Ducas 5 - El Nuevo Testamento en matsés

Nuëcquid dadpenquio bedaid

¹ Adashic chian Quenesaded cashumbic Cadidea caid cuëman tabadquin Esusën Nuquin Papan Chiaid chuibansho tantianuec chochoash matses tsucus tsucustsëcquio yec tabadpanëdash.

² Adnubien aid chian cuëman masi yacno aton cano daëd nëshshun nuëcquid bedquidon aton nëshaid dapambededpanëdash.

³ Adsho isanec nidash Simonën cano antsadtoshon: Udictsëc ubi buan, Esusën cac Simonën udictsëc buampanëdash. Aden buanac chian cuëman tabadshobi cano antsadquin Esusën chuibampanëdash.

⁴ Aden chuibanquin ënshumbic: Acte ëquëducquio yacno nidshun nuëcquid bednu, quequin min nëshaid nënetan, Simon, capanëdash Esusën.

⁵ Adoaquien Simonën: Icbo, inchëshannubi bedanquin nuëcquid bednuen ambi badiadtsëcquien nëshaid nënebennequimbi ubitedishun bedambo iccombi. Adbuedi mimbi: Nëshaid nënetan, cac nidshun nënetanembi, quepanëdash Simon.

⁶ Adash nidshun nëshaid nënequin nuëcquid dadpenquioshë bedshun indono, cac nëshaid nedesquec bedampanëdash.

⁷ Adsho issun abëtan nuëcquid bedquid cano utsin uanno nuadsho cuënquin: Cadoec cho, cac aido choshon cano cubu cubuctsëcquiocnoc nuëcquid sandoac aid cano daëdi mentoadtiadtsëcquio icpanëdash.

⁸ Aden isanec Esus yacno choequi dannëshën sebudec shuebudshun Simon cashumbic Petedo caidën: Icbo, ubëd iquenquio yec nidta. Icsambuen naquid nebique, capanëdash Esus chuiquin.

⁹ Abëd icquidobëtan nuëcquid dadpen ambi bedbued isash tantiadempambo icquin: Esus nadatiambocquid nec, quequin tantienquio yec adpanëdash Simon.

¹⁰ Adecbidi Santiacobëd Uan tantiadempambo yec tabaduapanëdash. Aid daëdi Sebedeon mado yec Simombëd icquid nepanëdash. Adec Simon shuebudash onquesho tantiatanec Esus nadpanëdash: Dacuëdenda. Mimbi nuëcquid bedbocpadombuembidi nëbi bedanquin ubi tantiaquid icmenuen nidaid utsi utsiec yacno capuquin mimbi matses chuiben chuibenendac, quepanëdash Esus Simon Petedo caic.

¹¹ Aden chiaquien aton cano acte cuëman nëshquin atonatedi nianec: Esusën chiacpaden nanuna, quianec abëtan nuëcquid bedbuedobëtan Petedon Esus nidsho tsibanampanëdash.

Dada daush daushpambo yec daicsaid Esusën bëdanmiaid

¹² Adashic shubu dadpen icquid utsi yacno Esus icnubien dada aton dada daush daushpambo yec daicsaidquio chopanëdash. Aidi Esus isanec choequi dannëshën sebudec nidaid bëccuësquec shuebudash nadpanëdash: Ubi bëdanmete bunquin mimbi ubi bëdanmetsiaque. Ubi bëdanme, Icbo, quepanëdash.

¹³ Adsho tantiash aid mishec Esus: Mibi bëdanmete bunebique. Bëdanta, quenubi daicsaid nibëdquio yec badedquio bëdampanëdash.

¹⁴ Aden bëdanmetanec Esus: Umbi bëdanmebued utsibo chienda. Adoenquio icquin nëish iua cuessunneshun pichicaquid ismec nidta. Aden ismiac: Nuquin Papan bëdanmiaid nec, quequin ma aidon tantiapanu. Adembidi aido ismeshun Nuquin Papan Ambi Chiaid Moises dada uamiampicpaden nëish iua pichicatequid meneta. Moisesën chiampicpadombuen: Nuquin Papan: Nëid bëdamiaid bëdambo iquec, quequin tantiaquin ma pichicanu. Meneta, capanëdash Esusën ambi bëdanmebued chuiquin.

¹⁵ Adnubien Esusën bëdanmesho isquidon chuibanac matses dadpen Esusën chuibansho tantianuec chochopanëdash. Adecbidi daicsaidobëd nënquido bëdannuec chochoacsho Esusën bëdanmebampanëdash.

¹⁶ Adashic matses nibëdacnombo Nuquin Papa chiec Esus nidtednepanëdash.

Dada shëquëquenquiocquid bëdanmiaid

¹⁷ Adashic uëshë utsimbi Esusën Nuquin Papan chiaid chuibannuc padiseobobëdi Moisesën chiampid tantiamequid dadpen ambo tabadpanëdash. Aido utsi utsiec nidaid Cadidea yacnouësh chochoquido icnubi utsi utsiec nidaid Udea yacnouësh chochoquid icnubi utsi utsiec shubu dadpen icquid Edusaden yacnouësh chochopanëdash. Adec chochoash tabadnubien Nuquin Papan nadatiambocquin naquid icmiac matses daicsaidobëta nënquido bëdanmequid Esus icpanëdash.

¹⁸ Adnubien dada shëquëquenquio yec caputiapimbocquid nënquid nandoten nandoshon dada utsibon bëpanëdash. Aden bëshun shubu nuntan puduedquin: Esus yacno buannu, caqui

¹⁹ matses dadpenquio yec tsucus tsucustsëcquio icnuc puduedtiapimbo icsho issun shubu macano padapadapambo icquid yacno dada shëquëquenquiocquid nandoten nandoshon indoec dectatoshon shubu macano nacnenaid chicquin shëcuë uashun dada shëquëquenquiocquid Esusën dayunquio abi bëquidon imbudpanëdash.

²⁰ Dada shëquëquenquiocquid umbi bëaid Esusën bëdanmendac, quequin tantiaquin bëquidon ambi bëaid imbudsho isash dada shëquëquenquiocquid caic: Mado, mimbi icsambuen naidtedi tantienquio yec bëshunobi, quepanëdash Esus.

²¹ Aden chuisho tantiash padiseobobëd Moisesën chiampid tantiamequido ambibi tantiacpadec onquec: Nuquin Papanuidtsëqui chuitequidquio chuibanquin Nuquin Papa icsambuen chuishunquid yec ¿tsutsi nepec? Nuquin Papa abentsëcquiobien icsambuen naidtedi tantienquio yec bëshunquid nec, quecuededpanëdash.

²² Aden aidon otacquio tantiaid ambibi tantiashumbien Esusën naden chuipanëdash: ¿Atotsi quequin mibitedishun icsambuen tantiape?

²³ Umbi: Mimbi icsambuen naidtedi tantienquio yec bëshunobi, quequin chuinuc ¿bëdantequidpenquioda nedic? Adecbidi: Mibi daicsaid icbuedi mibi bëdanoque. Nidtoash nidec nid, quequin umbi chuinuc ¿bëdantequidpenquiobidida neuadic?

²⁴ Istac. Mibi ismenu. Matsesën Tishaid iquequi nidaidënuësh Nuquin Papan namiaid yec icsambuen naidtedi tantienquio yec bëshunquid nec, quequin mabi tantianu, quetanquin dada shëquëquenquiocquid chuiquin: Nidtoshon mibi bëbued nandote chiadtoshon buanec min shubuno nidec nid, capanëdash Esusën.

²⁵ Adoac abitedishun isnuc badedquio nidtotanquin abi nandoshon bëbued nandote bedanec: Nuquin Papa bëdambo iquec, quenidec aton shubuno nidpanëdash.

²⁶ Adosho isash tantiadempambo yec dacuëdcuededequi: Adenshenda bëdanmepec, quequin Nuquin Papan naid chiec onquecuededec tabadequi: Aden nadatiambocquin bëdanmesho isenquio icbuedëmbi nëbimbobi ispombi, quecuededpanëdash.

Esusën: Ubëd iquec cho, Debi, quequin chiaid

²⁷ Adanec nidquimbi Debi cuëmëdquid Esusën istuidpanëdash. Aidi aton matses iuaquid nidaid Doma yacnocquidon chuiquid tapan chiacpadombuen piucquid bedshumbanec tsadpanëdash. Adec tsadsho istuidshumbien: Ubëd iquec cho, Esusën cac

²⁸ atonatedi nianec badedi Esus tsibananec Debi nidpanëdash.

²⁹ Adshumbic aton shubuno Esus buanshun cuishonquec iccuededquin Debin pemepanëdash. Adembidi abipadquid piucquid bedshunquidobëtabi utsibo dadpen Debin pemepanëdash.

³⁰ Aden adquidobëtan Esusën pesho isashien padiseobobëdi Moisesën chiampid tantiamequido: ¿Atotsi queshun piucquid bedshunquidobëtan utsibon: Icsambo icquidombo nec, caidobëtambi min chuiquidbëtan mibitedishun pebededpe? quepanëdash Esusbëd icquido chiec.

³¹ Aden chuisho tantiash Esus nadpanëdash: ¿Nënenquio yec bëdambocquidta dauëchoquidën dauë menepadic? Padenquio. Nënquidien dauëchoquidën dauë menequid.

³² Adecbidi: Nuquin Papan bëdambuen isaid nebi, quesho: Mimbi icsambuen naid ënta, quequin chuinuecpenquio chondabi. Padnuembi icsambuen naquido icsho: Mimbi icsambuen naid ënshun Nuquin Papa tantiabenta, quequin chuinuec chondabi, quepanëdash Esus padiseobo chiec.

Buna mëmunte chiaid

³³ Aden Esusën chuibansho tantiashun naden utsibon Esus chuipanëdash: Acten mentoanquid Uambëd icquidon buna mëmunquin Nuquin Papa chiannequidquio nec. Adembidi buna mëmunquin Nuquin Papa chiannequidquio padiseyobo neuaic. Aden nainquio icquin mibëd icquidon peshun aquec, quepanëdash Esus chiec.

³⁴ Adoaquien Esus: Aton chido bednun abi bednuequidën abëd icquido pemec. Aden pemiac bënëbëd cuishonquequin isuidesa abëd icquido nec.

³⁵ Adbuedi iuecash chido inquid nibëdanan abëd icquidon uënësquiocquin buna mëmunquin isuidpec.

³⁶ Aden chuibanequi utsi chiacbimbuen chiec Esus: Dashcute shëni canchedaid dashcute chucambocquid cuëshë bëtuscaisa matses nec. Shëni chucambocquid bëtuscatsaid panac shëcuë amëec cancheduaic. Aden dashcute chuca icsa uaic.

³⁷ Adembidi nuquin matsesën uba chinaid chuca nëish bitsi nacnenaid shënin cushtoac bitsi canchednuc uba chinaid chiuidec mëyadtsiash.

³⁸ Adnushe, queshun: Nëbi uba chinaid chuca nëish bitsi nacnenaid chucanquio cushtoec.

³⁹ Adquid icnuc uba chinaid paë uaid acquin tanash uba chinaid chuca acte bunenquio iquendac. Shëniuidi acquin quenenuash aid acte chuca bunenquio iquendac, quepanëdash Esus.