Doma 9 - El Nuevo Testamento en matsés

10. Nuquin Papan isadaidbo bëdambuen isaid ( 9.1—11.36 ) Isadaidbo quequin Pabadon chiaid

^1-2 Cun matses isadaidbo tantiaquid Nuquin Papa nec. Aden abi tantiaquid cun matsesën bëdambuen tantienquio iquec, quiash uënësquio yec shubitiadquio iquebi. Muainquio iquebi. Esuquidistu tantiaquid icsho Nuquin Papan Mayan Bëdan tantiamiaid icquin abimbo chiec nebi.

³ Cun matses isadaidbo tantiec uënësquio yec tsadebi. Nuquin Papan: Min matses abitedi cuidmenquio icnuen mibiuidtsëqui Esuquidistubëd tabadmenquio icquin mëyadtequid yacno nidmequin cuidnu, capatecnëdani. Adoac: Ai, cun matses isadaidbo cuidenquio icnuen ubided cuid, quetsenondabi.

⁴ Cun tsusedpa Acobo Nuquin Papan Isadaid cuënaidën tsiuecquidotedi isadaidbo tantiaquin Nuquin Papan nadopampic: Cun matses mibi icsho isash mibëd tabadebique. Mibi ismenu, quequin cun matses tabadacno abu ushu bëchamauanquiecquid chomequin ismepampic. Adashic nadpampic: Umbi chiacpadec bëdambuec tabadsho mibi bëdambuen isquin bëdambo icmendambi, queshun ambi: Naden nata, quequin chiaid Moises dada uamepampic. Adoac abi tantianuen tabadte shubumpi uashunac Nuquin Papan abi bëdambuen tantiec tabadte isadaidbo chuipampic. Adshumbic: Bëdambuen isendambi, quequin Nuquin Papan cun tsusedpabo chuipampic.

⁵ Tsusedpabon tsiuecquido yec Nuquin Papan chiampicpadquiequi isadaidbon chidon tishac Esus matsesac caondash. Aidi Mesias Nuquin Papan Chomiaid abipadquidquiobidi yec abitedishun Icbombo matsesac caondash. Adquid icsho: Mibi bëdamboshë iquec, canuna ënenquio icquin. Amen.

Isadaidbon Esus tantienquio yaid

⁶ Umbi chuibocpaden cun matses isadaidbo dadpenshun Esuquidistu tantienquio iquec. Adsho issun Nuquin Papan ambi chiampicpadombuen nainquio iquec ¿quectabi que? Padenquio. Cun matses dadpenshun Nuquin Papa tantienquiocsho issun Nuquin Papan: Cun matses nec, cainquio iquec.

⁷ Ëndenquimboshë Abadauanën tsiuecquido abitedi Nuquin Papan: Cun matses nec, caidopenquio icnuc Nuquin Papan: Min mado Isaquën tsiuecquido cun matses caindambi, quequin chuipampic.

⁸ ¿Abadauanën bacuëbotedishun tsiuecquidotedida Nuquin Papan cun matses caido nepec? Padenquio. Ambi chiampicpadombuen naquido icsho Isaquën tsiuecquidotedi Nuquin Papan cun matses caido nec.

⁹ Naden Nuquin Papan Isac tishte chuipampic: Umbi tantiacpaden nadquid uëshën umbi namiac min chido Sadan min mado tishendac, quequin Nuquin Papan Abadauan chuipampic.

¹⁰ Aden chiampid icnubi nuquin tsusedpa Isaquën aton chido Debeca bedshun bacuë usundomiac abi ushëmbi bacuë daëd tishpampic.

^11-13 Bacuë daëd tishabi icshobi aid bëdambuen nainquio yec, icsambuec tabadtiapimbo icnubi Nuquin Papan Debeca naden chuipampic: Min mado tsiuecquid icshobi bëyucquidën nashunendac, quepampic. Adembidi Isaquën mado chuiquin Nuquin Papan Ambi Chiaid naden dada uamepampic: Acobouidtsëqui tantiaquioquimbi Esau bëdiactsëc tantiatsembi, quepampic. Nuquin Papan ambi tantiacpadombuen adombuembidi tantiamec, quequin nuquitedi tantiec. Ambi tantiaid matses icsho bëdambuen nainquio yec icsambuec tabadquid nec, quenquio icquin Nuquin Papan ambi tantiacpaden tantiamendac.

Ambibi tantiacpadombuen Nuquin Papan naid

¹⁴ Umbi aden chuisho tantiash: Nuquin Papan ambi chiacpadombuen bëdambuen nainquio ictsiash ¿quecta ique? Padenquio.

¹⁵ Naden Nuquin Papan Moises chuipampic: Umbi tantiactedi matses bëdambuen isendambi. Utsitedi uënësquio icnuc cuidte bunenquio iquebi, quequin chuipampic.

¹⁶ ¿Ambembi nasho Nuquin Papan ubi bëdambuen istsiash, quequin abi bunacpaden nashoda Nuquin Papan matses bëdambuen ispec? Padenquio. Nuquin Papan ambi tantiactedishun abi tantiasho Nuquin Papan uënësquio icquin bëdambuen isendac.

¹⁷ Ëndenquimbo Nuquin Papan Equipito yacnocquidon chuiquid tapa padaon caid naden chuipampic: Nadatiambo icquidquio nec, ma ubi canu, queshun mibi chuiquid tapa icmiondambi. Adquid icsho ma matses abitedishunquio ubi tantianu, quequin Nuquin Papan padaon chiaid Moisesën dada uapampic.

¹⁸ Aden Nuquin Papan tantiacpadombuen utsi utsien icsambuen naquido pamumëdacbimbuecnuc icmebanec. Adoshombic utsi utsien uënësquio icquin tantiaquin abi tantiaquido icmebanendac.

¹⁹ Ubi adsho ¿tantiashta mibi nadpe?: ¿Atotsi queshun Nuquin Papan matses cuidpec? ¿Abitedishun Icbo icquin ambi tantiacpaden nasho issunda matsesën: Aden nainda, capec?

²⁰ ¿Matses icquinda mimbi Nuquin Papa chushcapatsia? ¿Ada abi nacnenquid matsun: ¿Atotsi queshun ubi aden nacneno? quequin chushcapec?

²¹ Matsu nacnenquidën ambi tantiacpadombuen nacnenendac: Nëid nidaid tëshë tëchu bëdambocquid acte uetequid nacnennu. Nëid nidaid tëshë matsumpi icsactsëcquid nacnennu, queshun matsu nacnenquid.

²² Adombuembidi Nuquin Papan ambi tantiacpadombuen cuidendac. Nadatiambocquid icquin icsambuen naquido cuidquid nebique. Ismenu, quebuedi ambi cuidtequidobi baded cuidenquio iquec. Adoshombic ambi tantiacpadëmbi aido adec icsambuec tabadsho issun cuidquin chian annëdënquiacno nësecaindac.

²³ Nuquin Papan matses bëdambuen iste bunquin icsaisambo yec bëdamboshëcquid icquin nuqui tantiamete bunec. Nuquin Papa nuqui tantiec uënësquiocquid icquin ambi ëndenquimbo nacnenampicno bëdamboshë yacno tabadmendac.

²⁴ Aden ambi tantiacpadombuen Esus tantiasho Nuquin Papan nuqui bëdambuen isec. Isadaidbon Esus tantiasho bëdambuen isquinc isadaidpembon abi tantiasho bëdambuen isquinc caindac.

²⁵ Naden chuiquin Nuquin Papan oncamiampid Oseasën dada uampid iquec: Utsibo umbi cun matses cacmaidobi tantiamebenshun cun matses caindambi. Adembidi umbi bëdambuen tantiacmaidobi matses utsibo bëdambuen tantiendambi, quequin chuipampic.

²⁶ Nadentsen ashunquiobidi Nuquin Papan matses utsibo chiaid Oseasën dada uapampic: Mibitedi umbi: Cun matses, cacmaido nec. Adquid icbuedi Nuquin Papa uënëstiapimbocquidën: Cun mado nec. Cun champi nec, caido iquendac, quequin chuiquin Oseasën dada uapampic.

²⁷ Isadaidbo chuiquin Isayasën naden chuipampic: Masi dadpenquio yactedi caidnëdaidobi isadaidbo daëdpactsëcshun bëdambuen tantiasho bëdambuen isquin aidtedtsëqui Nuquin Papan cuidenquio icquin abëd tabadmendac.

²⁸ Ambi chiampicpadombuen nëbi ambi tantiacpadën matses abitedimbo ambi naid chuimeshun abi tantiesabotedi Nuquin Papan uesquin cuidendac, quequin Isayasën dada uapampic.

²⁹ Nadembidi Nuquin Papan Chiaid dada uaquin Isayasën ënden chuiuapampic: Abitedishun Icbo nadatiambocquid icquin Nuquin Papan uesquin cuidabi nuquin tsiuecquido nibëdquio ictsiandac. Shubu dadpen icquid Sodomabëta Comoda yacnoquid matses nëdëncacbimbuen cuidac nuquitedi nëbi nibëdquio ictsiandac, quequin chuipampic.

Isadaidbo bëdambuen istiapimbo icte chiaid

³⁰ Aden chiaid tantiash ¿atotsi nuqui quendac? Matses utsibon abi tantienquio icbuedombi ambi chiacpadombuen naquin tantiabensho icsaisabimbuecnuc bëdambuen isendac. Ambi chiacpadombuen naic tabadnu, quesabobi Nuquin Papan abi tantiasho icsaisabimbuecnuc isendac.

³¹ Padnuen isadaidbon: Moisesën chiampiduidi nasho issun Nuquin Papan ubi bëdambuen istsiash, quebuedombi abitedi nainquio icsho bëdambuen isenquio icpampic.

³² ¿Atotsi queshun Nuquin Papan isadaidbo bëdambuen istiapimbo icpec? Ambi chiacpadombuenuidi naquin bëdambuen ismembi, quebuedombi abi bunacpadec tabadquin Nuquin Papa bëdambuen ismequidquio tantienquio iquec. Adquid yec cuënoten tocoshquetanec uebudacbimbuecquido nec.

³³ Naden chuiquin Nuquin Papan Chiaid dada uapampic: Edusaden yacno cuënote dectanendambi. Aid sec matses tocoshquetanec uebudcuededendac. Nëid tantiaquid icsho cuidenquio icquin ubi yacno tabadmendambi, quequin chuiquin dada uamepampic.