Ebedeo 2 - El Nuevo Testamento en matsés

Nuquin Papabëd tabadmete chuinu, queshun tantiadonequiota, caid

¹ Adec abitedishun Icbombo Nuquin Papan Mado Esus icnuc: Ambi Chiaid niaquec cuëshëdchitomane, queshun aid tantiaquin aidën chiacpadombuen nabanec bëdambuec tabadnuna.

² Ëndenquimboshë Nuquin Papan: Naden nata, quequin chuibanampid ambi abi yacnocquid abëd icquido chuimiacpadombuen chiac matsesën nainquio icsho issun Nuquin Papan cuidpampic. Aden ëndenquimboshë Ambi Chiaid niacquido cuidpampic.

³ ¿Nëbi icquido nuquitsen Nuquin Papa matses cuidmenquio icquin bëdambuen ismete chiaid chuisho tantiate bunenquiocsho cuidenquioda icpatsiash? Nuquin Papa yacno tabadmianquid nebi, quequin aton Madonquio Esusëmba chiac adombuembidi aidën chuibansho tantianëdaidontsen: Abimbo iquec, queshun ubitedi chuiuapondashi.

⁴ Aden chuibanaid abimbo iquec, camequin Nuquin Papan matsesën natiapimbo ictequid ismiantequid ismequimbi nadatiambocquin nabanquin nënquido bëdanmequin tantiamepanëdash. Adoshombic aton Mayan Bëda abi tantiaquido menequin abi bunacpaden ubitedi namepondash.

Matses icnu, quiash Esuquidistu: Cun utsibo nec, quiash matses yanaid

⁵ Tantia. Chuinu. Abi yacnoshon Nuquin Papan abëd icquido chuiquin: Nidaid chuca uaidën tabadec Cun Mado tantiaquidon chuiquid icta, cambo iquec.

⁶ Adquid icnuc ëndenquimboshë dada uaquin naden Nuquin Papa chiec nuquin tsusedpa onquepampic: Tantiaquiono. Ubi chui, Papa. ¿Atotsieshun mimbi uaid matses icsho mimbi bëshunenquio icquin tantiaquiope? Adembidi ¿atotsieshun aido mimbi nashumpe?

⁷ Mibëd icquido cumapenen tantiaquin nabanquidquio icnuc matses daëdpactsëc tantiaquin nabanquid mimbi icmiac. Aden iuecpactsëcshun mimbi namiac matsesën namendac. Aden namequid yec bëdamboshë icquid icsho: Mibi bëdambuen isembi, mimbi caindac, Papa.

⁸ Adquid icmeshun mimbi uaidtedishun Icbombo mimbi icmiac, Papa, quequin dada uamequin abimbo chuipampic. Aden Nuquin Papan matses abitedishun Icbombo icmendac. Adoac abitedimbo namequidquio iquendac. Nëbien abitedishun Icbo Nuquin Papan icmiabi iquec.

⁹ Naden tantianuna. Nuquin Papabëd icquido cumapenen tantiaquin nabanquido icnuc Esusien Nuquin Papan matsesmeshun iuec iuecpactsen daëdpactsëc nabanquid icmiaqui Nuquin Papa matses bëdambuen ismenuen abitedi cuidmenquiocnuec abided cuidadec uënëspanëdash. Aden Nuquin Papan matses tantiaquidquio icquin cuidmepanëdash. Adec mëyadec abided cuidadaid icsho issun Nuquin Papan: Mibi bëdamboshë iquec. Nëbi mibi abitedishun Icbombo icmendambi, caindac.

¹⁰ Aden: Cuna icmenu, quequin Nuquin Papan abitedi uaquid icquin naden tantiapanëdash: Matses cun madobëta cun champi icmeshun bëdamboshë yacno ubëdi tabadmendambi, quepanëdash. Adshumbic ambi tantiacpadembidi: Esuquidistu matsesmeshun natiamiaqui icsambuen naisa yec abided cuidadec uënësacsho uincuenmeshun ubi yacno matses ubëd tabadmequid icmendambi, capanëdash.

¹¹ Aden matses bëdambo icmequid Esuquidistun Papa ambi bëdambo icmiaidon Papabidi nendac. Adec Nuquin Papan Madombo icquin Esusën dacuëdenquio icquin: Cun Pabëd ictequid cun utsibobëd nec, caindac.

¹² Nuquin Papan chuiquin dada uamequin chuimiacpadec nadecbidi Esus onquendac aton Papa chiec: Mimbi naid chuiquin cun utsibo tantiamembi, Papa. Aidobëd tabadequi mibi tantiec cuëdënebi. Nuquin Papa bëdambo iquec, quec cuëdënebi, quependac.

¹³ Adembidi chuiuaic: Ambi chiampicpadombuen nabanquidquio Cun Pa nec, quequin tantiembi. Cun mado nec. Cun champi nec, quequin mimbi meniaidobëd në iquebi, Papa, quequin chuipampic.

¹⁴ Matses yec namibëd intacchoquid nuquitedi nec. Adecbidi Esus namibëd intacchoquid matses yanash naden nanuec uënëspanëdash. Mayan Icsa Satanas matses uënës uaquid icsho dëniacshun aden namenquio iquembi, quiash Esuquidistu matsesash uënëspanëdash.

¹⁵ Aden Mayan Icsa Satanasën matses abi uënëste tantiamequin dacuëdmiaido yec aidën iuaido icbuedi matses umbi mënchicaid iquendac, quepanëdash Esus.

¹⁶ Nuquin Papabëd icquido nashunquin mënchicnu, quenquio yec Abadauanën tsiuecquido matses mënchicnu, quiash matsesash Esuquidistu abided cuidadec uënëspanëdash.

¹⁷ Matsespadquid yanash matses cuidmenquio icte bunquid yec Nuquin Papan chiacpaden naquid yec matses nashunquid nec. Adquid iquec Nuquin Papa matses bëdambuen ismenuen nëish iua cuessunneshun pichicaquidon chuiquid tapabimbuecquid yec bëdamboshëcquid nec. Adquid icquin matsesën icsambuen naidtedi bëshunmequin Nuquin Papa bëdambuen ismenuec Esus abided cuidadec uënëspanëdash.

¹⁸ Adec matsesash mëyadquid icpanëdash. Adquid icsho Mayan Icsa Satanasën: Nuquin Papan Chiaid niacmenu, quequin tanaqui niaquesa Esus icpanëdash. Adquid icquin nuquitsen Mayan Icsa Satanasën: Nuquin Papan Chiaid niacmenu, quequin tanac: Ubi nashunquin chieshtomenda, cac Esusën chieshtoenquiocquid nuqui icmendac.