Ducas 16 - El Nuevo Testamento en matsés

Utsi chiacbimbuen Icbona icsambuen isquin dayun uaquid chiaid

¹ Adshumbic abëd icquido Esusën naden utsi chiacbimbuen chuiuapanëdash: Dada atona dadpen icquid icposh. Aidën: Cuna dayun uaquin isquid icta, caid icposh. Adnubi utsibon: Mimbi: Cuna ista, caidën mitsana uesbudosh, quequin utsibon chuituidposh.

² Adoac ambi: Cuna ista, caid chomeshun icbon naden chuiposh: Mimbi: Cuna ista, caidën mitsana uesbudec, quequin mimbi naid chioshi. Aden chuisho tantiashun: Cuna isquid mibi icmetiapimbo iquebique. Nëbi mimbi naidtedi dada uashun ubi meneta. Mitsana nëidted piucquid menebanombi. Adembidi mitsana utsitedi menebanquin nëidted min piucquid bedombi, quequin chuiquin dada uabanshun ubi meneta, queposh icbo.

³ Aden chiaquien icbon: Cuna ista, caid otacquio onquec: Cun icbon: Nëbi cuna isquid mibi ictiapimbo iquec, caboc. ¿Atotsimbi napeba? Chonoadtiapictsëcquiocquid yec neshcashunquid ictiapimbo iquebi. Adecbidi: Cuna nibëdeque. Bec cho, quetiapimbo iquec dacuëduaibi.

⁴ Chicshunniac naden natsiambi, quequin tantiembi. Ma Cun icbona: Ma bëuanu, quequin meniondaidtedi chochomeshun nashunsho issun ubi iuedquin nashuntsiash, queposh.

⁵ Aden tantiashun ambi aton icbona meniondaid abentse abentsen chochomequin bëyuc choquid chuiquin: ¿Tedtsi umbi cun icbona meniaqui mimbi cuidquin meniambo icpe? caquien:

⁶ Bëchi shocosh tapan cushtoaid 100ted bedboshombi cuidquin meniambo iccombi, queposh. Adoaquien: Mimbi 100ted bedombi, quequin dada uaid secashun dada uatempi bedshun shocosh tapa bëchi cushtoaid 50ted bedbued cuidquin mibi menembi, quequin dada uata, caposh.

⁷ Aden bëyuc choquid chuishumbic utsitsen chomeshun: ¿Cun icbona tedtsi bedshun cuidquin mimbi meniambo icpe? caquien: Tsitsanën icquid iuë tambanaid 100ted icnuc tiedën icquid tidico caid ëshë bedombi, queposh. Adsho tantiashun: Mimbi aidted bedombi, quequin dada uaid secashun dada uatempi utsin: Iuë tambanaid 80ted icnuc cuidquin menembi, quequin dada uata, quequin icbon: Cuna ista, caid icsambocquidën chuiposh. Adoac aidën chiacpaden ambi bedaid cuidquin meniambocquidën dada uaposh.

⁸ Adoacsho tantiashun icbon: Cun piucquid icsambuen dayun uaquidën ambi naid tantiaquidquio nec. Cun icbon nidmiacsho umbi nashunaidon ubi bëdambuen isquin iuedtsiash, quepec. Aden Nuquin Papa tantiesabon aton piucquid bednuen ambi naid tantiaquidquio nec. Padnuen Nuquin Papa tantiaquidën aton piucquid bedte bëdiactsëc tantiatsec.

⁹ Adquid icnuc ubëd icquido icsho: Aden nata, quequin mibitedi chuinu. Min piucquid utsibo nashunquin bëdambuen tantiaquin menebanta. Aden mimbi uesadtequid icshobi meniannequid yec uënësacsho Nuquin Papan abi yacno mibitedi bëdambuen isquin ënëdenquiocnoc abëdi tabadmendac, quepanëdash Esus.

¹⁰ Aden chuishumbic adombuembidi chuiquin Esusën nadopanëdash: Icbona daëdpactsëc icquid bëdambuen isquin bëdambuen dayun uaquin bëdambuen nashunquid nec. Adembidi icbona dadpen icquid bëdambuen isquin dayun uaquin nashunendac. Padnuen aton icbona daëdpactsëc icquid isquin icsambuen naquin ampeshunquidën adombuembidi aton icbona dadpen icquid icsambuen isquin ampeshunendac.

¹¹ Adembidi nidaidënshun bedquin mibitedishun icsambuen naquin ampiacsho issun ¿tsuntsin: Bëdambocquid mibitedi neque. Cun piucquid dayunuaquin ista, capec?

¹² Adembidi utsina isquin bëdambuen dayun uainquio icsho ¿tsuntsin: Cuna dayun uata, quequin atonatedi menepadic?

¹³ Adecbidi chuiquid daëd icnuc aid daëdshun namiaid mibi ictiapimbo iquec. Abentsëcshun chiaiduidi tantiaquin utsin chiaid mimbi chieshënec. Adquiobidi min piucquid bedteuidi tantiaquid icquin Nuquin Papan chiacpadombuen mimbi natiapimbo iquec, quepanëdash Esus.

¹⁴ Aden chuibansho tantiash aton piucquid ambi tantiaidquio icnuc Esus icsambuen chuishunquin mamënshunec padiseobo tabadcuededpanëdash.

¹⁵ Adec tabadsho issun Esusën: Bëdambuen nacbimbuen ismequido mibitedi icsho mimbi ompoquin naidtedi Nuquin Papan tantiec. Adembidi: Bëdambuen naquidquio nec, quequin matsesën isaidi Nuquin Papan bëdambuen istiapimbo iquec, quepanëdash Esus.

Naden nata, quequin chiaidbëta Nuquin Papan namiacno tabadte chiaid

¹⁶ Adembidi acten mentoanquid Uan tishabicnuc Nuquin Papan: Naden nata, quequin chiaid Moisesën dada uampidbëta Nuquin Papan oncamiaidon dada uampid mimbi ënden tantiondaid nec. Nuquin Papan namiacno tabadte iquec, quequin Chiaid Bëda umbi chuibansho tantiash ubi tantienquio yequi dadpen ambo puduedte bunquiec.

¹⁷ Abubëd nidaid ënëdtequid icnuc Nuquin Papan: Naden nata, quequin chuiquin Moises dada uamiampidtedi utsi uatiapimbo iquendac, quepanëdash Esus.

Aton chidobëd cuëshëdte chiaid

¹⁸ Adashic utsi chiec: Aton chido bunenquio icquin aid nianquin chido utsi bedquin Nuquin Papan Chiaid niaquec icsaindac. Adecbidi aton bënën niambued chido bedquin Nuquin Papan Chiaid niaquec icsaindac, quepanëdash Esus.

Atona dadpen icquidbëta atona nibëdquid chiaid

¹⁹ Adshumbic utsi chiacbimbuen Esusën naden chuipanëdash: Dada atona dadpen icquid dashcute bëdaidquio dasiuidquidën badiadquidën badiadquidënquien utsibo dadpen chochomeshun nua pemeshun acmededneposh.

²⁰ Adnubien aidën shubu shëcuë cuëman bëshun tsadunac atona nibëdquid Dasado cuëmëdquid chiuë dadpen icquid tsadposh.

²¹ Ambo tsadec atona dadpen icquidën pequin secaid bedshun pete bunquiec tsadposh. Adnubi opa choquin aton chiuë bëtashshuntuidposh.

²² Uëshë utsimbi atona nibëdquid Dasado uënësso issun Nuquin Papabëd icquidon abuc buanshun aton tsusedpa Abadauanën dayunquio tsadumposh. Adoambic atona dadpen icquidtsen uënësacsho chococaposh.

²³ Adoac chian annëdënquiacnouësh mëyadquin abuc isquimbi atona nibëdquid uënësbuedi Dasado Abadauanën dayunquio tsadsho isposh.

²⁴ Adec aid daëdi tsadsho issun atona dadpen icbuedën chuiquin: Papa Abadauan Ubi ampichiquequieque. Ma Dasadon aton mëdante dëshbi acte puntanquin cun ana dauebudmequin ubi anchucu uanu. Chome, papa, caposh.

²⁵ Adoaquien Abadauanën: Tantia. Chuinu, mado. Ënden nidaidën tabadquin mitsana dadpen bedbanec mibi tabadnubi Dasado cumapenec bunquiec tsadposh. Adbuedi nëbi aidi ubëd bëdambuec tabadnubi anchumbo yec mëyadec mibi tënquebudec.

²⁶ Adquid yec ëquëmbo mibi iquec. Nidaid tiadaid nuambo yec ëquëducquio icquid cuëma utsiuc potetiapimbo icnuc nëuëshquio nidtiapimbo iquec. Adquiobidi mibi yacnocquido nëmbo chotiapimbo icuaic, quequin Abadauanën atona dadpen icbued chuiposh.

²⁷ Adoaquien: Ubi yacno potetiapimbo icnuc cun pan shubu yacno Dasado nidmeta, papa.

²⁸ Cun utsibo 5ted uënësabi yec nidaidën tabadeque. Cun utsibo nëmbo ubi mëyadacno chonoshe, queshun ma aido chuinu. Nidmeta, papa, queposh atona dadpen icbued.

²⁹ Adoaquien: Nuquin Papan Chiaid Moisesën dada uampidbëta Nuquin Papan oncamiampidon dada uaid issun ma aidon chiacpaden min utsibon tantiashun napanuna, quequin Abadauanën chuiposh.

³⁰ Adoaquien: Aid tantienquioctsiash, papa Abadauan. Uënësaid uincuenanec nidshun chiac aidon ambi icsambuen naid ënshun tantiabentsiash, quequin atona dadpen icbuedën chuiposh.

³¹ Adoaquien: Padicnuna. Moisesën dada uampidbëta Nuquin Papan oncamiampidon dada uaid tantiatiapimbo icquin uincuenmiaidën chiaid min utsibon tantienquio ictsiash, quequin Abadauanën atona dadpen icbued chuiposh, quepanëdash Esus.