Doma 6 - El Nuevo Testamento en matsés

6. Esuquidistu tantiaquid icsate bunenquio yaid ( 6.1-23 ) Esus tantiaquid bëdambuec tabadquid quiaid

¹ ¿Atotsimbi utsi chuipe? Adembi Icsambuen nabanembi. Mabi Nuquin Papan uditsëc bëdambuen isnu ¿queshoda nuqui bëdambuen ispec?

² Padenquio. Nuquitedi uënësacbimbuen padpiden icsambuen nate bunenquio iquec. Adquid icquin ¿icsambuen naiduidi naicta nuqui tabadpe?

³ Esuquidistu uënësaid tantiaquid yec aidbëd abentsëc yacbimbuec tabadquid nebi, quequin tantiasho acten mentoaid nebi, ¿quequinda mibitedishun tantienquio ique?

⁴ Aden acten mentoaido yec Esuquidistubëd uënësacsho chococacbimbuecquido nuquitedi nec. Adecbidi aidbëd uincuenacbimbuec ma Esuquidistubëd tabadnu, queshun utsiacbimbuecnuc icmiaido nuquitedi nec. Aden Nuquin Papa nadatiambocquid icquin Esuquidistu bëdamboshëcquid icmequin uincuenmepanëdash.

⁵ Adec Esuquidistu uënësaid tantiaquid yec aidbëd abentsëc yacbimbuec tabadquido nuquitedi nec. Adecbidi uënësacsho uincuenmiaid tantiaquido yec aidbëd abentsëc yacbimbuec tabadec nuqui abi yacno tabadtequid nendac.

⁶ Ënden icsambuen naquido nuquitedi iccondac. Adquid icsho Esuquidistubëta cueste napotiaidën dectanacbimbuecquido nebi, quequin nuquitedi tantiec. Aden dectanquin nuquitedi icsambuen naidbëta icsambuen tantiaidtedi nibëdanmepanëdash. Adquid yec nëbi nuquitedi icsambo icmianquidën iua ictiapimpo iquec.

⁷ Matses uënësquin ambi icsambuen naid natiapimbo iquec.

⁸ Adec Esuquidistubëd uënësacbimbuecquid nebi, quequin aid tantiaquid yec aidbëd abi yacno tabadendabi, quequin nuquitedi tantiec.

⁹ Esuquidistu uincuenash padpidec uënëstiapimbo iquec. Uënësquid icbuedi nëbi padpidec uënëstiapimbo iquec, quequin nuquitedi tantiec.

¹⁰ Icsambuen naquido cuidmenquio icnuec Esuquidistu abentsequi abided cuidadec uënëspanëdash, padpidec uënëstiapimbo icnuec. Adbuedi nëbi Nuquin Papa bëdambo icmec aidbëd tabadec.

¹¹ Adembidi icsambuen naquido icbuedi uënësacbimbuecquid nebi, quequin mibitedishun tantiata. Adbuedi nëbi mibitedi Nuquin Papa bëdambo icmenuec Esuquidistubëd abentsëc yacbimbuec tabadec.

¹² Adquid icnuc icsambuen tantiaquin nabanec tabadenda. Min dada uënëstequid neque. Min dadan bunacpadombuen nabanec tabadenda.

¹³ Icsambuen nabanec tabadec uënësacbimbuec nuquitedi icpondac. Adquid icbuedëmbi uincuenacbimbuen Nuquin Papa tantiabenshun icsambuen naic tabadenquio icquin aid bunacpadombuen naic bëdambuec tabadnuna.

¹⁴ Nuquin Papan: Naden nata, quequin chuiquin Moises dada uamiampidtedi tantiaquin nabanondaidi mibitedishun aidën chiacpadombuen natiapimbocquin abi tantiasho Nuquin Papan bëdambuen isendac. Aden bëdambuen isquin tantiac icsambuen naic tabadte bunenquio mibitedi yanendac.

Nuquin Papa tantiaquin nabante chiaid

¹⁵ Nuquin Papan nuquitedi bëdambuen isec, quequin chuisho tantiashun naden icsambuen tantienda: Moises dada uamiampidtedi niacsho bëdambuen isquin cuidtiapimbo iqueque. Ambi chiaid niacquin icsambuen nanu, ¿quequinda tantie? Aden icsambuen tantienda.

¹⁶ Mibitedishun naden tantiec: Icbon chiacpadombuen iuan nabanquid nec. Adquid icnuc ambi tantiacpadombuen icsambuen nabanec tabadec uënësacsho ënenquio icquin cuidacno nësecaindac. Padnuen ambi chiacpadombuen naic tabadsho Nuquin Papan icsaisabimbuenuc bëdambuen isaid mibi iquendac.

¹⁷ Ënden mimbi icsambuen naid ëntiapimbo yec mibitedi tabadpondac. Adec tabadsho Esus abided cuidadaid chuibanac: Abimbo caic, queshun tantiabenash aidën chiacpadec mibitedi bëdambuec tabadcuenondac. Aden namec mibi bëdambo iquec, quequin Nuquin Papa chiombi.

¹⁸ Nëbi mimbi icsambuen naid ënshun Nuquin Papa tantiabenash aidën chiacpadombuen utsibo bëdambuen nashunec mibitedi bëdambuec tabadcuenondac.

¹⁹ Matses icquin umbi chuibanac tantiadenquio iquec, nëidon canushe, queshun bëdambuen tantiamenuen cuembo mibitedi chuibanembi. Nuquin Papan Chiaid niacquin icsambuen nateuidi bunquiec mibitedi icsaded icsadedpondac. Adec tabadbuedi nëbi Nuquin Papa tantiabenshun aidën chiacpadombuen naic bëdambuec tabadta.

²⁰ Mibitedi iuabimbuen utsi natiapimbo icquin icsambuen nabanec tabadec: Nuquin Papan chiacpadombuen naic tabadnu, quetiapimbo mibi icpondac.

²¹ Adec tabadnuc ¿atotsi mibi bëdambo icmiante iccosh? Nëbi mibitedi icsambuec tabadquido icquin mimbi naid chienquio yec dacuëdec uënësacbimbuec tabadsho ënenquio icquin cuidacno nësecaindac.

²² Nëbi mimbi icsambuen naid ënshun Nuquin Papa tantiaquin aidën chiacpaden nabanec mibitedi tabadec. Adec tabadquin bëdambuen nabanec mibi bëdambouidi iquec. Aden nabanec tabadsho Nuquin Papan ënenquiocquin abëdi tabadmendac.

²³ Icsambuen naic tabadec uënësacsho Nuquin Papan ënenquio icquin cuidacno nësecaindac. Padnuen Nuquin Icbo Esuquidistubëd abentsëc yacbimbuec tabadquid icsho Nuquin Papan ënenquiocquin abëdi tabadmendac.