Ducas 8 - El Nuevo Testamento en matsés

Chidobo Esus nashunquido chiaid

¹ Adshumbic Esusën shubu daëdpactsëcquidbëd shubu dadpen icquid yacno yacnombuec capucuennequin: Nuquin Papan namiacno tabadte iquec, quequin Chiaid Bëda chuibennepanëdash. Aden chuibennec capunuc abëd icquido 12ted adecbidi Esusbëd nidpanëdash.

² Adecbidi tsibananec chidobo nidpanëdash. Ambi podobitsi icsa dapuduenmiaidobëtan ambi nënsho bëdanmiaidon Esus tsibanampanëdash. Aden Madia Macdadena cuënaidën Esus tsibanampanëdash. Aidi podobitsi icsa 7ted dapuduedaid icsho Esusën dapuduenmebued nepanëdash.

³ Abëd nidquid utsi Uana icpanëdash. Aidën bënë Cusa cuëmëdquid chuiquid tapa Edodes Antipas aton chuiquid icsho aid dadpen nashunquid icpanëdash. Abëd nidquid utsibic Susana icpanëdash. Adecbidi chido utsibo dadpen atona dadpen icnuc Esus nashunquin menedednepanëdash.

Utsi chiacbimbuen pete ëshë secaid chiaid

⁴ Aden chuibenniash tabadtuidtsëcnubi shubu dadpen icquid utsi utsiec yacnouësh Esus isec matses dadpen chochopanëdash. Adec chochoacsho issun utsi chiacbimbuen Esusën naden chuibampanëdash:

⁵ Tied icbo pete ëshë secaic aton tied yacno nidposh. Adec nidshun pete ëshë secac maisec utsi utsiec podquied nantan paëdacsho matsesën tintincanubi utsi dadpen uicchunën cheposh.

⁶ Utsibic cuënote dadpen samëdacno paëdaid badedquio dëyucuidtsashi acte nibëdnuc bidiquec uënësposh.

⁷ Utsibic nisanquid dadpen yacno paëdash aidbëdi dëyucash canidotsëcshobi nisanquidën bëtinac canitiapimbo yec uënësposh.

⁸ Utsibic nidaid bëdambo yacno paëdaid dëyucash caniash dadpen bacuëash 100ted ëshë icquid icposh, quepanëdash Esus. Aden chuibanashic cumapenec cuëdec: Pabiate shëcuë choquidën Umbi Chiaid bëdambuen tantiata, quepanëdash Esus.

Utsi chiacbimbuen dadpen chuibanaid

⁹ Adoaquien: ¿Atotsi tantiamenuen utsi chiacbimbuen chuibanquin nao? Tantianu. Ubitedi chui, capanëdash abëd icquidon.

¹⁰ Adoaquien: Matses tantiamenquio icnëdaidi nëbi: Nuquin Papan namiacno tabadte iquec, quequin mibitedictsëqui tantiamembi. Utsiboembi utsi chiacbimbuen chuibanendac. Aden chiac: Ëshën bëdambuen isquimbi ma isenquiocpanuna. Adembidi tantiaten bëdambuen tantiaquimbi ma abimbo chiaid tantienquio icuapanuna, quepanëdash Esus.

Pete ëshë secaid cuembo chiaid

¹¹ Aden chiashic: Umbi utsi chiacbimbuen chuibambued nad iqueque. Tantia. Chuinu. Tied icbon pete ëshë secaidbimbuecquid Nuquin Papan Chiaid nec.

¹² Secac podquied nantan paëdaidbimbuecquid nad iquec. Nuquin Papan Chiaid tantiashumbi bëdambuen tantienquiocsho Mayan Icsa Satanasën: Nuquin Papa tantiabenash aid yacno tabadnushe, queshun tantiamenquio icquin badedi bëshunmendac.

¹³ Pete ëshë utsi cuënote dadpen samëdacno paëdaidbimbuecquid nad iquec. Nuquin Papan Chiaid chuibansho tantiash: Tantiabenombi, quiash cuishonquendac. Adbuedi aton tapun nibëdquio yacbimbuec chieshtomiantequid utsi utsiec icnuc bëdambuen tantienquio icquin Nuquin Papa tantienquio yanendac.

¹⁴ Pete ëshë utsi nisanquid dadpen dëyucaid yacno paëdaidbimbuecquid nad iquec. Nuquin Papan Chiaid chuibansho tantiashun ambi natiaquin tantiaiduidi tantiec chieshtoendac. Utsibic ambi bedteuidi tantiaquin nabanquin chieshtoshon tantienquio yanendac. Utsibic abi bunaidtedi nate bunquin tantienquio yanuaindac. Adquidon Nuquin Papan Chiaid tantiesa yanshun bëdambuec tabadaid ismesa yanendac. Adquid nisanquidën bëtinac bacuëtiapimbo yacbimbuecquido nendac.

¹⁵ Pete ëshë utsi nidaid bëdambo yacno paëdaidbimbuecquid nad iquec. Nuquin Papan Chiaid chuibansho tantiaquioshon ambi tantiabued bëshunenquio icquin tantiadonec bëdambuec tabadquin utsi tantiamequin chuibanquidquio nendac. Adquid natiamiantequid chonoc chieshtoenquio icquin utsibo ënenquio icquin chuibanendac. Adquidën chuibanac ubi tantiaquid dadpenquio yanendac, quepanëdash Esus abëd icquido chiec.

Utsi chiacbimbuen tabote chiaid

¹⁶ Aden chuishumbic Esusën utsi chiacbimbuen naden chuiuapanëdash: Tabote taboshon matsun bëtashesa nec. Adembidi uete tëdion tabote nanesa icbo nec. Ma umbi iuedaidon isnu, queshun tabote taboshon nënantanquio abuc dectanquid.

¹⁷ Utsibo tantiamenquio icquin ompodshon nabanaidtedi tantiadanendac. Adembidi utsibo tantiamenquio icquin nabanaidtedi chiadanendac. Adembidi utsibo ismenquio icquin nabanaidtedi sebadënquio tantiadanendac.

¹⁸ Adquid icnuc Umbi Chiaid bëdambuen tantiaquiota. Nuquin Papa tantiate bunquidën ubi tantiabensho bëdambuen tantiamendambi. Nuquin Papa tantiauidtsëcquidën umbi utsi chiacbimbuen chiac tantienquio icsho tantiamenquio iquendambi, quepanëdash Esus.

Esusën utsibo aton titabëd choaid

¹⁹ Adashic Esus isnuec aton titabëd aton utsibo chopanëdash. Adec chochoash matses dadpen icnuc Esus anoentsëc chotiapimbo icpanëdash.

²⁰ Adnubi utsin: Titabëd min utsibo chochoshon mibi isnuen umanucshun cainec, quequin Esus chuipanëdash.

²¹ Adoaquien: Nuquin Papan Chiaid tantiashun aidën chiacpaden nabanec tabadquid icsho dada cun utsi catanquimbi chido cun ta caimbi, quepanëdash Esus.

Acte cumapenec bocquequid ënëdmiaid

²² Uëshë utsimbi: Chian potec ëquëmatsiuc nidnu nid, quianec abëd icquidobëd cano antabëdtoanec puduanec nidpanëdash.

²³ Adec nidnubi cano anuec Esus ushtopanëdash. Adec ushnubien cunquequid tapa cumapenec cunquec acte bocquequidën acte ancushadec cano mentoadtiadtsëcquio yampanëdash.

²⁴ Adsho isash dacuëdquin Esus ushec uesho tinec: Icbo, Icbo, nuqui mentoadeque. Isucun, quequin cuëmbededpanëdash abëd icquidon. Adsho tantiash isucunec nidtoshon: Mibi cumapenec cunqueque. Ënëd, Esusën cac cunquequid badedquio ënëdpanëdash. Adembidi: Mibi cumapenec bocqueque. Ënëd, Esusën cac badedquio acte bocquequid ënëduapanëdash.

²⁵ Aden ënëdmetanec: ¿Atotsi quiash ubi tantienquio yec dacuëdcuededo? Esusën caquien abëd icquido tantiadempambo yec dacuëdcuededquiequi: ¿Mitsipadquidquio nëid nepec? Cunquequidbëta acte bocquequid: Ënëd, cacpadequi ma ënëdpaboc, quec abëd icquido onquecuededpanëdash.

Nidaid Quedasa yacnoshon podobitsi icsa dadpen dapuduedaid dapuduenmiaid

²⁶ Adec acte bocquec ënëdan nidec chian ëquëmatsiuc potec nidaid Quedasa caid yacno Esus nidpanëdash abëd icquidobëd. Aid yacnoshon isac utsiuc nidaid Cadidea icpanëdash.

²⁷ Ambo nidash pudundosho isash podobitsi icsa dadpen dapuduedaid dada Esus bëquedec chopanëdash. Aidi shubu dadpen yacno iccondaidi uanno uënësaid chococate cuënote shëcuën tsadcuennequid yec dashcute dasiuidenquio icpanëdash.

²⁸ Aidi Esus bëquedec choec Esusën taëno dannëshën tinquebudash cumapenec cuëdec: ¿Atotsi ubi canuec ne? Esus. Nadatiambocquid Nuquin Papan Madombo mibi neque. Ubi mëyanenda, quequin aid dadan chuipanëdash podobitsi icsan oncamiac.

²⁹ Adec onqueshobi podobitsi icsa chuiquin Esusën: Dapuduen, capanëdash. Aid dada podobitsi icsa dapuduedshun namiac nad icpanëdash. Shocosh bucun abi mëtaniaidbëtabi abi tataniaid tëstenniacsho podobitsi icsan shubu nibëdacno buanaid aid dada nepanëdash.

³⁰ Adquid nec, quequin tantiaquin Esusën: ¿Tsutsi cuëmëdquid ne? capanëdash. Adoaquien: Dadpenquioshë dapuduedaid yec Dequion nebi, quepanëdash podobitsi icsa dapuduedaido onquec.

³¹ Adashic: Mibi nadatiambocquid neque. Mëyadmequin ënenquio icquin cuidtequid yacno ubitedi nidmenda, quiashic

³² chanchu dadpenquio macuësh yacno pec tabadsho isash: Ubitedi chanchu dapuduedtiadquio iquebique. Ubitedi dapuduedme, quepanëdash podobitsi icsabo Esus caic. Adoaquien: Ai, chanchu dapuduedcuededec nid, Esusën caquien

³³ matsesën dadanouësh dapuduenequi icbo icboec chanchu dapuduedash niquianec abucquio quiusudacnouësh chian nëpaëdbudnec mentoadbudnepanëdash nibëdquio yec.

³⁴ Adsho istanec chanchu pemequin isquido titinquianec nidannepanëdash. Adec nidshun shubu dadpen icquid yacno tabadquidobëta uanno uannoec tabadquido ambi isbued chuipanëdash.

³⁵ Adoac ambocquido: Istannu, quianec Esus yacno chochopanëdash. Adec chochoshon podobitsi icsa dapuduenmequin bëdanmiaid dashcute dasiuidash bëdambuen tantiabenash Esusën dayun tsadec onquesho istuidpanëdash. Adsho isash: Uinsadpambo iquec, quiash dacuëdcuededpanëdash.

³⁶ Adnubien podobitsi icsa dapuduenmequin bëdanmesho isbuedon ambi isbued dacuëdquido chuipanëdash.

³⁷ Aden chiac nidaid cuëshë Quedasa yacnocquido natiambo dacuëdcuededquimbi: Nëmbo iquenquio yec nidec nid, cabededpanëdash chochobuedon Esus chuiquin. Adoac Esus abëd icquidobëd aucbidi budec cano dapa antabëdtoanec nidpanëdash.

³⁸ Adsho isash: Mibëd nidte bunebique. ¿Ada ubi buantsia? quepanëdash ambi podobitsi icsa dadpen dapuduenmequin bëdanmebued Esus caic. Adoaquien:

³⁹ Padi. Min shubuno nidec nid. Ambo nidshun Nuquin Papan mibi nashunquin podobitsi icsa dadpen dapuduenmequin bëdanmebued ambocquido chuibanta, quianec Esus canon nidpanëdash. Aid nidnubien podobitsi icsa dapuduenmequin Esusën bëdanmebued aton shubu yacno nidshun ambo icquidotedi chuibennepanëdash.

Chido bëdanmiaid chiaidbëta champi uincuenmiaid chiaid

⁴⁰ Adashic chian ëquëmatsiuc potiash Esus padpidec chosho isash: Mibi isec cuishonquebi, quepanëdash abi cainquidotedi.

^41-42 Adnubien Nuquin Papan Chiaid chuibante shubun tabadquido isquin namequid Aido cuëmëdquid choash Esusën taëno dannëshën tinquebudec nidaidën bëccuësquebudash: Cun champi abentsëc icquidi uënëstiadtsëcquo iccosh. Aidi aton seta 12ted icquid niosh. ¿Ada aid isnuec cun shubuno nidtsia? quepanëdash Aido cuëmëdquid. Aden chiac: Ai, quianec aidbëd Esus nidnubien chochoquido dadpen tsucus tsucustsëcquio yec Esusbëd nidpanëdash.

⁴³ Adnubien chido seta 12ted matanmec intac mëyanec nacchoadec bëdanenquiocquid chopanëdash. Aidi dauëchoquid aton piucquid uesquin menianniaqui bëdanmenquio icpanëdash.

⁴⁴ Adquid yec: Bëdanmianquidën ubi bëdanmetsiash, quianec Esus ismenquio yec cachoc choshon aidën dashcute bëntsecquid cuëma mishnubi aton intac badedquio bëdampanëdash.

⁴⁵ Aden mishac: ¿Tsuntsimbini mishosh? quepanëdash Esus. Aden chuisho tantiash abi datsidadquido mishambo yec otacquio tabadcuededpanëdash. Adec tabadnubien Petedon: Matses dadpenshun tsucus tsucustsëcquiocquin ma mibi cuëscabededpayoc, Icbo, capanëdash.

⁴⁶ Adoaquien: Matses abentsëcshun ubi mishosh. Umbi nadatiambocquin nabued iquec, quepanëdash Esus.

⁴⁷ Adsho tantiashien chido: Nëidën umbi nabued ambibi tantiaquin ubi isec, quec abibi onquequi dacuëdec uëdëquequi Esusën taëno dannëshën tinquebudpanëdash. Adec tinquebudshun datsidadquidon tantianubi: Intac bëdannu, quequin min dashcute bëntsecquid mishequi badedquio bëdanobi, quepanëdash Esus chiec.

⁴⁸ Adoaquien: Mimbi tantiacpadquiequi mibi bëdanaque. Dacuëdenquio yec bëdambuec tabadec nid, champi, capanëdash Esusën.

⁴⁹ Aden chiec abi Esus onquenubien Nuquin Papan Chiaid chuibante shubun icquidon chuiquid tapa Aido cuëmëdquidën shubun icquid choshon: Min champi uënësoshe. Chuibanquidi ancabudenda, quequin chuituidpanëdash.

⁵⁰ Aden chuisho tantiashun Esusën: Dacuëdenquio icquin ubi tantiata. Aden mimbi tantiacpadquiequi min champi bëdanendac, capanëdash Aido cuëmëdquid chuiquin.

⁵¹ Aden chianec Aido cuëmëdquidën shubuno nidash chochoquidotedi caic: Ubëd puduedenda, quequin chianec Petedo yec Uan yec Santiaco yec aton papa yec aton tita yec quec champi uiacno Esus puduedpanëdash.

⁵² Ambo Esus puduednubi ambo icquido uënësquio yec shubiec sedenquesho tantiashun: Mibi shubieque. Ënëd. Champi uënësenquio yec ushash neque, capanëdash Esusën.

⁵³ Adsho tantiashun: Ma champi uënësquiopacboc, quequin tantiaquin Esus mamënshumbededpanëdash.

⁵⁴ Aden mamënshunaqui Esusën champi mëdinquin: Nidto, champi, cumapenen cac

⁵⁵ uincuenec badedquio nidtopanëdash. Adec nidtosho isash: Champi peme, quepanëdash Esus.

⁵⁶ Adosho isash tantiadempambo yec aton titabëd aton papa tabadpanëdash. Adsho: Mimbi isbued utsibo chuibanenda, capanëdash Esusën.