Ducas 1 - El Nuevo Testamento en matsés

Mibi tantiamenuen dada uanu, Teopido, quiaid

¹ Matses dadpenshun: Nëmbo nasho ubitedishun isondaid dada uaquin tannu, quequin dada uapanëdash.

² Aidon Esuquidistun tauain naidbëtabi ambi naid utsitedi isbanquidon ambi: Chuibenneta, caidon chuibanacpaden dada uaidtedi nec.

³ Esuquidistu chuibanquin dada uaid isbanquimbi Esuquidistu isnëdaidon chuibanaidtedi bëdambuen tantiashun aidtedi mibi bëdambuen chuibanquin umbitsen dada uaimbi, chuiquid tapa Teopido.

⁴ Utsibon mibi Esus chuiquin tantiamenëdaid abimbo chiaid nec, quequin ma mimbi tantianu, queshun mibi chuiquin dada uaimbi.

I. UAN ACTEN MENTOANQUIDBËTA ESUS CHIAID ( 1.5—2.52 ) 1. Tishendac, quequin chiaid 1.5-56 Uan acten mentoanquid tishte chiaid

⁵ Nidaid Udea caid yacno Edodes cuëmëdquid isadaidbon chuiquid tapa icnubien Nuquin Papa ismequin nëish iua cuessunneshun pichicaquid Sacadias cuëmëdquid icpanëdash. Aidi Abiasbëtan Nuquin Papa tabadte shubu dapa yacnoshon nabanquid yec Adonën tsiuecquid nepanëdash. Aidën chido Isabed cuëmëdquid Adonën tsiuecquidbidi nepanëdash.

⁶ Aidi aton bënëbëdi Nuquin Papan Chiaid tantiaquin nabanquidquio icpanëdash. Adquid icsho Nuquin Papan bëdambuen isaidquio aid daëd icpanëdash.

⁷ Isabed bacuë tishesa yec machobudnubi aton bënëtsen tsësiobudquiopanëdash.

⁸ Adashic Edusaden yacno nidash Nuquin Papa tabadte shubu dapa nuntanshun ambi nabantequid icnuc padpidembuec Sacadias puduedpanëdash. Abëtan naquidon: Aid uëshën mimbitsen nata, cac nepanëdash.

⁹ Ambi nuadte bëda pichicate uëshë chonoc Sacadias aid pichicanuec Nuquin Papa tabadte shubu dapan puduedpanëdash. Ënden ambi abipadquid utsibobëtan nadenniacpadembi abi cuëmëdquid cuëmëdquidquien dada uaid tëchun sandoshon cadotanniac abia dada uaidëmpi puduenquid Sacadias cuëmëdquid icnuc nepanëdash.

¹⁰ Adquid icnuc puduedshun Sacadiasën nuadte bëda pichicanubi umanuc Nuquin Papa tabadte shubu dapa daquënë uaid yacno Nuquin Papa chiec matses dadpen tabadpanëdash.

¹¹ Adnubien Nuquin Icbon budmiaid abëd icquidquio isadcuempanëdash. Isadcuenec nuadte bëda pichicate dayun abiucquio nidtuidpanëdash.

¹² Adec nidtuidec dacuëdampambo icsho isash Sacadias dacuëdec tantiadempambo icpanëdash.

¹³ Adsho isash Nuquin Papabëd icquidquio nadpanëdash: Dacuëdenda, Sacadias. Bacuë bunquin mimbi chiannebued Nuquin Papan tantioshe. Min chido Isabedën min mado tishendac. Tishacsho Uan cuënta.

¹⁴ Min chidon tishaid isash mibi bëdambo iquec cuishonquequiendac. Adecbidi bacuë tishaid tantiash matses dadpen cuishonquecuededendac.

¹⁵ Min mado Nuquin Papan bëdambuen isaidquio iquendac. Acte paë uaid min madon aquenquio icquin isuidendac. Aid tishabicshobi Nuquin Papan aton Mayan Bëda meniaidquio min mado iquendac.

¹⁶ Nuquin Papan Chiaid tantiaquidquio icquin aidën chiac isadaidbo dadpen Nuquin Papan Chiaid niac niacquid icbuedi: Cun Icbo Nuquin Papa nec. Aidën chiacpadombuen naimbi, quequin tantiabenendac.

¹⁷ Min mado Nuquin Papan Chomiaid tishabi icnuc choendac. Tsusedpa Nuquin Papan oncamiampid Ediasën chiampicpadombuen dacuëdenquio icquin cuembo chuibanquidquio min mado iquendac. Aidën chuibanac chieshënnambuedi amëbëd aton bacuëbo tantiananuaindac. Nuquin Papan Chiaid niacbuedi min madon chiac Nuquin Papan Chiaid naquidquio iquendac. Nuquin Papan Chomiaid choeque. Bëdambuec tabadnuna, quequin chuibanendac, quepanëdash Nuquin Papabëd icquid.

¹⁸ Aden Nuquin Papabëd icquidën chiaquien Sacadiasën: ¿Mitsipadembimbi mimbi chuibued: Abimbo iquec, quequin tantiape? Cun chido machobudnubi mabi tsësiobudquiopaboc, capanëdash.

¹⁹ Adoaquien: Cabadied nebi. Abëd tabadquin Nuquin Papa nashunquidquio nebi. Aidëmbi ambi tantiacpadombuen mibi Chiaid Bëda tantiamenuen chomebued nebique.

²⁰ Tantia. Chuinu. Min chidon bacuë tishendac, quequin umbi chuibued tantienquio icsho Nuquin Papan mibi eme uaindac. Min chidon bacuë tishan padpidec mibi onquianuaindac, quepanëdash Nuquin Papabëd icquid Sacadias chiec.

²¹ Adnubien nuadte bëda pichicate quënënuësh Sacadias baded puduenenquiocsho isash: ¿Atotsi quiash puduenenquio icpec? quequin cainec umanuc utsibo tabadpanëdash.

²² Aden iuen caimbudnubien puduenash onquenuequi cuëdenquiocpanëdash Sacadias. Adsho issun: Ushquin isacbimbuen isash nec, cabededpanëdash. Aden chuibededsho issun Sacadiasën ambi isbued tantiamequin chuinuequi onquenquio icquin mëdante uic uiccapanëdash.

²³ Adashic Nuquin Papa tabadte shubu dapa nuntanshun ambi nabantetedi nainash aton shubuno Sacadias niduapanëdash.

²⁴ Ambo choash iuec icnubien aton chido Isabedën bacuë usundopanëdash. Aden usundoash uëshë 5ted nidmec uanno nidenquio yec aton shubu nuntan icpanëdash.

²⁵ Adec ambo icquimbi Isabedën naden tantiapanëdash: Bacuë usundoenquien icpec, cabededbuedëmbi nëbi machobudshumbi umbi bacuë usundoacsho utsibon ubi bëdambuen isec. Ubi tantiaquin Nuquin Papan usundomiaid nebi, quepanëdash Isabed.

Esus tishte chiaid

²⁶ Aden Isabedën bacuë usundoaid uëshë 6ted nidmian nidaid Cadidea yacno shubu dadpen icquid Nasaded yacno Nuquin Papan abëd icquid Cabadiedbidi chomepanëdash.

²⁷ Ambobi chido dadan bedabicquid Madia cuëmëdquid icpanëdash. Adquid icsho abi bednuequid tsusedpa Dabidën tsiuecquid Ose cuëmëdquid icpanëdash.

²⁸ Adnubien Nuquin Papabëd icquid Cabadied ambo choshon: Mibi tantiaquin Nuquin Papan bëdambo icmiaidquio mibi nec. Nuquin Icbo mibëd iquec, capanëdash Cabadiedën Madia chuiquin.

²⁹ Aden chiaquien Madia: ¿Atotsi chuinuec nepeba? quec tantiadempambo yec otacquio tsadpanëdash.

³⁰ Adec tsadsho issumbien Cabadiedën: Madia, dacuëdenda. Mibi bëdambuen isquin Nuquin Papan tantiaid nad iqueque.

³¹ Tantia. Chuinu. Bacuë usundoshon mimbi min mado tishendac. Tishshun Esus cuënta.

³² Mimbi tishaid chuiquid tapa iquendac. Aden mimbi tishaid issun: Nuquin Papa Nadatiambocquidën Madombo nec, cabededendac. Tsusedpa Dabid chuiquid tapa Nuquin Papan icmiampicpadombuembidi chuiquid tapa aid icmeuaindac.

³³ Adoac chuiquid tapa abentsëcquiobi iquendac. Adquid iquec tsusedpa Acobon tsiuecquido isadaidbon chuiquid tapa yec ënëdenquio iquendac, quepanëdash Cabadied Madia chiec.

³⁴ Adoaquien: ¿Mitsipadembimbi bacuë usundoshon tishpe? Mabi dadan chudambocquid nepayoc, quepanëdash Madia.

³⁵ Adsho tantiashumbien: Nuquin Papan Mayan Bëda budshun mibi usundomiac mimbi bacuë tishendac. Aden Nadatiambocquidën naidënquio usundomiaid icquin mimbi tishendac. Aden tishaid icsho: Nuquin Papa Nadatiambocquidën Madombo yec bëdamboshëcquidquio nec, utsibon cabededendac.

³⁶ Min chuchu Isabed machobudshun bacuë usundotiapimbo icbuedëmbi nëbi bacuë usundoac. Usundoenquien icpec, cabededbuedëmbi ambi bacuë usundoaid uëshë 6ted nidmiaid iquec.

³⁷ Utsin natiapimbo ictequid Nuquin Papan naidquio nec. Ambi natiapimbo ictequid nibëdec, quepanëdash Cabadied.

³⁸ Adoaquien Madia: Ai, cun Icbon namiaidquio nebique. Ma mimbi chiacpadombuen Aidëmbi ubi tantiaquin napanuna, quepanëdash. Aden chiac Cabadied isadenquio yanec nidpanëdash.

Isabed isedec Madia nidaid

³⁹ Adashic atona sandoquin nacnenanec Madia nidaid cuëshë Udea yacnocquid macuësh yacno shubu daëdpactsëcquid yacno badedquio nidpanëdash.

⁴⁰ Adec nidash Sacadiasën shubun puduedquin aton chuchu Isabed istuidec: Mibi isnuec chobi, chuchu, quepanëdash Madia.

⁴¹ Adsho Isabedën tantianubi aton bacuë cumapenec cuididiquepanëdash. Adec aton bacuë cuididiquenubi Nuquin Papan Mayan Bëdan tantiamiacpadec Isabed

⁴² Madia chiec nadec cumapenec onquepanëdash: Chidobo dadpen icnubi mibi abentsëcquiobi Nuquin Papan bëdamboshë icmiaidquio mibi nec. Mimbi usunaid adecbidi bëdamboshë icmiaidquio nec.

⁴³ Cun Icbon tita iquequi ¿atotsi quiash ubi isnuec cho?

⁴⁴ Mibi isec chobi, mibi quesho umbi tantianubi cuishonquec cun bacuë cuididiquiosh.

⁴⁵ Nuquin Icbon chuimiacpadombuen chuisho tantiash: Adquid iquendabi, quequid yec mibi bëdambo iquec, quepanëdash Isabed Madia chiec.

Madia Nuquin Papa tantiec cuëdënaid

⁴⁶ Adashic Madia naden chiec cuëdëmpanëdash: Nadatiambocquid icquin Mimbi naid tantiec bëdambo iquebi, Icbo.

⁴⁷ Abi yacno ubi tabadmequid Nuquin Papa nec, quequin tantiec cuishonquec bëdambo iquebi.

⁴⁸ Ambi namiaid aton iua icsho ubi bëdambuen isquin Nuquin Papan dayun uaoshi. Adquid icsho: Nuquin Papan bëdamboshë icmiaid nec, quequin ënenquio icquin cun matsesadon ubi tantiabededendac.

⁴⁹ Aden ubi tantiaquin nadatiambocquid icquin ubi nashunquid yec Nuquin Papa bëdamboshëcquidquio nec, caimbi. Icsasaisambo nec.

⁵⁰ Aton matsesën tishaid tsibanquid tsibanquidquiec abi tantiaquido icsho issun: cuidenquio icquin mimbi bëdambuen isquin tantiendac.

⁵¹ Nadatiambocquin nadednequidquio Nuquin Papa nec. Adquid icquin matses: Umbentsëqui namequid nebi, quequid icsho issun Nuquin Papan aid namenquio iquendac.

⁵² Matses chuiquid tapa icbuedobi dëniacshun namendac. Utsin namiaid icbuedi chuiquid tapa Nuquin Papan icmendac.

⁵³ Atona nibëdquido bunec tabadsho issun Nuquin Papan nashunendac. Atona dadpen icquid atona nibëdquio icmeshunendac.

⁵⁴ Nuquin matses isadaidbo tantiaquin nashunquid Nuquin Papa nec. Adquid icquin aido bëshunenquio icquin bëdambuen isquid nec.

⁵⁵ Aden tantiaquin Nuquin Papan ambi nuquin tsusedpa Abadauambëta aton tsiuecquidtedi chiacpadombuen bëdambuen isquin nuqui tantiendac, quequin tantiec Madia cuëdëmpanëdash.

⁵⁶ Adashic Isabedbëd uëshë 3ted nidmec tabadash uëshë utsi nidbudtsëcnubi aton shubuno Madia niduapanëdash.

2. Uan acten mentoanquid tishaidbëta Esus tishaid chiaid ( 1.57—2.52 ) Uan acten mentoanquid tishaid

⁵⁷ Adnubien ambi tishte uëshën bacuë nëncuenshun Isabedën dada bacuë tishpanëdash.

⁵⁸ Aden bacuë tishenquio icbuedëmbi Nuquin Icbon bëdambuen isaid icquin nëbi aton bacuë tishosh, quesho tantiash aton matsesadobëd shubu utsin icquidotedi Isabedbëd cuishonquec bëdambo icpanëdash.

⁵⁹ Adnubien 7tedec ushtanquin Isabedën: Cun madon shui dëbid dëtemetannu, quec nidpanëdash. Adanec puduedacsho: Bacuëmpi aton papa Sacadias cuëmëdquidi cuënnuna, quesho tantiashun

⁶⁰ aton tita Isabedën: Padenquio. Abi cuëmëdquid Uan nec, capanëdash.

⁶¹ Adoaquien ambocquido: Min matses Uan cuëmëdquid nibëdec.

⁶² Sacadias chuimenu, quequin mëdante uic uiccaquin: Abi cuëmëdquid chui. Tantianu, capanëdash utsibon.

⁶³ Adoaquien: Dadauate bec cho, quequin uic uiccaquin tantiamiac meniac: Abi cuëmëdquid Uan nec, quequin dada uaquin Sacadiasën ismepanëdash. Adoaquien: ¿Abimbobida capec? quec tantiadempambo yec tabadcuededpanëdash utsibotedi.

⁶⁴ Adnubien padpidembuen oncamiac: Nuquin Papan naid bëdambo iquec, quequin Sacadiasën onquequin chuipanëdash.

⁶⁵ Aden chuibansho tantiash: Dacuëdampamboshë iquec. ¿Atotsi quiash onquenquiocbuedëmbi nëbi onquequin Nuquin Papan naid chuibampec? quecuededpanëdash abëd icquido. Adembidi nidaid cuëshë Udea yacnocquid macuësh yacno tabadquid matsesën Sacadias onquecuenuaid chuibededpanëdash. Aden tantianec aton shubuno nidanneshun ambi isbuedbëtabi ambi tantiabued chuipanëdash.

⁶⁶ Adoac: ¿Mitsipadquidquio ictequid aid bacuë nepash? Nuquin Papan tantiaidquien nechitash, quecuededpanëdash.

Nuquin Papa tantiec Sacadias cuëdënaid

⁶⁷ Adnubien Uanën papa Sacadias Nuquin Papan Mayan Bëdan oncamiac naden aton mado Uanën nate chuipanëdash:

⁶⁸ Cun matses isadaidbon tantiaid Nuquin Papa chuiquin: Mibi bëdamboshë iquec, canuna. Utsin mëyanquin iuaido icsho choshon nuqui mënchiquendac.

⁶⁹ Aden Nuquin Papan abi yacno puduedmianquid nadatiambocquin nabanquid chomendac. Aidi Nuquin Papan namiaid tsusedpa Dabidën tsiuecquid nendac.

⁷⁰ Aid chote Nuquin Papan tantiamiacpadombuen ëndenquimbo ambi oncamiaidon chuipampic.

⁷¹ Aidëmbi nuqui chieshënquido nuqui mënchiquendac.

⁷² Nuquin tsusedpabo bëdambuen isquin ambi aido chiampicpadombuen bëshunenquio icquin naindac.

⁷³ Aden nuquin tsusedpa Abadauan chiec: Muainquiocquid icquin umbi chiacpadombuen naindambi, quepampic.

⁷⁴ Abi chieshënquidon chieshënsho min tsiuecquido mënchiquendambi. Adoac dacuëdenquio yec umbi namiaido yanendac, quepampic.

⁷⁵ Aden ambi namiaid yec abi tantiaquid uënësabi yec bëdambuec tabadquid iquendac. Aden chiec onquiashien aton mado chiec Sacadias nadec onqueuapanëdash:

⁷⁶ Nuquin Papan Chomiaidquio chuibanquidquio mibia icsho issun utsibon: Nuquin Papan oncamiaidquio nec, mibi caindac, mado. Chuiquid tapambo choec, queshun podquied nacnenacbimbuen: Nuquin Icbombo choeque. Mimbi icsambuen naid ënash bëdambuec tabadta, quequin aid chuiquidquio mibi iquendac.

⁷⁷ Adquid icquin nuquin matses chiec: Mibi cuidenquio yec mimbi icsambuen naid tantienquio yec bëshunshun bëdambuen isquin Nuquin Papan mibi abëdi tabadmendac, quequin chuibanquid mibi iquendac, mado.

⁷⁸ Mibi oncamequid Nuquin Papan nuqui cuidte bunenquio icquin matses tantiaquid icquin badiadnuc uëshë chënquecunacbimbuecquid nuqui cuidmenquiocquid abucshun chomendac.

⁷⁹ Aden chomiac choshon uëshëmbo icnuc isquin tantiacbimbuen matses abimbo tantiamendac. Icsambuen naquidombo icsho Nuquin Papan cuidtequido nec, quequin tantiamendac. Aden tantiamiac aid tantiaquid yanash dacuëdenquio yanec bëdambuec tabadendac, quequin Sacadiasën chuipanëdash.

⁸⁰ Adashic Sacadiasën mado Uan canicuensho Nuquin Papan tantiamiaidquio iquec shubu nibëdacno capucuennepanëdash ambi isadaidbo chuibennete uëshë choabicnuc.