Ducas 19 - El Nuevo Testamento en matsés

Saqueo Esus iste bunaid

¹ Adec nidequi shubu dadpen icquid Edico caid nasiadec Esus nidpanëdash.

² Ambobi atona dadpen icquid Saqueo cuëmëdquid icpanëdash. Aidi Doma yacnocquidon chuiquid tapan chiacpadombuen aton matsesën piucquid bedshunquidon chuiquid icpanëdash.

³ Adquid icquimbi utsibo: Esus cuenec, quesho tantiash aid iste bunquiec: ¿Mitsipadquidquio Esus neque? Isnu, quianec nidquimbi matses ënapen icquid dadpen Esus datsidadacsho bushcuctsëcquid icquin Saqueon istiapimbo icpanëdash.

⁴ Adash: Nëid podquiedënquiobi Esus choec, quianec bëyuc titinquiash podquied cuëman nidquid cute icueda caidën dectatoash isnuec cuidin tsadpanëdash.

⁵ Adec tsadnubien aid podquiedënquio choquin abuc isquin Saqueo bushcuctsëcquid tsadsho istuidshun Esusën: Nëbi min shubu yacno nuquibi tabadec nidnu. Baded bud, caquien

⁶ Saqueo badedi budpanëdash. Budanec nidquin Esus aton shubuno buanec nidshun: Mibi ubëd icte bunsho isash bëdambo iquebique. Pudued, Saqueon cac Esus puduedpanëdash.

⁷ Adec puduedsho isash Esus icsambuen chuishunec tsibanquidotedi: Icsambo icquidën shubun Esus puduedosh, quecuededpanëdash.

⁸ Adnubien aton shubu nuntanuësh nidtoash Saqueo: Tantia. Chuinu, Icbo. Nëbi cuna tedbidi bedquin atona nibëdquido tedbidi menebanembi. Adoshombic cun matses: Cuna mimbi ampioc, quesho tantiashun umbi ampiaidbëta daëd daëdquiecnuc daëd uashun icbo menebanuaimbi, quepanëdash Saqueo Esus chiec.

⁹ Adoaquien Esusën: Chian annëdënquequid yacno nësecatsembuedi aton tsusedpa Abadauanën tantiampicpaden tantiaquid yanacsho Saqueobëta aton shubun icquido mënchicaid nëbi iquec.

¹⁰ Adquid icnuc Matsesën Tishaid yec icsambocquid nibënquin istuidshun: Chian annëdënquiacno nësecanushe, queshun mënchicnuec chondash, quepanëdash Esus.

Aton piucquid 10ted icquidëmpi meniaid

¹¹ Aden Esusën chuisho tantiashun: Edusaden yacno niduash Nuquin Papan namiaidquio nëbi yanec, quequin utsibon cuembo tantienquio icpanëdash.

¹² Aden icsambuen tantiaid tantiashun utsi chiacbimbuen Esusën naden chuipanëdash: Chuiquid tapan mado: Ënden caniondaid nebique. Nëbi ubitsen chuiquid icnuec chuiquid tapa yacno nidaid utsi yacno nidendabi. Amboshon chuiquid tapa icmiac nëmbobidi chouaindabi,

¹³ queshun aton iuabo ambi namiaido 10ted icquid chochomeshun piucquid dadpen icbo icboen menebamposh. Aden menebanash: Ubi nidan umbi menebued bëdambuen nabanquin daëd uata, quequin chianec chuiquid icte bunquid chuiquid tapa yacno nidposh.

¹⁴ Adec aid nidambic abi yacnocquidon aid chieshënquin nadoposh: Aidi ubitedishun chuiquid icmenushe, queshun chuiquid tapabo yacno nidshun: Aid ubitedishun chuiquid icmenda, quequin chuitan, queshun abëd icquido nidmeposh.

¹⁵ Adnubien: Chuiquid icnu, quianec nidbued chuiquid tapa icmeposh. Aden icmiac aton shubuno chouash: Cun piucquid ¿tedtsi daëd uapashba? abibi queshun ambi menebuedo aton iuabo 10ted icquid chochomeposh.

¹⁶ Adoac bëyuc choquid chiac: Mimbi piucquid meniondaid utsi 10ted icnuc daëd uaombi, icbo, queposh.

¹⁷ Adoaquien: Ai. Cun iua bëdambocquid mibi nec. Umbi menebued daëdpactsëc bedshun bëdambuen mimbi daëduaque. Nëbi mimbi daëd uaidtedquiobi shubu dadpen icquid 10ted uanno uannoecquidon chuiquid icta, caposh aton icbon.

¹⁸ Adnubien utsintsen: Icbo, Mimbi piucquid menebued utsi 5ted icnuc daëd uaombi, caposh.

¹⁹ Adoaquien: Mimbi daëd uaidtedquiobi shubu dadpen icquid 5ted uanno uannoecquidon chuiquid icta, caposh aton icbon.

²⁰ Adnubien utsintsen: Mimbi menebued min piucquid umbi dashcute cuëshaidën dapucshun dayun uabued në iquec, icbo.

²¹ Min piucquid mimbi tantiactedimbo daëd uatiapimbo ictsiabi, queshun dayun uaombi. Utsinabëta utsin nitsinaid bedbanquid mibi icsho isash: Chushcanushe, quiash dacuëdec tsadtedniobi, queposh.

²² Adoaquien chuiquid tapan: Umbi chiaid niacquid yec cun iua icsambocquid mibi nec. Umbi naid tantiaquimbi umbi chiaid nainquio icsho mibi cuidmembi. Utsinabëta utsin nitsinaid bedbanquid mibi icsho isombi. Adquid icquin chushcanushe, ¿quequinda tantio?

²³ Aden tantiaquid icquin ¿atotsi queshun umbi chiaid: Nanu, quequin umbi menebued ma daëd uanu, quequin piucquid sauedte yacno menenquio icco? Aden meniac daëd uacsho cun shubuno choshon bedtsenombi, queposh aton icbo.

²⁴ Aden atona daëd uaisa chuishumbic aton iua utsi chuiquin: Ubi chieshënquin cuna daëd uainquiocquin ambi dayun uabued piucquid bedshuntanquin umbi menebued 10ted icnuc daëd uacbued meneta, caposh aton icbon.

²⁵ Adoaquien: Aidëna 10ted iqueque. Aid menenda, icbo, caposh iccuededquidon.

²⁶ Adoaquien chuiquid tapa: Umbi chiacpaden naquin daëd uacsho issun atona daëd uaquin udictsëc menendambi, queposh. Adoshombic umbi chiaid tantiesa icquin chieshquin daëd uambocsho issun umbi menebued bedshunendambi, queposh aton icbo.

²⁷ Adashic: Ubi chieshënec aton chuiquid tapa ubi icmete bunesabo nëmbo bec cho. Bëshun umbi isnubi abitedi cuessunneta, caposh aton chuiquidën, quepanëdash Esus.

V. EDUSADEN YACNOSHON NAID ( 19.28—24.53 ) 1. Edusaden yacnoshon Esusën nabanaid 19.28—21.38 Chuiquid tapabimbuec Edusaden yacno Esus choaid

²⁸ Aden chuibanashic Esus Edusaden yacmi nidpanëdash.

²⁹ Adec nidequi macuësh Odibos yacno shubu daëdpactsëcquid Bedpaque caidbëd Betania caid anoentsëqui choash Esus nidtuidpanëdash. Adec nidtuidshun abëd icquid daëd nidmenun naden chuipanëdash:

³⁰ Nëid podquiedën nidquimbi shubu daëdpactsëcquid yacno nidshun mimbi cabachubitsecquidën bacuë caniactsëc catsadabicquid nëshac tsadsho mimbi istuidendac. Aid istuidshun bucun nëshaid chicshun nëmbo bëta.

³¹ Aden mimbi chicsho isash: ¿Atotsi canun aid chicquin nai? quendac. Adsho tantiashun: Nuquin Icbon: Bedtan, cac naimbi, quequin chuita, quepanëdash Esus.

³² Adoac nidshun abëd icquid daëdshun Esusën chuibocpadombuen istuidtanquin

³³ cabachubitsecquidën bacuë caniactsëc nëshac tsadquid chicsho issun: ¿Atotsi canun aid chicquin nai? capanëdash icbon.

³⁴ Adoaquien: Nuquin Icbon: Bedtan, cac naimbi, quepanëdash.

³⁵ Aden Esus yacno buannun aton dashcute bëntsecquid chictanquin cabachubitsecquidën bacuë caniactsëc capucpanëdash. Adoshon Esus catsadtomepanëdash.

³⁶ Aden catsadtomiac nidsho issumbien iccuededquidontsen aton dashcute bëntsecquid chictanquin podquied ansambampanëdash.

³⁷ Adec nidannec macuësh Odibos caid budash abi tsibanquid abitedimbo: Bëdambo iquec, quec cuishonquec Nuquin Papan nadatiambocquin namiac nasho ambi isbued naden chiec cumapenec cuëdcuededpanëdash:

³⁸ Nuquin Papan abi yacnoshon Chomiaid chuiquid tapa Ambi bëdambo icmiaidquiobidi nec. Nuquin Papa yacno bëdambuec tabadec icsaisatedi iquendac, quec iccuededquido cumapenec cuëdcuededpanëdash.

³⁹ Adec cuëdcuededsho tantiashun padiseobon: Adec onquenda, quequin mibëd icquido chui, capanëdash Esus chuiquin.

⁴⁰ Adoaquien: Umbi naid chiec aidtedi cuëdcuededenquio yec ënëdnuc cuënotebi umbi naid chiec cuëdcuededantsiandac, quepanëdash Esus padiseobo chiec.

⁴¹ Adanec nidequi Edusaden anoentsëqui choequi ambo icquido tantiec shubiec Esus nadpanëdash:

⁴² Ubi bëdambo icmequid Esus nec, quequin nëbi ubi tantiaquid yec mibi bëdambuec tabadtsiandac. Bënnudacbimbuen tantiesa icquin mimbi ubi tantiatiapimbo iquendac.

⁴³ Iuecash choquin uinmanëmënquidon mibi cuentiapimbocnoc tsicateshun mibitedi icsa uashunendac.

⁴⁴ Aden icsa uaquin min bacuëbobëtabi naimbudquin mibi cuessun secaindac. Adoshombic cuënote nacnenaidtedi uesquin chic chiquendac. Nuquin Papan Chomiaid chosho tantiesa icsho cuidtequido mibitedi nendac, quepanëdash Esus.

Nuquin Papa tabadte shubu dapa yacnoshon cuenmiaid

⁴⁵ Adashic Edusaden yacno choash Nuquin Papa tabadte shubu dapa daquënë uaidën puduedshun piucquid bedquin atona menebanquido icsho istanquin Esusën cuenmequin niacumpanëdash.

⁴⁶ Aden cuenmequin chiec: Nuquin Papan chuiquin dada uamiampid nad iquec: Ubi tabadte shubu dapa ubi chiannec tabadte nec, quequin chiampid icnubi adoenquio icquin mitsanauidi bedte bunquin ampec tabadte shubu mibitedishun icmiaque. Niecun, quepanëdash Esus.

⁴⁷ Adoshombic badiadquidën badiadquidënquiec Nuquin Papa tabadte shubu dapa daquënë uaidën puduedtednequin Nuquin Papan Chiaid Esusën chuibampanëdash. Aden chuibansho issun: ¿Mitsipadombuen Esus bedmeshun uënës uametiad? quequin nëidtedishun tantiabededpanëdash. Nëidic Nuquin Papa ismequin nëish iua cuessunneshun pichicaquidon chuiquidon. Nëidic Moisesën chiampid tantiamequidon. Nëidic isadaidbon chuiquid utsibon.

⁴⁸ Aden aidtedishun tantiaquin caimbedednubi: Esusën chuibansho tantianu, quec matses dadpen Esus datsidadacsho issun ashunquio isadaidbon chuiquidon Esus uënës uamenuen bedtiapimbo icpanëdash.