Epeso 5 - El Nuevo Testamento en matsés

¹ Mibitedi Nuquin Papan: Cun bacuëbo nec, queshun ambi tantiaido yec aidbimbuec tantiananec tabadta.

² Nuqui tantiaquidquio Esuquidistu nec. Adquid icnuc utsibobëd tantiananec tabadta. Nuquitedi tantiaquidquio yec abided cuidadec uënëspanëdash. Adec abi uënësaid nuadte bëda shëdtequid pichicacbimbuen nasho isash Nuquin Papa: Bëdambo iquec, quepanëdash.

³ Nuquin Papa tantiaquido mibitedi neque. Bëdambuec tabadta. Adecbidi chudaiduidi chiec onquesa icta. Adecbidi natemaid utsi abi bunaiduidi naquin mëmunesa nec, quequin chiec onquesa icta. Adecbidi utsina isash dadpen bedte bunquid nec, quequin chiec onquesa icta.

⁴ Adecbidi icsambuenuidi chiec onquenda. Matsesën natemaid chiec utsibëd abembi onquenda. Adecbidi utsi icsambuenuidi chuiquin oncaisambo icta. Adecbidi bëdambuec onquequidi utsi uain chuiquin mamënshunesambo icta. Adec onquec tabadaid bëdambocquidpenquio nec. Adenquio yec: Nuquin Papa bëdambo iquec, quequin chiannec tabadta.

⁵ Nadquido icsambo iquec. Nëidic ambi chudtemaidi chudquido. Utsibic ambi natemaid utsi naquin mëmunesabo. Utsibic ambi tantiaiduidi dadpen bunquin bedquido. Aden naquido: Ambibi nacnenash: Ubi uaquidien nec, quiacbimbuen Nuquin Papa tantiesabo nec. Aidotedi Nuquin Papan Esuquidistubëtan namiacno tabadtiapimbo iquendac.

Nuquin Papan chiacpadombuen naic tabadte chiaid

⁶ Muaquin ambembi chiec onquiaid tantiesa icta. Adquid ambi chiacpadombuen naisa icsho Nuquin Papan cumapenen cuidendac.

⁷ Aidobëtan icsambuen naic tabadenda.

⁸ Ënden Esuquidistu tantiesa yec inchëshquio yacno tabadacbimbuec mibitedi tabadpadennec. Adquid ictennedi nëbi Nuquin Icbo Esuquidistubëd abentsëc yacbimbuen aid tantiabenash badiadnuc isucunacbimbuen aid tantiec bëdambuec tabadta.

⁹ Aidën tantiamiacpadombuen bëdambuen nabanec utsibo bëdambuen isec bëdambuec tabadendac. Adembidi muainquio icquin abimbo chuiquid icta.

¹⁰ ¿Adambi bëdambuen napeba? quequin ënenquiocquin tantiadednequin Nuquin Papa bunacpadombuen nabanec tabadtedneta.

¹¹ Nuquin Papa tantiesabobëtan icsambuen nainda. Aden icsambuen nainquio yec tabadquin utsibo icsambuec tabadsho: Mimbi icsambuen naid ënta, quequin chuita.

¹² Icsambuen naquidën ompodshon naid chiec dacuëdtsiabi, queshun adquid chuitemaid neque. Chuibanenda.

¹³ Padnuen uëshë chënquequin ismiacbimbuen tantiamiac: Ambi ompoquin naid icsambuen naidquiobi nec, quequin utsibon abimbo tantiabenendac.

¹⁴ Bëdambuec tabadquin ismedenniac icsambuen nabuedëmbi bëdambuen tantiendac. Adquid chuiquin naden dada uanëdaid iquec: Mibi usheque. Isucun. Uënësaidotedi nidtome. Adquid icsho Esuquidistun mibi bëdambuen tantiamendac, quequin chuipanëdash.

¹⁵ Adquid icmiac bëdambuen naic tabadta. Tantiesan nacpadombuen nabanec tabadenda. Adec tabadenquio yec bëdambuen tantiaquido tabadacpadec tabadta.

¹⁶ Icsambuen naquido dadpen iqueque. Aidpadquid iquenda. Bëdambuen nabandednequidquio icta.

¹⁷ Mimbi icsambuen tantiacpaden nabanenda. Aden nainquiocquin: ¿Mitsipadec Nuquin Papa bunacpadec tabadte icpec? quequin tantiec tabadta.

¹⁸ Tantiadennuen acte paë uaid aquenda. Aid aquec padpidec icsambocquid yanuaindac. Icsambuen nate bunenquio icquin Nuquin Papan Mayan Bëdan tantiamiacpadombuen bëdambuen nabanta.

¹⁹ Adec icsambuen nate bunenquio icquin Esuquidistu tantiaquid utsibobëtan Nuquin Papan Chiaid chuiquinc, chuiquid tapa Dabidën dada uampid cuëdënte utsi utsien chuiquinc, cuëdënte utsi chuiquinc cain chiec cuëdëndenneta. Adec cuëdënquin cuishonquequin Nuquin Icbon naid chuidenneta.

²⁰ Nuquin Icbo Esuquidistun namiaid icquin ambi tantiacpadombuen icmiaidtedi bëdambo iquec, quequin Nuquin Papa ënenquio icquin chianneta.

Esus tantiaquido yec nashunnante chiaid

²¹ Esuquidistu tantiaquido yec utsibobëd tantiananec nashunnanta.

²² Cun Icbo Esuquidistun chiacpadombuen naquid nebi, queshun aton chido icquin min bënën chiacpadombuen nabanta.

²³ Aton chidon chuiquid aton bënë nec. Adquiecbidi Esuquidistu abi tantiaquidtedishun chuiquidquio nec. Adembidi aido Nuquin Papa bëdambuen ismequidquio nec. Esuquidistu mapibimbuecquid icnuc abi tantiaquidtedi aton dadabimbuecquid nec.

²⁴ Esuquidistun chiacpadombuen nabanquido abi tantiaquido nec. Adombuembidi aton bënën chiacpaden nabanquid aton chido neuaic.

²⁵ Aton bënë icquin min chido tantiaquiota. Esuquidistu abi tantiaquido tantiaquiec abided cuidadec uënësacbimbuen tantiaquiota.

²⁶ Adec abided cuidadec uënëssun: Ubi tantiaquido bëdamboshëcquid icmenu, queshun ambi Chiaid tantiamequin abi tantiaquido acten mentoadmendac.

²⁷ Esuquidistun abi yacno tabadmenuen abi tantiaquido abibimbuecnuc bëchish nibëdquid ushumbo yacbimbuecnuc icmiac bëdamboshëcquid iquendac. Adshun icsambuen nainquio yec bëdambuec tabadquid iquendac.

²⁸ Adombuembidi aton bënë icquin mibibi datantiadacpadombuen min chido tantiac bëdambo iquec. Aden aton chido tantiaquid yec dada abibi tantiadquid nec.

²⁹ Abibi aton dada chieshëmëdesa matses nec. Abibi tantiadquin bunquioquin peshun aquec. Adec abibi dayun uadquid nec. Adembidi Esuquidistun abi tantiaquido tantiaquioquin nashunquin dayunuaic.

³⁰ Nuquitedi abi tantiaquido yec Esuquidistubëd abentsëc yacbimbuecquid icnuc aidën dadabimbuecquid nuqui nec.

³¹ Adquid icnuc naden chuiquin Nuquin Papan dada uamiampid iquec: Dadan aton papabëta aton tita nianquin aton chido bedash aidbëd daëdash matses abentsëc yacbimbuecquid iquendac, quequin chuipampic.

³² Aden abi bunacpadombuen ambi matses tantiamenquio icpampidi mimbi tantiacmaid Nuquin Papan mibi Esus tantiamendac. Adoac Esuquidistu abi tantiaquidobëd tabadendac, quequin chiec nebi.

³³ Tantia. Mibitedi chuinu. Mibibi datantiadacpadombuen min chido bëdambuen tantiaquiota dadan. Adembidi aton chido icquin min bënë bëdambuen isquin aidën chiacpadombuen nata.