Satanasën iuabo isadesabëd cuesnanacbimbuen nuquitedi naic. Aidtedi abuc tabadec. Aidotedi nidaidënshun nadatiambocquin nabanquidquio yec: Abitedishun chuiquid tapa nebi, quequin icsambuen namequin iuanu, quequid aido nendac.

¹³ Adquid icnuc Mayan Icsa Satanas cuenmetequidtedi sondado tsasimbocquid dasiuinacbimbuen Nuquin Papan Ambi Chiaid tantiamiaido yec bëdambuen tantiec tabadtenneta. Mibitedi adec tabadnuc icsamiantequid uëshë chonoc icsambuen namenuec chosho bëcunniacbimbuec tabadta. Adec tabadquido yec mibitedi chieshtoenquio yec uidënquio iquendac.

¹⁴ Aid cacunmec chieshtoenquiocquid icnuec Nuquin Papan Chiaidquio nacnëshëdacbimbuen abimbo tantiec tabadtedneta. Adecbidi ambi cudasënquin dayun uaid yec tsasimbocquid shictoncacbimbuec chieshtoenquio yec bëdambuec tabaduata.

¹⁵ Nuquin Papan: Bëdambuen tabadmete Chiaid Bëda chuibantan, canushe, queshun Aidën chiaid isted istedta.

¹⁶ Nuquin Papan abi tantiaquid icsho dayun uaindac. Adosho issun Mayan Icsa Satanasën: Icsamenu, quequin pia dëtaboaidën senu, cac shocosh tsasimbocquidën dëcatemëdquiash nidacbimbuec chieshtoenquio yec abi mibi nidendac.

¹⁷ Shocosh mauete tsasimbocquid mauiacsho masetiapimbo yacbimbuen Esus tantiaquid icsho Nuquin Papan cuidenquio icquin abi yacno tabadmendac, quequin tantiaquid icsho Mayan Icsa Satanasën mibitedi chieshtometiapimbo iquendac. Shocosh siante cuënumbo yacbimbuecquid Nuquin Papan Chiaid nec. Nuquin Papan Mayan Bëdan tantiamiac Nuquin Papan Chiaidquio chuinuc Mayan Icsa Satanas cuenendac.

¹⁸ Aton Mayanën tantiamiacpadombuen ënenquio icquin Nuquin Papa chianneta. Adec tabadquin uidënquio icquid yacbimbuen chieshtoenquio icquin Nuquin Papa tantiaquidotedi tantiaquin chianneta.

¹⁹ Ubitsen tantiaquin Nuquin Papa chianneta. Dacuëdmenquio icquin mimbi tantiamiacpadombuen chuibanquidquio icme, quequin chuita. Adoac ambi oncamiacpadombuen ambi matses tantiamenquio icpampidi nëbi Nuquin Papan tantiamec, quequin tantiabicquido Esus chuibanendambi.

²⁰ Esuquidistun: Ubi chuibenneta, caid icquin aid chuibennesho mëtaneshun quënën tsadunaid nebi. Adoaid ubi icsho: Mimbi tantiacpaden dacuëdenquio icquin Esusën naid Chiaid Bëda chuibanquid Pabado icme, quequin Nuquin Papa chianneta.

IV. MIBI TANTIEMBI, QUEQUIN ËNQUIN CHIAID ( 6.21-24 )

^21-22 Nuquin utsi nuqui tantiaidquio ubëd icquid Tiquico mibi yacno nidmembi. Aidi Esuquidistu tantiaquid icquin ubi nashunquid nec. Nuquin Icbo tantiaquidquio aidi nec. Aidëmbi mibi yacno nidshun: Nadquio iccosh, quequin umbi naidtedi chiendac. Aden chuisho tantiash mibitedi bëdambo iquendac.

²³ Nuquin Papabëtan Nuquin Icbo Esuquidistun ma mibitedi bëdambuec tabadmequin Esus tantiaquido utsibobëd tantiananquidquio icmequin abi tantiaquidquio icmepanuna.

²⁴ Ënenquio icquin Nuquin Icbo Esuquidistu tantiaquid abitedi Nuquin Papan bëdambuen isquin ma chieshtoenquiocquid icmepanuna, quequin tantiembi. Aidted chuiquin dada uaombi.