Epeso 1 - El Nuevo Testamento en matsés

I. MIBI TANTIEMBI, QUEQUIN CHIAID ( 1.1-2 )

¹ Pabado nebi. Nuquin Papa bunacpadombuen Esuquidistun: Ubi chuibenneta, caidquio nebi. Adquid icquin Nuquin Papa tantiaquido icsho: Mibitedi tantiembi, quequin chuiquin dada uaic nebi. Epeso yacnocquido Esus tantiaquido yec mibitedi Esuquidistubëd abentsëc yacbimbuec tabadquido nec.

² Nuquin Papabëtan Nuquin Icbo Esuquidistun ma mibitedi bëdambuen isquin bëdambuec tabadmepanuna, quequin tantiembi.

II. NUQUIN PAPAN MATSES ABËD TABADMETE CHUIBANAID ( 1.3—3.21 ) Nuquin Papan abëd abuc tabadtequid icmiaid

³ Nuquin Icbo Esuquidistun Papa Nuquin Papa bëdamboshëcquid nec. Adquid icquin Esus tantiaquid icsho abëd abuc bëdambuec tabadacpadquidquio nuquitedi icmiac, quequin: Nuquin Papa bëdambocquid nec, canuna.

⁴ Ëndenquimbo abitedi uabi yequi Nuquin Papa nadpampic nuquitedi caic: Nëidtedquio Esuquidistu tantiaquido icsho Umbi: Cun matses nec, caido icsho icsambuen naisabimbuecnuc bëdambuen isendambi, quequin Nuquin Papan tantiapampic. Aden nuquitedi tantiaquioquin

⁵ abi bunacpadombuen Nuquin Papan Esuquidistu uidtsëqui tantiaquido icsho ambi chiampicpadombuen nuquitedi: Cun bacuëbo icmendambi, abi quiampicpadombuen nëbi adobanec.

⁶ Aden tantianquid icquin: Ma ubi ënenquio icquin: Bëdambocquid nec, canu, queshun Nuquin Papan aton Mado ambi tantiaidquio Esuquidistu nuquitedi tantiamiac. Adoac Esus tantiaquido yec nuqui abëd tabadtequido nec.

⁷ Matses bëdambuen iste bunquidquio icquin Nuquin Papan namiac Esuquidistu aton intac chididiquec uënësaidën nuquitedi icsambuen naid bedshunquin nuqui icsambuen naid tantienquiocnoc Nuquin Papa bëshunmendac.

⁸ Adomiac Nuquin Papan nuquitedi bëdambuen isquin ambi bëdambuen tantiaid tantiamequin utsi dadpen bëdambuen tantiamendac.

⁹ Aden Nuquin Papan ambi matses tantiamenquio icpampidi nëbi nuqui tantiamec. Abi bunacpadombuen abi matses bëdambuen ismequid Esuquidistu nuqui tantiamiac.

¹⁰ Aden ambi tantiampicpaden Nuquin Papan abuc icquidobëta nidaidën icquido abitedi tsidadmeshun aidon Icbo Chuiquid Tapa abentsëcquiobi Esuquidistu icmendac.

¹¹ Nuquin Papa ambi tantiampicpadombuen naquidquio nec. Ëndenquimbo abitedi uabi yequi Nuquin Papa nadpampic: Umbi tantiaidtedishun Esuquidistu tantiaquid icsho: Ubëdi tabadmenuen: Cun matses nec, caindambi, quepampic.

¹² Ambi tantiacpadombuen Nuquin Papan cun matses isadaidbo abia tantiamiaido yec Esuquidistu cainec nuquitedi bëdambuec tabadec. Adec tabadec: Nuquin Papa nadatiambocquid yec bëdamboshëcquid nec, quequin aid tantiec ma abitedi cuëdëmpanuna.

¹³ Nuqui icsambuen naid bedshunash Esuquidistuded uënëspanëdash, quequin abimbo chiaid chuibansho tantiashun Esus tantiabenondaido mibitedi nec. Adquido icsho: Umbi bëdambuen isaido ubëd tabadtequido nec, queshun ambi chuinëdacpadombuen: Cunatedi nec, quequin Nuquin Papan aton Mayan Bëda meniac mibëd iquec.

¹⁴ Aden aton Mayan meniaid icquin: Abëdi tabadmequin nuquitedi bëdamboshëcquido icmendac, quequin nuqui tantiec. Adoshon icsambuen namete nibëdacno abëd tabadmequin Nuquin Papan ambi cun matses caido icsho nuquitedi aton Mayan menendac. Aden tantiec: Nuquin Papa nadatiambocquid yec bëdamboshëcquid nec, quequin aid tantiec ma abitedi cuëdëmpanuna.

Nuquin Papa chianniaid

¹⁵ Mibitedi Nuquin Icbo Esus tantiaquido yec Nuquin Papa tantiaquidobëd tantiananquiec tabadosh, quequin mimbi naid chuisho tantiombi.

¹⁶ Aden tantiaquin: Mimbi namiac aidon bëdambuen naic, queshun: Nuquin Papa bëdambo iquec, quequin ënenquio icquin chiannequin bëshunenquio icquin mibitedi tantiadednembi.

¹⁷ Nuquin Papa Nuquin Icbo Esuquidistun Papa bëdamboshëcquid icsho naden chiannembi. Mimbi aido Min Mayan meniaidën ma bëdambuen tantiamepanuna. Aden tantiamiaido icquin: Nadquio Nuquin Papa iquec, quequin ma abimbo tantiapanu, quequin mibitedi tantiaquin Nuquin Papa chiannembi.

¹⁸ Nadembidi mibitedi tantiaquin Nuquin Papa chiannembi. Mimbi bëdambuen tantiamiac: Ma mibëd tabadte bunquin cainquidombo ma icpanuna. Adash: Nuquin Papa tantiaquido utsibobëd bëdamboshë yacno tabadendabi, quequin ma tantiapanuna, quequin chiannembi.

¹⁹ Aden tantiamiac: Nadatiamboshëcquid iquin ambi natiapimbo ictequid nibëdnuc abi tantiaquido icsho nashunquidquio Nuquin Papa nec, quequin ma tantianu. Tantiameta, quequin chiannembi. Adembidi: Nadatiamboshëcquid icquin

²⁰ Esuquidistu uënësacsho uincuenmeshun abi yacno abuc indoshon min dayun abiucquio mimbi tsadumpanëdac.

²¹ Aden tsadunquin Nuquin Papan podobitsi icsabo cumapenen tantiaquin matses nabanmequidobëtan podobitsi icsabon icbo Mayan Icsa Satanasën Icbombo icmepanëdash. Adembidi nëbi icquidobëtan iuecash icquidon Icbombo Esuquidistu mimbi icmeuapanëdash.

^22-23 Abitedishun: Cun Icbo, caidquio Esuquidistu nec. Abi dëniactiapimbo icquid nibëdec. Adquid yec abi tantiaquidotedishun Icbombo Esuquidistu nec. Abi tantiaquidotedi atona nec. Aidotedi aton dadabimbuecquid nec. Aido namequid yec mapibimbuecquid Esus nec. Aidëmbi abi tantiaquido tantiaquin bëdambuen namebanec.