Doma 15 - El Nuevo Testamento en matsés

Esuquidistun nacpadombuen nanuna, quiaid

¹ Tantia. Chuinu. Esus tantiaquidquio icquin Esus tantiabentsëcquid chieshënenquio icquin bëdambuen isnuna. Aid tantiaquin nashunquin nuqui bunaiduidi nainquio icnuna.

² Utsibon ma bëdambuen tantiabenquiono, queshun aido tantiaquin nuquitedi nashunnannuna. Aden nashunac uditsëc Nuquin Papa tantiatsiash, quiash: Bëdambuec tabadnuna, quec chuinannuna.

³ Adembidi Esuquidistun abi bunacpadenuidi nainquio icpanëdash. Aden nainquio icte chuiquin Nuquin Papan naden dada uamepampic: Mibi chieshënquin icsambuen chuishunsho tantiash ubitsen chieshënquin chiacbimbuen chiec, quiash uënësquio iquebi, quequin chuipampic.

⁴ Nuquitedi bëdambuec tabadte tantiamenuen Nuquin Papan Ambi Chiaid dada uamepampic. Aid isban isbanquin ma utsi uainquio icquin ubëta Esus ënenquio icquin tantiec tabadnu, queshun bëdambo icmequin dayacquio icmiac: Esusbëdi Nuquin Papa yacno tabadendabi, quequin tantiaquin cainec nuqui tabadec.

⁵ Nuquin Papauidtsëqui nuqui chieshtomenquio icquin bëdambo icmequin dayacquio icmequid nec. Aidën namiac ma utsibobëd Esuquidistun nanëdacpadquiec mibitedi bëdambuec tabadquid icpanuna, quequin tantiembi.

⁶ Mimbi adoac aidtedishun: Nuquin Papa, Nuquin Icbo Esuquidistun Papa mibi nec. Mibi bëdamboshë iquec, quequin mibi chuibededtsiash, quequin Nuquin Papa chiannembi.

Nuquin Papan Chiaid Bëda Esusën naid matses abitedishun tantiatequid

⁷ Esuquidistun mibitedi bëdambuen isacpadombuembidi utsibotsen bëdambuen isquin tantiata. Adoac aidon: Nuquin Papa bëdamboshë iquec, caindac.

⁸ Esuquidistu choshon cun tsusedpa Nuquin Papan dada uamequin chiampicpadec isadaidbobëd tabadquin aido nashumbampanëdash. Aden nashunquin: Nuquin Papa ambi chiampicpadombuen naquidquio nec, quequin tantiamenuen adopanëdash.

⁹ Adecbidi matses utsibo Nuquin Papan cuidte bunenquio icquin bëdambuen isaido yec ma aido tantiec tabadnu, quiash Esus chopanëdash. Nuquin Papan naden chuiquin dada uamepampic: Adquid icsho nidaid utsi utsiec yacno tabadquid matses utsibobëtan: Nuquin Papa bëdambo iquec, quequin mibi chiendambi. Adecbidi mibi tantiec cuëdënendabi, quequin chuipampic.

¹⁰ Nadembidi chuiquin Nuquin Papan dada uamepampic: Nidaid utsi utsiec yacno tabadquido Nuquin Papa tantiaquidobëd cuishonqueta, quequin chuipampic.

¹¹ Adembidi naden chuiquin dada uamiampid iquec: Nidaid utsi utsiec yacno tabadquidbëta shubu dadpen icquidën icquidotedishumbi: Nuquin Icbo bëdambo iquec, quequin aid tantiec tabadta, quequin chuipampic.

¹² Adembidi Isayasëntsen naden chuiquin dada uapampic: Esen tsiuecquid iquendac. Nidaid utsi utsiec yacno tabadquidotedishun chuiquid tapa icquin bëdambuen namendac. Aidën ambi chiacpadombuen ubitedi bëdambuen namendac, quequin matses utsibon cainendac, quequin chuipampic.

¹³ Nuquin Papa tantiaquido icsho mibitedi tantiaquin naden chiannembi: Aido bëdambuec tabadmequin cuishoncameta. Adembidi min Mayan Bëda nadatiambocquidën tantiamiacpadombuen cainec tabadmeta, quequin Nuquin Papa chiannembi.

IV. ËNQUIN CHIAID ( 15.14—16.27 ) Matses utsibo Esus chuibennequid nebi, quiaid

¹⁴ Tantia. Chuinu, cun utsibo. Mibitedi bëdambuec isnanec utsibobëd bëdambuec tabadquido nec, quequin tantiembi. Adembidi: Bëdambuen tantiaquidquio yanash chuinanquidombo nec, quequin tantiembi.

¹⁵ Aden tantiashun: Nëishënnushe, quenquio icquin bëdambuec tabadta, quequin abimbo chuiquin nëid dada uaimbi. Nuquin Papan: Esus chuibenneta, caid icquin mimbi ënden tantiaidbidi ma bëshunenquio icquin bëdambuen tantianu, queshun dada uaimbi.

¹⁶ Nuquin Papan adquid icmiac Esuquidistun naid chuibennequidquio icquin matses utsibo nashunquin aidën bëdambuen iste chuibenniombi. Adoac Nuquin Papa ismequin nuadte bëda pichicacbimbuecquido icsho Nuquin Papan Mayan Bëdan aido bëdambuen tabadmendac.

¹⁷ Aden Esuquidistun namiacpadombuen naic bëdambocquid nebi, quequin Nuquin Papan chiacpadombuen naimbi.

¹⁸ Esuquidistun ubi chuibanmequin namiaiduidtsëqui icquin mibitedi chiec nebi. Aidën namiac matses utsibon ma Nuquin Papabëta Esus tantiabenshun aidën chiacpadec ma tabadnu, queshun chuibenniombi.

¹⁹ Nuquin Papan Mayan Bëdan tantiamiacpadombuen nadatiambocquin nabanquin ismiondambi. Adosho issun dadpenshun Esus tantiabenshun Nuquin Papan chiacpadombuen natiadquio yanondash. Shubu dadpen icquid Edusaden yacnouësh nidquin shubu dadpen icquid yacno yacnombuen chuibennequin nidaid cuëshë utsi Ididia caid yacno cuëscaquin Esuquidistun naid Chiaid Bëda chuibanondambi.

²⁰ Esuquidistun naid Chiaid Bëda chuibanacmanombo chuibennetiadquio iquebi. Utsibomba Esusën naid chuibanacno nidte bunenquio iquebi.

²¹ Aden nate chuiquin Nuquin Papan naden dada uamepampic: Nuquin Papan Chomiaidën naid chuisho tantiacmaidombi tantiabenendac. Adshun ambi tantiacmaid paposhquiacbimbuen bëdambuen tantiendac, quequin chuipampic.

Doma yacno nidte bunebi, quiaid

²² Esusën naid chuibanacmanomboba chuibenneta, quequin Nuquin Papan tantiamiacpaden naic mibi yacno nidabi iccobi. Mibi yacno iuec: Istannu, queuid queuidobi. Adbuedi mibi isec nidabi iccobi.

²³ Nëbi nidaid cuëshë utsi utsien umbi tantiacno nainquin chuibenniombi, quiash mibi yacnotsen nidtiadquio iquebi. Ënden nidte bunondaidi seta dadpen matanmiashi abi nëbi mibitedi isec nidte bunquiebi.

²⁴ Nidaid utsi Espania caid yacno nidquimbi mibitedi isbidanendambi. Ambo daëdpactsëc ushec tabadash: Nidnu, quesho: Nidec nid, queshun mibitedishun ubi nashunendac, quequin tantiec mibi yacno nidte bunebi.

²⁵ Nëbini Edusaden yacnoba nidendac. Ambocquid Esus tantiaquido atona nibëdquido utsibon meniaid menec nidendabi.

²⁶ Edusaden yacnocquid Esus tantiaquido utsi utsiec aton piucquid nibëdquid iqueque. Nuquinabi sambudnuna. Ma buanshun menenu, queshun Esus tantiaquido icquin Acaya yacnocquidobëtambi Masedonia yacnocquidon: Nëid buanshun meneta, caoshi.

²⁷ Aden ambi tantiacpaden naid bëdambo iquec, caombi. Edusaden yacnoshon isadaidbomba Esus tantiapanëdash. Adshumbic aidon chuibenniac matses utsibontsen tantiabempanëdash. Aden abi nashunquin chuibanquido caic: Piucquid nibëdec, quiac caoshe. Aido ma menenu. Nashunnuna, quesho tantiashun: Bëdambo iquec, caombi.

²⁸ Aden meniac piucquid buanec nidendabi. Buanshun Edusaden yacnoshon Esus tantiaquido atona nibëdquido menebanash nidaid utsi Espania yacno nidquin mibitedi isbidanendambi.

²⁹ Adec nidshun mibëdi tabadquin umbi Esus tantiamequin chuisho Esuquidistun nuquitedi bëdamboshë icmendac, quequin tantiembi.

³⁰ Tantia, cun utsibo, Nuquin Icbo Esuquidistun aton Mayambëtan tantiamiacpadec utsibobëd tantiananec bëdambuec tabadquido nuqui neque. Icsamianquidën dëniacnushe, queshun ubi tantiaquin ënenquio icquin Nuquin Papa chianneta.

³¹ Udea yacno nidsho Esus tantiesabon cuesnushe. Dayun uata, quequin Nuquin Papa chianneta. Adembidi umbi piucquid buanaid Edusaden yacnocquid Esus tantiaquidon bedenquio icnushe. Bëdambuen bedmeta, quequin Nuquin Papa chuita.

³² Aden Nuquin Papan tantiamiacpadombuen naquin amboba istanec mibitedi yacnotsen nidendabi. Mibi istuidash cuishonquendabi. Mibëd tabadec bëdambo yanendabi.

³³ Aden mibitedi tantiaquin nuqui bëdambo icmequid ma Nuquin Papa mibitedbëd icpanuna. Amen.