Ducas 6 - El Nuevo Testamento en matsés

Esusbëd icquidon chonoadtemaid uëshëmbi adosbiecquid ëshchicshun pesho istuidaid

¹ Adashic chonoadtemaid uëshëmbi tied matanquin adosbiecquid tidico caid istuidshun cuëssun tsucucaquin ëshchicshun Esusbëd icquidon pebededpanëdash.

² Aden pesho istuidshumbien padiseobon: ¿Atotsi quiash chonoadtemaid uëshëmbi mibitedi chonoadpe? capanëdash.

³ Adoaquien Esus: Ëndenquimbo abëd icquidobëtan chuiquid tapa Dabidën natiambo bundoshon ambi petemaidi pepampic, ¿quequin chuiquin dada uampid isbanquin tantiamboda ictio?

⁴ Naden chiampid iqueque. Tantia. Abëd icquidobëtan bundoshon Dabidën nadopampic. Nuquin Papa tabadte shubumpin abi puduedtemaidëmbi puduedshun ambi petemaidi pan bedshun Dabidën abëd icquidobëtambi pepampic. Aid pan Nuquin Papa ismequin nëish iua cuessunneshun pichicaquidon peteuidtsëqui nepampic, quequin Esusën chuipanëdash.

⁵ Aden chuishumbic: Ubien Matsesën Tishaid yequi chonoadtemaid uëshën Icbo nec. Adquid icquin umbi tantiacpadombuen matses namequid nebi, quepanëdash Esus.

Esusën chonoadtemaid uëshëmbi mëicsaid bëdanmiaid

⁶ Adashic chonoadtemaid uëshë utsin Nuquin Papan Chiaid chuibante shubun puduedshun Esusën chuibannubien ambobi mëdante abiucquio mëicsaid dada tsadpanëdash.

⁷ Ambobidi tabadquin Moisesën chiampid tantiamequidobëtan padiseobon: Nëid chonoadtemaid uëshëmbi Esusën bëdanmenushe. Isnuna. Aden chonoadquin bëdanmesho issun: Mimbi icsambuen naic, canuna, quiash tabadquin caimbededpanëdash.

⁸ Aden cainnubien aidon tantiaid tantiaquid icquin mëicsaid chuiquin: Nënantanquio nëmbo cho, Esusën cac mëicsaid choec nënantanquio nidtopanëdash.

⁹ Adsho istanquimbien: Tantianu. Chui. Chonoadtemaid uëshën matses tantiaquin bëdambuen naquimbi ¿matses icsa uapendambi ique? ¿Nëid uëshëndambi matses bëdanmenquio icpe? ¿Bëdanmenquio icquindambi: Ma adequi uënësnu, cape? quepanëdash Esus.

¹⁰ Aden chuishumbic abi datsidadquidotedi bëisbantanquin mëicsaid chuiquin: Ubi mëd, Esusën cac mëdequi bëdampanëdash.

¹¹ Aden mëicsaid bëdanmesho isashien cumapenec nëishcuededash: ¿Mitsipadombuen Esus bedmetiad? quequin tantiec padiseobobëd Moisesën chiampid tantiamequido onquecuededpanëdash.

Esusën abëd icquido 12ted: Ubi chuibenneta, caid

¹² Adashic uëshë utsin macuësh yacno matses nibëdacno Nuquin Papa chiec nidshun inchëshën ushenquio icquin Esusën Nuquin Papa chuipanëdash.

¹³ Badiadshun abi tsibanquidotedi chomeshun: Nëido ubëd icquidombo nec, quequin 12tedtsëqui chuipanëdash. Adoshon: Ubi chuibenneta, caido nec, quequin cuëmpanëdash.

¹⁴ Aido nëidted icpanëdash. Nëidic Simon cashumbic Petedo cuënaid. Nëidic Petedon utsi Andedes. Nëidic Santiaco. Nëidic Uan. Nëidic Uedipe. Nëidic Badtodome.

¹⁵ Nëidic Debi cashumbic Mateo cuënaid. Nëidic Tomas. Nëidic Santiaco Adpeon mado. Nëidic Simon isadaidpembo Doma yacnocquido cuenmete bunquid.

¹⁶ Nëidic Udas Santiaco utsin mado. Nëidic Udas Iscadiote iuecshun abi chieshënquido Esus bedmetequid. Aidtedi Esusën: Ubi chuibenneta, caido icpanëdash.

Esusën chuibanquimbi nënquido bëdanmiaid

¹⁷ Adashic macuësh yacnouësh abëd 12ted icquidobëd Esus nidaid pada padambo yacno budpanëdash. Adshun isaquien abi tsibanquidobëd utsibo dadpen tabadsho isash Esus nidtuidpanëdash. Aido nëidtedi yacnouësh chochoquido icpanëdash. Nëidic nidaid cuëshë Udea yacnocquido. Nëidic shubu dadpen icquid Edusaden yacnocquido. Nëidic acte dapa cuëman shubu dadpen icquid Tido caidbëd Sidon yacnocquido.

¹⁸ Aidotedi Esusën chuibansho tantianuec chochoash tabadnubi: Ubi bëdanmec, quequin tantiec nënquido tabadpanëdash. Aido Esusën bëdanmepanëdash. Adecbidi podobitsi icsa dapuduedshun mëyadmiaid icsho issun Esusën podobitsi icsa dapuduenmequin bëdanmebampanëdash.

¹⁹ Adosho issun: Nadatiambocquid Esus neque. Mishe bëdantsiabi, queshun mishequi abitedi bëdancuededpanëdash.

Nuquin Papan bëdambo icmiaid chiaid

²⁰ Adshumbic abëd icquidombo isbanquin naden Esusën chuibampanëdash: Mitsana nibëdquido icsho Nuquin Papan ambi namiacno tabadmenuen mibitedi bëdambo icmendac.

²¹ Nëbi natiambo bunec tabadtednesho issun Nuquin Papan bëdambo icmiaid yec bunesa mibitedi iquendac. Nëbi mëyadec shubiec tabadtednequid icsho Nuquin Papan bëdambo icmiaid yec iuecash mibitedi cuishonquec mamënendac.

²² Matsesën Tishaid Esus tantiaquid nec, queshun utsibon mibitedi chieshënquin icsambuen chuishunquin mamënshunendac. Adembidi: Icsambocquid nec, queshun mibitedi cuenmendac. Adoaid icshobi Nuquin Papan mibitedi bëdambo icmendac.

²³ Aden utsibon: Esus tantiaquido nec, queshun chieshënaqui chieshtoenquio yec cuishonqueta. Adembidi ënden min tsusedpabon Nuquin Papan oncamiaidon chuibansho tantiashun chieshënquin mëyampampic. Aden nampid icnuc utsibon chieshënaid icshobi: Ubi bëdambuen isquin uënësacsho abuc abëdi tabadmequin bëdamboshëcquid ubi menendac, quiash cuishonqueta, quequin Esusën chuipanëdash.

²⁴ Padnuen atona dadpen icquid: Cuna dadpen iquec, quiash cuishonquec bëdambuec tabadebi, quesho Nuquin Papan abi yacno puduedmenquio icquin mibitedi cuidendac.

²⁵ Nidaidënshun bunenquio icquin abi bunaidtedi pequidobi Nuquin Papan icsambuen isaido yec cumapenec buntequid iquendac. Adecbidi atonauidi tantiec mamënec tabadquido icsho Nuquin Papan icsambuen isaido yec natiaquiec shubiquiendac.

²⁶ Matsesënuidtsëqui: Bëdambocquid mibi nec, quequin chiaidi Nuquin Papan cuidtequid mibitedi iquendac. Adombuembidi ëndenquimbo: Nuquin Papan oncamiaid nebi, quec muaquidquiobi tsusedpabon: Bëdambo mibi iquec, quequin chuipampic, quepanëdash Esus.

Mibi chieshënquido tantiaquin nashumbanta, quiaid

²⁷ Aden chiashic Esus: Tantia. Umbi chiaid tantiaquid icsho mibitedi chuinu. Mibi chieshënquidobi tantiaquin bëdambuen nashunta.

²⁸ Adembidi mibi icsambuen chuishunquid bëdambuen chuita. Adembidi: Ubi icsambuen chuishunquido bëdambuen ista, papa, quequin Nuquin Papa chianneta.

²⁹ Adembidi mibi tancuesquid cuidenquio icquin: Utsiuctsen ubi tancues, cata. Adembidi ampequin min dashcute bedanec cuensho issun: Chiata. Bëntsecquidtsen beduan, cata.

³⁰ Utsibic: Mitsana bec cho, quesho meneta. Adembidi utsin mitsana bedshunac: Badedquio ubi meneuata, cainda.

³¹ Adembidi: Utsibon: Ubi nashumpashun, quequin mimbi tantiacpadombuen utsibo tantiaquin nashunta.

³² Ubëd tantiananquiduidtsëqui tantiembi, ¿quecta mibitedi bëdambo icpe? Padenquio. Adecbidi Nuquin Papa tantiesabo yec icsambuen naquido abëd icquidobëd tantiananec.

³³ Adecbidi: Ubi tantiaquin nashunquiduidtsëqui bëdambuen tantiaquin nashunembi ¿quecta mibitedi bëdambo icpe? Padenquio. Nuquin Papa tantiesaboen adecbidi tantiananec nashunnanquid nec.

³⁴ Adecbidi: Bec cho, caquidën ubi meneuatsiash, quequin menembi, ¿quecta bëdambo mibitedi icpe? Padenquio. Nuquin Papa tantiesaboen adecbidi aton piucquid utsibobëd menenanec.

³⁵ Tantia. Mibitedi chuinu. Mibi chieshënquidobi tantiaquin bëdambuen nashunta. Adembidi: Mitsana bec cho, quesho: Iuecshun aidpadquid ubi meneuata, quenquio icquin meneta. Mimbi adosho issun Nuquin Papan bëdambuen isquin bëdamboshëcquid mibi menendac. Ambi icsambuen naquidobi nashunacpadombuen nashunsho issun mibitedi Nuquin Papan: Cun mado nec. Cun champi nec, caindac.

³⁶ Nuquin Papan matses abitedi tantiaquin uënësquiocquin nashundedniacpadombuembidi matses abitedi tantiaquin uënësquiocquin nashundedneta, quepanëdash Esus.

Icsambocquid aid nec, quequin chienda, quiaid

³⁷ Aden chuibanashic Esus: Mibi icsambocquid nec, utsibo cainda. Adesa icsho: Bëdambocquid nec, Nuquin Papan mibi caindac. Adembidi utsibo chieshënquin: Icsambocquid icsho mibi Nuquin Papan cuidtequid nec, cainda. Adenquio icsho Nuquin Papan mibi cuidenquio iquendac. Mibi icsambuen tantiaquin utsin icsambuen nasho isash aidën nabued tantienquio yec bëshunta. Adquid icsho isash mimbi icsambuen nabanaid tantienquio yec Nuquin Papa bëshunendac.

³⁸ Atona nibëdquid bëdambuen tantiaquin meneta. Adembidi mibi tantiaquin Nuquin Papan mitsana icmendac. Utsi tantiaquin mimbi meniacpadombuembidi mibi tantiaquin mitsana daëd uashun Nuquin Papan mibitedi meneuaindac, quepanëdash Esus.

³⁹ Aden chuishumbic utsi chiacbimbuen naden Esusën chuipanëdash: ¿Bëshuaid: Podquiedën nidnu, quianec nidquin bëshuaid utsi bëyucmecta nidtic? Nidnu. Cho, quianec nidequi abidaëdi shëcuë ampaëdtsiash.

⁴⁰ Adembidi: Ambi tantiamiaidon abi tantiamequid dëniactiapimbo iquec. Tantiamiac tantiabenquiash abi tantiamequidbimbuequid iquendac, quepanëdash Esus.

⁴¹ Adoshombic naden Esusën chuiuapanëdash: ¿Atotsi quiash utsi bëctsiadaid pistsëcquid icnubi mibi bëctsiadaid bëchish nua bëuequid icquimbi: Mibi bëctsiadac, mimbi cape? Mibi bëctsiadaid bëchish nua bëuequid bëbedadabicquin ¿Mitsipaden mimbi utsi bëctsiadaid pistsëcquid bedshunnuen ispe?

⁴² Bëctsiadaid bëchish nua bëuequid nebi, quequin tantienquio icquin utsi bëctsiadaid pistsëcquid icshobi ¿Mitsipaden mimbi aid bedshunnuen ispe? Bëdambocquid danmianquido mibi neque. Mibi nua bëuequidba chicshun mimbi min utsi bëctsiadaid pistsëcquid bedshuntsiac.

Cute abipadquid aton bacuë nec, quequin chiaid

⁴³ Adoshombic adembidi Esusën chuiuapanëdash: Cute bëdan bacuë adquiobidi bacuë iquec. Cute icsan bacuë adquiobidi bacuë icuaic.

⁴⁴ Chetequid issun cuten dada matsesën tantiec. Aden tantiaquid yec nisanquidën bacuë isash: Dadainën bacuë nec, quetiapimbo matses iquec. Adecbidi echon bacuë isash: Bata nec, quetiapimbo matses icuaic.

⁴⁵ Adembidi aton tantiaten bëdambuen tantiaquidën ambi tantiacpadombuen utsi bëdambuen tantiaquin nashumbanendac. Adecbidi ambi tantiacpadec bëdambuec onquec. Adembidi aton tantiaten icsambuen tantiaquidën ambi tantiacpadombuen utsi icsambuen tantiaquin nabanec. Adecbidi ambi icsambuen tantiacpadequi icsambuec onquec, quepanëdash Esus.

Tantiaquidbëta tantiesa chiaid

⁴⁶ Adoshombic: ¿Atotsi queshun: Cun Icbo mibi nec, quequimbi umbi chiacpadombuen nainquio mibitedishun icpe?

⁴⁷ Ubi tantiabenquidën umbi chuibambued tantiaquioshon umbi chiacpadombuen naquid nadquidbimbuec iqueque. Tantia. Chuinu.

⁴⁸ Shubu uaquin bëdambuen tantiaquidënquio shëcuë ëquëducquio uëdëshcashun buintad nitsinquid. Adoaid acte mauanec chëuëdquidën chimeshadenquio iquendac.

⁴⁹ Utsibic umbi chiaid tantiashumbi naisa yec nadquidbimbuec iqueque. Tantia. Chuinu. Shubu uanun shëcuë ëquëduc uëdëshcambobi nitsinaid cunquequid tapa choquidën bëcunnequin badedquio chimeshshunendac. Adoacsho acte mauanquidën buanquin icsa uashunendac, quepanëdash Esus.