Ducas 7 - El Nuevo Testamento en matsés

Sondadon chuiquidën iua bëdanmiaid

¹ Aden iccuededquido chuibanquin ënash shubu dadpen icquid Capednaun yacno Esus nidpanëdash.

² Ambo nidash Esus tabadnubien Doma yacnoquid sondadon chuiquid tapa capitan caidën iua ambi tantiaidquio nënec uënëstiadtsëcquio icpanëdash.

³ Adnubien: Nënquid bëdanmequid Esus nëmbobi iquec, quequin utsibon chuisho tantiash: Aidën cun iua bëdanmetsiash, quianec isadaidbon chuiquid tsësiobo yacno nidshun: Cun iua ma bëdanmec chono. ¿Ada Esus chiec nidtsia? capanëdash sondadon chuiquidën.

^4-5 Adoaquien: Ai, quianec Esus yacno nidshun chuituidec: Sondadon chuiquid capitan caidën: Chuitan, caido nebi. Cun iua uënëstiadtsëcquio iqueque. Ma bëdanmenu. Esus chuitan, cac mibi chiec chobi. Aidi nuquin matses tantiaquin Nuquin Papan Chiaid chuibante shubu uamiondaidquio nioshe. Aidën chiacpadombuen aton iua bëdanmeshuntiadquidi mibi nec, quepanëdash isadaidbon chuiquido Esus chiec.

⁶ Adoaquien aidobëd Esus nidpanëdash. Adec nidec shubu anoentsëqui yanshobi sondadon chuiquidën chomiaid utsibo choquin bëquedshun nadopanëdash: Sondadon chuiquid capitanën: Naden chuitan, caoshi: Padicnuna, Icbo. Icsambocquid nebique. Mibi bëdambocquid yec cun shubun puduedenquioctiadquidi mibi nec.

⁷ Icsambocquid nebi. Adquid yec mibi bëquedec nidenquio iccobi. Bëdanmianquid iquec cun shubun puduedenquio icquin mibi yacnoshombi: Bëdanta, mimbi cac cun iua bëdantsiash.

⁸ Ubibic chuiquid tapan namiac sondado utsibo namequid nebi. Umbi: Nid, cac badedi nidec. Umbi: Baded cho, cac badedquio choec. Cun iuan umbi: Nata, cac umbi chiacpadombuen naic. Mibi adquidquiobidi neque. Cun iua bëdanmeta, quiosh, quepanëdash sondadon chuiquid capitanën: Chuitan, caido Esus chiec.

⁹ Adsho tantiash tantiadempambo icquin Esusën abi tsibambëquido naden chuipanëdash: Bëdambuen nëidën chuipec. Nëidën: Chuiquinuidtsëqui cun iua bëdanmetsiash, quequin ubi bëdambuen tantiaquid nec. Aidpadquid isadaidbo nibëdec, quepanëdash Esus.

¹⁰ Aden chuisho tantiashien sondadon chuiquid capitanën: Chuitan, caido aucbidi niduash shubun puduedshun sondadon chuiquidën iua bëdanacsho istuidpanëdash.

Nianten mado uënësaid Esusën uincuenmiaid

¹¹ Adashic shubu dadpen icquid Nain caid yacno Esus nidpanëdash. Aidbëd abëd icquido nidnubi matses utsibo dadpen nidpanëdash.

¹² Adec nidequi Nain anoentsëqui choquimbi uënësaid bëquido bëquedtuidpanëdash. Aton mado abentsëcquid uënësaidën tita niante icpanëdash. Aidbëd Nain yacnocquido dadpenquio chochopanëdash.

¹³ Adec choec niante shubisho isash uënësquio icquin Esusën: Shubienquio yec ënëd, capanëdash.

¹⁴ Adec: Ënëd, quetanec udictsëc nidshun uënësaid nandoaid Esusën mishnubi abi bëquido nidtuidpanëdash. Nidtuidsho issun: Uëtsëdto, abuido, cac

¹⁵ uëtsëdtoash tsadec uënësacbuedi onquiampanëdash. Adsho isash ani caic: Uënësacbuedi min mado uincuenoshe. Aidbëdi nidec nid, capanëdash Esusën.

¹⁶ Aden uënësaid uincuenmesho isash dacuëdcuededequi chochoquido: Adopenshenda uincuenmec, queshun: Abi namequid Nuquin Papa bëdambo iquec, quequin chuibampanëdash. Aden chuibanec: Nuquin Papan ambi: Cun matses nec, caido bëdambuen nashunnuen ambi oncamiaid chomiaid nuquibëd iquec, quec isquido onquecuededpanëdash.

¹⁷ Aden isash nidshun uënësaid uincuenmiaid isquidon chuibansho nidaid cuëshë Udea caid yacnocquidon tantiabededpanëdash. Adembidi aid nidaid cuësquiacno icquidontsen tantiauapanëdash.

Uambëd icquidon Esus chuituidaid

¹⁸ Adnubien Uan acten mentoanquid quënën tsadunmiaid icshobi abëd icquidon Esusën nabanaid chuibampanëdash. Adoaquien abëd icquido daëd chomeshun Uanën nadopanëdash:

¹⁹ Esus yacno nidshun nadota: ¿Ubitedishun cainaid Nuquin Papan Chomiaidquiobida ne? cac: Padenquio, quesho: ¿Utsidambi caimpe? quequin chuitan, Uanën cac aid daëdi Esus yacno nidpanëdash.

²⁰ Adec nidshun Esus chuituidec: Uan acten mentoanquidën: Chuitan, cac chobuedo nebi. Aidi nadosh: ¿Ubitedishun cainaid Nuquin Papan Chomiaidquiobida ne? cac: Aidpenquio nebi, quesho tantiashun: ¿Adambi utsi caimpe? quiosh Uan, capanëdash.

²¹ Aden chiaquien nënquidobëta dada daicsaido bëdanmequinc, podobitsi icsa dapuduedaid dapuduenmequinc, bëshuaid bëdanmequinc caquin Esusën ismebampanëdash.

²² Aden nabanquin nainashic: Mibi chuitan, caquid yacno nidshun umbi chuisho mimbi tantiabuedbëta umbi nabansho mimbi isbued Uan chiec nid. Bëshuaidëmbi isbenosh. Nidte icsash tidinquebuedi bëdambuec capucuenosh. Dada daush daushpambo yec daicsaidquio bëdanosh. Pashuacbuedëmbi tantiabenosh. Adoshombic uënësaidi uincuenmiosh. Adoshombic atona nibëdquido Chiaid Bëda chuiquin Nuquin Papan bëdambuen iste chuibanosh, quequin Uan chiec nid.

²³ Umbi aden nabanaid tantiash chieshtoenquio icquin ubi tantiaquid Nuquin Papan bëdambuen isaidquio nendac, quiosh Esus, quequin Uan chiec nid, quepanëdash Esus Uambëd icquido chiec.

²⁴ Adoac Uanën chomebuedo nidbombien matses dadpen icsho tantiamenuen Uan chiec Esus nadpanëdash: ¿Atotsi isnuec shubu nibëdacno mibitedi nidonda? ¿Piabiecquid cunquequidën ishcunaid isnuecta nidtionda?

²⁵ ¿Aid isnuec nidenquio yec atotsi isnuec nidonda? ¿Dashcute bëdaidquio dasiuidquid isnuecta nidtionda? Padenquio. Dashcute bëdaidquio dasiuidquido atona dadpenquio icquido chuiquid tapan shubun tabadquido nec, quequin mibitedishun tantiec.

²⁶ Ad icnuc ¿atotsi isnuec nidonda? Nuquin Papan oncamiaidën chuibansho tantianuec ma mibi nidpondac. Adec abipadquid utsi nibëdnuc Nuquin Papan oncamiaidquio Uan nec.

²⁷ Uanën abia choshon chuite chuiquin Nuquin Papan naden dada uamepampic. Mibi chote chuiquidba chomendambi, Mado. Aidëmbi: Bëdambo icquid choeque. Podquied cuembo icnuc nacnenacbimbuen icsambuen nabanenquio icquin ënta, quequin chiendac, Mado, quequin chuipampic.

²⁸ Acten mentoanquid Uampadquid matsesën tishaid utsi nibëdec. Adquid icnuc chuiquidpenquio icbuedi: Nuquin Papan namiacno tabadte iquec, quequin chuibansho tantiabenquid Uan dëniaquec bëdamboshëcquid iquendac, quepanëdash Esus.

²⁹ Adashic abi onquec: Uanën chuibansho tantiaquido dadpenshun Nuquin Papan chiacpadombuen nate bunquin acten mentomepanëdash. Adembidi Doma yacnocquidon chuiquid tapan chiactedi cun matses piucquid bedshunquidontsen mentomepanëdash.

³⁰ Aden aidon mentomenubi Nuquin Papan namiaid icte bunenquio icquin padiseobobëtan Moisesën chiampid tantiamequidon Uan acten mentomenquio icpanëdash.

³¹ Aden Uan chiashic Esus: Nuquin Papan Chiaid nëbi chuisho tantiesabo yec ¿Mitsipadquid nepec?

³² Nadquidbimbuec mibitedi iquec. Bacuëbo: Mamënnuna, quiashi nëishnanash chushcananacbitsëcquiec mibitedi iquec. Adecbidi: Umbi shoncanuc shëcshëcquec bidiadtanneta, cac ma mibi shëcshëcquec bidiadtannenquio icboc. Adecbidi cuëdënte uënësquiocquid ubi cuëdënnubi ma mibi shubienquio icboc, quiash cuëdnanec bacuëbo nëishnanacbitsëcquiec ma mibitedi icpayoc.

³³ Uan acten mentoanquid pete utsi utsien pesa niondash. Adecbidi acte paë uaid aquesambo niondash. Adquid icsho isash: Podobitsi icsa dapuduedashien nechitec, ma mibitedi quepondac.

³⁴ Adnubini Matsesën Tishaid yec choshon peshun acsho isash: Nua peshun tantiadennuen acte paë uaid acquid nec. Adecbidi icsambuen naquidobëd icquid yec Doma yacnocquidon chuiquidën: Piucquid aidted bedta, quequin chiacpadec bedshumënquidbëd icquid nec, mibitedishun ubi capec.

³⁵ Adquid icnuc Nuquin Papan bëdambuen tantiamiac aidën chiacpadombuen nabansho issun: Bëdambo iquec, caindac, quepanëdash Esus.

Simon padiseobon shubun pec Esus tabadaid

³⁶ Adnubien padiseobo abentsëcshun: Ubi yacno pec cho, cac aidbëd nidash shubun puduedash pec tabadte yacno Esus tsadpanëdash.

³⁷ Adec tsadnubi utsibon: Icsambuen nabanquid nec, caidquio chido: Padiseon shubun Esus puduedosh, quesho tantiash choquin danoshquete bëdambo noadquid sedunte postichoquidën icquid bëpanëdash.

³⁸ Aden bëec choash puduedshun Esus istuidash: Nëid bëdambocquid nec, quequin ambibi tantiec shubiec Esusën taëno tsadbudshun aton bëunën tapascaquin tachucu uapanëdash. Aden tachucu uatanquin aton manëdaidën taucshun tachoccatanquin danoshquete bëdambo noadquidën chidon tanoshcapanëdash.

³⁹ Chidon adosho isashien Esus iuedquid ambibi tantiec: Umbi iuedaid Nuquin Papan oncamiaid iquec: Ubi mishquid icsambocquid nec, quequin chido mishmenquio ictiadquidi nec, quepanëdash Simon padiseobo yec.

⁴⁰ Adsho ambibi tantiaquin Esusën: Tantiata. Mibi tantiamequin chuinu, Simon, capanëdash. Adoaquien: Ai, en chuiban. Tantianu, quepanëdash Simon.

⁴¹ Adsho tantiashun utsi chiacbimbuen chuiquin nadopanëdash. Dada daëdshun: Piucquid bec cho. Iuecshun meneuanun nanu, caposh. Adsho meniac abentsëcshun 500ted bednubi utsin 50tedpactsëc bedposh.

⁴² Aden bedshun iuecshun ambi piucquid bedacted abidaëdi meniantiapimbo icposh. Adsho issun: Padi. Mimbi bedondaid ubi menenda, quequin piucquid bedshunondaidën abidaëdi chuiposh. Adoac ¿mitsicquidën abi bedshunnëdaid tantiaquiopec? quepanëdash Esus Simon caic.

⁴³ Adoaquien: Ambi dadpen meniondaidien nechitec, quepanëdash Simon. Aden chiaquien Esusën: Ai, bëdambuen tantiaquin mimbi chioc, queshun

⁴⁴ Simon tantiamenuen chido yacmi bidiadshun naden Esusën chuipanëdash: Min shubun puduedsho nuquin matsesën nacpadombuen mimbi tapamëdte ubi menenquio iccoc. ¿Nëid chidon nasho isenquioda ictio? Aidëmbi aton bëunën tachucu uatanquin aton manëdaidëmbi taë bëchishaid ucposh.

⁴⁵ Min shubun ubi puduedacsho issun nuquin matsesën nacpaden mimbi ubi tanchoccainquio iccoc. Padnuen nëid chidon ubi tantiaquioquin iuen cun taë tachoccaposh.

⁴⁶ Nuquin matsesën nacpaden naquin mimbi ubi bëchin manoshcainquio iccoc. Padnuen nëid chidon danoshquete bëdambo nuadquidën tachiuinquin tanoshcaosh.

⁴⁷ Adembidi mibi chiembique. Tantia. Aidën icsambuen nabanaidtedi tantienquio yec bëshunobi. Umbi aden nac ubi bëdambuen tantiaquioquin ubi nashunquidquio nëid chido nec. Padnuen utsin: Umbi icsambuen naid daëdpactsëc icsho Nuquin Papan cuidenquio iquec, quequidën bëdiactsëc tantiactsëcquin nashunenquio iquendac, quepanëdash Esus Simon caic.

⁴⁸ Aden Simon chiashic chido caic: Mimbi icsambuen naidtedi tantienquio yec bëshunobi, quepanëdash Esus.

⁴⁹ Adsho tantiash: Mimbi icsambuen naid tantienquio yec bëshunobi, quequid ¿Mitsipadquid nepec? quepanëdash pec tabadquido.

⁵⁰ Aden pec tabadquidon tantianubi chido caic: Ubi tantiaquid yec Nuquin Papa yacno puduedtequid mibi neque. Dacuëdenquio yec nidta, quepanëdash Esus.