Ebedeo 8 - El Nuevo Testamento en matsés

Nuquin Papa matses bëdambuen ismequid tapa Esus chiaid

¹ Tantia. Mibi naden chiombique. Adec Esuquidistu abi tantiaquido abi bëdambuen ismequid tapa yanash Nuquin Papa aton tsadte dapan tsadacnombo pudueduash abitedishun Icbombo yec Aidën dayun abiucquio tsadec.

² Adec tsadquin Nuquin Papan uaid abi tabadte shubu matsesën shubu uacmaidënquio puduedshun Nuquin Papa Esuquidistun matses bëdambuen ismequin chiannendac.

³ Matses icshobi nëish iua cuessunneshun pichicaquidon chuiquid tapa icta, caid icquin: Cun matsesbëtambi icsambuen naquid nebi, queshun nëish iua cuessunneshun pichicadennepampic. Adembidi Nuquin Papa tantiaquin: Menenu, quequin aton matsesën bëbëaid bedshun Nuquin Papa menedednepampic. Adembidi Esuquidistun nuqui bëdambuen ismequid tapa icquin Nuquin Papa menetequid icpec.

⁴ Adec Esus nidaidën tabadec Moisesën chiampicpadquid Nuquin Papa matses bëdambuen ismenuen nëish iua cuessunneshun pichicaquid ictiapimbo icpanëdash. Nëbi Adonën tsiuecquidoen Nuquin Papa matses bëdambuen ismenuen nëish iua pichicaquimbic Nuquin Papa bëdambuen ismenuen utsi menequid abi iquec.

⁵ Nidaidën icquid Nuquin Papa tabadte shubun puduedshun nëish iua cuessunneshun pichicaquid Nuquin Papa matses bëdambuen ismequidën nacnempec. Nuquin Papa yacnombo abi tabadte shubumbo abia icquidquio nec. Nidaidën icquid aidbimbuecquid nec. Adquid nec, quequin naden chiaid nuqui tantiec. Ëndenquimbo Nuquin Papan abi abuc tabadtembo tantiaquin Moises naden chuipampic: Umbi macuësh tapa yacnoshon mibi ismeboedbimbuecquid ubi tabadte shubu uata, quequin chuipampic.

⁶ Padnuen nuqui Nuquin Papa bëdambuen ismequid tapa icquin Esuquidistun bëdambuenshë naic. Utsibic Nuquin Papa matses bëdambuen ismenuen nëish iua cuessunneshun pichicaquidon chuiquid tapa yec matses icquin bëdiactsëc bëdambuen naic. Nuquin Papan: Aden matsesën tantiasho bëdambuen isendambi, quequin chiaid chuca bëdamboshë icsho aid tantiamequid Esus nec.

Matsesën natiapimbo icte chiaid

⁷ Ëndenquimbo Nuquin Papan: Naden nata, quequin chiampid aton matses Moises chuimiampicpadombuen nabanec matses icsambuen naisa yannuc: Mimbi naden nasho bëdambuen isembi, quequin chiaid chuca Nuquin Papan chienquio ictsempanëdash.

⁸ Naden nata, caqui umbi chiacpadombuen nauidquid matses icsambuen naisa yantiapimbo icsho issun Nuquin Papan naden chuipampic: Iuecshun umbi: Naden naindambi, quequin chiaid chuca isadaidbobëta Udan tsiuecquido chiendambi.

⁹ Ëndenquimbo min tsusedpabo Equipito yacnoshon buanmequin Umbi: Naden nata, quequin chiampid niaquec icsambuec tabadsho issun isadaidbo nianondambi, quepampic Nuquin Papa.

¹⁰ Nadembidi Nuquin Papan chuipampic: Aden umbi isadaidbo nianondaid tantiaquin naden chiaid chuca aido chiendambi. Umbi: Naden nata, quequin chiaid chuca isadaidbo bëshunenquiocnoc tantiamendambi. Adoac umbi chiacpadombuen nate bunquiendac. Aden tantiamiash aidon: Cun Icbo, quequin cuënaid iquendabi. Adecbidi aido cun matsesquio iquendac.

¹¹ Adec ubi tantiaquid icsho: Nuquin Papa tantiaquid icta, utsin cainquio iquendac. Nëidtedshun ubi tantiendac. Nëidic amëbëtan anin. Nëidic bacuëbobëtan champibon. Nëidic caniabon. Nëidic tsësiobobëtan machobon. Aidtedshun ubi tantiendac.

¹² Aidon icsambuen naidtedi tantienquio yec bëshunendabi, quequin Nuquin Papan Chiaid utsi nendac.

¹³ Nuquin Papan: Umbi ënden: Naden nata, quequin chiaid shëni nec, queshun ambi: Naden naindambi, quequin chiaid chuca icnuc ënden chiaid nëbi nibëdquio yanendac, quequin chuipampic.