Ebedeo 4 - El Nuevo Testamento en matsés

Ubi yacno natienquio yec tabadendac, quequin chiaid

¹ Adec nuquin tsusedpabo Nuquin Papa tantienquio yec tabadash aidën chiacno tabadambo icpampic. Nëbi Nuquin Papan chiampicpadombuen chiembique. Chuinu. Tantia. Ubi yacno puduedash natienquio yec ubëd tabadtequid mibitedi iquendac, quequin chiampid icnuc aid yacno aidbëd tabadtiapimbo icchitomane, queshun Esuquidistu tantiaquionona.

² Aden Equipito yacnoshon buanaido chuiquin: Umbi buanacno mibi tabadte iquendac, quequin ambi nuquin tsusedpabo chiampicpadombuen: Ubi yacno puduedash natienquio yec tabadtequid iquendac, quequin nëbi ambi Chiaid Bëda Esusën naid chuibanuasho nuquitedi tantiauaic. Aden ëndenquimbo chuisho tantiash: Nuquin Papan Chiaid abimbo iquec, quequin tantienquio icquido yec aidën chiampicno tabadtiapimbo icpampic.

³ Aden Ambi Chiaid tantiashumbi nuquin tsusedpabon nainquiocsho isash nëishash Nuquin Papa nadpampic: Umbi chiondacno tabadmenquio iquembi. Ambo ubi abitedi uaquin nainash tabadacbimbuec cuesnanenquio yec bëdambuec mibi tabadtsenoc, quequin chushcaquin Nuquin Papan chuipampic. Nëbi Ambi Chiaid tantiaquido natienquio yec aidbëdi tabadtequido nuqui nendac. Nuquin Papabëd bëdambuec tabadte abi iquec. Nidaidbëta abu uaquin 6tedec ushquin nainash 7icquidën nacnenenquio yec Nuquin Papa tsadtopampic.

⁴ Abi nacnenenquio yec tsadtoampid chuiquin Nuquin Papan naden dada uamequin chiampid iquec: 6tedec ushquin abitedimbo uatanec 7icquidën tsadtobi, quequin chuipampic.

⁵ Adshumbic padpiden nadentsen Nuquin Papan Chiaid chuiquin dada uamepampic: Ubi nainquio yec tsadacno Umbi Chiaid chieshënquido chotiapimbo iquec, quequin chuipampic.

⁶ Aden dada uamequin chuimiampicpadequi ëndenquimboshë Ambi Chiaid niac niaquec tantiesa yanash Nuquin Papan chiacno tabadambo icpampic. Adampid icnubi nëbi Nuquin Papa tantiaquidotedi aidbëd tabadtequid iquendac.

⁷ Aden Ambi matses tantiaquin aidon nate uëshë caquin Nuquin Papan nëbimbobi aid uëshë nec, cauapec. Isadaidbon ëndenquimbo Nuquin Papan Chiaid niacampid icnubi iuecshun Nuquin Papan Dabid naden chuiquin Ambi Chiaid dada uamepampic. Nëbimbobi Nuquin Papan Chiaid tantiashumbi tantienquio yanampicpadec tantiesa yanenda, quequin chuipampic.

⁸ Nuquin tsusedpa isadaidbon chuiquid tapa utsi Osue yanshun nidaid Canan yacno aton matses buanshun ambo utsibobëd natienquio yec bëdambuec tabadmiacsho issun Nuquin Papan: Natienquio yec tabadte utsi iquec, quequin chienquio ictsempampic.

⁹ Aden chiampid tantiashun abitedi uash 7 icquidën tsadtoampidtsen tantiaquin: Nuquin Papa tantiaquido natienquio yec tabadte iquec, quequin nuquitedi cainendac.

¹⁰ Adec Nuquin Papa abitedi uaquin nainash chonoadenquio yec tsadtoampicpadecbidi abi tantiaquidotsen ambi chiacpaden nabanec tabadash natienquio yec Nuquin Papabëd tabadtequido nendac.

¹¹ Nuquin Papabëd tabadtequid nebi, quequin tantiaquin Esuquidistu tantiaquionona. Nuquin Papan Chiaid tantiesa yanash tsusedpabo Nuquin Papan chiacno tabadambo yampicpadecbidi tabadtiapimbo icmane, queshun aid tantiaquionona.

¹² Nuquin Papan Chiaid nadatiambocquid yec abimbo tantiamianquid nec. Aden Nuquin Papan ambi tantiacpadombuen namendac. Chështe aucbidaëdi cuënumbo icquidën nami ëquëducquio sënquin isacbimbuen ambi icsambuen naidtedi matses tantiamendac. Adembidi Nuquin Papan chiaid issun Ambi: Icsambuen nanu, quequin tantiaidbëta ambi: Bëdambuen nanu, quequin tantiaidtedi tantiamendac.

¹³ Abitedimbo isquidquio Nuquin Papa nec. Adquid icsho ambi uaidtedishun ompodëntiapimbo iquendac. Adquid yec abitedimbo tantiaquid icquin: ¿Mitsipadec tabado? quequin chiac nuqui nabanaidtedi nuqui chuibanendac.

Nuquin Papa matses bëdambuen ismequid yec matses tantiaquidquio Esus nec, quequin chiaid

¹⁴ Esus Nuquin Papan Madombo yec nëish iua cuessunneshun pichicaquidon chuiquid tapambobimbuecquin Nuquin Papa matses bëdambuen ismequid nec. Adquid yec abuc nidshun Nuquin Papa chiec: Ubi tantiaquido matses bëdambuen ista, quequin chiannec. Aden chiannequid nec, queshun chieshtoenquio icquin Esus tantiaquionona.

¹⁵ Aden nëish iua cuessunneshun pichicaquidon chuiquid tapabimbuecquid icquin matses uidëmpentsëcquio icsho chieshtomete tantiec. Aidi matsesacsho Mayan Icsa Satanasën: Nuquin Papan Chiaid niacmenu, quequin tanaqui Esuquidistun niaquenquio icpanëdash. Adembidi nuquitsen: Nuquin Papan Chiaid niacmenu, quequin tanquin icsambuen namete bunec.

¹⁶ Adquid icnuc tantianquidquio yec Nuquin Papa abitedishun Icbombo yec aton tsadte dapan tsadacno choec puduedshun chiacbimbuen: Ubi cuidenquio icquin bëdambuen ista, quequin Nuquin Papa chiannenuna. Adembidi natiamiantequid icnuc Abi chiannesho tantiashun Nuquin Papan nuquitedi chieshtomenquio icquin nashunquin dayacquio icmendac.