Doma 16 - El Nuevo Testamento en matsés

Mibi tantiembi, quequin chiaid

¹ Ubëtan Esus tantiaquid icsho umbi cun chu caid Pebe cuëmëdquid mibi chuinu. Shubu dadpen icquid Senquedeas caid yacnoshon Esus tantiaquidon chuiquidën namiaid Esus tantiaquido utsibo bëdambuen nashunquidquio nec.

² Aidi Nuquin Icbo Esuquidistun namiaid yec mibi yacno nidsho bëdambuen ista. Utsibobëta bëdambuen isquin nashunoshibique. Nuquibëtan Esus tantiaquid nec, queshun bëdambuen isquin aidën: Ubi nashun, cacpadombuen nashunta.

³ Aquidabëta aton chido Pisida chuiquin: Mibi tantiembi, quiosh Pabado, cata. Aido ubëtan Esuquidistun naid chuibennequid niondashe.

⁴ Esusën naid chuibennesho: Cueschitomane. Esusën naid chienda, chieshëmënquidon ubi casho aidon ubi nashunquin cuenmesho issun aidtsen cuessunetsempaccondash. Adsho issun: Mibitedishun bëdambuen naoc, caondambi. Adembidi aidon chiondaidon isadaidpembo matses utsibon: Mibitedishun bëdambuen naoc, quequin chuiuapondash.

⁵ Aquidabëtan Pidisidan shubuno Esus tantiec cuëdënec chochoquidotsen chuiquin: Mibitedi tantiembi, quiosh, cata. Adembidi nidaid cuëshë utsi Asia caid yacnoshon ambia Esuquidistu tantiabenondaid umbi tantiaidquio Epenetotsen chuita.

⁶ Mibitedi nashunondaidtsen Madia chuiquin: Aidën mibi tantiec, cata.

⁷ Adembidi cun matses isadaidbo Andedonicobëta Unias chuita. Aido ubëtan Esusën naid chuibennesho chieshëmënquidon bedshun quënën tsadunondashi. Aidombien ambia Esuquidistu tantiabempanëdash umbi padabi icnubi. Adsho aidoba Esusën: Ubi chuibenneta, cac chieshtoenquio icquin chuibennequido nec, queshun Esus chuibennequid utsibon: Bëdambo iquec, caido nec.

⁸ Umbi tantiaidquio Esus tantiaquid Ampidiatotsen chuiquin: Aidën mibi tantiec, cata.

⁹ Ubëtan Esuquidistun naid chuibanquid utsi Udbano chuiquin: Aidën mibi tantiec, cata. Adembidi umbi tantiaidquio utsi Estaquis chuiquin: Aidën mibi tantiec, cata.

¹⁰ Adembidi Apedes chuiquin: Aidën mibi tantiec, cata. Aidi utsibon chieshënaqui chieshtoenquio icquin Esuquidistu tantiaquidquio nec. Adembidi Adistobudon shubun icquidotedi chuiquin: Aidën mibitedi tantiec, cata.

¹¹ Adembidi cun matses isadaidbo Edodion chuiquin: Aidën mibi tantiec, cata. Utsitsen Nadsison shubun icquido Esus tantiaquidtedi chuiquin: Aidën mibitedi tantiec, cata.

¹² Chido Tidipenabëta Tidiposa chuiquin: Aidën mibi tantiec, cata. Aidon Esus tantiaquin dayacquio icquin Nuquin Icbon tantiamiacpadombuen nabanquido nec. Adembidi chido utsi Pedside cun chubimbuecquidquio chuiquin: Aidën mibi tantiec, cata. Aidi Esus tantiec dayacquio icquin Nuquin Icbon tantiamiacpadombuembidi naquidquio nec.

¹³ Dupo caid Esus tantiaquidquio chuiquin: Aidën mibi tantiec, cata. Adembidi aton tita cun tabimbuecquid chuiquin: Aidën mibi tantiec, cata.

¹⁴ Adoshombic nëidtedi chuita: Nëidic Asinquidito. Nëidic Pedeconte. Nëidic Edmes. Nëidic Patodobas. Nëidic Edmas. Nëidic abëd icquido Esus tantiaquidotedi chuiquin: Aidën mibitedi tantiec, cabanta.

¹⁵ Adoshombic nëidtedi chuita. Nëidic Pidodoco. Nëidic Udia. Nëidic Nedeobëta aton chuchu. Nëidic Odimpas. Nëidic aidobëtan Esus tantiaquidotedi chuiquin: Aidën mibitedi tantiec, cabanta.

¹⁶ Esus tantiaquido yec utsibobëd: Mibi tantiembi, cananta. Adembidi nëmbo icquido Esuquidistu tantiaquidtedishun mibitedi caic: Mibi tantiembi, quiosh.

¹⁷ Tantia. Chuinu, cun utsibo. Mibëtan Esus tantiaquido chieshënmequin cuëshëdmequido iquec. Aidon Nuquin Papan Chiaid mimbi tantiaidquio chienquio icquin mibitedi icsambuen namenuen muaquin chuibampec. Adquidobëd onquec tabadenda.

¹⁸ Nuquin Icbo Esuquidistun chiacpadombuen nainquio icquin aidon: Umbi chiaid tantiata, quequin abi bunaidquio namequin muaquin Esus tantiabentsëcquid icsambuen namec.

¹⁹ Mibitedi caic: Esus tantiec aidën chiacpadec bëdambuec tabadosh, quequin mimbi naid chuibededsho dadpenshun tantiac caosh. Adsho tantiash bëdambo yec cuishonquebi. Aden tantiaquidquio yanash icsambuen nainquio yec bëdambuec ma mibitedi tabadpanuna.

²⁰ Mibitedi bëdambuec tabadmequid icquin mibi dëniacmequin Nuquin Papan matses icsambuen namequidquio Mayan Icsa Satanas cuenmendac. Ma Nuquin Icbo Esusën: Mibitedi tantiaquiembi, quequin mibitedi ismendac.

²¹ Ubëtan Esusën naid chuibennequid Timoteon mibitedi tantiec. Adembidi Dusio yec Ason yec Sosipatodo yec quequin cun matses isadaidbon mibitedi tantiec.

²² Nëid dada uaquidquio Tedsio caid nebi. Adquid iquec Esus tantiaquid icquin umbitsen mibitedi tantiembi, quequin aidtedpactsëc chiombi.

²³ Pabado nebi. Cayon shubu yacno iquebi. Esus tantiaquido iccuededec nëid shubu yacno pudued puduedosh. Aidontsen mibitedi tantiec. Adembidi Edaston mibitedi tantiec. Aidi nëid shubu dadpen icquidon chuiquidën chiacpadombuen piucquid bedbenneshun dayun uaquid nec. Nuquin utsibimbuecquid Cuadtontsen mibitedi tantiec.

²⁴ Doma yacnocquido icsho mibitedi tantiaquin ma Nuquin Icbo Esuquidistun bëdambuen isquin mibitedi bëdambuen tabadmepanuna. Amen.

Nuquin Papa bëdamboshë iquec, quequin ënquin chiaid

²⁵ Nuquin Papa Bëdamboshë iquec, canuna. Umbi Esuquidistu chuibanac tantiabensho Nuquin Papan mibitedi chieshtoenquio icmiac umbi chuibambued Esus tantiec tabadta. Nuquin Papa ëndenquimboshë abitedi uabi yec: Iuecshun naindambi, quequin ambi matses tantiamenquio icpampidi mibi Esus tantiamiac.

²⁶ Aid chuiquin Nuquin Papa uënësesambo icquin ambi oncamiaido utsi utsien Esus chote dada uamepampic. Nëbi Esusën naid chuisho tantiaquin ma nidaid utsi utsiec yacno tabadquidon Esus tantiaquin aidën chiacpadombuen nanu, queshun Nuquin Papan Esusën naid chuibennequido icmiac.

²⁷ Nëbi Esuquidistunuidtsëqui tantiamiacpadombuen chuiquin: Nuquin Papa abentsëcquiobi iquec. Aidpadquid utsi nibëdec. Abitedimbo tantiaquid yec bëdamboshëcquid nec, canuna ënenquio icquin. Amen.