Doma 13 - El Nuevo Testamento en matsés

Nuquin Papan chuiquid tapa icmendac

¹ Aton matsesën chuiquid tapan chiacpadombuen abitedishun naquid. Aido Nuquin Papan chuiquid tapa icmiaido nec. Aidëmbidi chuiquid tapa icmeshun utsi utsiec yacno tabëcaido iquec.

² Chuiquid tapan chiaid niacquin Nuquin Papan Chiaid niaquendac. Aden ambi chiaid niacsho issun chuiquidon cuidquid.

³ Bëdambuec tabadquidon chuiquid tapan cuidte dacuëdëntiapimbo iquec. Adquido cuidenquio icquimbien ambi chiaid niacquido chuiquid tapan cuidendac. ¿Ada aido dacuëdënenquio yec tabadte bune? Adte bunec bëdambuec tabadta. Adsho issun: Mibitedi bëdambuec tabadec, catsiash chuiquid tapan.

⁴ Ma matses bëdambuen tabadmenu, queshun Nuquin Papan chuiquid tapa icmiaidën mibitedi bëdambuec tabadmete bunec. Adquid icnubi: Icsambuen nasho chuiquid tapan cuidpanundac, quiash icsambuen naquid dacuëdendac. Adec chuiquid tapa icquin icsambuen naic tabadquido cuidendac.

⁵ Adquid icnuc chuiquid tapabon chiacpadombuen nabanta. Cuidnushe, quequinuidtsëqui tantienquio icquin: Naden nac bëdambo ictsiash. Naden nac icsambo ictsiash, quequin tantiaquin nabanta.

⁶ Bëdambuen tabadmenuen Nuquin Papan chuiquid tapa icmiaidon chiacpadombuen naquin: Nëidtedi piucquid meneta, caid icnuc menequid.

⁷ Chuiquid tapan: Piucquid bec cho. Nacnenmenu, cacpadombuen aidën chiactedi meneta. Min chuiquidon chiacpadombuen naquin bëdambuen ista.

Utsibo tantiaquionona, quiaid

⁸ Aidted bedshun mibi meneuanun nanu, quequin bedenda. Aden nainquio yec utsibobëd tantiananta. Adec utsibobëd bëdambuec tantiananquin Nuquin Papan: Naden nata, quequin Moises chiampicpadombuen nuqui bëdambuen naindac.

⁹ Nuquin Papan Moises chuiquin naden dada uamepampic: Utsin chido chudenda. Utsin bënë chudmenda. Cuessunnianenda. Ampenda. Utsina isash: Cuna adquid nibëdec, quec chieshëmënenda. Naden naquin aid chiampid mimbi natsiac: Mibibi min dada datantiadacbimbuen utsibotsen tantiaquiota, quequin chuipampic.

¹⁰ Adec utsibo tantiaquidquio icquin mimbi utsibo icsa uatiapimbo iquendac. Adec utsibobëd tantiananquin Nuquin Papan chiampicpaden mimbi naindac.

Esus chouate chiaid

¹¹ Naden mibitedishun tantiata: Chuibanquidën chuibansho tantiashun Esus tantiabenash: Iuecashien Esus chochitec, quiondaidi nëbien abi tantiaquido abi yacno buannuec Esus choec, quequin tantiaquionona. Ushacbimbuen tantienquio icbuedi nëbi ushash isucunacbimbuec dayacquio yec chieshtoenquio icquin Nuquin Papan chiacpadombuen nanuna.

¹² Nëbien Esus choec, quequin tantiaquin icsambuen nainquio yec bëdambuec tabadnuna. Sondado: Senushe, quiash tsasimbocquid dasiuidacbimbuen icsamianquidën iuanushe, queshun nuqui icsambuen naid ënshun bëdambuen tantianuna.

¹³ Icsambuen nainquio yec bëdambuec tabadquid nebi, queshun peteuidi nua penquio yec tabadquinc tantiadennuen acte paë uaid aquenquio icquinc utsin chido chudenquio icquinc utsin bënë chudmenquio icquinc canuna. Adecbidi utsina isash cuna adquid nibëdec, quiash chieshëmënec tabadenquio icnuna. Adembidi utsin namesho isash chieshëmënenquio icnuna.

¹⁴ Adec tabadenquio icquin Nuquin Icbo Esuquidistu tantiaquiec aid tabadacpadquiec bëdambuec tabadnuna. Adquid icquin nuqui bunacpadombuenuidi icsambuen nainquio icnuna.