Ducas 9 - El Nuevo Testamento en matsés

Esusën: Ubi chuibennec nidta, quequin abëd icquid 12ted chiaid

¹ Adshumbic ambi: Ubi chuibenneta, caido 12tedtsëqui chochomeshun Esusën nadopanëdash: Umbi nadatiambocquin nabambocpadombuembidi mibitedishun nabanendac. Podobitsi icsa dapuduedaid dapuduenmequinc daicsaido bëdanmequinc nënquido bëdanmequinc quequin mimbi nabanendac.

² Nëbi mibitedi nidmembi. Adoac nidshun: Nuquin Papan namiacno tabadte iquec, quequin chuibennequimbi nënquidobëta daicsaido bëdanmebenneta.

³ Nidquin mitsana buanenda. Min cueste mibi uidënte buanenda. Min shictoadte buanenda. Min pete buanenda. Min piucquid buanenda. Min dashcute utsi buanenquio yec nidta.

⁴ Adec nidash mibi iuedquidën shubun puduedshun umbi chiacpadombuen nabanec auëshquio nidabi yec ambouidi tabadta.

⁵ Mibi nidacnoshon mibi iuedenquiocsho isash auëshquio nidnun naden nata. Nëmbo icquido Nuquin Papa tantiesabo yec icsaquidombo icsho Nuquin Papan cuidtequidombo mibitedi nec, quequin ismec nidaid putu tabesqueta, capanëdash Esusën abëd icquido chuiquin.

⁶ Aden chiac nidanneshun abëd icquidon shubu daëdpactsëcquid yacno yanombuec capucuennequin Esusën chiacpadombuen: Nuquin Papan namiacno tabadte iquec, quequin Chiaid Bëda chuibanquimbi daicsaidobëta nënquido bëdanmebampanëdash.

Edodes Antiapasën tantienquio yaid

⁷ Adnubien chuiquid tapa Edodes Antipasën Esusën nabansho isquidon chuisho tantiapanëdash. Aden tantiashun: ¿Tsutsi nepash? Edodesën caquien: Acten mentoandenned Uan uincuempash icnui, utsi utsiec quenubi

⁸ utsibo: Nuquin Papan oncamiampid Edias padpidec chopash icnui, quenubi utsibo: Ëndenquimbo Nuquin Papan oncamiampid utsi uincuempash icnui, quecuededpanëdash Edodes tantiamequin chiec.

⁹ Adoaquien: Mambi uincuentiapimbo icnuc Uan mapi butemiondac. ¿Tsudain umbi tantiacmaidquio aden nabanquid mimbi chuipec? quiashic Esus iste bunquiopanëdash Edodes.

Esusën matses dadpenquio pemiaid

¹⁰ Adashic Esusën: Ubi chuibenneta, caido ambi nidmebuedo padpidec Esus yacno chochouapanëdash. Adec chochoshon ambi nabanaidtedi chuibampanëdash. Aden chuibansho tantiashun abëd icquidouidtsëqui buanec Esus shubu daëdpactsëcquid Betsaida yacno nidpanëdash.

¹¹ Adec nidsho issun chochoquidon tsibanampanëdash. Adsho issun Esusën: Nuquin Papan namiacno tabadte iquec, quequin chuibanquimbi daicsaidobëtabi nënquido bëdanmepanëdash.

¹² Adashic uëshë budsho istanec abëd icquidombo Esusën dayuntsëc choshon: Nëmbo shubu nibëdeque. Shubu utsi utsiec yacno nidshun piucquid menequin ma pete bedshun pec nidannennu. Chochoquido nidanneme, capanëdash.

¹³ Adoaquien Esusën: Mibitedishun pemeban, capanëdash. Aden chiaquien: Ma nëmbobi pan 5ted icnubi nuëcquid daëd icpayoc. ¿Aidtedtsëqui icsho issunda chochoquidtedi pemenu, quequin: Piucquid menequin pete bedtan ubi cai? quecuededpanëdash abëd icquido.

¹⁴ Ambo tabadquid dada 5midted iquec, queshun aden chuipanëdash. Adsho tantiashumbien Esusën: 50 ted 50ted tedquiec icnuc tabadbudme, cac abëd icquidon

¹⁵ aidën chiacpadombuen abitedi tabadbudmepanëdash.

¹⁶ Adec tabadbudsho istanquin pan 5ted icquidbëta nuëcquid daëd sananquin abuc isec: Mibi bëdambocquid icquin mimbi meniaid nëid pete nec, Papa, quec onqueshun pambëta nuëcquid cuëshbudcuenquin menequin: Nëid meneban, Esusën cac abëd icquidon menebampanëdash.

¹⁷ Aden meniac pebededash: Pequiombi, quecuededpanëdash abitedimbo. Aden pebededan napi uaid bedbanshun sandoaid tambanac tsitsan dapa 12ted icpanëdash.

Nuquin Papan Chomiaid Quidistu mibi nec, quequin Petedon chiaid

¹⁸ Adshumbic matses nibëdacno abëd icquidobëd nidash uanno abentsëqui nidshun Nuquin Papa Esusën chuipanëdash. Aden chuitanec choshon: ¿Matsesën: Tsutsi nec, ubi caosh? quepanëdash Esus abëd icquido chiec.

¹⁹ Adoaquien: Utsin utsinquien: Uan acten mentoandenned nepanui, mibi caosh. Utsimbic: Edias icpampid nepanui, mibi caosh. Utsimbic: Ëndenquimbo Nuquin Papan oncamiampid uincuenaid nepanui, mibi caosh, quepanëdash abëd icquido.

²⁰ Adsho tantiashumbien Esusën: Ma mibitedishun ¿tsutsi nec, ubi cao? caquien Petedon: Quidistu caid Nuquin Papan Chomiaidquio nec, mibi caombi, capanëdash.

²¹ Aden chiaquien: Mimbi aden tantiaid utsibo chienda, capanëdash Esusën.

Esusën abi uënës uate chiaid

²² Aden chiashic: Matsesën Tishaid icshobi natiamequin nëidtedishun ubi mëyanmendac. Nëidic isadaidbo tsësiobon. Nëidic nëish iua cuessunneshun pichicaquidon chuiquidon. Nëidic Moisesën chiampid tantiamequidon. Aidtedshun mëyanmequin uënës uamiaqui daëdec ushash uincuenendabi, quepanëdash Esus.

²³ Aden chuishumbic ambocquidotedi chiec: Ubi tantiaquid icquin atonauidi nainquio icquin badiadquidën badiadquidënquien umbi chiacpadombuen natsiash. Adsho chieshëmënquidon: Cueste napotiaidën dectanquin uënës uamechitono, caqui chieshtoenquio icquin abi ubi tantiatsiash. Adquid ubi tantiaquidquio nendac.

²⁴ Matses ambi tantiaiduidi naic tabadquid uënësash Nuquin Papa yacno puduedtiapimbo iquendac. Padnuen ubi tantiaquin umbi chiacpadombuen naquid chieshënquin cuessuniacsho Nuquin Papan abi yacno puduedmendac.

²⁵ Utsibic abi bunaid dadpenquio bedbanec abibi cuessunniadacbimbuecquin ubi tantiesa yec uënësash Nuquin Papa yacno puduedtiapimbo iquendac.

²⁶ Esus tantiaquin aidën chiaid tantiaquid nebi, quebuedi utsibo dacuëdënquin umbi chiaidbëta ubi tantiaquin chuitiapimbocquid iquendac. Adquid icsho issun adembidi Matsesën Tishaid icshobi Nuquin Papa nadatiambocquidquio icquin abitedishun Icbombo icmiac Nuquin Papabëd icquid bëdambocquidobëd choshon umbitsen: Ubi tantiaquid nec, cauatiapimbo iquendabi.

²⁷ Aden chiashic Esus: Tantia. Abimbo chuinu. Nëmbo tabadquid ubi tantiaquid utsi utsiec uënësabi yec nidaidën abi tabadsho Nuquin Papan ambi namiaid ismendac, quepanëdash Esus.

Esus bëchamauanquiecsho isaid

²⁸ Aden chiashic 7tedec ushash: Nuquin Papa chuitannu, quianec nidquin Petedo yec Uan yec Santiaco yec quenuc buanec macuësh tapa abucquiocquid yacno Esus nidpanëdash.

²⁹ Adec nidshun Nuquin Papa chiec onquequi aton bëtantete utsiacbimbuec yannuc aton dashcute ushumboshë yanec bëchamauanquiec Esus yampanëdash.

³⁰ Adnubien dada daëd isadcuenash Esusbëd onquec tabadpanëdash. Aidi Moisesbëd Edias nepanëdash.

³¹ Aid daëdi adecbidi bëchamauanquiec isadec Esusbëd onquec tabadquin Edusaden yacnoshon Esus uënës uamete chuipanëdash.

³² Adnubien Petedo abëd chobuedobëd ushcasquiec tabadquimbi Esusbëd dada daëd bëchamauanquiecsho ispanëdash.

³³ Esusbëd icbuedi Moisesbëd Edias nidsho istanec Petedo nadpanëdash: Icbo, mibëd nëmbo choash tabadquin mibitedi isec bëdambo iquebi. Mibi nëmbo tabadte 3ted icnuc shubumpi uanu, mitsana yec Moisesëna yec Ediasëna yec quenuc, quepanëdash Petedo bëdambuen tantienquio yec.

³⁴ Adec Petedo onquenubien abu ushu choquin isadenquiocnoc abitedi bëtimpanëdash. Adsho isash Esusbëd nidbuedo dacuëdcuededpanëdash.

³⁵ Adnubien abu ushu yacnouësh onquec: Nëid Cun Madombo umbi Chomiaidquio Quidistu neque. Aidën chuisho bëdambuen tantiata, quepanëdash.

³⁶ Adec onquian Esus abentsëqui icsho abëd nidbuedon ispanëdash. Adoshon ambi isbued utsibo chienquio icpanëdash.

Esusën podobitsi icsa madompi dapuduedaid cuenmeshunaid

³⁷ Adashic badiadash macuësh tapa yacnouësh Esus budsho istanec aid bëquedec matses dadpen chochopanëdash.

³⁸ Adec chochoash tabadnubi dada abentsëcshun cumapenen cuënquin nadopanëdash: Icbo, Mibi bëdambocquid neque. Cun mado abentsëc icquidi isec cho.

³⁹ Podobitsi icsan cun mado bedquin nua cuëdmequin mëyadmequin padishmededniosh. Adembidi ëcbacushmedennequin mëyadmequin nianenquio iquec.

⁴⁰ Adsho isash choshon mibëd icquido chuiquin: Dapuduenmeta, cauidombi. Adoaqui podobitsi icsa dapuduenmenquio iccosh, quepanëdash madompin papa Esus chiec.

⁴¹ Adoaquien ambi nianaidobëta abëd icquido caic Esus nadpanëdash: Nadatiambocquid Nuquin Papa nec, quequin tantiesa mibitedi nec. ¿Tedectsicshun umbi chiacpaden mimbi tantiabempe? Mibitedishun tantienquiocsho isash ¿tedectsiashini chieshtope? quetanquin: Min mado bec cho, capanëdash Esusën.

⁴² Aden bëec anoentsëqui chosho podobitsi icsan bëcunniac madompi uëdëquianec uebudpanëdash. Adosho issun Esusën: Aidën dadan iquenquio yec dapuduenec cuenta, capanëdash podobitsi icsa chuiquin. Aden chiac dapuduennuc madompi bëdanacsho aton papa Esusën menepanëdash.

⁴³ Adosho isash: Nuquin Papan nadatiambocquin naid uinsadpambo iquec, quec isquidotedi tantiadempambo yec tabadpanëdash. Aden tantiec tabadnubi Esusën abëd icquido naden chuipanëdash:

Esusën abi uënës uate padpiden chuiuaid

⁴⁴ Tantia. Chuinu. Bëshunenquio icquin bëdambuen tantiaquiota. Matsesën Tishaid icsho ubi chieshënquido ubi bedmendac, quepanëdash Esus.

⁴⁵ Aden Esusën chuibansho abëd icquidon tantienquio icpanëdash. Nuquin Papan tantiamiabi yac tantienquio yec: Mimbi chiaid bëdambuen tantiambo iccombique. En padpiden chui. Tantianu, quetiapimbo yec abëd icquido dacuëdec otacquio tabadcuededpanëdash.

¿Tsutsimbo chuiquid tapa icpec? quequin chiaid

⁴⁶ Adashic: ¿Mitsicquid abentsëc nuquibëd icquid chuiquid tapa yampatsiash? quec abëd icquido cuëdnancuededpanëdash.

⁴⁷ Adsho ambibi tantiashun Esusën bacuë abentsëc bedtanquin aton dayunquio tsadunash:

⁴⁸ Ubi tantiaquin nadquid bacuë nashunquin ubi iuedquin nashunacbimbuecquid nendac. Ubi iuedquin nashunquidën ubi chomiondaid Nuquin Papa nashunuacbimbuecquid neuaindac. Nidaidënuësh utsi nashunquidquio icbuedi aidquiobi abi yacnoshon Nuquin Papan: Chuiquid tapa icta, caindac, quepanëdash Esus abëd icquido chiec.

Ubi: Icsambocquid nec, caisa ubi bëdambuen isquid nec, quiaid

⁴⁹ Adnubien utsin nasho isboshon Uanën naden chuipanëdash: Icbo, mimbi nabocpadombuen utsin nasho ispombi. Aidën: Esus nadatiambocquin naquidquio nec, quequin tantiembique. Dapuduen, cacpadquiequi podobitsi icsa dapuduemposh. Adosho issun: Esusbëd icquidpenquio mibi neque. Aden chienda, quequin chuipombi, quepanëdash Uan.

⁵⁰ Adoaquien Esusën: Adquid aden chienda. Nuqui chieshënenquio icquidën nuqui bëdambuen isquid nendac, quequin Esusën Uan chuipanëdash.

IV. EDUSADEN YACNO NIDTE CHIAID ( 9.51—19.27 ) Esusën Santiacobëta Uan: Aden chienda, quequin chiaid

⁵¹ Adashic Esus abi abuc indote uëshë chote anoentsëqui yannuc: Uënësmane, quenquio yec nidebi, quequin ambibi tantianec Edusaden yacmi niduaic puduampanëdash.

⁵² Adec nidquimbi: Bëyuc nidshun chiec nid, quequin chuiquid Esusën abia nidmiac nidaid Samadia caid yacno shubu dadpen icquid yacno chopanëdash. Adec choshon: Edusaden yacno nidnush Esus choshe. ¿Ada aid abëd icquidobëta iuedshun mimbi ushmepatsia? caquien:

⁵³ Edusaden yacno nidnuec choquid isadaidboen nechitec, quequin tantiaquin iuedenquiocpanëdash Samadia yacnocquidon.

⁵⁴ Adsho istanec Santiacobëd Uan nadpanëdash: ¿Nëmbocquido ma uënësnu. Aido nëdëncatequid abucshun chome, Papa, quequindambi Nuquin Papa chuipe, Icbo? capanëdash.

⁵⁵ Adoaquien bidiadquin isec: Padicnuna. Aden chienda, capanëdash.

⁵⁶ Matsesën Tishaid icquin matses cuessunnenquio icquin Nuquin Papa yacno tabadmenuec chondabi, quiash shubu daëdpactsëcquid utsi yacno abëd icquidobëd nidpanëdash.

Esus tsibante bunquidën natequid

⁵⁷ Adec podquiedën Esus nidshobi abëd nidannequid abentsëcshun nadopanëdash: Icbo, mibi nidacnombobi nidec mibëd nidte bunebi, quepanëdash.

⁵⁸ Adoaquien Esusën: Tantia. Mibi chuinu. Bëdi chëshë aton shëcuën ushquid. Uicchun aton shubu uash abuc ushquid. Padnueni Matsesën Tishaid yequi cun shubu nibëdnuc quenenenquio yec capucuennequid nec, capanëdash.

⁵⁹ Adoshombic: Ubëd iquec cho, Esusën caquien utsi: Cun pa uënësaccoshe. Aidba chococatambono, Icbo, capanëdash.

⁶⁰ Adoaquien Esusën: Uënësacbimbuec icquidon ma uënësaid chococanu. Mimbimbo: Nuquin Papan namiacno tabadte iquec, quequin tantiamequin chuibenneta, capanëdash.

⁶¹ Adshobien utsintsen nadopanëdash: Mibi tsibanec nidnun cun matsesba: Nidendabi, quequin chuitambono, Icbo, caquien:

⁶² Mibi tsibannu, quebuedi aucbidi bidiadquin isacbimbuen utsiba tantiec Nuquin Papan namiaid mibi ictiapimbo iquec, quepanëdash Esus.