Ducas 22 - El Nuevo Testamento en matsés

2. Esus mëyanquin uënës uamete chiaid ( 22.1—24.53 ) Esus bedmenu, quequin Udasën chiaid

¹ Adashic pan bidiscamiabi buanampid tantiate uëshë Pascua caid anoentsëqui yampanëdash.

² Aid uëshë choabicnuc Nuquin Papa ismequin nëish iua cuessunneshun pichicaquidon chuiquidobëd Moisesën chiampid tantiamequido iccuededtednequin: ¿Mitsipaden utsibo ismenquio icquin Esus bedmeshun uënës uametiad? quequin tantiec tabadpanëdash. Aden tantiaquimbi Esusën chuibansho tantiec matses dadpen icsho isash dacuëdquin Esus bedmenquio icpanëdash.

³ Adnubien Esusbëd icquid abentsëc Udas Iscadiote cuëmëdquid dapuduedshun Mayan Icsa Satanasën tantiamiac

⁴ nëish iua cuessunneshun pichicaquidon chuiquidobëd Nuquin Papa tabadte shubu dapa yacnoshon namequido iccuededacno isec nidpanëdash. Adec aido yacno nidshun Udasën: Esus mibi bedmete bunebi, quequin chuipanëdash.

⁵ Aden chiac aido cuishonquec: Ubi Esus bedmesho mibi piucquid menembi, capanëdash Udas chuiquin.

⁶ Adoaquien: Ai, quianec Esus yacno nidquimbi: ¿Mitsishunquiembi utsibo ismenquio icquin Esus bedmepeba? quequin tantiapanëdash Udasën.

Ënquin nidaidënshun Esusën piaid

⁷ Adnubien isadaidbon Equipito yacnouësh puduanec nidquin pan bidiscamiabicquid buanampid tantiec 6tedec ushec tabadte tauaid uëshë yampanëdash. Aid uëshëbidi: Cun mado uënësmenushe, queshun nëish iua obeca caniactsëc cuessunneshun pepampid tantiate uëshë nepanëdash.

⁸ Aid uëshë chonoc Uambëta Petedo chuiquin: Obeca caniactsëc cuessunneshun pepampid tantiaquin penun nacnenec nid, capanëdash Esusën.

⁹ Adoaquien aidon: ¿Mitsishunquiembi aid mibi nacnenshumpe? capanëdash.

¹⁰ Adoaquien Esusën: Nëbi Edusaden yacno nidshun tëchun acte cushtoshon buanquid dada mimbi istuidendac. Aden istuidash aidbëd nidec shubun puduedshun

¹¹ naden shubu icbo chuita: Ubëd icquidobëtan obeca caniactsëc cuessunneshun pepampid tantiaquin obeca pec tabadte ¿mitsicquid quënë icpec? quiosh Nuquin Icbo, quequin chuita, quepanëdash.

¹² Aden mimbi chiac buanshun abuc dectatomeshun quënë dapa bëdambuen nacnenaid aidën mibi ismendac. Ambo pete tabëcte iquendac. Ashunquio penun nacnenta, quepanëdash Esus.

¹³ Aden chiac abëd icquid daëd Edusaden yacno nidquimbi Esusën chuibocpadombuen acte buansho isash aid tsibananec aton shubun puduedshun obeca caniactsëc penun shuishun Uambëtan Petedon nacnempanëdash.

¹⁴ Adashic aid inchëshbudtsëqui choash abëd icquidobëd pete tabëcte yacno tsadquimbi Esusën aido naden chuipanëdash:

¹⁵ Ubi mëyanquin uënës uate yanabicnuc aton mado bëyucquido uënësmenquio yampid tantiaquin pec mibëdi tabadte bunquiobi.

¹⁶ Adshumbic isadaidbon bacuëbo uënësmenquio yampid tantiaquin obeca cuessunneshun nuqui pebededacpadombuen mibëtambi nidaidënshun padpiden penquio iquendambi. Adshumbic Nuquin Papan chiampicpadombuen nainshun aidën namiacnoshon pendambi, quepanëdash Esus.

¹⁷ Adoshombic dëshoten uba chinaid cushtotanquin sananquin Nuquin Papa chiec onqueshun abëd icquido menec: Në, pistsëc pistsen acban mibitedishun.

¹⁸ Nëbi uba chinaid nidaidënshun padpiden mibëtambi aquenquio iquendambi. Aden aquenquiocquimbi Nuquin Papan namiacnoshon aid actequid aquendambi, quepanëdash Esus.

¹⁹ Adoshombic pan bedshun: Mimbi uaid nëid pete bëdambo iquec, Papa, quequin Nuquin Papa chuitanquin cuëshshun abëd icquido naden chuiquin menepanëdash: Mibitedi icsaid bedshunacsho ubided cuidquin mëyanquin uënës uaidën namibimbuecquid neque. Ubimbo tantiaquin pededneta, capanëdash Esusën.

²⁰ Adoshombic adembidi dëshoten uba chinaid ënë cushtoshon menec: Nëid cun intacbimbuecquid neque. Aid acquin: Ubi cuidmenquiocnoen Esusded Nuquin Papan cuidmiac aton intac siquebudpambuec uënësposh. Adsho issun aid tantiaquid icsho Nuquin Papan ubi cuidenquio iquec, quequin tantiata, quepanëdash.

²¹ Isadaidbon chuiquido ubi bedmequid nëmbobi ubëdi pete tabëcte mishec tsadec.

²² Matsesën Tishaid icshobini Nuquin Papan tantiacpadembi bedmendac. Aden ubi chieshënquin bedmequid cumapenen cuidtequidquio nendac. Aidi aton titan tishenquio icpatecnëdan, quepanëdash Esus.

²³ Aden Esusën chuisho tantiashien abëd icquido: ¿Tsudain capec? quecuededpanëdash.

¿Mitsicquid abentsëc chuiquidquio icpatsiash? quiaid

²⁴ Adashic Esusbëd icquido nadec onquec: ¿Ubitedi tsutsien chuiquidquio icpatsiash? quec cuëdnampanëdash.

²⁵ Adsho tantiashun Esusën naden chuipanëdash: Isadaidpembo chuiquid tapan cumapenen ancaquin aton matses chonoauashun daëdpactsëc menebanec. Aden meniash: Umbi namiaido bëdambo icmequid nebi, quequin tantiendac.

²⁶ Mibitedi adquid iquenda. Nadquidquio icta. Chuiquid nebi, quec tsiuec caniquidbimbuecquid icta. Chuiquid icquin iuan nacbimbuen utsibo nashunquidquio icta.

²⁷ Abi pemequid abi nashunquid nec. Adembidi pec tsadquid chuiquid nec, quequin utsibon ispec. Aden tantienda. Ubien mibëdi pec tsadquid yequi mibitedi nashunquidquio nec.

²⁸ Ubi chieshënquido icnuc ubi nianesa mibitedi nec.

²⁹ Adquid icsho cun Pan ubi chuiquid icmiacpadombuembidi chuiquid mibitedi icmendambi.

³⁰ Aden isadaidbo chuiquido icmiac ubëd icquin ubëtambi peshun aquec mibitedi tabadendac. Chuiquid icquin abuc tsadte icquidën tsadquin Acobon mado 12 ted icpampidën tsiuecquidon tsiuecquidonquien mibitedi namequid iquendac, quepanëdash Esus abëd icquido chiec.

Esus umbi isacmaid nec, quequin Petedon chuite chiaid

³¹ Aden chuishumbic Esusën nadentsen chuipanëdash: Tantia. Mibi chuinu, Simon. Mibitedi Mayan Icsa Satanasën iuatiadquio iquec. Aden: Iuanu, quequin tidico caid tsucucaquin nainshun putu secacbimbuen ubëd icbuedi mibitedi cuëshëdmetiadquio iquec.

³² Aden mibitedi Mayan Icsa Satanasën iuatiadquio iquec, quequin tantiaquin Nuquin Papa naden chiombi: Simon ubëd icquidquio neque. Mayan Icsa Satanasën iua yannushe. Aidën: Nuquin Papan Chiaid niac niacmenu, casho adomenda, Papa, quequin chiombi. Adec ubëd icbuedi cuëshëdtsembosh chouashun padpidec cuëshëdenquio icquin cumapenen ubi tantiaquin ubëd icquid utsibo adombuembidi cuëshëdenquio icnuc cumapenen ubi tantiameta, capanëdash Esusën Petedo chuiquin.

³³ Adoaquien: Mibi caic: Quënën tsadunmenu, casho tantiash mibëdi tsadumëdendabi. Adecbidi mibi caic, Uënës uanu, casho tantiash mibëdi Uënës uadendabi, Icbo, quepanëdash Petedo Esus chiec.

³⁴ Adoaquien: Tantia. Chuinu, Petedo. Cachina cuëdabicnuc nëid uëshëmbi ubi caic: Umbi isacmaid nec, quequin mimbi 3teden chiendac, capanëdash Esusën.

Buanenda, quebuedëmbi: Buanta, quequin chiaid

³⁵ Aden chuishumbic abëd icquido chuiuaquin: Min piucquid yec min shictoadte yec min dashcute utsi yec min tapucudte yec quenuc buanenquio yec nidanneta, umbi cac nidanniash ¿mibitedi bunecta tabado? capanëdash Esusën. Adoaquien: Padenquio, quepanëdash abëd icquido.

³⁶ Adoaquien: Ënden adquid buanenda, quequin mibitedi chiondaidi nëbi: Ubi nibëdnuc min piucquidbëta shictoadte buanta. Chështe nibëdquid bednu, queshun min piucquid nibëdnuc min dashcute abentsëc menequin chështe bednun adembidi buanta.

³⁷ Nuquin Papan ubi nate chuiquin dada uamiampid nad iqueque. Tantia. Chuinu: Icsambocquid danquin icsambocquidbëta uënës uaindac, quepampic. Aden chuiquin dada uamiampicpadombuen nëbimbobi nainquin ubi uënës uamendac, quepanëdash Esus.

³⁸ Adoaquien abëd icquidon: Në chështe daëd iqueque. Is Icbo, capanëdash. Aden abëd icquidon tantienquio icquin abi chuisho tantiashun: Padi. Aidtedi, quepanëdash Esus.

Quetsemani yacnoshon Esusën Nuquin Papa chiaid

³⁹ Adashic Edusaden yacnouësh nidec macuësh Odibos caid yacno abi nidtedniacpadec Esus nidsho issun abëd icquidon tsibanampanëdash.

⁴⁰ Adec nidequi abi tabadtedniacno choshon Esusën: Mayan Icsa Satanasën mibi caic: Icsambuen namequin tannu, cac aid bunacpaden ubi namenda, Papa, quequin Nuquin Papa chuidoneta, capanëdash abëd icquido chuiquin.

⁴¹ Aden chianec abiuidtsëqui udictsëc nidash dannëshën nidaid sebudash tsadquin naden Esusën Nuquin Papa chuipanëdash:

⁴² Papa, ¿ada ubi natiamequin mëyadmenquio ictsia? Ubi bunacpaden namenquiocquimbi mibi bunacpadombuen nameta, Papa, quepanëdash Esus Nuquin Papa chiec.

⁴³ Aden Esusën chuinubien Nuquin Papabëd icquidquio budshun Esus uidënquio icmequin chieshtomenquio icpanëdash.

⁴⁴ Aden chieshtomenquio icaqui natiaquiec uëshquec Nuquin Papa chuiquiequi ichacbëd intac daëdash nidaidën pasquebudnepanëdash.

⁴⁵ Aden Nuquin Papa chuitanec abëd icquido yacno choquimbi ambi chuisho tantiabued tantiec uënësquio icnuc ushec samëdsho istuidshun:

⁴⁶ ¿Atotsi quiash ushec samëde? Isucunshun: Mayan Icsa Satanasën namete bunacpaden ubi namenda, Papa, quequin Nuquin Papa chui, capanëdash Esusën abëd icquido chuiquin.

Abi chieshënquidon Esus bedaid

⁴⁷ Aden Esusën chuinubien abëd icbuedi: Esus bedmenu, quequin matses dadpen bëec Udas bëyuc chopanëdash. Adec choquimbi abi tanchoccasho issumbien

⁴⁸ Esusën: ¿Matsesën Tishaid icshobi aden tanchoccaquinda ubi chieshënquido ubi bedme, Udas? capanëdash.

⁴⁹ Aden Udasën ismiac Esus bednuesho isash abëd icquido: ¿Chështendambi sepe? Icbo,

⁵⁰ quetanquimbien abëd icquid abentsëcshun abi tsiusudaid chështe chictanquin nëish iua cuessunneshun pichicaquidon chuiquid tapan iua abiucquio pateshunnepanëdash.

⁵¹ Aden pateshunnesho isash: Padi. Chën. Adoenda, quetanquin Esusën chuiquid tapan iuan pabiate patiacno mishquin bëdanmepanëdash.

⁵² Adoshombic Nuquin Papa ismequin nëish iua cuessunneshun pichicaquidon chuiquido yec Nuquin Papa tabadte shubu dapa yacnoshon namequido yec tsësiobo yec quec chochoacsho issun: ¿Ampec cuesanquid Esus nec, queshunda cuestebëta chështe sanambededtsëcquiec ubi bedec chocho?

⁵³ Mambi badiadquidën badiadquidënquien Nuquin Papa tabadte shubu dapa daquënë uaidën puduedtednequin matses tantiamequin chuibanshobi ma mimbi ubi bedmenquio icpaboc. Mimbi ubi bedte uëshë nëidquiobi nec. Mayan Icsa Satanasën tantiamiacpaden utsibo ismenquio icquin inchëshëmbi mimbi ubi bedec, quepanëdash Esus.

Umbi isacmaid Esus nec, Petedo quiaid

⁵⁴ Aden bedshun nëish iua cuessunneshun pichicaquidon chuiquid tapan shubu yacno Esus buannubi Petedo uannoshon isbëec chopanëdash.

⁵⁵ Adec choequi shubu umanuc daquënë uaidën cute dëtsiadoaid cuëec utsibo tabadacno Petedo cute cuëec tsadtuidpanëdash.

⁵⁶ Ambo Petedo tsadsho isash chuiquid tapan iuaid chido anoentsëqui choshon isec: Nëid bëbuedbëd icbuedi nec, quepanëdash.

⁵⁷ Adoaquien: Umbi isacmaidquio mimbi chiec, quepanëdash Petedo.

⁵⁸ Adshumbic iuecpactsëcshun Petedo isec dadatsen: Ma mibi bëbuedbëd icquid nepayoc, caquien: Aidbëd icquidpenquio nebi, quepanëdash Petedo.

⁵⁹ Adshumbic iuepactsëc ictanquin utsintsen: Nëid nidaid Cadidea yacnocquid yec aidbëd icquid ma mibi nepayoc, capanëdash.

⁶⁰ Adoaquien: Tantiadenquionoc mimbi chiec, quepanëdash Petedo. Aden chiec onquenubien cachina cuëdtopanëdash.

⁶¹ Adec cuëdnubi aton Icbon bidiadshun Petedo bëispanëdash. Adosho issun: Nëid inchëshëmbi cachina cuëdabicnuc: Umbi isacmaid nec, quequin 3teden mimbi chiendac, quequin aton Icbon chuibued tantiash

⁶² uënësquio yanec umanuc nidash Petedo shubiquiopanëdash.

Esus sondadon mamënshunaid

⁶³ Adshumbic: Esus cuennushe, queshun isquido sondadon Esus icsambuen chuishunquin mamënshunquin cuesbededpanëdash.

⁶⁴ Adoshombic dashcute cuëshën bëpucshun cuestanquin Esus sondadon nadopanëdash: Cumapenen tantiaquidquio icquin ¿tsundan mibi cuesoshe? En chui. Tantianu, capanëdash.

⁶⁵ Adotanquimbi dadpen icsambuen chuiquin Esus icsambuen chuishumpanëdash.

Isadaidbon chuiquido yacno Esus buanaid

⁶⁶ Adashic badiadbudnubi isadaidbon chuiquido nëidted iccuededpanëdash. Nëidic isadaidbon chuiquid tsësiobo. Nëidic Nuquin Papa ismequin nëish iua cuessunneshun pichicaquidon chuiquido. Nëidic Moisesën chiampid tantiamequido. Aidtedishun aton matsesën chuiquidotedi iccuededacno Esus buanshun

⁶⁷ chuimenun nënantanquio nidtomeshun: Nuquin Papan Chomiaid Quidistu Mesias caid nebi, ¿quecta ique? Tantianu. Chui, capanëdash isadaidbon chuiquidon Esus chuiquin. Adoaquien: Umbi: Aidi nebi, quequin chiac mimbi tantienquio ictsiac.

⁶⁸ Adembidi ¿Mitsipadquidquio Nuquin Papan Chomiaid neque? Tantianu. Chui, umbi cac mimbi chienquio ictsiac.

⁶⁹ Tantia. Chuinu. Matsesën Tishaid yec nidaidën tabadbuedi nëbimbobi Nuquin Papa nadatiambocquidën dayun abiucquio tsadendabi, quepanëdash Esus.

⁷⁰ Adsho tantiashumbien: Nuquin Papan madombobi nebi ¿quecta ique? caquien Esusën: Ai, mimbi chuibocpadquid nebi, quepanëdash Esus isadaidbon chuiquido caic.

⁷¹ Adoaquien: Nuquin Papan madombobi nebi, quequin ambibi chiec icsambo iqueque. Utsin chuisho tantienquio icnuna. Ambibi chuisho nuqui tantioque, quepanëdash isadaidbon chuiquido.