Doma 14 - El Nuevo Testamento en matsés

Esus tantiaquid utsibo bëdambuen iste chiaid

¹ Mibëd iccuededquid Esus tantiabentsëcquido bëdambuen ista. Aidobëd icsambuec chushcananec tabadenda.

² Adquid chuinu. Tantia. Esus tantiaquidquio: Pete abitedi pambidbëta pequid Nuquin Papan: Icsambo iquec, cainquio iquec, quenubien utsi Esus tantiabentsëcquid: Padenquio. Pambid pesho issun Nuquin Papan: Icsambo iquec, canushe, quequin pete utsi pequin pambid isuidquid iquec, quepec.

³ Pambid pequidobëtan pambid isuidquidombi Esus tantiasho Nuquin Papan aid daëdi bëdambuen isec. Padnuen pambidbëta pete utsi abitedi pequidën pambid isuidquid chieshënac icsambo iquec. Adembidi pambid isuidquidën: Pambid pequid icsambo iquec, quequin chieshënac icsambo iquec.

⁴ ¿Icbompenquioda utsin iua chushcaquin: Icsambo iquec, capadic? Padenquio. Aton Icbonuidtsëquien: Mibi bëdambo iquec. Mibi icsambo iquec, caquid. Adembidi abi nashunquid icsho Nuquin Papa nadatiambocquidën bëdambo icmendac.

⁵ Adquidbidi chuinu. Tantia. Esus tantiaquido utsi utsiec: Aid badiadënuidtsëqui Esus tantiec cuëdënac bëdambo ictsiash, quenubien utsi utsiec: Badiadquidën badiadquidënquiec Nuquin Papabëta Esus tantiec cuëdënebi, quecuededpec. Adquid daëd icsho Nuquin Papan: Icsambo iquec, cainquio iquec. Aden matsesën: Naden nac bëdambo ictsiash, queshun Nuquin Papabëta Esus ambi tantiacpadembi tantiac bëdambo ictsiash.

⁶ Adembidi aid badiadënuidtsëqui Esus tantiec cuëdënac bëdambo iquec, quiash aid uëshën tabadec. Adembidi pete abitedi pequidën Nuquin Icbo tantiaquid icquin: Mimbi pete uaid bëdambo iqueque. Penu, quequin Nuquin Papa chuishun pequid iquendac. Utsimbic adembidi Nuquin Icbo tantiaquid icquin: Mimbi pete uaid bëdambo iqueque. Penu, queshun utsi pequimbi pambid isuidquid iquendac.

⁷ Nuqui tantiacpadec tiboquequidpenquio nuquitedi nec. Adecbidi nuqui tantiacpadec uënësquidpenquio nuquitedi nec.

⁸ Uënësabi yec tabadec Nuquin Icbo Esusëna nuqui nendac. Adecbidi uënësash aidënabidi nuquitedi neuaindac. Aden uënësabicquin abi tantiaquido yec aidëna nuqui nendac. Aid tantiec uënësashic aidënabidi nuqui neuaindac.

⁹ Adquidon Icbo icnuec uënësash Esuquidistu uincuempanëdash. Uënësabi icquidën Icbo icbuedi uënësaidën Icbobidi iquendac.

¹⁰ Adquid icnuc ¿Atotsi queshun mibëtan Esus tantiaquid: Icsambocquid nec, quequin mimbi chuishumpe? ¿Atotsi queshun mibëtan Esus tantiaquid mimbi icsambuen chuishunquin mamënshumpe? Nuquin Papanuidtsëqui matsesën naidtedi tantiaquid icquin: Nëid bëdambocquid nec. Nëid icsambocquid nec, quequin matses abitedishun tantianuc nuqui chuimendac.

¹¹ Adembidi naden chuiquin Nuquin Papan Ambi Chiaid dada uamiampid nad iquec: Uënëstiapimbocquid icquin abimbo caimbi. Matses abitedishun dannëshën tinquebudcuededshun ubi naden chiendac: Abitedishun Icbombo yec bëdamboshëcquidquio mibi nec, quequin ubi ismequin dannëshën sebudendac, quequin chuipampic.

¹² Adec abitedishun Icbo icquin ambi cuidte uëshën Nuquin Papan: ¿Enda? ¿Mitsipadec tabado? cabanac nuquitedishun nuqui naidtedi chuibanendac.

Utsibo icsa uainquio icnuna, quiaid

¹³ Aden chuitequid icnuc utsibobëd icsambuec chuishunnanenquio icnuna. Adoenquio icquin ambi natemaid umbi nasho isash chieshtoshon Esus tantienquio yannushe, queshun ambi natemaid naquin ismenquio iquembi, queshun Esus tantiaquidtedi bëdambuen isnuna.

¹⁴ Nuquin Icbo Esus tantiaquidquio icquin: Umbien petemaid nec, quequin tantienquio iquec. Nëbi petemaid nec, caid nibëdec, quequin tantiembi. Ubi adnubi utsibo: Umbi petemaidquio nec, quequin tantiaquin ma penquio icpanuna.

¹⁵ Nëbi aido bëdambuen tantiaquin ambi petemaid pemenda. Ambi petemaid pemequin mimbi aido bëdambuen tantienquio iquec. Mibitedishun ambi petemaid pemiac mibëtan Esus tantiaquid icbuedi tantiesa yanacsho cuidnushe, queshun tantiaquiota. Ambi petemaid pemenda. Nëid petemaid nec, quequidotsen tantiaquin cuidmenquio icnuec abided cuidadec Esus uënësac caondashe. Aido bëdambuen tantiata.

¹⁶ Esus tantiaquid icquin mimbi tantiacpadombuen nabanquin utsibo icsambuen chuimenda.

¹⁷ ¿Nadquid petemaid nec. Nadquid actemaid nec, quequin tantiecta Nuquin Papan namiacno tabadpatsiash? Padenquio. Aton Mayan Bëdanuidtsëqui abëd tabadquin namiac ambi chiacpadombuen naic cuishonquec bëdambuec tabadendac.

¹⁸ Adec Esuquidistun chiacpadec tabadsho issun Nuquin Papan: Bëdambo iquec, canubi matsesëntsen: Aido bëdambo iquec, cauaindac.

¹⁹ Adquid icnuc aidën chiacpadec chieshëmënenquio yec bëdambuec tabadnuna. Esus tantiec chieshtoenquio yec bëdambuec tabadnuna, quec chuinannuna.

²⁰ Nuquin Papan bëdambuen isaidon tantienquio yannushe, queshun ambi petemaid pemequin aido chieshtomenda. Nuquin Papan: Matsesën petemaid nec, caid nëbi nibëdnubi Esus tantiabentsëcquid ambi petemaid pemequin aid chieshtomiac icsambo ictsiash.

²¹ Ubëtan Esus tantiaquido chieshtonoshe, queshun ambi petemaid pambid penquio icquinc ambi actemaid acte paë uaid aquenquio icquinc ambi natemaid utsi nainquio icquinc cac bëdambo ictsiash.

²² Nuquin Papan matsesën: Natemaid nec, cacmaid tantiaquin: Nëid umbi petequid nec. Nëid umbi actequid nec, quequin ambibi tantiendac. Aden naquin utsin: Umbi natemaid nec, caidi naquin ismenda. Chieshtonoshe. Aden chieshtomequin: Icsambuen naombi, quequin mimbi tantiatsiac.

²³ Ambi: Umbi petemaidquien nepec, quequimbi pesho: Nuquin Papan nëishënchitembini ictsiash, ambi cabuedi piash icsambuen nachitombi, quetsiash. Adsho Nuquin Papantsen: Icsambuen naic, catsiash. Aden naic icsatequid nec, cabuedtedi naic nuqui icsaindac.