Doma 11 - El Nuevo Testamento en matsés

Isadaidbo Nuquin Papan bëdambuen isaid

¹ Tantia. Chuinu. ¿Ada Nuquin Papan aton matses isadaidbo tantiatiapimbo icquin chieshëmpec? Padenquio. Isadaidbombo nebi. Cun tsusedpa Abadauanën tsiuecquid Benjaminën tsiuecquidon tsiuecquid nebi.

² Ëndenquimboshë Nuquin Papan: Cun matses isadaidbo nec, queshun tantiaquiopampic. Nëbi aido chieshënenquio iquec. ¿Nuquin Papan oncamiampid Ediasën chiampid tantienquioda mibitedishun ique? Aton matses isadaidbo nëishënshun Nuquin Papa naden chuipampic:

³ Icbo, mimbi oncamiaido abitedi cuessun secatanquin mibi ismequin nëish iua pichicate cuënote nacnenaid uesquin chic chiccosh. Ubentsëqui iquebi. Adquid icsho ubitsen cuessunnete bunec, quequin Ediasën Nuquin Papa chuipampic.

⁴ Adoac Nuquin Papan naden chuipampic: Abi Umbi namiacpadombuen ubi tantiaquido dadpenquio 7midted iquec. Aidon ubi tantiesabon papa canuen ambi nacnenaid Bad caid tantienquio iquec, quequin chuipampic.

⁵ Adembidi nëbi isadaidbo ambi tantiactedishun Nuquin Papa tantiaquiec.

⁶ Aden tantiec Nuquin Papa bëdambocquid icquin ambi chiacpadombuen naquid nibëdsho bëdambuen istiapimbo icbuedëmbi ambi tantiactedishun icsambuen nabuedombi abi tantiasho Nuquin Papan bëdambuen isendac.

⁷ ¿Atotsimbi chiec ne? Isadaidbon ambi tantiactedishun abi tantiasho Nuquin Papan bëdambuen isec. Isadaidbo utsiboen bëdambuen istiapimbo iquec. Aido: Nuquin Papa bëdambuen ismembi, quebuedi tantienquio icsho Nuquin Papan pacuënnëdacbimbuecnuc icmepanëdash.

⁸ Naden chuiquin Nuquin Papan dada uamepampic: Nuquin Papan pacuënnëdacbimbuecnuc icmiac Ambi Chiaid mimbi nëbi tantienquio iquec. Nëbi adombuembidi ëshë icmeshunaqui bëdambuen isenquio iquec. Adembidi pabiate icmeshunaqui bëdambuen tantienquio iquec, quequin dada uamepampic.

⁹ Adembidi naden chuiquin Dabidën dada uapampic: Ubi bunaiduidi naic bëdambo iquebi, queshun iccuededquin peshun aquec icsambuen naic tabadec. Adquido icsho Nuquin Papan: Aido icsamboshë icquido nec, queshun cuidendac.

¹⁰ Aton ëshë icquimbi bëshuacbimbuecquin aidon isenquio icpanuna. Adembidi aton cacho shuebudmequin ënënquiocquin mëyadmepanuna, quequin chuipampic.

Nuquin Papan isadaidpembo abëd tabadmendac, quequin chiaid

¹¹ Pacuënnëdacbimbuecnuc icmiac tantiatiapimbo icsho isadaidbo padpiden ¿bëdambuen tantiamenquioda Nuquin Papan icpec? Aido tantiamec. Isadaidbon Ambi Chiaid niacsho bëdambuen istiapimbo icquimbi Nuquin Papan matses utsibo tantiamequin bëdambuen isbenec. Adosho issun isadaidbo utsin utsinquien Nuquin Papa nëishënec.

¹² Ambi chiaid niacquid isadaidbo dadpen icsho bëdambuen istiapimbo icquimbi matses utsibon abi tantiasho isadaidbobimbuecnuc Nuquin Papan bëdambuen isbenec. Adshumbic ambi tantiacpadën matses utsibobëtan isadaidbo dadpenshun tantiabensho Nuquin Papan bëdamboshë icmendac.

¹³ Tantia, matses utsibo. Mibitedi chuinu. Nuquin Papan mibi yacno nidmiac Esusën naid chuibennec bëdambo iquebi. Nëid umbi chuibanaid bëdamboshëcquid nec.

¹⁴ Umbi mibitedi chuibanaid tantiash cun matses utsi utsiec: Esus tantiate bunebi, ma quenu, queshun mibitedi chiec nebi. Adshun Esus tantiabensho aidotsen Nuquin Papan cuidenquio icquin bëdambuen isquin abëd tabadmendac.

¹⁵ Aden isadaidbon Esus chieshënsho issun Nuquin Papan matses utsibo Esus tantiamequin bëdambuen isbenac. Ambi tantiacpadëmbien isadaidbon uënësacbimbuen tantienquio icbuedombi Esus tantiasho Nuquin Papan bëdambuen isquin abi yacno tabadtequido icmendac.

¹⁶ Pan dadpen shuiquimbi ambi bëyucquio shëaid Nuquin Papa meniac utsitedi aidënabidi nec. Adembidi: Nuquin Papana nec, quequin ambi cute nitsinaid tapunec caniash bëdambocquid yec cute abichobi Nuquin Papanabidi nec. Cuiditsen Nuquin Papanabidi nec.

¹⁷ Aden isadaidbon ambi Chomiaid tantienquio icsho issun cute cuidi utsi pobinun pateshunniacbimbuen Nuquin Papan isadaidbo dadpen bëdambuen istiapimbo iquec. Matses utsibo Esus tantiamequin cute bëdambocquid pobiacbimbuen mibitedi bëdambuen isec.

¹⁸ Isadaidbo cute cuidibimbuecquidquio icnubi mibitedi matses utsibo cute cuidi pobiacbimbuecquido nec. Adquid icnuc: Ubiuidtsëqui bëdambo iquebi, quenda. Isadaidbonuidtsëqui nac mibitedishun tantiabenoc, Cute aton tapunën uidënash nidacbimbuen bëshunenquio icquin tantiata.

¹⁹ Ubi adsho ¿tantiashta mibitedi nadpe? Isadaidbon Ambi Chiaid niacsho issun cute cuidi pateshunniacbimbuen nëbi isadaidbo dadpen Nuquin Papan bëdambuen istiapimbo iquec. Ubipadquid cute cuidi pobiacbimbuecquido icsho bëdambuen isec, mibi quepec.

²⁰ Abimbo mimbi caic. ¿Atotsi queshun Nuquin Papan isadaidbo bëdambuen istiapimbo icpec? Ambi Chomiaid Esus tantienquio icsho Nuquin Papan aido bëdambuen istiapimbo iquec. Padnuen Esus tantiasho mibitedi bëdambuen isec. Adoac: Ubi bëdambo icnubi isadaidbo icsambo iquec, quenda. Adenquio yec: Nuquin Papan cuidnushe, queshun Esus tantiec bëdambuec tabadta.

²¹ Isadaidbon Esus tantienquio icsho Nuquin Papan bëdambuen istiapimbo icpanëdash. Adembidi matses utsibo icquin mimbi Esus tantienquio icsho Nuquin Papan mibitedi bëdambuen istiapimbo icuaindac.

²² Nuquin Papa bëdambocquid nec. Adembidi Ambi Chiaid niaquesa bëdambo icmequin Ambi Chiaid niacquido comapenen cuidendac. Adquid icquin Ambi Chiaid niacbuedombi abi tantiabensho mibitedi bëdambo icmendac. Esus tantiaquin naden tantiata. Mibitedishun: Nuquin Papa bëdambo iquec, quequin tantiata. Aden abi tantienquio icsho mibitedi bëdambuen istiapimbo icquin cuidendac.

²³ Padi, aid tantiatiapimbo iquebi, quebuedombi cute bëdambocquid pobiacbimbuen isadaidbon Esus tantiabensho abëdi tabadmenuen nadatiambocquid icquin Nuquin Papan bëdambuen isuaindac.

²⁴ Matses utsibo icsho Nuquin Papan cun matses cacmaido mibitedi icnëdac. Adoaid yec nitsinabi aben icquidbimbuecquid mibitedi icnëdac. Nëbien cute cuidi bëdambocquid pobiacbimbuen Esus tantiamiac aid tantiaquido mibitedi yanac. Isadaidboen nëbi dadpen abi tantiesabo icsho cute pateshun secacbimbuen bëdambuen istiapimbo icbuedëmbi Nuquin Papan aucbidi cute pobiacbimbuen isadaidbo Esus tantiamequin bëdambuen isuaindac.

Nuquin Papan isadaidbo dadpen abëd tabadtequid icmiaid

²⁵ Cun utsibo, tantia. Chuinu. Nuquin Papan ambi matses tantiamenquio icpampidi nëbi tantiamequin mibitedi chuinu. Nuquin Papan isadaidbo pacuënnëdacbimbuecnuc icmiac tantiate bunenquio iquec. Nuquin Papan tantiactedishun matses utsibomba dadpenshun Esus tantiambic isadaidbontsen dadpenshun Esus tantiabenendac.

²⁶ Adoshombic Nuquin Papan isadaidbo bëdambuen isquin abi yacno tabadtequid icmendac. Adquid naden chuiquin Nuquin Papan dada uamiampid iquec: Isadaidbon icsambuen naidtedi bedshunshun bëdambuen isquid nebi, quec Edusaden yacnouësh choendac.

²⁷ Aden umbi chiacpadombuen aidon ubi tantiasho ambi icsambuen naid bedshunshun bëdambuen isendambi, quequin chuipampic.

²⁸ Nëbi Nuquin Papan Chomiaid chieshënquid icsho isadaidbo bëdambuen istiapimbo icquin matses utsibo icshobi mibitedi Esus tantiamiac. Aden abi chieshënquid icshobi Nuquin Papan isadaidbo abi tantiaquiec. Aton tsusedpabo ambi cun matses campid icsho isadaidbo Nuquin Papan tantiaquiec.

²⁹ Ambi tantiamiaido icsho ambi icsambuen naid bedshunquin cuenmenquio icquin Nuquin Papan tantiaquiendac.

³⁰ Ënden mibitedishun matses utsibo icquin Nuquin Papan Chiaid niacniacquin tantienquio iccondac. Nëbien isadaidbon Ambi Chiaid niacniacsho issun Nuquin Papan uënësquio icquin mibitedi tantiec.

³¹ Adembidi nëbi isadaidbon Nuquin Papan Chiaid niacniacquec. Adsho issun Nuquin Papan mibitedi uënësquio icquin tantiacpadombuembidi Nuquin Papan uënësquiocquin aidotsen tantiendac.

³² Nuquin Papan: Ma umbi tantiacpadequi matses abitedimbo Umbi Chiaid niacniacquec ma tabadnu, capampic. Adshobi tantianquidquio yec uënësquio icquin abitedimbo bëdambuen iste bunec.

Nuquin Papa bëdamboshëcquid nec, cate chiaid

³³ Nuquin Papa abitedimbo tantiaquidquio yec bëdamboshëcquid nec. Adquid icquin ambi natiapimbo ictequid nibëdnuc bëdambuen naquidquio nec. ¿Ada adquid icsho matsesën: Aden nac icsambo iquec. Naden nac bëdambo iquec, quequin Nuquin Papa chuipadic? Padenquio. Ambi naidtedi matsesën tantienquio iquec.

³⁴ ¿Nuquin Papan otacquio tantiaidtedida matsesën tantiapadic? Padenquio. ¿Mimbi tantienquio iqueque. Naden nata, quequinda matsesën Nuquin Papa chuipadic? Padenquio.

³⁵ ¿Ada matsesën Nuquin Papa atona menequin: Ubi cuidquin meneta, capadic? Padenquio.

³⁶ Nuquin Papan abitedi uapampic. Aidtedi atona nec. Ambi uaid abitedi iquec. Ambi uaidtedi ambi dayun uaidquio nec. Adquid icsho: Nuquin Papa bëdamboshë iquec, canuna ënenquio icquin. Amen.