Doma 12 - El Nuevo Testamento en matsés

III. NADEN NANUNA, QUEQUIN CHIAID ( 12.1—15.13 ) Esus tantiabenash bëdambuec tabadte chiaid

¹ Tantia, cun utsibo, Nuquin Papan cuidte bunenquio icquin bëdambuen isaido icsho mibitedi chuinu. Abi bunaidquio obeca bëdambocquid pichicaquin ismiacbimbuen: Umbi nate bunaid nainquiocquin mimbi nate bunaid bunebi, Icbo, quequin Nuquin Papa chianneta. Aden chiannec Esus tantiec iccuededtequid nendac.

² Esus tantiesabon nacpadombuen naic tabadenda. Adembidi aidon tantiacpadombuen nainquiocquin bëdambuen tantiabenash mibitedi bëdambuec tabadquid yanendac. Adash Nuquin Papa bunacpadec tabadquin bëdambocquid yec abi bunaidquio yec icsambocquidpenquio yante yec quequin mibitedishun tantiendac.

³ Nuquin Papa bëdambocquid icquin: Esus chuibennequid icta, caid nebi. Adquid icquin mibi chuinu. Tantia. Tantiaquidquio nebi, quequin mibitedishun tantienda. Adenquio icquin Esus tantiaquid icsho Nuquin Papan tantiamequin namiaid nebi, quequin tantiata.

⁴ Nuquin dada abentsëqui icnuc aidëna utsi utsiec iquec. Adquid icnuc ¿Abitedimboda nuquin dadan abibidi nate icpec?

⁵ Adecbidi nuquitedi dadpenquio icquid iquequi Esuquidistun dada yacbimbuec abi tantiaquidtedi iquec. Adash abentsëc yacbimbuec utsibobëd tsidadash tabadec dada abentsëcbimbuec iquec.

⁶ Nuquin Papan abi bunacpaden abentse abentsen: Naden nata, quequin ambi nametequid dadpen iquec. Nëidotedi caimbi: Esus tantiaquid icsho Nuquin Papan iuecshun nate chuibanta, caid icquin aidën tantiamiaiduidi chuibanta.

⁷ Utsibo nashunquid icta, quequin namiaid icquin bëdambuen nashumbanta. Utsibic Nuquin Papan Chiaid bëdambuen tantiashun utsibo tantiameta, caid icquin bëdambuen tantiameta.

⁸ Utsibic: Utsibo chieshtomenquio icquin Esus tantiameta, quequin chuiquid icquin: Bëdambuec tabadnuna, quequin chuibanta. Utsibic atona nibëdquido menequid icta, caid icquin cudasenquio icquin menianneta. Utsibic Esus tantiaquidon chuiquid icta, caid icquin Nuquin Papan namiacpadombuen Esus tantiaquido bëdambuen tantiaquin nabanmeta chieshenquio icquin. Utsibic daicsaido yec isedanquido yec aton shubu nibëdquido yec aton pete nibëdquido yec macho yec tsësio yec quesho bëdambuen nashunquid icta, caid icquin cuishonquequin nashumbanta.

Esus tantiaquidon nabante chiaid

⁹ Muainquio yec utsibobëd tantiananquiota. Icsambuec tabadte bunenquio yec bëdambuec tabadta.

¹⁰ Esus tantiaquid yec utsibobëd tantiananquiota. Ubëtan Esus tantiaquido nec, quiash aidobëd tantiananec bëdambuec isnanta.

¹¹ Nuquin Papan chiacpadombuen naic chieshtoenquio icquin nata. Chieshquid iquenda. Nuquin Icbo tantiaquin aid nashunec chieshtoenquio yec bëdambuec tabadta.

¹² Uënësacsho abi yacno Esusën ubi tabadmendac, quequin cainec cuishonqueta. Utsibon chieshënquin natiamiaqui chieshtoenquio icquin tantiata. Ënenquio icquin badedbadedquien Nuquin Papa chianneta.

¹³ Esus tantiaquido atona nibëdsho issun meneta. Isedanquido chosho bëdambuen isquin iuedta.

¹⁴ Utsibon chieshënaqui aidobëd chieshënnanenquio icta. Adenquio icquin: Chieshënmënquido bëdambuen isquin tantiameta, papa, quequin Nuquin Papa chuita.

¹⁵ Utsi bëdambo yec cuishonquesho isash aidbëdi cuishonqueta. Utsi uënësquio icnuc shubisho isash aidbëdi shubita.

¹⁶ Utsibobëd tsidadash chieshënnanenquio yec bëdambuec tabadta. Ubiuidtsëqui bëdambocquid nebi, quenquio yec utsibobëd bëdambuec tabadta. Utsibon tantienquio icnuc ubentsëqui bëdambuen tantiaquidquio nebi, quenda.

¹⁷ Utsin chieshënac aidbëd cuidnanec chieshënnanenda. Ma utsibo: Bëdambuec tabadquid nec, quenu, quiash bëdambuec tabadta.

¹⁸ Chieshëmënec icsambuec tabadte bunsho issun aid chuiquin: Bëdambuequien tabadtiad, quequin chuita.

¹⁹ Cun utsibo, umbi tantiaido mibitedi neque. Tantia, chuinu. Chieshëmënquidobëd cuidnanenquio icta. Adenquio icquin: Nuquin Papanuidtsëquien aid cuidec, quequin tantiata. Naden Nuquin Papan chuiquin Ambi Chiaid dada uamiampid iquec: Ubentsëcquiobi icsaquido cuidquid nec, quec Icbo, quequin chuipampic.

²⁰ Adembidi naden chuiuapampic: Mibi chieshënquidobi pete bundoacsho pemeta. Acte bundoacsho acmeta. Adoac mibi chieshënquido: Bëdambo icquidi chieshënec icsambo icchitobi, quiash dacuëdendac, quequin chuipampic.

²¹ Icsambocquidën dëniacquin chieshtomiadenda. Adenquio icquin bëdambuen naquin icsambocquid dëniacta.