Ebedeo 9 - El Nuevo Testamento en matsés

Nuquin Papa tabadte shubun puduedshun naid

¹ Nuquin Papan ambi: Ubi min matses bëdambuen ismenuen naden nata, quequin chiaid dada uameshun isadaidbo menepampic. Nuquin Papan: Ubi tabadte shubu uashun aid shubu nuntan ubi tantiaquin naden nacnenta, cacpadombuen abi nidaidën tabadte shubu uashumpampic.

² Aden shubu uashun nacnenshun nitsinaid anquënë uaid daëd icpampic. Shubu nuntan abia quënë uaid quënë bëdambocquidën tabote dectantebëd pan: Nuquin Papana nec, quequin ismenuen tabëcte icpampic.

³ Aid shubun puduedacno dashcute dectanaid icpampic. Aid nuntambidi dashcute dectanaid utsi icpampic. Aid dectanaid udictsëcquid quënë bëdamboshëcquid quequin cuënaid icpampic.

⁴ Aid quënë bëdamboshëcquid yacno tsadunaid bëdambo nuadnuc pichicate shocosh piu piupactsëcquid odo caidën dabiunaid icpampic. Aid quënë yacnobidi sandote dapa shocosh odo caidën dabiunaidbidi icpampic. Aid sandoten pete mana caid musucshun dayun uaid sedunte piu piupactsëcquid odo caidën dabiunaid icpampic. Aid sandote dapambidi Adonën cueste ënden teshun sananaid dëyucaid icuapampic. Aidën sandoaid utsi cuënote pada uashun Nuquin Papan: Naden nata, quequin chiaidtedi dada uaid icpampic.

⁵ Aid sandote dapa bëchudante nacnenaidën Nuquin Papabëd icquido uicchunën podobimbuecnuc daëd nacnenshun bëchudante catabëcquin podo dësenanmiaid nënantanquio nuqui bëdambuen isquin cuidmenquioctequid Nuquin Papa iquec, quequin tantiamete caid nec. Nëbi aden nacnenaid chiaidtedi chienquio iquembi.

⁶ Aden shubu uashun aidën icquidtedi tabëcash quënë bëdambocquid caid yacno badiadquidën badiadquidënquiec puduedtennequin Nuquin Papan Moises chiampicpadombuen Nuquin Papa bëdambuen ismenuen nëish iua cuessunneshun pichicaquidon bëdambo nuadnuc nabandednepampic.

⁷ Padnuen quënë utsi bëdamboshëcquidën setan setanquiec Nuquin Papa matses bëdambuen ismenuen nëish iua cuessunneshun pichicaquidon chuiquid tapauidtsëqui puduedtednepampic. Ambo puduedquin nëish iua pichicatequid tësënquin cuessunneshun intac cushtoshon buampampic. Aid nëish iua cuessunneshun pichicaquin: Cun matsesbëtan umbi tantienquio icquin icsambuen nabued bëshunmequin Nuquin Papa bëdambuen ismete nepampic.

⁸ Aden chiaid Nuquin Papan Mayan Bëdan tantiamiac: Nuquin Papa tabadte shubumpi nidaidën icquid quënë bëdambocquid abi icnuc matses abitedi quënë bëdamboshëcquid Nuquin Papa yacnombo puduedte nibëdtsiash, quequin nuqui tantiec.

⁹ Aden chiaid issun nëbi naden nuqui bëdambuen tantiec. Matsesën icsambuen nasho ma Nuquin Papan cuidenquio icnu, quequin baded badedquien nëish iua pichicapadennec. Adembidi Nuquin Papa bëdambuen ismenuen nëish iua cuessunneshun pichicaquidën matsesën meniaid menepadennec. Adobuedi: Umbi icsambuen naid tantienquio yec Nuquin Papa umbi naid bëshunac, quetiapimbo icpampic.

¹⁰ Adembidi: Nëid petequid nec. Nëid petemaid nec. Nëid actequid nec. Nëid actemaid nec. Nëid nabannush mëpamëdtequid nec. Nëid Nuquin Papa tabadte shubumpin puduednush dapamëdtequid nec, quequin tantiaquin nabampanëdash. Aden nabanquin bëdambuec tabadquid icmetiapimbo icpampic. Aden Nuquin Papan abi ismequin nabantequid utsi uabi icnuc matsesën nate nepanëdash.

Esuquidistu abided uënësec intac chiuidaid

¹¹ Padnuen Esuquidistu choec matsesash Nuquin Papa nuqui bëdambuen ismequid tapa yampanëdash. Aidëmbi matses bëdambuen nashumpanëdash. Nidaidënshun Nuquin Papa tabadte shubu nec, quequin matsesën nidaidënshun nacnenaidën puduedquidpenquo nec. Matsesën shubu uacmaid abuc abi tabadte shubu uaidën Nuquin Papa icsaisambo yec tabadacnombo puduedshun Nuquin Papa matses bëdambuen ismequin nabanec.

¹² Matsesën nëish iua cuessunneshun intac bedshun buanec Nuquin Papa tabadte shubu uashunaid quënë bëdamboshëcquidën puduedenquio Esuquidistu icpanëdash. Aidi matsesën icsambuen naid bedshunash abided cuidadec uënësacsho cudan siac aton intac chiuidash Nuquin Papa yacnombo aid ismec puduedpanëdash. Adec abentsequi puduedshun abi tantiaquido nuqui icsho ënenquio icquin Nuquin Papa bëdambuen ismequin nuqui icsambuen naidtedi bëshunmec.

¹³ Naden abimbo chiaid iquec. Nuquin Papan: Mishtemaid nec, caid mishash Nuquin Papa tabadte shubu yacno puduedtiapimbocquid nec. Adquid icsho pichicanuen baca bënën intac bedaidën dasecaic. Adshun cabada bënën intac bedshun daseccaquin baca chido canicuentsaid cuessunneshun pichicashun isisapuc bedshun maseccaid Nuquin Papan chiacpaden. Ambi: Cuna nec, caido abi tabadte shubu yacno pudueduaindac, quequin mishtemaid mishabi yacbimbuecnuc Nuquin Papana icmeuaindac. Aton dadauidtsëqui chiaid nepanëdash.

¹⁴ Esusën intaquëmbien Nuquin Papa yacnombo matses puduedmetequidquio nec. Nuquin Papan Mayan Bëda uënësesambo icquin dayacquio icmiac Esuquidistu icsambuen naisambo yequi matsesën icsambuen naid bedshunec abided cuidadec uënëspanëdash. Adec uënësaid icnuc nëbi naden nuqui tantiec: Umbi icsambuen naidtedi tantienquio yec bëshunquin ambi cuidtequid icbuedi Esusën mënchicaid icsho Nuquin Papan ubi cuidenquio iquec, quequin nuqui tantiec. Nuquin Papa uënëstiapimbocquidën namiaid icmenuec adec Esus uënëspanëdash.

Nuquin Papan Chiaid chucambo chiaid

¹⁵ Adquid yec Nuquin Papan Chiaid chuca chuiquin tantiamequidquio Esuquidistu nec. Ënden Nuquin Papan: Naden nata, quequin chiaid niacquin matsesën icsambuen nampidbëtabi nëbi matsesën icsambuen naidtedi bedshunash abided cuidadec uënëspanëdash: Ma ubi tantiaquido Cun Pa uënëstiapimbocquid nashunec tabadnu, quiash.

¹⁶ Tantia. Matsesën abi uënëste tantiaquin utsi chiaid chuinu: Ubi uënësan umbi chiacpadombuen cuna umbi tantiactedi menebanta, quequin dada uapec. Aidën chiacpadombuen bednuen: Icbo uënësac, quequin abimbo chuiquin tantiametequid nendac.

¹⁷ Aden chuiquid uënësambo icnuc ambi dada uaquin chiacpadombuen utsibon bedtiapimbo iquec. Ad icnuc atona abi iquec. Aid uënësan aidëna icbuedi utsina yanendac.

¹⁸ Adquid icnuc Nuquin Papan: Naden nata, quequin ënden naden chuipampic: Ubi ismequin nëish iua intac chididiquenuc uënës ua, cac aton matsesën: Ai, adoembi, quequin ismequin nëish iua intac chididiquenuc uënës uapampic.

¹⁹ Aid nëish iua uënës uabi icnubi Nuquin Papan: Naden nata, quequin chiaid chuibanshun nëish iua Moisesën baca bënëmpibëta cabada bënë cuessunneshun intac bedshun acte cacushtanquin buenac buenacpampic. Adshumbic cute bushcuctsëcquid isopo cuidi mëdquëntanquin cabada bu piu dëtaneshun intac puntanquin Nuquin Papan: Naden nata, quequin cuënoten dada uaid daseccatanquin aton matses isadaidbotsen daseccabampampic.

²⁰ Adshumbic: Nëid nëish iuan intaquën: Nuquin Papan chuibued abimbo iquec, quequin mibitedi tantiamequin chuitequidquio nec, quequin Moisesën chuipampic.

²¹ Adoshombic Nuquin Papa tabadte shubumpibëtabi aidën tabëcaid ambi nabantequidtedi intaquën daseccabampampic.

²² Cuessunniaidën intac daseccatequid nec. Nuquin Papana icsa uaid bëdambo icmenuen dadpen intaquën daseccabantequid nendac. Adecbidi cuessunniaidën intac chiuidenquiocnoc matsesën icsambuen naid tantienquio yec Nuquin Papa bëshunenquio iquendac.

²³ Aden nidaidën icquid Nuquin Papa tabadte shubumpibëta ëquëduc tabëcaidtedi Nuquin Papa yacno tabëcaidbimbuecnuc nacnenaid nec. Aden nidaidën icquid nëish iua cuessunniaid intaquën Nuquin Papa tabadte shububëta ëquëduc tabëcaidtedi intaquën daseccabantequid nendac. Nuquin Papa yacnombo icquid nëish iua intaquën daseccatiapimbo iquec. Padnuen Esuquidistu Nuquin Papa yacno matses puduedmenuec icsambuen naisambo yequi abided cuidadec aton intac chiuidec uënëspanëdash.

Nuquin Papa yacnombo puduedmete chiaid

²⁴ Nidaidënshun Nuquin Papa abuc tabadtebimbuecnuc matsesën nacnenaidën tabadte shubun Esuquidistu aton intac buanec puduedenquio icpanëdash. Aton Papa abuc tabadacnombo puduedshun abi tantiaquido icsho nuqui tantiaquin: Papa, ubi tantiaquid neque. Bëdambuen ista, quequin Nuquin Papa abi chiannec.

²⁵ Ambo puduedash: Matsesën icsambuen naid bedshunash ubided cuidadec uënësted uënëstedebi, quenquio yec tabadec. Nidaidën icquid matses bëdambuen ismenuen nëish iua cuessunneshun pichicaquidon chuiquid tapa abitedishun setan setanquien Nuquin Papa tabadte shubun puduedquin quënë bëdamboshëcquidën aton intacpenquio nëish iuan intacquio bedshun daseccadennepec: Ma Nuquin Papan ubitedi bëdambuen isnu, queshun.

²⁶ Matsesën nacbimbuen naic taecquiobi abitedi uash matsesën icsambuen naid bedshunash abided cuidadec baded badedquiec Esuquidistu uënëstsempanëdash. Adenquio yec matsesën icsambuen naidtedi bedshunash abided cuidadec abentsecquiobi uënëspanëdash, nëid nidaid nibëdanmete anoentsëqui yannubi.

²⁷ Adecbidi nidaidën tabadquidtedi uënëste uëshë abentsëc iquendac. Uënësacsho uincuemiac matsesën ambi naidtedi chuisho Nuquin Papan tantiendac. Adshumbic Esus tantiaquido cuidenquiocquimbi abi tantiesabo cuidendac.

²⁸ Adecbidi matsesën icsambuen naidtedi bedshunash abided cuidadec Esus abentsequi uënëspanëdash. Adashic aidquiobidi padpidembuec nidaidën chouaindac. Matsesën icsambuen naidtedi bedshunash padpidec uënësnu, quenquio yec abi cainquidotedi abi yacno tabadmenuen bedec chouaindac.