Doma 8 - El Nuevo Testamento en matsés

9. Nuquin Papan Mayan Bëdan bëdambo icmiaido nuqui nec ( 8.1-39 )

¹ Nëbi Esuquidistubëd abentsëc yacbimbuec tabadquid icsho Nuquin Papan nuqui cuidenquio iquendac.

² Nuquin Papan aton Mayan meniac nuqui Esuquidistubëd abentsëc yacbimbuec tabadquido nec. Adquido yec nëbi mëtaniacbimbuec icsambuec tabadbuedi mënchicacbimbuec bëdambuec tabadquid yanash nuqui uënësacsho cuidenquio iquendac.

³ Moises dada uamiampidën chiacpadec matses bëdambuec tabadtiapimbo yec uidëmpentsëcquio icsho issun Nuquin Papan aton Mado matses uidëmpentsëcquiocquid yacbimbuecquid chomepanëdash. Adshumbic Nuquin Papan icsambuen naquido cuidenquio icnuen aton Madoded cuidmequin uënës uamepanëdash.

⁴ Nuquin Papan Moises chuiquin dada uamiampid bëdambuec tabadmianquid icnuc aidën chiacpadombuen naic nuquitedi bëdambuec tabadtsiac. Nuquitedi matses yec uidëmpentsëcquio icquid icquin icsambuen nateuidi bumbuedi Nuquin Papan Mayan Bëdan tantiamiacpadec bëdambuec tabadendac.

⁵ Aden Nuquin Papan Mayan Bëdan Esus tantiamiaid yec aidën tantiamiacpadec bëdambuec tabadte bunec. Padnuen uidëmpentsëcquiocquid icquin icsambuen nateuidi bunquin: Ubi bunaid nanu, quequin ambi tantiacpadenuidi icsambuen naic.

⁶ Aden abi bunaiduidi tantiaquin naic icsambuec tabadquid uënësacsho ënenquio icquin cuidacno nësecaindac. Nuquin Papan Mayan Bëdan tantiamiacpadec tabadquidien dacuëdenquio icnuc abëdi tabadmendac padpidec uënëstiapimbo icnuc.

⁷ Icsambuen nate bunquidëmbien Nuquin Papan: Naden nata, quequin chiaid nate bunenquio icquin ambi icsambuen naiduidi tantiaquin Nuquin Papa chieshënquid nec.

⁸ Adquid icquin icsambuen naquidon Nuquin Papa: Mibi bëdambo iquec, cametiapimbo iquec.

⁹ Nëbi Nuquin Papan aton Mayan Bëda meniaid icquin mibi bunacpaden icsambuen nainquio yec bëdambuec tabadquido mibitedi nec. Nuquin Papan Mayan Bëda mibëd iquec. Esuquidistun Mayambëd tabadesa yec Esuquidistu tantiaquidpenquio nec.

¹⁰ Esuquidistu mibëd iquec. Adquid icsho Nuquin Papan Mayan Bëdan tantiamiacpadec tabadsho Nuquin Papan bëdambuen isaido mibi nec. Icsambuen nabanquido yec min dada uënëstequid nendac.

¹¹ Nuquin Papan Esus uincuenmepanëdash. Aidëmbi aton Mayambëd tabadquid yec uënësacsho uincuenmequin mibitedi dada chuca uaindac.

¹² Cun utsibo, adquid icnuc uidëmpentsëcquio icquid icquin nuqui icsambuen nate bunacpadenuidi naic tabadbuedi nëbi adec tabadenquio icnuna.

¹³ Aden chiaqui mibitedi icsambuen nabanec tabadec uënësacsho ënenquio icquin cuidacno nësecaindac. Padnuen Nuquin Papan Mayan Bëdan tantiamiacpadec tabadquin mibitedishun icsambuen naid ënendac. Adash uënësacsho Nuquin Papan abëdi abi yacno tabadmendac.

¹⁴ Aden aton Mayan Bëdan tantiamiacpadec bëdambuec tabadquido icsho Nuquin Papan: Cun mado nec. Cun champi nec, caindac.

¹⁵ ¿Nuquin Papan Mayanënda mibitedi icsambocquidën iuabimbuecnuc dacuëdmepec? Padenquio. Mibitedi dacuëdmenquio iquec. Aidëmbi namiac mibitedi Nuquin Papan: Cun mado nec, Cun champi nec, caindac. Aidën tantiamiacpadombuen Nuquin Papa chuiquin: Papa papa, quequin nuqui chiannec.

¹⁶ Nuquin Papan Mayambëd nuquin mayan daëdash tabadnuc: Nuquin Papan mado nebi. Aton champi nebi, nuquitedi quendac.

¹⁷ Cun mado nec. Cun champi nec, queshun nëbi Nuquin Papan ambi chiampicpadombuen bëdambuen isquin uënësacsho abëdi tabadmequin nuqui bëdamboshë icmendac. Adoaid yec Esuquidistubëd nuqui tabadendac. Esuquidistu mëyanquin natiamequin mëyadmequiopanëdash. Adembidi chieshënquin natiamequin nuqui mëyadmendac. Adoaid yec iuecpactsëc yash Esuquidistubëd bëdamboshë yacno tabadsho: Mibi bëdambo iquec, quequin Nuquin Papan chiendac.

Nuquin Papan matses bëdamboshë icmete cainaid

¹⁸ Aden Nuquin Papa yacno bëdamboshë icte cainec tabadquin nuqui nidaidën natiec tabadaiduidi ma nuqui tantiatiapimbo iqueyoc.

¹⁹ Aden Nuquin Papan: Nëid cun mado nec. Nëid cun champi nec, quequin abitedi ismete uëshë cainec ambi uaidtedi: ¿Nëbimbobida napeba? quequin cainec tabadec.

²⁰ Nuquin Papa abitedimbo uaic: Ubi bunacpadec yanta, quequin chuipampic. Adoaid yec abibi yanenquio yec Nuquin Papan tantiacpadequi yampampic. Adash bëdambocquid icbuedi abitedi uënëstequidouidquio yampampic.

²¹ Adampid icnubi Nuquin Papan bëdamboshë icmete cainec tabadec. Aden Nuquin Papan uaid icquin nidaidën icquidtedi nibëdanmete uëshë icnuc mënchicshun utsi uain bëdamboshëcquid icmendambi abi quiampicpadombuembidi: Cun mado nec. Cun champi nec, caido iquendac.

²² Nuquin Papan uaidtedi natiamiac natiec tabadec nëbimbobi: Utsi uapashuni, queded quededec tabadec. Chido bacuë nëncuenash paëmbo icnuc: Badedquio tishmepashuni, quiacbimbuec ambi uaid abitedi tabadec, quequin nuquitedi tantiec.

²³ Adembidi nuquitedi natiamiac natiec tabadquid icshobi: Nëid Cun Mayambëd tabadquid nec, queshun Nuquin Papan bëdambuen isquin: Cun madobëd cun champi nec, queshun ambi tantiaid uëshën Nuquin Papan ubi uënëstiapimbo icquid icmendac, quequin tantiaquin natiamiaqui chieshtoenquio icquin nuquin dada chuca uate nuqui cainec.

²⁴ Aden chieshtoenquio icquin cainquido icsho Nuquin Papan nuquitedi abi yacno tabadmendac. Aden cainec tabadquin nuqui isaidtedi caintiapimbo iquec. Adquid icsho ¿tsuntsin ambi isquin tantiaid cainuapec?

²⁵ Aden ambi isaidquio cainenquio icquid icnubi nuqui isacmaidquio cainquido icsho natiamiac tabadquimbi chieshtoenquio icquin cainec nuqui tabadec.

²⁶ Adembidi Nuquin Papan Mayan Bëdan nuquitedi uidëmpentsëcquiocquid icshobi nashunec. Nuquin Papa bëdambuen tantiaquin chuinu, caqui: Tantiadenquio iquec, quiash shubitiadquio icsho issun aton Mayanën nuqui tantiaquin Nuquin Papa onquenquio icquin tantiamec.

²⁷ Matsesën tantiaidtedi tantiaquidquio Nuquin Papa nec. Adquid icquin abi bunacpadombuen: Ma Nuquin Papan abi tantiaquido bëdambo icmenu, quequin tantiaquin aton Mayanën onquenquio icquin abi chuisho Nuquin Papan tantiec.

Nuquin Papan bëdambo icmete chiaid

²⁸ Nuqui naden tantiec. Ambi tantiampicpadombuen abi tantiaquido bëdambo icmete bunquin Nuquin Papan bëdambuen nashunec. Aido ambi tantiampicpadombuen tantiamebenquin: Nuquibi icnuc cho, caquin cuënaido nec.

²⁹ Ëndenquimboshë Nuquin Papa aido tantiec nadpampic: Nëido Cun Madobimbuecquid icmeshun aidon buchi bëyucquidbimbuecquid Cun Madombo icmendambi. Adshumbic aidën utsibobimbuecquid tsiuec dadpenquio icmendambi.

³⁰ Ëndenquimboshë abitedimbo uabi yequi Nuquin Papa nadpampic: Nëido Cun Madobimbuecquido icmembi, abi quiampicpadombuembidi tantiamebenquin: Nuquibi icnuc cho, caquin ambi cuënaido nec. Aido Nuquin Papan icsaisabimbuecnuc isendac. Adembidi bëdamboshë yacno tabadmendac, quequin nuqui tantiec.

³¹ Aden tantiasho ¿atotsi nuquitedi cape? Nuquin Papa tantiasho utsibon chieshënquin: Icsa uanu, cashobi Nuquin Papan nuqui cudasquin icsa uamenquio iquendac, quequin nuqui tantiec.

³² Nuquin Papan nuqui tantiaquin aton Madombo cudasenquio icquin nuqui cuidmenquio icnuen aton Madoded cuidmequin uënës uamepanëdash. Adshumbic aid tantiasho nuqui bëdambuen isquin uënësacsho Aton Madobëd tabadmequin abitedi menendac.

³³ Nuquin Papan ¿Adquid icmiacshoda utsibon: Mimbi icsambuen nabanec, capatsiash? Padenquio. Aido Nuquin Papan ambi tantiacpadombuen icsaisabimbuenuc icmendac.

³⁴ Adquid icshoda ¿Utsibon: Aido natiamequin cuidquin Nuquin Papa nibëdacno nidmenu, queshunda naic? Padenquio. Esuquidistu abided cuidadec uënësacsho uincuenmepanëdash. Aidëmbi nëbi Nuquin Papan dayun abiucquio tsadquin nuquitedi tantiaquin: Aid bëdambuen ista, quequin Nuquin Papa chiannec.

³⁵ Esuquidistun tantiaido icsho ¿tsuntsin nuquitedi Esusbëd cuëshëdmepec? ¿Natiamiac mëyadsho issunda Esuquidistun nuquitedi tantienquio icquin cuëshëdmepec? Padenquio. ¿Natiec tabadshoda Esuquidistun nuquitedi tantienquio icpec? Padenquio. Utsibon chieshënaid icsho bëdambuen isquinc pete nibëdnuc bunsho bëdambuen isquinc dashcute nibëdsho bëdambuen isquinc: Badedquio uënëstsiabi, quec dacuëdec tabadsho bëdambuen isquinc chieshëmënquidon: Badedquio cuessunnenu, casho bëdambuen isquinc caquin Esuquidistun ënenquio icquin nuqui tantiec.

³⁶ Nuquin Papan naden chuiquin dada uamepampic: Mibi tantiasho chieshëmënquidon: Cuessunnenu, ubitedi cadedcadedec. Ubitedi nëish iua obeca buanshun cuessunniacbimbuen cuessunnenu, cadedcadedec, quequin chuipampic.

³⁷ Aden natiamiaid icshobi nuqui tantiaquidquio icquin Esuquidistunuidtsëqui chieshtoenquiocquid nuquitedi icmendac chieshëmënquido dëniacquin cuesacbimbuen.

³⁸ Naden ënenquio icquin tantiembi. Nuquitedi Nuquin Papan ënenquio icquin tantiaido icsho nadquidtedishun cuëshëdmenquio iquec. Uënësmequin cuëshëdmenquio icquinc, uënësabicsho cuëshëdmenquio icquinc, Nuquin Papabëd icquidombi cuëshëdmenquio icquinc, podobitsi icsabon aton chuiquid tapabëtan cuëshëdmenquio icquinc nëbi icquidon cuëshëdmenquio icquinc, iuecash icquidon cuëshëdmenquio icquinc,

³⁹ abuc nidacsho cuëshëdmenquio icquinc, nidaid ëquëducquio nidacsho cuëshëdmenquio icquinc, Nuquin Papan uaid utsi abitedishun cuëshëdmenquio icquinc nuqui caindac. Nuquin Papan nuquitedi bëdambuen tantiaido icsho ënenquio icquin Nuquin Icbo Esuquidistun nuquitedi cuëshëdmenquio iquendac.