Doma 4 - El Nuevo Testamento en matsés

4. Abadauanën nampid tantiamete ( 4.1-25 ) Abadauanën Nuquin Papa tantiaid

¹ ¿Atotsi nuquin tsusedpa Abadauanën napampic?

² Ambibi tantiacpaden nasho Nuquin Papan bëdambuen isac: Bëdambocquid nebi, quetsempampic Abadauan. Padnuen Nuquin Papa chiec: Bëdambocquid nebi, quenquio icpampic.

³ Naden chuiquin Nuquin Papan dada uamiampid iquec: Nuquin Papa ambi chiacpadombuen naquidquio nec, quequin abi tantiaquidquio icsho Abadauan Nuquin Papan bëdambuen ispampic, quequin dada uamepampic.

⁴ Tantia. Naden chuinu. Chonoadquid icsho abi chonoadacpadquid piucquid menequid. Ambembi menenquio iquec.

⁵ Nuquin Papambien icsambuen nabuedëmbi Esus tantiasho aid matses bëdambuen isendac icsambuen naisabimbuecnuc. Aid matsesën abi bëdambuen ismete nainquio icshobi Nuquin Papan bëdambuen isec.

⁶ Aden matsesën abi bëdambuen ismete nainquio icshobi Nuquin Papan bëdambuen isac matses cuishonquetequid Nuquin Papan tantiamiac

⁷ Dabidën naden chuiquin dada uampid iquec: Nuquin Papan ambi icsambuen naid tantienquio yec bëshunshun bëdambo icmiaid nebi, quendac. Bëchish ucacbimbuen ambi icsambuen naid nibëdacbimbuecnuc Nuquin Papan bëdambuen isaid adquid nendac.

⁸ Nuquin Papan ambi icsambuen naidtedi tantienquio yec bëshunshun bëdambo icmiaid nebi, quendac matses, quequin dada uapampic.

⁹ ¿Shui dëbid dëtemequid isadaidbouidtsëquida Nuquin Papan bëdambuen ispec? Padenquio. Matses utsibotsen bëdambuen isendac. Adquid icnuc abi tantiaquid icsho Nuquin Papan Abadauan Ambi Chiaid niaquesabimbuecnuc bëdambuen ispampic, quequin chiombi.

¹⁰ ¿Ambi chiacpadombuen shui dëbid dëtemiacshoda Nuquin Papan Abadauan bëdambuen isbempampic? Padenquio. Shui dëbid dëtemiambo icquimbi Abadauanën Nuquin Papa bëdambuen tantiabempampic.

¹¹ Adoshon Abadauanën: Abi tantiasho Nuquin Papan ubi bëdambuen isec icsambuen naisabimbuecnuc, quequin tantiaquin Nuquin Papan chiacpadombuen naquin shui dëbid dëtemepampic. Adoaid yec Abadauan Nuquin Papa tantiaquidtedishun papabimbuecquid nepanëdash. Shui dëbid dëtemiacmaidombi abi tantiasho Nuquin Papan adembidi bëdambuen isec icsambuen naisabimbuecnuc.

¹² Adecbidi Abadauan shui dëbid dëtemiaidon papabimbuecquid nec. Abadauanën Nuquin Papa tantiabennëdacpadombuembidi tantiaquido aido nec. Abadauanën shui dëbid dëtemiambo icquimbi Nuquin Papa tantiabempampic.

Abadauanën tsiuecquido chiaid

¹³ Ëndenquimbo Nuquin Papan Abadauan chuiquin: Min tsiuecquido nidaid abitedi menendambi, quequin chuipampic. Nuquin Papan Moises: Naden nata, ¿quequin chiampicpadombuenuidi nashoda Nuquin Papan aden Abadauan chuipampic? Padenquio. Aden aidën chiacpadombuen nainquiocquin abi tantiasho Nuquin Papan bëdambuen isquin Abadauan chiec: Aden menendambi, quepampic.

¹⁴ ¿Nëbi Nuquin Papan: Naden nata, quequin Moises dada uamiampid niaquenquio icquin nabanquiduidi icshoda Nuquin Papan ambi chiampicpadombuen bëdamboshë yacno tabadmepec? Padenquio. Adquid icsho bëdambuen isquin ambo tabadmequin Nuquin Papan ambi Abadauan chiampid muaquin chiaid ictsempanëdash.

¹⁵ Nuquin Papan: Naden nata, quequin chiampid niacacsho Nuquin Papan matses cuidendac. Ambi: Naden nata, quequin chiampid nibëdnuc aid niactiapimbo icnuc nuqui cuidenquio ictsiash.

¹⁶ Nuquin Papan naden Abadauan chuipampic: Abadauan, umbi chuisho tantiash: Abimbo mimbi caic, quesho mibi bëdambuen isquin: Min tsiuecquido: Ubi piucquid mene, cainquiocquin aid nidaid abitedi menendambi, quequin chuipampic. Aden chuiquin ambi cuidenquio icquin bëdambuen iste Abadauanën tsiuecquidotedi tantiametiadquio icpampic. Nuquin Papan: Naden nata, quequin chuiquin Moises meniaid bedshun isadaidbouidtsëqui chienquio icquin adopampic. Abadauambimbuen abi tantiaquido icsho bëdambuen isendac. Aden ambia Nuquin Papa tantiaquid yec Abadauan nuquitedishun papabimbuecquid nec.

¹⁷ Nuquin Papan Abadauan chiampid chuiquin naden dada uamepampic: Nidaid utsi utsiec yacno tabadquidon papabimbuecquid mibi iquendac, quequin chuipampic. Aidi Abadauanën tantiaidquio Nuquin Papa nepampic. Aidi uënësaid uincuenmequidquio nec. Adecbidi nibëdquio icbuedi utsi uaquidquio nec.

¹⁸ Nuquin Papan Abadauan naden chuipampic: Tambantiapimbo yactedi min tsiuecquido dadpenquioshë iquendac, quequin chuipampic. Aden Nuquin Papan chuiboc cainequi: Cun bacuëbo nibëdec, quenquio icquin cainec Abadauan nadpampic: Ai, abimbo mimbi caic, quequin tantiapampic. Adnëdaidi Abadauan nidaid utsi utsiec yacno tabadquidon papabimbuecquid yampanëdash.

¹⁹ Aton seta 100ted yantiadtsëcquio yanec tsësiobudtsëcquimbi chieshtoenquio icquin Nuquin Papa tantiapampic: Umbimbo bacuë tishmetiapimbo iquebi. Adecbidi cun chido Sada machobudtsash uënëstiadtsëcquio yanec. Adquidën bacuë usundoshon tishtiapictsëcquio iquec, quequin tantiequi: Nuquin Papan abimbuen caosh, quequin ënenquio icquin tantiapampic.

^20-21 Nuquin Papa muequi nec, quenquio yec: Nadatiambocquid icquin ambi chiacpadombuen naindac, queshun bëdiactsëc tantiabuedëmbi Nuquin Papa tantiaquiopampic. Adshun: Mibi bëdamboshë iquec, quequin Nuquin Papa chiannepampic.

²² Adquid icsho Nuquin Papan: Ubi tantiaquidquio nec, queshun icsaisabimbuecnuc bëdambuen ispampic.

²³ Aden Nuquin Papan ambi Abadauan bëdambuen iste chuiquin dada uamiampid icnuc ¿Abadauanuidtsëqui tantiaquinda aden dada uamepampic? Padenquio.

²⁴ Nuquitsen Nuquin Papan ambi bëdambuen iste tantiamenuen aden dada uamepampic. Nuquin Icbo Esus uënësacsho uincuenmiaid tantiasho Nuquin Papan nuquitsen bëdambuen isec.

²⁵ Nuquin Papan tantiacpadec nuquitedi cuidmenquio icnuec nuqui icsambuen naid bedshunec abided cuidadec Esus uënëspanëdash. Adec uënësash uincueniaid tantiasho Nuquin Papan icsambuen naisabimbuecnuc nuqui bëdambuen isendac.