Doma 5 - El Nuevo Testamento en matsés

5. Nuquin Papabëd tabadte cainaid ( 5.1-21 ) Esus tantiaquido Nuquin Papan bëdambuen isaid

¹ Nuquin Icbo Esuquidistu uidtsëqui tantiasho Nuquin Papan nuqui bëdambuen isquin cuidenquio iquendac isaisabimbuecnuc. Adoaid yec nuqui bëdambuec tabadendac.

² Abi tantiaquido icsho nuquitedi cuidmenquio icnuec abided cuidadec Esuquidistu uënëspanëdash, quequin nuquitedi tantiec. Aid tantiashouidtsëqui Nuquin Papan bëdamboshë yacno abëdi nuqui tabadmendac, quec chieshtoenquio yec nuqui cuishonquec.

³ Nadectsen nuquitedi cuishonquec: Abi tantiaquido icsho utsibon chieshënquin natiamiaqui bëdiactsëc tantiactsëcbuedi chieshtoenquio yec tantiaquidquio yanebi, quectsen nuquitedi cuishonquendac.

⁴ Aden chieshtoenquio icquin Esus tantiasho Nuquin Papan nuqui bëdambuen isquin: Bëdambo iquec, caindac. Adoac: Uënësacsho uincuenmeshun abi yacno tabadmendac ambi chiampicpadombuen, quequin nuquitedi cainec.

⁵ Aden chieshtoenquio icquin cainquin abi tantiaquid icsho Nuquin Papan ¿ada cacunmepec? Padenquio. Nuquin Papan nuquitedi tantiaquidquio icquin aton Mayan Bëda nuquibëd tabadmec, quequin nuquitedi tantiec.

⁶ Nuquitedi icsaquido yec Nuquin Papa yacno tabadtapimbo icpondac. Adec matses abitedi icsambuec tabadsho Nuquin Papan uesquin cuidtsennubi abi tantiaquido cuidmenquio icnuec abided cuidadec Esus uënëspanëdash.

⁷ Matses bëdambocquid icsho ¿cuesanquidën: Cuessunnenu, casho tantiashunda dadpenshun: Padi. Ubiquien cuessunne, capatsiash? Padenquio. Utsin abi nashunquidquio icsho cuessunnemenquio icnuen: Nëid cuessunnenquio icquin ubi na, cachitembien ictsiash abentsëcshun.

⁸ Padnuen matses abitedimbo icsambuenuidi naic tabadnuc nuquitedi cuidmenquio icnuec Esuquidistu abided cuidadec uënëspanëdash. Nuquin Papan nuquitedi tantiaquiec, matses camenuen aden Esus namepanëdash.

⁹ Nëbi abided cuidadaidquio Esuquidistu tantiasho Nuquin Papan nuquitedi ambi chiacpadombuen namequin icsaisabimbuecnuc isendac. Aden bëdambo icmeshun abi yacno tabadtequid icmeshun Nuquin Papan abitedi cuidte uëshën nuquitedi cuidtiapimbo iquendac.

¹⁰ Abi chieshënquido icsho issun nuqui cuidte bunenquio icquin Nuquin Papan aton Madoded cuidmepanëdash. Aden aton Madoded cuidmiash nëish bëdanshun abi tantiaquido bëdambo icmeshun abi yacno tabadmendac. Nëbi Nuquin Papan uincuenmenëdaid icquin Esusën nuquitedi cuidmenquio iquendac.

¹¹ Adembidi aidën tantiamiacpadombuen nuquitedi cuidmenquio icnuen Esuquidistu uidtsëqui cuidmequid bëdambo iquec, quequin Nuquin Papa tantiec nuquitedi cuishonquec. Adembidi icsambuec tabadbuedëmbi nëbi Esuquidistu uidtsëqui tantiasho Nuquin Papan bëdambo icmendac.

Adambëta Esuquidistu chiaid

¹² Ëndenquimboshë abia matses uaid Adanëmba Nuquin Papan Chiaid niacquin icsambuen nasho cuidac uënëstequid yampampic. Adembidi matses abitedi Adanën icsambuen nampicpadembidi icsambuen naquido icsho Nuquin Papan uënëstequidouidquio matses icmepampic.

¹³ Nuquin Papan: Naden nata, quequin ambi chiampid Moises dada uamiabi icnubi matses abitedi icsambuec tabadpampic. Umbi Moises chuimiaid mimbi niac niaquec, Nuquin Papa quetiapimbo icnubi matses icsambuen naic tabadpampic.

¹⁴ Nuquin Papan chuibuedquiobi niacquin Adanëmba icsambuen nasho cuidac uënëstequid yanec taëpampic. Adan uënësambic aidën nacpadombuen icsambuen naic matses abitedishun icsambuen nasho adecbidi uënëstequiduidquio Nuquin Papan icmepampic. Naden nata, quequin Moises dada uamequin Nuquin Papan chiabi icnubi aidën chiaid niactiapimbo yec utsi naquin icsambuen nashobi adopampic. Adambimbuecquid Nuquin Papan Chomiaid nepanëdash.

¹⁵ Adanëmba Ambi Chiaid niacsho cuidquin aidba uënëstequid icmeshun aton tsiuecquido matses uënëstequidouidquio Nuquin Papan icmepampic. Padnuen Nuquin Papa matses bëdambuen ismequidquio abentsëc icnuc utsi adquid ictiapimbo iquec. Nuquin Papan: Piucquid ubi mene, quenquio icquin Esusuidtsëqui tantiameshun nuquitedi bëdambuen isec. Esuquidistun naid bëdamboshë icnuc Adanën naid icsamboshë icpampic.

¹⁶ Adanën icsambuen nanëdacpaden Nuquin Papa matses bëdambuen ismequidën icsambuen nambo iquec. Adan abentsëcshumbi icsambuen naquin Nuquin Papa cuidmiaidën matses abitedimbo uënëstequidouidquio yampampic. Nuquin Papan Chomiaid bëdambuen ismequidien matses icsaid bedshunash abided cuidadec uënëssun Nuquin Papa abi tantiaquidotedi bëdambuen ismec, icsaisabimbuecnuc.

¹⁷ Abi chuibuedi niacquin Nuquin Papa cuidmiash Adan uënëstequid yannëdacpadequi matses abitedi uënëstequiduidquio iquec. Esuquidistunuidtsëqui nac Nuquin Papan matses icsaisabimbuecnuc bëdambuen isquin: Piucquid ubi mene, quenquio icquin abi yacnombo abëdi Nuquin Papan bëdamboshë yacno tabadmendac.

¹⁸ Aden Adanën icsambuen nasho cuidampid icnuc aton tsiuecquido abitedimbo cuidquin Nuquin Papan uënëstequidouidquio icmepampic. Padnuen Nuquin Papan chiacpadec Esuquidistu abided cuidadaidën abi tantiaquid icsaisabimbuecnuc Nuquin Papa bëdambuen ismequin abi yacno ënëdenquio icnuc tabadmendac.

¹⁹ Matses abentsëcshun Nuquin Papan Chiaid niacquin icsambuen naquin tauampicpadequi aton tsiuecquido dadpenquio icsaquidouidquio yanac. Padnuen Nuquin Papan Chiaid niaquesambo icquin Esusën abi tantiaquido icsho bëdambuen isquin dadpenquio icsaisabimbuecnuc icmendac.

²⁰ Matses ambi icsambuen naid tantiamenuen ambi: Naden nata, quequin chiaid Moises dada uamepampic. Aidën chiaid chuisho tantiashi icsambuen naquido dadpenquio yampampic. Aden icsambuen naquido dadpenquioshë yansho issumbi Nuquin Papan matses tantiaquidquio icquin bëdambuen iste bumpampic.

²¹ Tauaquin matsesën icsambuen nasho cuidac uënëstequidouidquio yampampic. Adsho issun matses bëdambuen isnuen Nuquin Papan Ambi Chiaid niaquesambo Esusded cuidmepanëdash. Nëbi Nuquin Icbo Esuquidistu uidtsëqui tantiasho Nuquin Papan nuquitedi icsaisabimbuecnuc bëdambuen isquin ënëdenquio icnuc abëdi tabadmendac.