Ebedeo 10 - El Nuevo Testamento en matsés

Moisesën chiampicpadombuenuidi matsesën natiapimbo icte chiaid

¹ Moises Nuquin Papan: Naden nata, quequin chiampid naden bëdiactsëc tantiamete nepanëdash. Nuquin Papan matses bëdambuen ismetequidquio chomendac, quequin chiaid tantiamete nepanëdash. Adquid icnubi setan setanquien Nuquin Papan Moises chiampicpaden nuquin matsesën Nuquin Papa bëdambuen ismenuen nëish iua dadpen cuessunneshun pichicadennepampic. Aden nabanaidën Nuquin Papa tantiate bunquido nuquin matses: Nëbi icsambuen naisa nebi, quetiapimbo icpampic.

² Aidënquio Moisesën chiacpaden nëish iuan intac daseccaquin matses icsambuen naisa icmiac nëish iua padpiden pichicanun cuessunnenquio ictsempampic. Adecbidi: Icsambuen naquid nebi, quenquio matses ictsempampic.

³ Adquid icnubi: Icsambuen naquid nebi, quequin tantiameuanuen setan setanquien nëish iua cuessunneshun pichicadennepanëdash.

⁴ Aden baca bënëbëta cabada bënë cuessunnetanquin aidën intac bedshun daseccaidën matsesën icsambuen naid bedshuntiapimbo iquec.

Matses cuidmenquio icnuec Esus uënësaid chiaid

⁵ Padnuen Esuquidistu nidaidënshun tishac caniash Nuquin Papa chiec: Mibi bëdambuen ismenuen matsesën nëish iua cuessunneshun pichicatebëta ambi menete utsi iste bunenquio mibi iquec, Papa. Adec bunenquio icquin mimbi tantiacpadombuen matsesën tishaid nebi, Papa.

⁶ Ambi icsambuen naid mibi bëshunmenuen matsesën nëish iua cuessunneshun pichicatebëta ambi menete utsi iste bunenquio mibi iquec, Papa.

⁷ Adquid icsho issun nidaidën choshon mibi chiec: Në iquebi. Mimbi ubi chuiquin dada uamiampicpadombuen naimbi, Papa. Mibi bunacpadombuen naimbi, quequin chiaid dada uapampic.

⁸ Aden chiampid icnuc nëidba nuqui tantiec. Nuquin Papan: Naden nata, quequin chiampicpadombuen nabanquimbi matsesën ambi icsambuen naid Nuquin Papa bëshunmenuen nëish iua cuessunneshun pichicatebëta abi menete utsi iste bunenquio Nuquin Papa iquec. Aden Ambi: Naden nata, quequin chiampid tantiaquin matsesën nashobi Nuquin Papan: Bëdambo iquec, catiapimbo iquec, quequin chiampid nuqui tantiec.

⁹ Nadentsen Esusën chuite chuiquin dada uapampic: Në iquebi. Mibi bunacpadombuen naimbi, Papa, quequin Esusën chuipampic. Adoac nëish iua cuessunneshun pichicatequid ënmequin utsi chuca uain Nuquin Papan Aton Madombo namepanëdash.

¹⁰ Adoac Nuquin Papa bunacpaden: Ma matsesën ubi uënës uanu, quiash padpidec uënësenquio icnush abentsequi abided cuidadec Nuquin Papa matses cuidmenquio icnuec Esuquidistu uënëspanëdash. Aid tantiaquido icsho issun Nuquin Papan: Cuna nec, caido yec aton iuabo nuqui nendac.

¹¹ Adnuc nuquin matses isadaidbon nëish iua cuessunneshun pichicaquidon badiadquidën badiadquidënquien abi nëish iua cuessunneshun pichicadednepec. Aden naidën matsesën icsambuen naid bedshuntiapimbo iquec.

¹² Esuquidistuen Nuquin Papa matses bëdambuen ismenuec abided cuidadec abentsequi uënësash padpidec cuidadec uënëstiapimbo iquec. Adec uënësash uincuenash aton Papa yacnombo nidash aidën dayun abiucquio tsadtuidpanëdash.

¹³ Ambo tsadquin: Ma Nuquin Papan ubi chieshënquido dëniacmequin namenquio icnu, quequin cainec.

¹⁴ Adec abided cuidadec abentsequi uënësquin abi tantiaquido Nuquin Papa bëdambuen ismequin icsaisabimbuecnuc icmequin uënëstiapimbo ictequido icmepanëdash.

¹⁵ Nadembidi aton Mayan Bëdan nuqui bëdambuen tantiamec:

¹⁶ Chiaid utsi nëbi iquendac, quequin uëshë utsimbi chiaid chuca naden chiendambi: Umbi: Naden nata, quequin chiaid nate bunmendambi. Bëshunmenquio icquin tantiamendambi, quec Nuquin Icbo abi tantiaquido caic.

¹⁷ Adecbidi: Mimbi icsambuen naidtedi tantienquio yec bëshunendabi, queuaic Nuquin Icbo, quequin chuipampic.

¹⁸ Adec nuqui icsambuen naidtedi tantienquio yec bëshunash nëbi: Ubi bëdambuen ismenuen nëish iua cuessunneshun pichicata, quenquio Nuquin Papa iquec.

Chieshtoenquio icquin Esus tantiate chiaid

¹⁹ Tantia, cun utsibo, Nuquin Icbo Esuquidistu aton intac chididiquec abided cuidadec uënësaid tantiaquid icquin naden nuqui tantiec: Nëbi Nuquin Papa umbi icsambuen naid tantienquio yec bëshunac, quiash dacuëdenquio yec abi tabadte shubun icquid quënë bëdamboshëcquidën puduedacbimbuen Nuquin Papa chiannequid nuqui nendac.

²⁰ Esus uënësnuc Nuquin Papa tabadte shubu dapa yacno utsi puduedenquio ictequid yacno dectanaid dashcute dapa abucuësh budec abitiombi canchedbudcuempanëdash. Adec uënësbuedi abi icquin aidënuidtsëqui chuca uaquin utsi yacbimbuecnuc icmiac Nuquin Papa chiannequid nuquitedi nendac.

²¹ Nuquin Papa yacnombo icquin nuqui bëdambuen ismequid tapambo Esus nec.

²² Adquid icnuc bëchish nibëdquiecnuc acten dapanacbimbuen nuqui icsambuen naid nibëdacbimbuecnuc Nuquin Papan nuqui bëdambuen isec. Adoac: Nuquin Papa tantiaquidquio nuqui nec. Adecbidi: Nuquin Papan ambi tantiacpadombuen naindac, quequin tantiaquidquio nuqui nec. Adquid yec Nuquin Papa chiannequid nuqui nendac.

²³ Nuquin Papa ambi chiampicpadombuen naquidquio nec, quequin tantiaquid yec: Aid yacnombo tabadtequid nebi, quequin cainquin chieshtoenquio icquin tantianuna.

²⁴ Aden tantiec abi tantiaquid utsibobëd tantiananquiec bëdambuec tabadec nashunnannuna.

²⁵ Aden nabanec: Nuquin Papa tantiaquid utsibobëd iccuededtiapimbo iquebi, utsi utsiec quenubi adenquio icnuna. Adec iccuededec: Nuquin Papan chiacpadquiec bëdambuec tabadnuna, quec chuinannuna. Cuidnuen matsesën naid chuibante uëshë nëbimbobi yanec, quiash adec baded badedquiec chuinannuna.

²⁶ Nuqui icsambuen naid bedshunash abided cuidadec Esuquidistu uënëspanëdash, quequin abimbo chiaid chuibanac aid tantiabuedi: Adequi icsaic tabadnu, quequid: Nuquin Papa ubi bëdambuen ismetequid utsi iquec, quetiapimbo iquec.

²⁷ Aden Ambi Chiaid niactednequid icsho abitedi cuidte uëshë chonoc nëishshun dacuëdampambocquid icquin cumapenen chushcashun Nuquin Papan abi chieshënquido nibëdanmequin chian annëdënquiacno nësecaindac.

²⁸ Nuquin Papan: Naden nata, quequin Moises chiampid matsesën niacsho issun matses daëdshun adembidi 3tedshun: Isombi, quequin chiac niacquid cuidquin cuessunnemepampic: Uënësquio iquec, quenquio icquin.

²⁹ Aden Moisesën chiampid niacquid cuidampid icnuc Nuquin Papan Aton Mado matsesën tantienquio yansho ¿cumapenen cuidenquioda icpatsiash? Aidon Nuquin Papan Mado Esus tintincacbimbuen chieshënec. Esus uënësaid caic: Matses yec abembi uënësaid nepanëdash, quepec. Adembidi aton intac nua chiuidec abided cuidadec uënësaid Esus tantiasho bëdambuen isquin bëdambuec tabadmendambi, quequin Nuquin Papan Chiaid chuca chieshënec. Adembidi Nuquin Papan Mayan Bëda matses bëdambuen iste bunquid icsambuen chuishunuaic.

³⁰ Nuquin Papa: Umbi chiaid niacsho cuidquidquio nebi, quequin chiampid nuqui tantiec. Adembidi: Cun matses caidombi ubi chieshënsho cuidendambi, quequin Nuquin Papan Chiampid iquec, quequin nuqui tantiauaic.

³¹ Nuquin Papa uënëstiapimbocquid yec matses tibocamequid icquin icsambuen naquido cuidquidquio dacuëdampamboshë iquec.

³² Tantia. Cun utsibo. Mibitedi chuinu. Esuquidistu tantiaquido mibitedi yanacsho chieshënquin natiamiaqui chieshtoenquio icquin Esus tantiec mibi bëdambuec tabadondaid bëshunenquio icquin tantiata.

³³ Aden Esus tantiasho mibitedi utsi utsien icsambuen chuishunquin mamënshunquin abitedi ismequin cuesquin mëyanquin natiamepanëdash. Aden natiamiacsho isash Esus tantiaquid utsibo aidobëd shubitiadquio yec natiec tabadpanëdash.

³⁴ Adecbidi mibitedi Esuquidistu tantiaquid utsi quënën tsadunaid icsho isash uënësquio icquin aid tantiaquin mimbi nashumpondac. Adecbidi mibi chieshënquidën mitsana bedacsho isash cuishonquepanëdac. Nuquin Papan abi yacnoshon cuna bëdamboshëcquid nibëdantiapimbo icquid bedtequid iquec, quequin tantiec: Bëdambo iquebi, quec mibi cuishonquepanëdac.

³⁵ Adquid icquin chieshtoenquio icquin: Nuquin Papa yacno tabadtequid nebi, quequin ënenquio icquin mibitedishun tantiata. Aden tantiaquid icsho Nuquin Papan abi yacnombo tabadmequin bedtequid bëdamboshëcquid mibi menetequid iquendac.

³⁶ Utsin mëyanquin natiamiaqui Nuquin Papan Chiaid chieshtoenquio icquin tantiadedneta. Adec tabadquin abi bunacpadombuen nabanacsho ambi chiampicpadombuen Nuquin Papan abi yacno mibitedi tabadmendac.

³⁷ Nuquin Papan Chiaid chuiquin dada uampid nad iquec: Nëbimbobien mimbi cainaidquio choendac. Ambi tantiacpadënquio choendac. Ambi chiacpadënquio choenquio iquec, quetiapimbo iquec,

³⁸ Aid chote tantiec Ambi chiacpadec bëdambuec tabadquin abi tantiasho Nuquin Papan abëd tabadtequido icmendac. Utsin chieshtoshon ubi tantienquio icsho bëdambuen istiapimbo iquendabi, quec Nuquin Papa, quequin chuiquin dada uapampic.

³⁹ Padnuen nuquitedi chieshtoenquio icquin Esus tantiaquido nec. Utsiboen aid tantiaquid icbuedi chieshtoquid icsho Nuquin Papan cuidtequido yanec. Adoshombic Esus tantiaquido chieshtoenquio icsho Nuquin Papan nuquitedi bëdambuen isquin abi yacnombo tabadmendac.