Ducas 15 - El Nuevo Testamento en matsés

Utsi chiacbimbuen obeca istuidte chiaid

¹ Adashic: Icsambocquid nec, caidobëd Doma yacnocquidon chuiquid tapan chiactedi aton matses isadaidbo piucquid bedshunquido: Esusën chuibansho tantianu, quiash Esus datsidadpanëdash.

² Adsho isash padiseobobëd Moisesën chiampid tantiamequido Esus tantiamenquio yec chushquec: Abi datsidadquido icsambocquido icsho cacunmenquio icquin aidobëtambi peshun Esusën aquec, quec cuëdcuededpanëdash.

³ Adoaquien aido onquiaid tantiaquidquio icquin Esusën utsi chiacbimbuen naden chuipanëdash:

⁴ ¿Min obeca 100ted icbuedi abentsëc bënnudacsho issun: Nibëntannu, quequin min obeca utsi 99ted nianquin istuidnuen nibënec nidenquioda mibitedi ictsia?

⁵ Aidi nibënquin istuidash: Cun obeca istuidbosh bëdambo iquebi, queshun chiadquin icbon bëec.

⁶ Shubuno choshon abëd nashunnanquidobëta aton shubu anoentsëc icquido chomeshun chiec: Cun obeca bënnudacbuedi istuidshun bedbosh bëdambo iquebique. Aid tantiec cuishonquec tabadec cho, quequin icbon chuipec.

⁷ Adecbidi: Nuquin Papa tantiaquid yec bëdambo iquebi, quequid 99ted icsho isash bëdiactsëc cuishonquenuc matses icsambuenshë naquid abentsëcshun ambi icsambuen naid ënquin Nuquin Papa tantiabensho isash abucuësh Nuquin Papabëd icquido: Bëdamboshë iquebi, quec cumapenec cuishonquecuededquiendac, quepanëdash Esus.

Utsi chiacbimbuen piucquid tsasicquid bënnudaid chiaid

⁸ Aden chuiboshombic utsitsen chiec Esus nadpanëdash: Aton piucquid tsasicquid 10ted icbuedi abentsëc paëdacsho issun tabote taboshon bescaquin chidon: Istuidnu, quequin ¿nibënenquioda icpec?

⁹ Aden nibënquin istuidshun abëd nashunnanquidobëta aton shubu anoentsëc icquido chomeshun chiec: Cun piucquid tsasicquid abentsëc paëdacbuedi iuen nibënquin istuidash bëdambo iquebique. Ubëdi cuishonquec cho, queposh chido.

¹⁰ Adecbidi matses abentsëcshun ambi icsambuen naid ënquin Nuquin Papa tantiabensho isash Nuquin Papabëd icquido: Bëdambo iquebi, quec cuishonquecuededquiendac, quepanëdash Esus.

Utsi chiacbimbuen aton madon aton papa nianaid chiaid

¹¹ Aden chuishumbic utsi chiacbimbuen Esusën naden chuipanëdash: Aton mado daëd icquid dada icposh.

¹² Aton mado tsiuecquidën aton papa chuiquin: Tsësiobudshun: Cuna mibi menembi, mibi quiondacpaden nëbi aidted ubi meneta, papa, queposh. Adoac atona tembi daëdquiocnoc aton mado abidaëdi menebamposh.

¹³ Aden meniac iuecpactsëc ushshun utsibo tied menequin piucquid dadpen aton mado tsiuecquidën bedposh. Adshumbic atonatedi sandoshon buanec nidaid utsi yacno nidash icsambuenuidi nabanec tabadnuc aton piucquid naimëdposh.

¹⁴ Adec atonatedi naimëdambic abi nidacnocquidon petetsen naimëdan tsësion mado cumapenec bunquioposh.

¹⁵ Adec bunquimbi abi nidacnocquid abentsëc yacno nidshun: Mimbi namiaid ictiadquio iquebique. Ubi chonoaua, caquien: Cun chanchu pemequid icta, queshun aton chanchu yacno tsësion mado nidmeposh.

¹⁶ Aden nidmiac nidshun chanchu pemequin ambi pemiaidi petiadquio yec tsadshobi ambo icquidon pete menenquio icposh.

¹⁷ Adec natiambo bunec tsadquin aton papa ambi nianondaidbëta ambi icsambuen naid utsitedi tantiec abibi onquec nadposh: Cun pan namiaidon pete dadpen icnubi cuna nibëdnuc bunambi uënëspebi.

¹⁸ Nëbi cun pa yacno niduashun naden cun pa chiembi: Nuquin Papan Chiaid niacquimbi mimbi chiaidtsen niacquin icsambuen nabanombi.

¹⁹ Adquid icsho: Cun mado nec, ubi cainda papa. Nëbi min iuapadquid ubi icme, quequin chiembi,

²⁰ abibi quianec aton papa yacno chouaposh. Adec choec ancuenquio yacno aton mado nidondaid casenash chosho isash uënësquiocnoc aton mado bëquedbanec titinquequin dayumbudshun shubi uatanquin aton papan tanchoccaposh.

²¹ Adoac ambi tantiabocpaden aton papa chiec: Papa, Nuquin Papan Chiaid niacquimbi mimbi chiaidtsen niacquin icsambuen nabanombi. Aden naquid icsho: Cun mado nec, ubi cainda, papa, caposh aton madon.

²² Aden chiaquien bëdambo yanshun aton iuabo naden aton papan chuiposh: Cun mado ëndenquio nidondaid choshe. Dashcute bëdaidquio bedshun cun mado dasiuinta. Adoshombic mëusudtetsen mëusunta. Adoshombic tapucudtetsen tasiuinta.

²³ Adoshombic bacan bacuë caniactsëc nuambo tsënënaid bedshun cuessunneta nuquitedi cuishonquec bëdambuec tabadquin penun.

²⁴ Cun mado uënësacbimbuec icbuedi nëbi ubëdi tabaduaic. Aidi bënnudacbimbuec icbuedi nëbi istuidacbimbuec choash iqueque, cac bacan bacuë bënë nuambo tsënënaid cuessunneshun codocacsho cuishonquec tabadquin pebededposh.

²⁵ Adnubien bëyuc tishaid tied nantan icposh. Auëshquio choec shubu anoentsëqui yanquin tintincate cuëdënmec matses dadpen shëcshëcquec bidiadtannec cuëdënsho tantiatuidposh.

²⁶ Aden tantiatuidshumbien aton papan iua istuidshun: ¿Atotsi naic nec? caposh bëyuc tishaidën.

²⁷ Adoaquien: Min utsi ëndenquio nidondaid choaccosh. Aid choacsho isash cuishonquequin nuquitedi bëdambuec tabadquin penu, quequin bacan bacuë caniactsëc nuambo tsënënaid papan cuessunnemiosh, caquien

²⁸ bëyuc tishaid nëishash shubun puduedenquio icposh. Adsho isash: Puduedenquio iccosh, quequin chiac aton papa bëyuc tishaid yacno nidshun: Min utsibëd bëdambo icnuec puduedec cho, mado, caposh.

²⁹ Adoaquien: Seta dadpen matanmequin mimbi chiacpadombuen nadedniombi. Adquid icshobi ubëd capuquidobëta ubi pemenuen nëish iua utsi cabadan bacuëmpibi ma mimbi cuessunnemenquio icpaboc.

³⁰ Nëbi mimbi meniaidtedi buanec nidshun chido piucquid bedec chudadquid chudquin piucquid uestanec min mado choacsho issun bacan bacuë caniactsëc nuambo tsënënaid ma mimbi cuessunnemepayoc, quequin bëyuc tishaidën aton papa chushcaposh.

³¹ Adoaquien aton papan: Mado, ubëd icquidquio mibi nec. Adquid mibi icnuc cunatedi mitsana nec.

³² Min utsi uënësacbimbuec icbuedi nëbi choash tabaduaic. Aidi bënnudacbimbuec icbuedi nëbi istuidacbimbuec chosh, quequin aton papan aton mado bëyucquid chuiposh, quepanëdash Esus.